1-3. (a) Ki perguntas alguns algen ta faze sobri mórti? (b) Kal ki é respóstas ki alguns relijion ta da?

BÍBLIA ta promete-nu ma un dia ‘ka ta ten más mórti’. (Apocalipse 21:4 ) Na kapítlu 5, nu prende ma ku resgati nu pode ten vida itérnu. Má ti inda pesoas sta ta móre. (Eclesiastes 9:5 ) Nton, un di kes grandi pergunta ki nu ta faze é: kuzê ki ta kontise ku nos óras ki nu móre?

² Nu ta fika ku gana di sabe respósta pa kes pergunta li, óras ki móre un algen ki nu ta ama. Talvês nu ta krê sabe: ‘Pa undi ki el bai? El sta ta odja-nu? El pode djuda-nu? Algun dia nu ta torna odja-l?’

³ Relijions ta da txeu respósta pa kes pergunta li. Alguns ta inxina ma si nos é un algen dretu, nu ta bai pa Séu i si nos é un algen mau, nu ta ba kema na inférnu. Alguns ta fla ma óras ki nu móre, nu ta bira un spritu i nu ta bai vive ku nos família ki dja móre. I otus ta fla ma dipôs ki nu móre i nu julgadu, nu ta nase otu bês ku mésmu korpu ô ku un korpu diferenti, ô alvês ti sima un animal.

4. Kal ki é ideia prinsipal ki relijions ta inxina sobri mórti?

⁴ Relijions ta inxina txeu kuza diferenti. Má kuazi tudu es ta inxina un ideia prinsipal. Es ta inxina ma óras ki un algen móre, ten un párti di el ki ta kontínua ta vive. Má kel-li é verdadi?

5, 6. Kuzê ki ta kontise ku nos óras ki nu móre?

⁵ Jeová sabe kuzê ki ta kontise ku nos óras ki nu móre, i el ta fla-nu ma óras ki un algen móre, se vida ta kaba. Ken ki sta mortu é pamodi el ka sta bibu. Nton, óras ki un algen móre, el ka ten un alma ô spritu ki ta sai di el pa ba vive na un otu lugar ku se pensamentus i sentimentus. * Óras ki nu móre nu ka ta konsigi odja, nen obi i nen pensa más.

⁶ Rei Salumon skrebe ma ‘mortus ka sabe di más nada’. Algen ki dja móre ka pode ama nen xinti ódiu i el ‘ka ten trabadju, nen planus, nen konhisimentu, nen sabedoria na Sipultura’. (Lé Eclesiastes 9:5, 6, 10.) I na Salmo 146:4, Bíblia ta fla-nu ma óras ki algen móre ‘se pensamentus’ ta móre tanbê.

7. Jizus konpara mórti ku kuzê?

⁷ Kantu se amigu Lázaru móre, Jizus fla se disiplus: ‘Lázaru, nos amigu, dja durmi’. Má Jizus ka krê flaba ma Lázaru staba ta diskansa. Dipôs Jizus fla: ‘Lázaru móre’. (João 11:11-14 ) Nton Jizus konpara mórti ku sónu. El ka fla ma Lázaru staba na Séu ô ku se famílias ki dja moreba. I nen el ka fla ma Lázaru staba ta kema na inférnu ô ma el ta naseba otu bês ku un korpu umanu ô di un animal. Éra sima si Lázaru staba na un sónu pizadu. Otus testu di Bíblia tanbê ta konpara mórti ku sónu pizadu. Bíblia ta fla ma kantu Estêvão  móre, ‘el durmi na mórti.’ (Atos 7:60 ) Apóstlu Polu tanbê skrebe ma alguns kriston ‘dja durmiba na mórti.’ — 1 Coríntios 15:6.

8. Modi ki nu sabe ma Deus ka faze-nu pa nu móre?

⁸ Nton, Deus faze Adon ku Eva sô pa es móre dipôs? Nau! Jeová faze-s pa es gozaba vida itérnu ku saúdi perfetu. Jeová faze-nu, ku dizeju di vive pa tudu ténpu. (Eclesiastes 3:11 ) Ninhun pai ku mai ka ta krê odja ses fidju ta bira bédju i ta móre, i Jeová tanbê ka ta krê pa kel-li kontise ku nos. Má si Deus faze-nu pa nu vive pa tudu ténpu, pamodi ki nu ta móre?

9. Pamodi ki órdi ki Jeová da Adon ku Eva ka éra difísil?

⁹ Na jardin di Éden, Jeová fla Adon: ‘Di tudu arvi di jardin bu pode kume avontádi. Má, kel arvi di konhisimentu di kel ki é dretu i di kel ki é mariadu, bu ka debe kume, pamodi, dia ki bu kume-l, di sertéza bu ta móre.’ (Génesis 2:9, 16, 17 ) Es órdi ka éra difísil. Pamodi? Pamodi es órdi éra klaru i sinplis di obi. I Jeová staba déntu se direitu di fla Adon ku Eva kuzê ki é dretu i kuzê ki é mariadu. Si es obiba ku Jeová, es ta mostraba ma es ta ruspetaba se autoridadi. Tanbê es ta mostraba ma es ta daba valor pa tudu kuza ki es dadu.

10, 11. (a) Kuzê ki Satanás fla pa ngana Adon ku Eva? (b) Pamodi ki ka tinha ninhun diskulpa pa kuzê ki Adon ku Eva faze?

¹⁰ Má Adon ku Eva disidi na ka obi ku Jeová. Satanás fla Eva: ‘É si própi ki Deus fla, ma nhos ka debe kume di tudu arvi na jardin?’ Eva responde: ‘Nu pode kume di fruta di arvis di jardin. Má di kel arvi ki sta na meiu di jardin, Deus fla: ‘Ka nhos kume-l, nen ka nhos poi mô na el, sinon nhos ta móre.’’ — Génesis 3:1-3.

¹¹ Nton Satanás fla: ‘É klaru ki nhos ka ta móre. Pamodi Deus sabe ma, kel dia ki nhos kume-l, nhos odju ta abri i nhos ta bira sima Deus, ta sabe kel ki é dretu i kel ki é mariadu.’ (Génesis 3:4-6 ) Satanás kreba pa Eva pensaba ma el ta pode disidiba pa se kabésa kuzê ki éra dretu i kuzê ki éra mariadu. Tanbê el konta mintira sobri kuzê ki ta kontiseba si es ka obiba ku Deus. Satanás fla ma Eva ka ta moreba, nton Eva kume kel fruta i dipôs el da se maridu pa kume.  Adon ku Eva sabeba ma Jeová flaba es pa es ka kumeba kel fruta. Kantu es kume-l, es disidi ka obi un órdi sinplis i klaru. Kel-la mostra ma es ka ta ruspetaba ses Pai na Séu ki ta amaba es txeu. Ka tinha ninhun diskulpa pa kuzê ki es faze!

12. Pamodi ki Jeová fika tristi kantu Adon ku Eva ka obi ku el?

¹² Fórti kuza tristi! Nos primeru pai ku mai mostra grandi falta di ruspetu pa ses Kriador! Modi ki bu ta xintiba si bu sforsa txeu pa bu kria bu fidju matxu ku bu fidju-fémia i es rabela kóntra bo, es fika ta faze sô kel ki bu fla-s pa es ka faze? Bu ka ta xintiba mágua na bu korason?

13. Kuzê ki Jeová krê flaba kantu el fla Adon ‘pa téra bu ta bai otu bês’?

¹³ Kantu es ka obi, Adon ku Eva perde xansi di vive pa tudu ténpu. Jeová fla Adon: ‘Bo é téra i pa téra bu ta bai otu bês.’ (Lé Génesis 3:19.) Kel-la krê flaba ma Adon ta biraba téra otu bês, sima ki nunka el ka fazedu. (Génesis 2:7 ) Dipôs ki Adon peka, el móre i el dexa di izisti.

14. Pamodi ki nu ta móre?

¹⁴ Si Adon ku Eva obiba ku Deus, ti inda es staba bibu. Má kantu es ka obi ku el, es peka, i dipôs es móre. Pekadu é sima un duénsa gravi ki nu erda di nos primeru pai ku  mai. Nos tudu nu ta móre pamodi nu nase ku pekadu. (Romanos 5:12 ) Má é ka kel-li ki Deus kreba pa nos. Deus nunka ka kreba pa algen móre, i Bíblia ta txoma mórti di ‘inimigu’. — 1 Coríntios 15:26.

15. Modi ki verdadi sobri mórti ta liberta-nu?

¹⁵ Verdadi sobri mórti ta liberta-nu di un monti ideia eradu. Bíblia ta inxina-nu ma algen mortu ka ta xinti nen dór nen tristéza. Nu ka ta pode pâpia ku es i nen es ka ta konsigi pâpia ku nos. Nu ka ta pode djuda-s i tanbê es ka ta pode djuda-nu. Es ka ta pode prujudika-nu, nton nu ka meste xinti medu di es. Má txeu relijion ta fla-nu ma algen mortu ta kontínua bibu na algun lugar i, pa nu djuda-s nu meste paga dinheru pa pastoris i xéfis di relijion. Má óras ki nu ta fika ta sabe verdadi sobri mórti, nu ka ta nganadu ku kes mintira li.

16. Ki mintiras txeu relijion ta inxina sobri mortus?

¹⁶ Satanás ta uza relijion falsu pa konta-nu mintiras i pa faze-nu pensa ma mortus ti inda sta bibu. Pur izénplu, alguns relijion ta inxina ma óras ki nu móre, un párti di nos ta kontínua bibu na algun lugar. Bu relijion ta inxina-u kel-li ô el ta inxina-u kel ki Bíblia ta fla sobri mortus? Satanás ta uza mintiras pa afasta pesoas di Jeová.

17. Pamodi ki inxina ma algen ta kema na inférnu é un ofénsa pa Jeová?

¹⁷ Kuzas ki txeu relijion ta inxina ta disgosta algen. Pur izénplu, alguns ta inxina ma algen mau ta kemadu na inférnu pa tudu ténpu. Kel mintira li é un ofénsa  pa Jeová. Nunka el ka ta dexaba ningen sufri di kel manera li. (Lé 1 João 4:8.) Kuzê ki bu ta pensaba di un algen ki pa kastiga un mininu el ta kema-l se mô na lumi? Bu ta perguntaba ki tipu di algen el é. Sô pode ser algen di korason mau. Nunka bu ka ta krê konxeba el. I é kel-li própi ki Satanás krê pa nu pensa di Jeová!

18. Pamodi ki nu ka meste xinti medu di ken ki dja móre?

¹⁸ Alguns relijion ta fla ma óras ki algen móre, el ta bira un spritu. Es ta inxina ma nu meste ruspeta i ti xinti medu di mortus pamodi es pode bira amigus ô inimigus ki ten txeu puder. Txeu algen ta kridita na es mintira. Es ta xinti medu di algen mortu i es ta tenta djuda-s ô adora-s envês di adora Jeová. Má nu debe lenbra ma mortus ka ta pode odja nen xinti nada, nton nu ka meste xinti medu di es. Jeová é nos Kriador, el é úniku Deus verdaderu i é sô el ki nu debe adora. — Apocalipse 4:11.

19. Modi ki sabe verdadi sobri mortus ta djuda-nu?

¹⁹ Sabe verdadi sobri mórti, ta liberta-nu di mintiras ki relijions ta inxina. I es verdadi ta djuda-nu ntende promésa di Jeová di da-nu un vida i un futuru rei di sábi.

20. Kuzê ki nu ta ben prende na kapítlu 7?

²⁰ Dja ten monti ténpu, ki un sérvu di Jeová ki txomaba Jó pergunta: ‘Óras ki un ómi móre, el pode vive otu bês?’ (Jó 14:14 ) É mésmu posível un algen ki dja móre vive otu bês? Respósta ki Deus ta da na Bíblia ta dexa-nu rei di kontenti. Nu ta ben odja kel respósta li na kapítlu 7.