Bu ta konsigi!

DJA txiga óra di bu ‘ten koraji i kumesa ta trabadja.’ (1 Crónicas 28:10) Kuzê más ki bu pode faze pa bu para di fuma?

Marka un data. Departamento de Saúde e Serviços Humanos, na Mérka, ta fla ma dipôs ki bu disidi para di fuma, bu ka debe spéra más di ki dôs simana pa faze kel-li. Asi bu ta kontinua ku forsa. Marka kel dia na bu kalendáriu. Fla bus amigu i ka bu muda data sikrê situason muda.

Skrebe un nóta ku informasons ki pode djuda-u. Skrebe kuzas ki ta da-u forsa i koraji pa bu para di fuma:

● Kes motivu pa bu para

● Nunbru di tilifóni di kes algen ki bu pode txoma óras ki bu xinti gana di fuma

● Skrebe ideias ki ta da-u forsa pa bu ka dizisti. Pur izénplu, skrebe testus di Bíblia sima Gálatas 5:22, 23, ki ta djuda-u alkansa bus obijetivu.

Leba kes nóta ki bu skrebe djuntu ku bo i le-s txeu bês na un dia. Mésmu dipôs ki bu para di fuma, kontinua ta lé kes nóta sénpri ki bu xinti vontadi di fuma.

Muda kes ábitu ki ta pô-u ku gana di fuma. Antis di txiga kel data ki bu marka, larga kalker ábitu ki ta pô-u ku gana di fuma. Si bu ten ábitu di fuma tudu dia lógu ki bu labanta, tenta aguenta un óra ô dôs sen fuma. Si bu ta fuma timenti bu sta kume ô dipôs, tenta para ku kel-la. Tenta ivita bai lugaris undi ki algen ta fuma. Óras ki bu sta bo sô, fla ku vós altu: ‘Nau, obrigadu! Dja-m para di fuma.’ Kes ideia li ta djuda-u sta más priparadu pa kel dia ki bu marka pa bu para di fuma. Tanbê es ta djuda-u lenbra ma ka ta dura bu ta ben ser un algen ki ka ta fuma más.

Pripara. Óras ki kel dia ki bu tene markadu pa bu para di fuma sta kuazi ta txiga, kunpra kuzas sima palitu di sinora, xíngua, mankara i otus kuza. Lenbra bus amigu i bu família di kel dia ki bu sta para di fuma i modi ki es pode djuda-u. Alguns dia antis di bu kumesa, bota sinseru fóra, iskeru ô kalker otu kuza ki pode pô-u ta kai sima sigaru ki pode sta déntu kaza, na karu, na bolsu ô na lugar ki bu ta trabadja. É más difísil pidi un sigaru pa un amigu ô kunpra un masu di sigaru di ki abri un gaveta i panha un sigaru! Kontinua ta faze orason pa Deus djuda-u i ora más txeu dipôs ki bu para di fuma pa últimu bês. — Lucas 11:13.

Txeu algen konsigi kaba ku kel amizadi ki es tinha ku kel amigu falsu i kruel, ki é sigaru. Bo tanbê bu ta konsigi. Un saúdi midjór i un vida livri i sábi sta ta spéra-u.

[Fotu]

Leba kes nóta ki bu skrebe djuntu ku bo i le-s txeu bês na un dia.