Na un vizita di studu, alguns rapás akuzadu di faze abuzu seksual ku un otu rapás ki éra alunu. Es tudu ta staba na mésmu skóla na Kanadá ki é txeu ruspetadu. Ten un jornalista ki skrebe sobri kel situason li: “Ten vantaji ser intilijenti, ten un bon idukason i ser di un família riku, má kes kuza li ka ta inpidi kes jóven di toma maus disizon na vida.” *

Tanbê el fla: “Normalmenti nu ta spéra ma kuza más inportanti pa pai ku mai é inxina ses fidjus kuzê ki é dretu i mariadu. Envês di kel-li, ta parse ma txeu pai ku mai ta atxa ma más inportanti é pa ses fidjus ten bons nóta na skóla i pa es konsigi ranja un bon trabadju pa es pode ganha txeu dinheru.”

É verdadi ki studa é txeu inportanti. Má simé nen kel midjór idukason ki ta dadu na skóla ka ta pode djuda algen vense kes tendénsia ô dizejus mariadu. Nton, na undi ki nu pode atxa un tipu di idukason ki ta djuda-nu faze kel ki é dretu?

Bíblia é sima un spedju. El ta mostra-nu klaru kal ki é nos pontus fraku i nos limitasons. (Tiago 1:23-25) Tanbê el ta djuda-nu faze kes mudansa ki meste pa nu dizenvolve kes kualidadi ki ta djuda ten pas i union, sima bondadi, paxénxa, kapasidadi di kontrola nos kabésa i amor. Bíblia ta fla ma amor ‘é kel ligason perfeitu di union.’ (Colossenses 3:14) Má pamodi ki amor é txeu spesial? Odja kuzê ki Bíblia ta fla sobri kel kualidadi li.

• ‘Amor ten paxénxa i el é bon. Amor é ka siumentu. El ka ta ngaba, el é ka orgulhozu, el ka ta konporta sen ruspetu, el ka ta djobe sô ses interesi, el ka ta xatia faxi. El ka ta liga mal ki fazedu [ô el ka ta fika ta konta kes fadja]. El ka ta fika kontenti ku injustisa, má el ta fika kontenti ku verdadi. El ta suporta tudu kuza, el ta aguenta firmi na tudu kuza. Amor nunka ka ta kaba’. — 1 Coríntios 13:4-8.

• ‘Amor ka ta faze mal pa se prósimu’. — Romanos 13:10.

• ‘Más inportanti ki tudu kuza, nhos ten un amor fórti pa kunpanheru, pamodi amor ta kubri un monti pekadu.’ — 1 Pedro 4:8.

Modi ki bu ta xinti óras ki bu sta ku kes algen ki bu ta ama? Suguru? Trankilu? Na pas? Sin, pamodi bu sabe ma kes algen li, krê kel ki é midjór pa bo, i nunka es ka ta magua-u di propózitu.

Amor tanbê ta poi pesoas ta faze sakrifisiu pa otus algen, i ti ta faze grandis mudansa na vida. Odja izénplu di George *. Kantu el bira avó, el ta  kria staba djuntu ku se nétu. Má tinha un prubléma. George ta fumaba txeu i se jénru ka kria pa el fumaba pértu di kel bebé. Modi ki George reaji? Dja tinha 50 anu ki el ta fumaba, má pamodi el ta amaba se nétu, el disidi para di fuma. Na verdadi, amor ten txeu puder!

Amor é ka un kualidadi ki nu ta nase ku el. Pai ku mai ten un papel inportanti na inxina ses fidjus mostra amor. Óras ki ses fidjus sta fridu ô duenti, es ta da-s kumida, es ta proteje-s i es ta kuida di es. Un bon pai ku un bon mai ta pâpia ku ses fidjus, es ta da-s orientason i tanbê es ta disiplina-s. I kel-li ta inklui inxina-s kuzê ki é dretu i kuzê ki é mariadu. Alén di kel-li, es ta da un bon izénplu pa ses fidjus imita.

Alguns pai ku mai ta fadja na kunpri ses responsabilidadi. Nton kel-li krê fla ma ses fidjus nunka ka ta bira bons algen? Txeu algen adultu, ki ta inklui alguns ki kria na un família konplikadu, faze grandis mudansa na vida. Es bira pesoas di kunfiansa i ki ta nporta ku otus. Na kel otu artigu, nu ta ben odja alguns izénplu ki ta mostra ma ti kes pesoa ki otus algen ta pensaba ma ka tinha soluson, pode muda!