Pamodi ki pesoas ten falta di ruspetu pa vida?

TOKA

PAMODI KI É INPORTANTI MOSTRA RUSPETU PA VIDA?

Óras ki bu ta faze kuzas ki ta prujudika bu saúdi ô ki ta poi vida di otus algen na prigu, kel-li ta mostra ma bu ka ta da valor pa bu vida ô pa vida di otus algen.

Fuma sigaru pode poi algen ta ten kánser i ta fika más difísil pa nos korpu lida ku el. Uns 90 pursentu di algen ki ta móre pamodi kánser di pulmon é pamodi es ta fuma ô pesoas ta fuma pértu di es.
Tudu anu tiroteiu ki ta mata un monti algen ta poi txeu algen ku trauma. Un rilatóriu di universidadi di Stanford fla: “Un piskiza ta mostra ma mésmu kes algen ki skapa [di kes tiroteiu na skóla] sen ninhun pankada, ta fika ku otus prubléma ki ta afeta ses vida pa txeu anu.”
Pesoas ki ta konduzi moku ô drogadu ta poi na prigu vida di kes otu algen ki sta ta konduzi ô ti mésmu kes ki sta ta anda na paseiu. Óras ki pesoas ta mostra ma es ka ta preokupa ku vida, kes algen inosenti pode fika prujudikadu.

MODI KI BU PODE MOSTRA RUSPETU PA VIDA?

Proteje bu saúdi. Nunka é ka tardi dimás pa bandona ábitus ki ta prujudika-nu, sima fuma, uza sigaru iletróniku, bebe dimás ô uza dróga. Kes ábitu li ta prujudika bu vida i ta mostra falta di ruspetu pa vida di kes algen na bu vólta, i kel-li ta inklui bus família.

“Nu linpa di tudu kuza ki ta kontamina korpu”. — 2 Koríntius 7:1.

Pensa na bu suguransa i na suguransa di otus algen. Pa ivita asidentis, mante bu kaza na un bon stadu. Konduzi ku suguransa i mante bu karu ô bu móta na un bon stadu. Ka bu dexa otus algen faze-u preson pa bu partisipa na atividadis ki pode pô-u ta panha un pankada gravi ô ti móre.

‘Si bu faze un kaza novu, tanbê bu debe faze un parapetu riba di kaza, asi si un algen kai di la, pa kulpa di sangi ka fika riba algen di bu kaza.’ — Deuteronómio 22:8. a

Mostra bondadi pa otus algen. Nu ta mostra ruspetu pa vida óras ki nu ta mostra bondadi pa pesoas di tudu rasa i país, ka ta inporta si es é riku ô póbri, ô si es ten skóla ô nau. Na verdadi, prekonseitu i ódiu é kes kuza prinsipal ki sta poi ta ten violénsia i géra na mundu.

“Nhos bandona tudu tipu di rankor, fúria, raiba, gritaria i palavras ki ta ofende i tanbê tudu maldadi. Nhos mostra bondadi pa kunpanheru”. — Efézius 4:31, 32.

MODI KI TISTIMUNHAS DI JEOVÁ TA INPENHA PA TEN RUSPETU PA VIDA?

Tistimunhas di Jeová ta inxina otus algen ten un stilu di vida ki ta djuda-s ten un bon saúdi. Nos prugrama di studa Bíblia ta djuda pesoas bandona vísius i ábitus ki ta prujudika-s.

Nu ta sigi orientasons di suguransa na nos prujétus di konstruson. Kes voluntáriu ki ta djuda na konstruson di kes lugar ki nu ta uza pa faze runion i otus prédiu ki ta uzadu pa djuda na nos trabadju di inxina Bíblia, ta trenadu pa ivita asidentis. Nos prédius sénpri ta djobedu pa odja si es sta di akordu ku leis di suguransa di kel lugar undi ki es sta.

Nu ta da ajuda na ténpu di dizastri. Na 2022, nu djuda pesoas kantu kontise uns 200 dizastri na mundu interu ki poi vida di pesoas na prigu. I nu gasta kuazi 12 milhon di dóla di kes kontribuison ki dadu pa djuda kes algen ki sufri.

Kantu ébola kumesa ta spadja na Áfrika Osidental (2014) i na Repúblika Dimokrátika di Kongu (2018), nu splika pesoas kuzê ki es pode fazeba pa es ka dexaba kel duénsa li, ki ta mata, spadjaba. Nu manda reprizentantis pa ba pâpia ku grupus di pesoas sobri kel téma li: “Obidiensa ta salva vidas”. Na entrada di kada lugar di faze runion, nu poi kuzas pa laba mô i nu mostra modi ki éra inportanti pesoas laba ses mô. Tanbê, nu splika otus kuza ki es pode fazeba pa ka dexa kel duénsa spadja.

Na Séra Lioa, un rádiu ilojia Tistimunhas di Jeová pamodi es djuda kes algen na ses zóna ki éra Tistimunhas di Jeová i kes ki ka éra, sabe kuzê ki es debe fazeba pa ka dexa vírus di ébola spadja.

Un lugar pa laba mô na un Salon di Reinu kantu ébola spadja na Libéria na 2014

a Na Orienti Médiu, na ténpu antigu, kel bon orientason li mostra ma suguransa di kes algen di família i di kes otu algen éra txeu inportanti.

NHOS KORDA!