Kuzas ki nos Kriador ta inxina ta da-nu speransa
Deus promete ma ka ta dura el ta ben faze mudansas grandi li na Téra. El ta ben kaba ku sufrimentu i el ta ben da tudu algen un vida filís li na Téra. (Salmo 37:11) Pamodi ki nu pode kridita na kel promésa li? Pamodi ‘Deus é ka ómi ki ta konta mintira’. (Números 23:19) Odja alguns kuza sábi ki nos Kriador ta ben faze.
Deus ta ben kaba ku kes algen mau
‘Óras ki algen mau bira txeu sima padja, i tudu kes ki ta faze maldadi ta ten bons rezultadu, é pa es ser distruídu pa tudu ténpu.’ — SALMO 92:7.
Sima nu odja na kel otu artigu, maldadi sta ta bira kada bês más txeu. Kel-li ka ta dexa-nu dimiradu, pamodi Bíblia dja flaba na 2 Timóteo 3:1-5 ma na ‘ténpu di fin’ pesoas ta ben fazeba txeu maldadi. Kuzê ki nu krê fla ku ‘ténpu di fin’? Kel-li krê fla fin di kes algen ki ka krê obi ku Deus. Ka ta dura, Deus ta ben kaba ku tudu kes algen mau ki ka krê muda. Dipôs, ta ben fika sô kes algen bon ô kes algen ki ta obi ku Deus. Salmo 37:29 ta fla: ‘Téra ta ben ser di kes algen justu i es ta ben vive na el pa tudu ténpu.’
Deus ta ben kaba ku Satanás
‘Kel Deus ki ta da pas ta ben pila Satanás’. — ROMANOS 16:20.
Dipôs ki Deus kaba ku tudu kes algen mau, ki ta inklui Satanás ku se dimónis, tudu algen na Téra ta ben vive na pas. Nos Kriador promete: ‘Ka ta ten ningen pa pô-s ta xinti medu’. — Miqueias 4:4.
Deus ta ben kaba ku duénsa i ku mórti
‘Ténda di Deus sta ku tudu algen. El ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór.’ — APOCALIPSE 21:3, 4.
Sufrimentu ku duénsa ka ta ben ten más. Deus ta ben kaba ku tudu mal ki Satanás, Adon ku Eva i nos própi inperfeson dja faze. Bíblia ti mésmu ta fla ma ‘ka ta ten más mórti’. Kes algen ki ta ama Deus i ki ta obi ku el, ta ben vive pa tudu ténpu. Má na undi ki es ta ben vive?
Nos Kriador ta ben bira Téra na un Paraízu
‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ — ISAÍAS 35:1.
Dipôs ki Deus kaba ku kes algen mau, Téra ta ben bira un Paraízu! El ta ben fika xeiu di jardins bunitu i el ta ben da txeu kumida. (Salmo 72:16) Mar, lagus ku rius, ta ben fika linpu i txeu animal ta ben vive na es. Pesoas ka ta ben lenbra más ma Téra staba suju ô poluídu! Pesoas ta ben faze ses kaza i es ta mora na es. Nunka más algen ka ta ben pasa fómi, ka ta ben fika póbri i sen lugar pa mora. — Isaías 65:21, 22.
Deus ta ben poi mortus ta vive otu bês
‘Ta ben ten resureison’. — ATOS 24:15.
Dja bu perde un algen ki bu ta ama? Bu ta gostaba di odja-l otu bês? Deus Tudu-Poderozu ta ben poi kes algen ki móre ta vive otu bês, ô el ta ben resusita-s pa es ben vive na un Paraízu na Téra. Óras ki kes algen ki bu ta ama ben vive otu bês, bu ta konxe-s i es ta konxe-u. Imajina alegria ki nhos ta ben xinti! Pamodi ki nu pode ten sertéza ma kel-li ta ben kontise? Pamodi Bíblia ta mostra ma na pasadu alguns algen grandi ku kriansas resusitadu i es kontinua ta vive djuntu ku ses família. Tanbê, txeu pesoas odja Jizus ta resusita algen. — Lucas 8:49-56; João 11:11-14, 38-44.
Bu pode gosta di kes-li tanbê
NHOS KORDA!
Un mundu xeiu di prubléma — Ka bu perde speransa
Bíblia ta djuda-nu lida ku kes prubléma di vida i el ta da-nu un speransa pa futuru.
RESPÓSTAS PA PERGUNTAS DI BÍBLIA
Kuzê ki é resureison?
Bu pode fika dimiradu di sabe kenha ki ta ben torna vive otu bês na futuru.
ESSENTIAL BIBLE TEACHINGS
Kuzê ki ta kontise ku nos óras ki nu móre?
Bíblia ta promete ma ta ben ten un ténpu ki un monti di algen ta ben resusitadu, sima kontise ku Lázaru.
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.
