‘El debe trabadja duru i faze un bon trabadju ku se mô, pa el pode ten algun kuza pa el da kalker algen ki meste.’ — EFÉSIOS 4:28.

Nos Kriador krê pa nu ten un atitudi puzitivu sobri trabadju. Pamodi? Un algen trabadjador é filís pamodi el ta konsigi kuida di se nisisidadis i di nisisidadis di se família. I ti el ta konsigi djuda otu algen ki sta pasa nisisidadi. Se patron tanbê, ta da-l txeu valor. Un algen ki é trabadjador ten más xansi di kontinua ku se trabadju. Bíblia ta fla ma bons rezultadu di un trabadju duru é un ‘prezenti di Deus’. — Eclesiastes 3:13.

‘Nu ten sertéza ma nu ten un bon konsénsia, dja ki nu krê konporta ku onestidadi na tudu kuza.’ — HEBREUS 13:18.

Si nos é onéstu nu ta ten ruspetu pa nos kabésa, nu ka ta fika preokupadu dimás i nu ta konsigi durmi dretu di noti. Alén di kel-li, otus algen ta kunfia na nos i es ta ruspeta-nu. Kes algen ki é ka onéstu ka ta ten kes kuza li. Tanbê, ses konsénsia ta inkomoda-s i es pode vive ku medu di un dia algen diskubri kuzê ki es sta ta faze.

‘Nhos manera di vive debe sta livri di amor pa dinheru, má nhos fika kontenti ku kes kuza ki nhos ten.’ — HEBREUS 13:5.

Nu meste dinheru pa kunpra kumida i pa kuida di otus nisisidadi. Má ‘amor pa dinheru’ é txeu prigozu. El pode poi un algen ta gasta kuazi tudu se ténpu i se forsa ta tenta ganha más dinheru. Dja ki kel algen ta sforsa pa ganha txeu dinheru el pode prujudika se kazamentu, el ta fika sen ténpu pa se fidjus i ti el pode prujudika se saúdi. (1 Timóteo 6:9, 10) Alén di kel-li, ken ki ta ama dinheru pode xinti tentadu na ser dizonéstu. Un ómi ku txeu sabedoria fla: ‘Un ómi fiel ta resebe txeu benson, má ken ki krê bira riku faxi ka ta kontinua inosenti.’ — Provérbios 28:20.

‘Proteje sabedoria i bu kapasidadi di rasusina’. — PROVÉRBIOS 3:21.

Un bon idukason ta djuda-nu ser un algen responsável i un bon pai ô mai. Má sô bai pa kes midjór skóla ka krê fla ma nu ta ser filís i ma sénpri nu ta ten kel ki nu meste. Si nu krê ten susésu na tudu kuza ki nu ta faze, nu meste di kel idukason ki Deus ta da-nu. Bíblia ta fla kel-li sobri kel algen ki ta obi ku Deus: ‘Tudu kuza ki el faze ta ten bon rezultadu.’ — Salmo 1:1-3.