Kontrola nos kabésa ta nvolve

• sabe spéra

• kontrola nos sentimentu

• tirmina di faze kes kuza ki nu kumesa

• poi nisisidadi di otus algen na frenti di kes di nos

Kes kriansa ki sabe kontrola ses kabésa ta konsigi vense un tentason sikrê é un kuza ki ta parse ma es gosta. Má, kriansas ki ka ta konsigi kontrola ses kabésa pode

• ser violéntu

• panha depreson

• fuma, bebe ô uza dróga

• kume mariadu

Ten un studu ki ta mostra ma kes kriansa ki ta konsigi kontrola ses kabésa, ten ménus xansi di ten prublémas di saúdi, prublémas di dinheru i prublémas ku lei óras ki es bira grandi. Ku bazi na kel studu li, ten un profesóra a di Universidadi di Pensilvánia, ki fla: “Kontrola nos kabésa sénpri é un kuza bon pa nos.”

Prende fla nau i mante bu palavra.

PRINSÍPIU DI BÍBLIA: ‘Nhos dexa pa nhos palavra “sin” ser sin, i pa nhos “nau” ser nau’. — Mateus 5:37.

Kriansas ta kustuma sprimenta ses pai ku ses mai óras ki es ta konporta mariadu ti mésmu na frenti di otus algen. Si pai ku mai da-s kuzê ki es krê, es pode prende ma konporta si é un bon manera pa es konsigi kuzê ki es krê.

Má si kel pai ku kel mai fla nau i es mante ses palavra, kriansas ta prende un lison di vida inportanti: nen sénpri nu ka ta konsigi ten tudu kel ki nu krê. Ten un pisikólogu, b ki fla: “É interesanti ki kes algen ki prende kel lison li ta parse ma es é más filís. Nu ka sta djuda nos fidjus si nu inxina-s ma mundu ta da-s tudu ki es krê di grasa.” c

Fla nau pa bu fidju désdi pikinoti ta djuda-l óras ki el bira grandi. Asi el ta konsigi fla nau pa se kabésa pa kuzas sima dróga, séksu antis di kazamentu ô kalker otu kuza ki é mariadu.

 Djuda bus fidju odja kes bon i mau rezultadu di kuzas ki es ta faze.

PRINSÍPIU DI BÍBLIA: ‘Kel ki algen símia, é kel ki tanbê el ta kodje’. — Gálatas 6:7.

Bu fidju meste ntende ma tudu kuza ki el ta faze ta ten un rezultadu, pur isu si el ka konsigi kontrola se kabésa el pode ten maus rezultadu. Pur izénplu, si sénpri bu fidju ta perde kabésa óras ki el sta xatiadu, ningen ka ta krê fika pértu di el. Má, si el prende kontrola se kabésa óras ki es ta provoka-l ô spéra ku paxénxa envês di korta algen konbérsu, pesoas ta krê sta djuntu ku el. Djuda bu fidju odja ma óras ki el ta konsigi kontrola se kabésa se vida ta ser más midjór.

Djuda bu fidju sabe kuzê ki é más inportanti.

PRINSÍPIU DI BÍBLIA: ‘Nhos konfirma kuzê ki é más inportanti’. — Filipenses 1:10.

Kontrola nos kabésa ka sô ta djuda-nu ivita faze algun kuza mariadu, má tanbê el ta djuda-nu faze kuzas ki talvês nu ka gosta, má ki nu meste faze. Bu fidju meste prende disidi kuzê ki é más inportanti i dipôs faze kes kuza la primeru. Pur izénplu, el ten ki faze kes trabadju di kaza antis di ba brinka.

Ser un bon izénplu.

PRINSÍPIU DI BÍBLIA: ‘N dexa izénplu pa nhos, nton sima N faze nhos, nhos debe faze tanbê.’ — João 13:15.

Bu fidju ta odja modi ki bu ta reaji óras ki ta kontise un kuza ki ta dexa-u xatiadu. Mostra pa bu izénplu ma óras ki algen ta konsigi kontrola se kabésa, el ta ten midjór rezultadus. Pur izénplu, modi ki bu ta reaji óras ki bu fidju ta faze algun kuza mariadu? Bu ta fika xatiadu ô bu ta mante kalmu?