3 Pamodi ki algen dretu ta sufri?
Pamodi ki é inportanti sabe respósta
É ka justu pa un algen dretu sufri. I pur isu alguns algen ta atxa ma ka bale péna sforsa pa ser un algen dretu.
Pensa na kel-li
Alguns algen ta kridita ma kuzas mariadu ta kontise pamodi distinu. Otus ta atxa ma sufrimentu é kastigu di Deus pa kes algen mau ô un próva di fé pa kes algen dretu. I ten otus ki ta fla ma nu ka ta konsigi ntende dretu pamodi ki algen bon ta sufri. Má kridita na kes kuza li ta pô-nu ta faze perguntas sima:
-
Si tudu kuza ki ta kontise é pamodi distinu, nton pamodi ki nu ta sforsa pa ten bon saúdi i toma bons disizon?
-
Si Deus ta preokupa ku algen, nton modi ki el pode ser mau i prova algen ku sufrimentu?
SABE MÁS
Odja vídiu Pamodi ki Deus ta dexa sufrimentu kontise? na site jw.org.
Kuzê ki Bíblia ta fla
Sufrimentu é ka kastigu di Deus.
Má txeu bês, algen ta sufri pamodi el ta sta na mau lugar i na mau óra.
‘Kes algen ki ta kóre faxi nen sénpri ka ta ganha korida, i nen sénpri é kes algen fórti ki ta ganha géra; algen sabidu nen sénpri ka ta ten kumida, algen intilijenti nen sénpri ka ta ten rikézas, algen ki ten konhisimentu nen sénpri ka ta ten susésu; pamodi ténpu i kuzas ki algen ka sta spéra ta kontise ku tudu es.’ — ECLESIASTES 9:11.
Nu ta sufri pamodi nu nase ku pekadu.
Normalmenti, algen ta uza palavra “pekadu” pa pâpia di algun kuza mariadu ki un algen faze. Má Bíblia ta uza palavra pekadu pa pâpia di un kuza ki tudu algen erda, sikrê el é un algen dretu ô mau.
‘Ami N nase ku kulpa di éru, i nha mai fika grávida di mi na pekadu.’ — SALMO 51:5.
Pekadu dja traze-nu txeu disgrasa.
Pekadu ka prujudika sô nos amizadi ku nos Kriador, má tanbê manera ki nu ta trata kunpanheru i modi ki nu ta trata naturéza. Tudu kel-li dja traze txeu sufrimentu pa tudu algen na Téra.
‘Óras ki N krê faze kel ki é dretu, kel ki é mariadu ta sta na mi.’ — ROMANOS 7:21.
‘Ti gósi tudu kriason sta kontinua ta jeme i ta xinti dór.’ — ROMANOS 8:22.
