Modi ki aparelhus iletróniku ta afeta bus amizadi?
Oji é mutu más fásil pa pesoas pâpia ku kunpanheru sikrê es ta vive na país diferenti. Ku aparelhus iletróniku é más fásil manda mensaji, e-mail, faze xamada pa vídiu i uza redi sosial. Má alguns algen sô ta pâpia ku ses amigu através di aparelhus iletróniku.
Pamodi kel-li es ta ten prublémas sima. . .
-
ka konsigi ntende sentimentu di ses amigu i poi na ses lugar.
-
xinti es sô.
-
pensa más na ses kabésa di ki na otus algen.
KUZÊ KI BU DEBE SABE
POI NA LUGAR DI OTUS
Pa nu poi na lugar di otu algen, nu meste tra ténpu pa pensa na el. Kel-li pode ser difísil si nu sta okupadu ta lé ô ta manda txeu mensaji i ta uza redi sosial.
Si bu ka toma kuidadu ku aparelhus iletróniku, ku ténpu, responde mensaji di bus amigu pode parse ma é sô más un kuza ki bu ten pa faze. Bu ka ta djobe si kes mensaji é inportanti ô nau, bu ta krê sô responde-s i bu pode ka da konta ma bus amigu meste di bu ajuda.
PENSA NA KEL-LI: Modi ki bu pode ‘poi na lugar’ di bus amigu óras ki bu ta uza aparelhus iletróniku pa pâpia ku es? — 1 PEDRO 3:8.
XINTI ES SÔ
Un piskiza ki fazedu mostra ma txeu algen, dipôs di pasa txeu ténpu ta uza redi sosial, ta xinti es sô i es ta fika diprimidu. Kes algen ki faze kel piskiza repara ma fika ta odja fotus i otus kuza ki algen ta poi na redi sosial pode pô-s “ta xinti ma ses vida ka ten piada.”
Alén di kel-li, fika ta odja kes fotu bunitu ki otus algen ta poi na redi sosial pode poi pesoas ta konpara ses vida ku di otus algen. Pode parse ma timenti tudu algen sta ta divirti, es sta ta faze sénpri kes mésmu kuza.
PENSA NA KEL-LI: Modi ki N pode ivita konpara nha kabésa ku di otus algen, óras ki N ta uza redi sosial? — GÁLATAS 6:4.
PENSA SÔ NA BU KABÉSA
Un profesóra repara ma alguns di se alunus ta pensaba sô na ses kabésa. Óras ki es ta fazeba amizadi, ses prinsipal preokupason éra: “Kuzê ki N ta ganha ku kel amizadi li?” a Kes amizadi li, pode poi algen ta pensa sô na se kabésa. Kes algen pode kumesa ta odja ses amigu sima un telemóvel ki es pode uza i disliga óras ki es krê.
PENSA NA KEL-LI: Kes kuza ki N ta poi na redi sosial, ta mostra ma N ten tendénsia di konpiti ku otus algen ô ma N ta pensa sô na nha kabésa? — GÁLATAS 5:26.
KUZÊ KI BU DEBE FAZE
PENSA MODI KI BU TA UZA APARELHUS ILETRÓNIKU
Óras ki é bo ki ta manda na aparelhus iletróniku envês di es manda na bo, ta fika más fásil kontinua ta pâpia ku bus amigu i bira nhos amizadi más fórti.
PRINSÍPIU DI BÍBLIA: ‘Amor ka ta djobe sô ses interesi’. — 1 CORÍNTIOS 13:4, 5.
Djobe kal di kes kuza li ki bu ta gostaba di faze ô skrebe bus própi ideia.
-
Pâpia ku otus algen (envês di manda mensaji ô e-mail)
-
Guarda bu telemóvel (ô pô-l na silénsiu) óras ki bu sta pâpia ku otus algen
-
Uza redi sosial más poku
-
Presta más atenson óras ki otus algen ta pâpia ku bo
-
Pâpia ku un amigu ki sta pasa pa un prubléma
a Sima sta na livru ku téma Reclaiming Conversation.
