É Deus ki faze universu i vida ki ten na Téra ô es parse es sô? Kuzê ki kes dôs sientista ki sta na komésu di es artigu fla i kuzê ki Bíblia ta fla, é txeu diferenti. Nu ta atxa pesoas ki ta difende kes dôs ideia li. Má inda ten txeu algen ki ten dúvida. Ten txeu livru ki ta pâpia di kes asuntu li i pesoas gosta di diskuti sobri kel-li na prugramas di tilivizon.

Talvês bus profesor inxina-u ma universu i vida ki ten na Téra parse es sô i ma é ka Deus ki kria-s. Má, bus profesor mostra-u próvas ma ka ta izisti un Kriador? Tanbê, pode ser ki bu obi kes xéfi di relijion ta inxina ma ta izisti un Kriador. Má es mostra-u próvas ki ta apoia kuzê ki es fla? Ô sô es fla-u ma bu ka meste ten próva pa bu kridita na Deus?

Di sertéza, dja bu pensa na kel pergunta li i talvês bu xinti ma ningen ka ta pode fla-u ku sertéza si ta izisti un Kriador ô nau. I tanbê, bu pode fika ta pergunta si bale péna sabe respósta.

Kel revista li ta ben mostra alguns próva ki djuda txeu algen kridita ma ta izisti un Kriador. Tanbê, el ta mostra pamodi ki é inportanti sabe modi ki vida kumesa.