Óras ki maridu ku mudjer ta trabadja djuntu sima un ekipa na ses kazamentu, es ta ser sima un pilotu ku se ajudanti ki ten kel mésmu planu di viaji. Mésmu óras ki parse prublémas, kada un di es ta pensa na es tudu dôs envês di pensa sô na ses kabésa.

KONSEDJU DI BÍBLIA: ‘Es é ka dôs más, má un karni sô.’ — Mateus 19:6.

“Maridu ku mudjer meste trabadja djuntu pa es pode ten un kazamentu filís.” — Christopher.

Óras ki parse un prubléma, maridu ku mudjer ki ka ta trabadja sima un ekipa, ta konsentra más na djobe kenha ki ten kulpa, envês di konsentra na djobe soluson pa kel prubléma. Di kel manera li, kuzas pikinoti ta bira un prubléma grandi.

“Trabadja djuntu sima un ekipa é un kuza txeu inportanti na kazamentu. Si mi ku nha maridu ka faze kel-li, nu ta fika sima dôs algen ki sô ta mora djuntu, envês di ser un kazal. I kel-li ta traze prubléma óras ki nu ten ki toma disizons inportanti.” — Alexandra.

FAZE UN TÉSTI PA BU KABÉSA

• N ta atxa ma kel dinheru ki N ta ganha é un kuza ki é “sô di meu”?

• Pa N konsigi xinti diskontraídu, N ten ki ta sta lonji di nha maridu ô nha mudjer?

• N ta fika afastadu di famílias di nha maridu ô di nha mudjer, nbóra el é txeu pegadu na es?

NHOS PÂPIA KU KUNPANHERU SOBRI KES PERGUNTA LI

• Na ki párti di nos kazamentu ki nu ta trabadja dretu sima un ekipa?

• Na ki párti ki nu pode midjora?

• Kuzê ki nu pode faze pa nu midjora i trabadja sima un ekipa?

AJUDA

• Ka bu nkara bu maridu ô bu mudjer sima un algen ki nhos sta ta djuga ténis kada un di un ladu kóntra kunpanheru. Kuzê ki nhos pode faze pa nhos tudu dôs djuga na mésmu ladu i poi kes prubléma na kel otu ladu di kanpu pa nhos djuga kóntra es?

• Envês di bu pensa modi ki bu pode ganha, pensa na modi ki nhos tudu dôs pode ganha.

“Ka bu fika ta pensa na kenha ki ten razon ô na kenha ki ka ten. Pas i union na bu kazamentu é más inportanti di ki ten razon.” — Ethan.

KONSEDJU DI BÍBLIA: ‘Ka nhos djobe sô nhos própi interesi, má tanbê interesi di otus.’ — Filipenses 2:3, 4.