Verdadi sobri futuru
Dja bu para pa bu pensa modi ki bu vida ta ben ser na futuru? Bíblia ta pâpia sobri kuzas inportanti ki sta kuazi ta ben kontise i ki ta ben afeta tudu algen na mundu.
Jizus splika modi ki nu ta sabeba ma “Reinu di Deus sta kuazi ta txiga.” (Lukas 21:31) El fla ma ta ben kontiseba géra, grandis tremor di téra, falta di kumida i duénsas. É kel-li ki nu sta odja ta kontise oji. — Lukas 21:10-17.
Bíblia tanbê ta fla-nu ma un di kes kuza ki ta mostraba ma nu sta na “ténpu di fin” di govérnus di ómi, é konportamentu mariadu di pesoas. Bu pode lé sobri kel-li na 2 Timótiu 3:1-5. Óras ki bu ta odja atitudis i konportamentu di pesoas oji, di serteza bu ta konkorda ma es profesia di Bíblia sta ta kunpri tintin pa tintin.
Kuzê ki kel-li siginifika? Kel-li krê fla ma sta kuazi ta txiga ténpu pa Reinu di Deus ben faze grandi mudansa na téra i midjora vida di pesoas. (Lukas 21:36) Na Bíblia, Deus promete ma el ta ben faze bons kuza li na téra i pa kes algen ki ta ben vive na el. Nu ben odja alguns izénplu.
UN BON GOVÉRNU
‘Jizus dadu autoridadi, ónra i un reinu, asi pa povus, nasons i línguas sirbi-l. Se govérnu é un govérnu pa tudu ténpu, ki ka ta kaba nunka más, i se reinu ka ta distruídu.’ — DANIEL 7:14.
Kuzê ki kel-li siginifika? Óras ki Reinu di Deus ben governa téra, bu ta ben ten un vida rei di sábi. Kel govérnu ki Jizus é Rei, é mutu más midjór di ki kalker otu govérnu.
BON SAÚDI
‘Ningen ki ta mora la ka ta fla: “N sta duenti.”’ — ISAÍAS 33:24.
Kuzê ki kel-li siginifika? Nunka más bu ka ta fika duenti ô difisienti; bu ta pode vive pa tudu ténpu.
PAS NA MUNDU INTERU
‘El ta kaba ku géra na téra interu.’ — SALMO 46:9.
Kuzê ki kel-li siginifika? Ka ta ben ten ninhun amiasa di géra i pesoas nunka más ka ta ben sufri pamodi kes prubléma ki géra ta traze.
TÉRA TA BEN INTXI DI PESOAS DRETU
‘Kes algen mau ta ben dexa di izisti. Kes algen mansu ta ben toma kónta di téra.’ — SALMO 37:10, 11.
Kuzê ki kel-li siginifika? Algen mau ta dexa di izisti, i ta ben fika sô kes algen ki krê obi ku Deus.
TÉRA INTERU TA BEN BIRA UN PARAÍZU
‘Es ta ben faze kazas i mora na es; es ta ben planta lugaris xeiu di pé di uva i kume di ses fruta.’ — ISAÍAS 65:21, 22.
Kuzê ki kel-li siginifika? Téra interu ta ben bira un lugar bunitu, sábi di sta. Deus ta ben responde kel pididu ki nu faze na orason di Pai-Nosso: el ta ben poi se vontadi ta fazedu “na téra”. — Mateus 6:10.
