1. Ki nkorajamentu Jeová da lógu dipôs ki Adon ku Eva rabela?

DÉSDI ki umanus bira pekador, Jeová mostra ma el é un Deus ki ta da koraji. Lógu dipôs ki Adon ku Eva rabela na jardin di Éden, Jeová da fidjus di Adon ku Eva un motivu pa es ten koraji. Jeová faze kel profesia ki sta na Génesis 3:15 pa mostra ma inda tinha speransa pa umanus. Sima es ba ta ntende kel profesia, es fika ku speransa ma El ta ben distruíba ‘kel kóbra antigu’, ki ta txomadu Diabu i Satanás djuntu ku tudu maldadi ki dja el faze. — Apo. 12:9; 1 João 3:8.

2. Modi ki Jeová da Nué koraji?

² Nué ki éra un sérvu di Jeová, vive na un mundu ki úniku algen ki ta adoraba Jeová éra el ku se família. El ta viveba na un mundu xeiu di violénsia i konportamentu seksual mariadu. Pur isu, el podia xintiba  dizanimadu. (Gén. 6:4, 5, 11; Judas 6 ) Má, Jeová fla-l un kuza ki da-l koraji pa el kontinua ta sforsa pa ‘anda ku Deus’. (Gén. 6:9) Jeová fla Nué ma el sta ben distrui kel mundu mau i el fla-l kuzê ki el debe fazeba pa el salvaba el ku se família. (Gén. 6:13-18) Jeová mostra Nué ma el é un Deus ki ta da koraji.

3. Ki nkorajamentu Juzué resebe? (Odja dizenhu na komésu di studu.)

³ Más tardi, Juzué dadu un trabadju difísil ki éra lebaba povu di Deus pa kel téra ki el prometeba es. Pa kel-la, el tinha ki distruíba kes nason poderozu ki staba na kel téra. Juzué tinha txeu motivu pa fikaba ku medu. Pur isu, Jeová fla Muizes pa da Juzué koraji. Deus fla: ‘Skodje Juzué pa ser líder, da-l koraji i da-l forsa, pamodi é el ki ta ben pasa dianti di es povu i é el ki ta faze-s erda téra ki bu ta ben odja.’ (Deut. 3:28) Antis di Juzué faze kel ki el mandadu, Jeová fla-l: ‘N ka fla-u pa bu ten koraji i pa bu ser fórti? Ka bu fika ku medu, pamodi Jeová, bu Deus, ta sta ku bo pa undi ki bu bai.’ (Jos. 1:1, 9) Kel-li da Juzué grandi koraji!

4, 5. (a) Ki nkorajamentu Jeová da se povu na ténpu antigu? (b) Modi ki Jeová nkoraja se Fidju?

⁴ Alén di Jeová nkoraja pesoas, tanbê el nkoraja se povu kómu grupu. Pur izénplu, Jeová faze un profesia pa nkorajaba kes judeu ki ta baba prézu pa Babilónia. El fla-s: ‘Ka bu xinti medu, pamodi N sta ku bo. Ka bu fika preokupadu dimás, pamodi mi é bu Deus. N ta da-u forsa, N ta djuda-u. N ta pega-u riju ku nha mô direita di justisa.’ (Isa. 41:10) Kes primeru kriston tinha kel mésmu sertéza i povu di Deus oji, tanbê ta xinti mésmu kuza. — Lé 2 Coríntios 1:3, 4.

⁵ Jizus tanbê resebe nkorajamentu di se Pai. Na se batismu, Jizus obi un vós di Séu ta fla: ‘Kel-li é nha fidju ki N ta ama txeu, ki ta da-m txeu alegria.’ (Mat. 3:17) Di sertéza kes palavra li da Jizus txeu forsa pa el faze se trabadju di pregason na Téra!

6. Modi ki kel ilustrason di taléntus ta da koraji?

⁶ Jizus imita izénplu di se Pai. Na ilustrason ki Jizus konta sobri taléntus, ki pâpia sobri fin di kel sistéma, el nkoraja kes algen lial. Kel dónu fla pa kes skravu fiel: ‘Bu faze dretu, skravu bon i fiel. Bu foi fiel na kuida di poku kuza. N ta pô-u enkaregadu di txeu kuza. Fika kontenti djuntu ku bu patron.’ (Mat. 25:21, 23) Kes palavra li da grandi nkorajamentu pa es kontinua ta ser lial pa Jeová!

7. Modi ki Jizus nkoraja se apóstlus i prinsipalmenti apóstlu Pedru?

⁷ Apóstlus di Jizus txeu bês ta diskutiba kal di es éra más inportanti. Má ku paxénxa Jizus nkoraja-s ser umildi i sirbi kunpanheru, envês di ser xéfi. (Lucas 22:24-26 ) Pur izénplu, apóstlu Pedru mágua Jizus txeu bês. (Mat. 16:21-23; 26:31-35, 75) Má envês di el nega Pedru, Jizus nkoraja-l i fla-l pa el da se irmons forsa. — João 21:16.

8. Modi ki Ezekias nkoraja se xéfis di trópas i povu di Judá?

⁸ Mésmu antis di Jizus ben pa Téra i da un izénplu perfetu di da koraji, sérvus lial di Jeová sabia ma éra inportanti daba otus algen koraji. Rei Ezekias foi un di es. Kantu Asíria amiasa Jiruzalen, Ezekias djunta se xéfis di trópas i povu pa nkoraja-s. Bíblia ta fla: ‘I povu fika nkorajadu ku [se] palavras’. — Lé 2 Crónicas 32:6-8.

9. Modi ki livru di Jó ta inxina-nu da algen koraji?

⁹ Nbóra Jó mesteba konsolu, el mostra se três amigu modi ki ta dadu nkorajamentu. El fla-s ma si es staba na mésmu situason ki el, ‘el ta daba es forsa ku palavras di se bóka i konsolu di se bóka ta trazeba es alíviu.’ (Jó 16:1-5 ) Na fin, foi Eliú ku Jeová ki nkoraja Jó. — Jó 33:24, 25 ; 36:1, 11 ; 42:7, 10.

10, 11. (a) Pamodi ki fidju-fémia di Jefté mesteba nkorajamentu? (b) Oji tanbê ken ki merese nkorajamentu?

¹⁰ Un otu izénplu di algen na ténpu antigu ki mesteba nkorajamentu éra fidju-fémia di Jefté. Antis di Jefté ba géra ku amonitas, el faze un promésa pa Jeová. El fla ma si el ganha géra, primeru algen ki sai di se kaza pa ba nkontra ku el dipôs ki el ganha géra, el ta ofereseba pa ba sirbi Jeová na tabernákulu. Israel ganha géra. Se úniku fidju-fémia fika uma kontenti ki el sai pa ba nkontra ku se pai i komemora vitória. Korason di Jefté fika txeu tristi. Má el kunpri se promésa. El manda se fidju-fémia pa ba sirbi na tabernákulu na Silu pa réstu di se vida. — Juí. 11:30-35.

¹¹ Kel-li éra un kuza difísil pa Jefté, má éra más difísil inda pa se fidju-fémia. Má simé el seta kunpri promésa ki se pai faze. (Juí. 11:36, 37) Dja el ka ta pode kazaba, nen ten fidju pa mante nómi i eransa di família. Si tinha algen ki mesteba di konsolu éra fidju-fémia di Jefté. Bíblia ta fla: ‘Kel-li bira un ábitu na Israel: tudu anu, duránti kuatu dia na anu, kes jóven di Israel ta ba djobeba fidju-fémia di Jefté ki éra di Jiliádi’. (Juí. 11:39, 40) Bu ka ta atxa ma kes irmon ku irman ki disidi fika solteru pa es pode da txeu atenson pa ‘kuzas di Sinhor’, tanbê merese nkorajamentu i pa nu ilojia-s? — 1 Cor. 7:32-35.

12, 13. Modi ki Pedru da se irmons koraji?

¹² Na kel noti antis di Jizus móre, el fla Pedru: ‘Simon, Simon, obi: Satanás krê pa nhos tudu pineradu sima trigu. Má N sta pidi pa bo, pa bu fé ka bira fraku; i abo, óras ki bu volta, da bus irmon forsa.’ — Lucas 22:31, 32.

¹³ Pedru prova ma el é un pilar di kongregason. (Gál. 2:9) El nkoraja se irmons na Pentikósti i na otus situason. Dipôs di monti anu di pregason el skrebe pa kristons. El fla: ‘N skrebe nhos na pokus palavra pa N nkoraja nhos i pa N da nhos sertéza ma  kel-li é kel bondadi di verdadi di Deus ki nu ka merese. Nhos mante firmi na el.’ (1 Ped. 5:12) Kes karta ki Pedru skrebe kontinua ta da nkorajamentu pa kristons pa monti ténpu i pa nos oji. Kel-li ta nkoraja-nu pa nu kontinua ta spéra ma promésas di Jeová ta kunpri. — 2 Ped. 3:13.

14, 15. Modi ki palavras ki apóstlu Juan skrebe nkoraja kes kriston na ténpu antigu i nos oji?

¹⁴ Apóstlu Juan tanbê foi un pilar di kongregason. Ivanjélhu ki el skrebe ki ta konta vida i pregason di Jizus, nkoraja kristons pa monti ténpu i ti inda na nos ténpu. Na se ivanjélhu nu ta atxa kel órdi ki Jizus da di ama kunpanheru. Kel amor é marka di kes verdaderu disiplus di Jizus. — Lé João 13:34, 35.

¹⁵ Na kes três karta ki Juan skrebe nu ta atxa jóias di verdadi. Alvês nu ta xinti nos pekadu sima un karga pizadu. Má óras ki nu ta lé ma ‘sangi di Jizus ta linpa-nu di tudu pekadu’, nu ta fika más diskansadu. (1 João 1:7 ) Si nos korason kontinua ta kondena-nu, nu ka ta fika txeu kontenti óras ki nu ta lé ma ‘Deus é más grandi ki nos korason’? (1 João 3:20 ) Tanbê Juan é úniku ki skrebe ma ‘Deus é amor’. (1 João 4:8, 16 ) Na se sugundu i se tirseru karta el insentiva kristons pa kontinua ta ‘anda na verdadi’. — 2 João 4 ; 3 João 3, 4.

16, 17. Ki nkorajamentu Polu da kes primeru kriston?

¹⁶ Na ténpu di apóstlus, algen ki más nkoraja ses irmons foi apóstlu Polu. Ta parse ma, na kes primeru ténpu, kuazi tudu kes apóstlu staba na Jiruzalen, ki éra undi grupu  enkaregadu di óbra ta staba. (Atos 8:14; 15:2 ) Kes kriston na Judea ta pregaba pa kes algen ki ta kriditaba ma tinha sô un Deus. Má spritu santu manda Polu pa prega pa gregus, romanus i otus ki ta adoraba un monti Deus. — Gál. 2:7-9; 1 Tim. 2:7.

¹⁷ Polu viaja pa txeu lugar sima Grésia, Itália i pa undi ki oji é konxedu pa Turkia. La el prega pa kes algen ki ka éra judeu i el forma txeu kongregason. Kes ki bira kriston ‘sufri na mô di [ses] povu’, i es mesteba di nkorajamentu. (1 Tes. 2:14) Más ô ménus na anu 50 D.J., Polu skrebe pa kel novu kongregason na Tesalónika: ‘Nu ta agradise Deus sénpri óras ki nu ta fla nómi di nhos tudu na orason, sénpri nu ta lenbra di nhos trabadju fiel, di nhos sforsu pamodi amor i di nhos kapasidadi di aguenta’. (1 Tes. 1:2, 3) Tanbê Polu insentiva-s pa es kontinua ta da kunpanheru forsa. El fla: ‘Nhos kontinua ta nkoraja i ta djuda kunpanheru’. — 1 Tes. 5:11.

18. Modi ki grupu enkaregadu di óbra na ténpu di apóstlus nkoraja Filipi?

¹⁸ Na ténpu di apóstlus, grupu enkaregadu di óbra ta daba nkorajamentu pa kes ki ta tomaba kónta di pregason i pa tudu kes otu kristons. Pur izénplu, kantu Filipi pâpia ku samaritanus sobri Kristu, grupu enkaregadu di óbra da-l tudu ajuda ki el mesteba. Es manda Pedru ku Juan, pa ora pa kes novu kriston resebeba spritu santu. (Atos 8:5, 14-17 ) Imajina modi ki Filipi i tudu kes ki bira kristons xinti nkorajadu, ku ajuda ki grupu enkaregadu di óbra da-s!

19. Modi ki kristons na ténpu di apóstlus fika kantu es resebe karta di grupu enkaregadu di óbra?

¹⁹ Ku ténpu, grupu enkaregadu di óbra txomadu pa toma un disizon inportanti. Judeus ki ta sigiba Lei di Muizes kreba pa kes algen ki ka éra judeu fazeba sirkunsizon. (Atos 15:1, 2 ) Dipôs di analiza Skrituras i ku ajuda di spritu santu, grupu enkaregadu di óbra disidi ma es ka mesteba faze sirkunsizon. Tanbê es skrebe karta pa kongregasons. Kes ki ta reprizentaba grupu enkaregadu di óbra mandadu pa ntrega karta na kes kongregason. Kal ki foi rezultadu? ‘Dipôs ki es lé karta es fika kontenti ku kel nkorajamentu.’ — Atos 15:27-32.

20. (a) Modi ki Grupu Enkaregadu di Óbra sta nkoraja povu di Jeová na mundu interu? (b) Ki pergunta nu ta ben responde na kel otu studu?

²⁰ Oji, Grupu Enkregadu di Óbra di Tistimunhas di Jeová ta nkoraja família di Betel, kes ki trabadja pa ténpu interu i irmons na mundu interu. I rezultadu ta ser kel mésmu ki kes kriston na ténpu di apóstlu tevi, nu ta fika kontenti ku nkorajamentu. Un izénplu di kel-li é bruxura Volte para Jeová ki Grupu Enkaregadu di Óbra lansa na anu 2015. Kel-li sta ta da txeu nkorajamentu pa monti algen na mundu interu. Má é sô kes algen ki ten autoridadi ki pode imita Jeová na da nkorajamentu? Na kel otu studu nu ta ben responde es pergunta.