1. Pamodi ki apóstlu Polu fla kristons na Jiruzalen pa nkoraja kunpanheru ‘inda más gósi’?

PAMODI ki nu debe faze tudu sforsu pa nu nkoraja kunpanheru? Apóstlu Polu fla un di kes motivu na se karta ki el skrebe pa kristons na Jiruzalen. El fla: ‘I nu pensa na kunpanheru pa nu insentiva kunpanheru pa amor i pa bons óbra, ka nu dexa di sta na runion, sima alguns ta kustuma faze, má nu da kunpanheru koraji, inda más gósi ki nhos sta ta odja kel dia ta txiga.’ (Heb. 10:24, 25) Más ô ménus sinku anu dipôs, kristons judeu ki ta viveba na Jiruzalen odja kel ‘dia di Jeová’ ta txiga i es ntende sinal ki Jizus daba, pa es saíba di la. (Atos 2:19, 20 ; Lucas 21:20-22 ) Dia di Jeová ben txiga na anu 70 D.J., kantu trópas di Roma distrui Jiruzalen.

2. Pamodi ki oji nu debe sforsa pa nu nkoraja kunpanheru inda más?

² Oji nu ten txeu motivu pa kridita ma kel ‘grandi dia di Jeová i ki ta da txeu medu’ sta kuazi ta txiga. (Joel 2:11 ) Proféta Sofonias fla: ‘Kel grandi dia di Jeová sta kuazi ta  txiga! El sta pértu i el sta ta ben uma na forsa!’ (Sof. 1:14) Kel profesia li tanbê ta sirbi pa nos ténpu. Dja ki dia di Jeová sta kuazi ta txiga, Polu fla-nu pa ‘nu insentiva kunpanheru pa amor i pa bons óbra’. (Heb. 10:24, nóta di rodapé.) Pur isu, nu debe omenta interesi pa nos irmons, pa nu pode nkoraja-s sénpri ki es meste.

3. Kuzê ki apóstlu Polu fla sobri nkorajamentu? (Odja dizenhu na komésu di studu.)

³ Bíblia ta fla: ‘Preokupason dimás é un karga pa korason di ómi, má un palavra sábi ta poi korason fika kontenti.’ (Prov. 12:25) Kel-li é un grandi verdadi. Un óra ô otu, nos tudu nu ta meste obi un palavra di nkorajamentu. Polu mostra ma sikrê un algen ki ten responsabilidadi di da nkorajamentu, tanbê ta meste resebe nkorajamentu. Polu skrebe pa kes kriston ki ta viveba na Roma: ‘N tene gana di odja nhos, pa N da nhos algun don spritual pa nhos pode fika firmi, ô midjór, pa nu nkoraja kunpanheru através di nos fé, tantu di nhos ku di meu.’ (Rom. 1:11, 12) Polu ki ta mandaba pa nkoraja otus algen, tanbê el ta mesteba di nkorajamentu. — Lé Romanos 15:30-32.

4, 5. Ken ki nu pode nkoraja oji i pamodi?

⁴ Oji kes algen ki ta faze txeu na sirvisu pa Jeová meste ilojiu. Entri es bu ta atxa pionerus fiel. Monti di es, faze txeu sakrifisiu pa entra na sirvisu di pioneru. Mésmu kuza ta kontise ku misionárius, enkaregadus di grupu di kongregason ku ses mudjer i kes ki ta trabadja na Betel ô na skritórius di traduson. Tudu es faze mudansa na ses vida pa sirbi Jeová pa ténpu interu. Pur isu, es merese nkorajamentu. Ten kes irmon ki ta gostaba di kontinua na sirvisu pa ténpu interu, má pa algun motivu es ka ta pode más. Es tanbê, es ta fikaba kontenti di resebe nkorajamentu.

⁵ Irmons ku irmans ki ta kontinua solteru pamodi es krê sigi konsedju di kaza ‘sô na Sinhor’, tanbê meste pa nu nkoraja-s. (1 Cor. 7:39) Di mésmu manera, irmans ta fika kontenti óras ki ses maridu ta ilojia-s pa txeu trabadju ki es ta faze. (Prov. 31:28, 31) Tanbê, kristons ki ta kontinua fiel mésmu ku pirsigison ô duénsa, meste obi un palavra di nkorajamentu. (2 Tes. 1:3-5) Jeová i Jizus Kristu ta konsola tudu ses sérvus lial. — Lé 2 Tessalonicenses 2:16, 17.

6. Modi ki ansions ta kunpri kel ki Isaías 32:1, 2 ta fla?

⁶ Lé Isaías 32:1, 2. Jizus Kristu ta da nkorajamentu i orientason pa kes ki sta tristi i dizanimadu, na es ténpu difísil ki nu sta vive. El ta uza kes ‘prínsipi’, ki é ansions ki ta faze párti di irmons skodjedu ku spritu santu i di kes otu ovelha. Kes ansion é ka ‘dónu’ di fé di otus, má es ‘ta trabadja djuntu ku ses irmon’ pa alegria di ses irmon. — 2 Cor. 1:24.

7, 8. Alén di uza palavras di nkorajamentu, modi ki ansions pode djuda ses irmon?

⁷ Apóstlu Polu é un bon izénplu pa imita. El skrebe pa kes kriston ki staba ta pirsigidu na sidadi di Tesalónika: ‘Nton, ku amor ki nu ten pa nhos, nu staba disididu ka sô na pâpia ku nhos di notísias sábi di Deus, má tanbê na  da nhos tudu kel ki nu ten, pamodi nu pasa ta ama nhos txeu.’ — 1 Tes. 2:8.

⁸ Pa mostra ma sô un palavra di nkorajamentu nen sénpri ta txiga, Polu fla kes ansion na Éfezu: ‘Na tudu kuza, N mostra nhos ma é ku trabadju riju ki nu pode djuda kes ki ka pode. Nhos lenbra di palavra ki própi Sinhor Jizus fla: “É más sábi da di ki toma.”’ (Atus 20:35, BPK ) Polu krê nkorajaba i fazeba tudu kel ki el podeba pa se irmons. (2 Cor. 12:15) Di mésmu manera, ansions debe nkoraja i konsola ses irmons, má tanbê es debe mostra interesi sinséru i faze tudu kel ki es pode pa djuda-s. — 1 Cor. 14:3.

9. Modi ki ansions pode da konsedju di manera ki ta nkoraja?

⁹ Pa djuda un irmon talvês un ansion meste da-l konsedju. Bíblia ta mostra modi ki nu pode faze kel-li di manera ki ta nkoraja. Un bon izénplu foi Jizus. Dipôs ki el resusitadu i el bai pa Séu, el tevi ki da konsedjus fórti pa alguns kongregason na Ázia. Má repara modi ki el faze-l. Antis di el da konsedju, el ilôjia kongregasons di Éfezu, Pérgamu i Tiatira. (Apo. 2:1-5, 12, 13, 18, 19) El fla kongregason di Laodisea: ‘Tudu kes ki N ta ama, N ta koriji i N ta disiplina. Pur isu, nhos ten zelu i nhos rapende.’ (Apo. 3:19) Ansions debe imita izénplu di Jizus óras ki es meste da konsedju.

10. Modi ki nos tudu nu pode nkoraja kunpanheru?

¹⁰ É ka sô ansions ki ten responsabilidadi di nkoraja otus. Polu fla tudu kristons pa pâpia ku otus ‘kel ki ta djuda, di akordu ku nisisidadi, pa fla ken ki sta ta obi kuzê ki é dretu.’ (Efé. 4:29) Kada un di nos debe presta atenson pa odja ‘nisisidadi’ ki otus ten. Polu fla kes kriston na Jiruzalen:  ‘Nhos da forsa pa kes mô ki sta kansadu i pa kes duedju ki sta fraku, i nhos kontinua ta faze kaminhu dretu pa nhos pé, pa ken ki é manku ka fika piór, má pa el kuradu.’ (Heb. 12:12, 13) Nos tudu, ti kes más novu, pode djuda kunpanheru ku palavras di nkorajamentu.

11. Kuzê ki djuda Marta kantu el staba ku dipreson?

¹¹ Marta, * un irman ki pa uns ténpu tevi dipreson, skrebe: “Un dia N staba ta ora Jeová pa N pidi-l nkorajamentu. Más tardi, na kel mésmu dia N nkontra ku un irman más grandi, ki mostra-m amor i ma el ta preokupaba ku mi. Éra kel-li ki N sta mesteba na kel ténpu. Tanbê el fla-m ma dja el pasaba pa mésmu prubléma ki mi i modi ki el lida ku el. Asi N xinti ma N ka staba mi sô.” Talvês kel irman ka da kónta modi ki se palavras nkoraja Marta.

12, 13. Modi ki nu pode aplika konsedju ki sta na Filipenses 2:1-4 ?

¹² Polu da kel konsedju li pa tudu irmons na kongregason di Filipus: ‘Si ten algun nkorajamentu na Kristu, algun konsolu di amor, algun ajuda spritual di kunpanheru, algun sentimentu di karinhu i konpaxon, nhos intxi-m di alegria pamodi nhos ten mésmu manera di pensa i mésmu amor, nhos sta tudu unidu, nhos tene kel mésmu pensamentu. Ka nhos faze nada pa konpitison nen ku orgulhu; má ku umildadi nhos trata otus sima algen más inportanti ki nhos, ka nhos djobe sô nhos própi interesi, má tanbê interesi di otus.’ — Fil. 2:1-4.

¹³ Tudu bês nu debe djobe interesi di otus, oferese ‘konsolu di amor’, ‘algun ajuda spritual di kunpanheru’ i ‘algun sentimentu di karinhu i konpaxon’, pa nu nkoraja nos irmons i irmans.

14. Kuzê ki pode nkoraja algen?

¹⁴ Óras ki nu ta obi notísias di kes algen ki nu djuda na pasadu nu ta fika nkorajadu. É kel-li ki kontise ku apóstlu Juan. El skrebe: ‘Ka ten nada ki ta da-m más alegria ki kel-li: obi ma nhas fidju sta ta anda na verdadi.’ (3 João 4 ) Txeu pioneru ta fla ma es fika nkorajadu kantu es obi ma alguns di kes algen ki es djudaba inda sta fiel i txeu di es dja sta pioneru. Si nu lenbra un pioneru di kuzê ki el faze na pasadu, pode nkoraja-l óras ki el sta dizanimadu.

15. Modi ki nu pode nkoraja kes ki ta trabadja txeu pa irmons?

¹⁵ Txeu enkaregadu di grupu di kongregason i ses mudjer ta fla ma es xinti txeu nkorajadu óras ki es ta resebe un karta pa agradise, dipôs di es vizita un kongregason. Kel-li tanbê ta kontise ku ansions, misionárius, pionerus i betelitas. Es ta fika nkorajadu óras ki nu ta agradise-s pa tudu ses trabadju ki es ta faze pa Jeová.

16. Modi ki nu pode nkoraja un algen?

¹⁶ Ta ser un éru di nos párti, si nu atxa ma nu ka ta pode nkoraja pamodi nos é kanhadu. Nu ka meste faze monti kuza pa nu nkoraja otus, talvês sô un sorizu óras ki nu ta fla un algen mantenha. Si kel algen ka ri pa nos, kel-li pode krê fla ma el tene algun prubléma i sô obi-l talvês pode nkoraja-l. — Tia. 1:19.

17. Kuzê ki djuda un jóven ki staba txeu tristi?

 ¹⁷ Enriki, un jóven di 20 anu, staba txeu dizanimadu pamodi alguns di se família más pértu, sima se pai ki éra ansion, dexa di sirbi Jeová. Pa nkoraja-l, un enkaregadu di grupu di kongregason konvida-l pa es ba toma un kafé i el obi-l ku txeu atenson. Enriki da kónta ma úniku manera di djuda se família volta pa verdadi, éra pa el kontinua ta ser lial. Un kuza ki djuda-l txeu foi lé Salmo 46, Sofonias 3:17 i Marcos 10:29, 30.

18. (a) Kuzê ki Rei Salumon fla? (b) Ki konsedju apóstlu Polu da?

¹⁸ Izénplus di Marta i Enriki ta mostra ma nu pode nkoraja un irmon ô un irman ki meste. Rei Salumon skrebe: ‘I modi ki é bon un palavra déntu d’óra! Odjus ki ta brilha ta dexa korason kontenti; un notísia sábi ta da osu forsa’. (Prov. 15:23, 30, nóta di rodapé) Tanbê, nu pode lé artigus di Séntinela ô di nos pájina na internet, pa nkoraja un algen ki sta dizanimadu. Polu mostra ma kanta kántikus di Reinu djuntu, pode nkoraja-nu. El skrebe: ‘Nhos kontinua ta inxina i ta nkoraja kunpanheru ku salmus, lovor pa Deus i múzika spritual kantadu ku agradesimentu, ta kanta pa Jeová na korason.’ — Col. 3:16; Atos 16:25.

19. Pamodi ki nkoraja kunpanheru ta ben bira inda más inportanti i kuzê ki nu debe kontinua ta faze?

¹⁹ Nkoraja kunpanheru ta ben bira inda más inportanti, sima nu ta ba ta odja dia di Jeová ta txiga más pértu. (Heb. 10:25) Sima Polu fla kes kriston di se ténpu, ‘nhos kontinua ta nkoraja i ta djuda kunpanheru, sima nhos sta ta faze.’ — 1 Tes. 5:11.