Dja ki nu ta oferese publikasons ku bazi na Bíblia di grasa, alguns ta atxa ma é normal kôpia kes publikason i pô-s na otu site ô redi sosial. Má, faze kel-li ta viola Régras di Uzu * di nos site i dja da txeu prubléma. Na kes Régra di Uzu sta klaru ma ningen ka debe poi kes kuza li na internet: “dizenhus, imaji, publikasons na formatu dijital, markas rejistadu, múzikas, fotus, vídius ô artigus di site (kel-li ta inklui poi na kalker site, redi sosial ô site ki ta da pa manda i resebe vídius).” Pamodi ki é proibidu faze kes kuza li?

Tudu material di nos site sta protejedu pa leis i direitus di autor. Kes algen ki éra Tistimunha di Jeová i ki dipôs bira kóntra nos, djuntu ku otus algen, ta uza nos publikason na ses pájina na internet pa poi kes ki é Tistimunha di Jeová i otus algen entra na ses site. Ses obijetivu é poi dúvidas na kabésa di kes ki entra la. (Sal. 26:4; Prov. 22:5) Otus, ta uza matéria di nos publikason ô nos logotipu jw.org pa faze avizus, pa bende produtus ô pa aplikativus di internet. Pa kel-li ka kontise, nu ten leis ki ta proteje direitus di autor i marka ki nos organizason ta uza. (Prov. 27:12) Má pensa na kuzê ki pode kontise si nu dexa pesoas, ti nos irmon, poi nos  publikasons i matéria na otus site ô uza nos marka pa bende ses produtu? Si un dia nu ba kexa kóntra kes algen ô kes enpreza di komérsiu, tribunal pode ka defende-nu.

Diskarega nos publikason na otus site fóra di jw.org é txeu prigozu. Úniku grupu ki Jeová da responsabilidadi di da kumida spritual é sô ‘skravu fiel i prudenti’. (Mat. 24:45) ‘Skravu’ ta uza sô kes site li pa da kumida spritual: www.pr418.com, tv.pr418.com i wol.pr418.com. I nu ten sô três aplikativu pa telemóvel i tablet : JW Language^®, JW Library^® i JW Library Sign Language^®. Nu pode kúnfia ma kes site i aplikativus li, ka ten ninhun publisidadi nen ka sta kontaminadu pa mundu di Satanás. Si nu diskarega kumida spritual na otus site ô di otus manera, el pode sta mudadu ô kontaminadu. — Sal. 18:26; 19:8.

Tanbê, poi nos publikasons na kes site ki ta fazedu komentárius, ta fasilita kes algen ki ta pâpia mal di organizason di Jeová i krítikus. Alguns irmon fika ta diskuti na internet i es da mau tistimunhu. Kes-li é ka lugar sértu pa ‘inxina ku kalma kes ki ka ten bon atitudi.’ (2 Tim. 2:23-25; 1 Tim. 6:3-5) Alguns algen ta kria kónta falsu na redi sosial na nómi di organizason, di Grupu Enkaregadu di Óbra i di ses ajudanti. Má, ninhun irmon di Grupu Enkaregadu di Óbra ten un pájina na internet ô kónta na redi sosial.

Pâpia ku pesoas di nos site jw.org ta djuda spadja ‘notísias sábi’. (Mat. 24:14) Kes feraménta ki nu ta resebe na internet pa uza na pregason sta sénpri ta midjora. Nu krê pa tudu algen tra pruvetu di kes feraménta li. Má, sima kes Régra di Uzu ta fla, nu pode manda un kópia di un publikason pa e-mail ô manda un link di un matéria di jw.org. Óras ki nu ta pâpia ku un algen ki ten interesi sobri nos site ofisial nu sta ta orienta kel algen pa úniku fonti verdaderu di kumida spritual di ‘skravu fiel i prudenti’.