1, 2. (a) Modi ki jóvens sta ta ganha géra kóntra Satanás ku se dimónis? (Odja dizenhu na komésu di studu.) (b) Kuzê ki nu sta ben odja na es studu?

APÓSTLU Polu konpara kristons ku trópas ki sta na un géra frenti-frenti. Má es géra é ka kóntra algen sima nos, é un géra spritual. Nos inimigu é Satanás ku se dimónis i es ta izisti di verdadi. Es é bon na géra i es ten txeu spiriénsa. Pode parse ma nu ka ten xansi di ganha-s. Prinsipalmenti jóvens, ki pode parse ma é más faxi Satanás disvia-s. Modi ki es pode konsigi ganha géra kóntra Satanás ku se dimónis? Nu ten sertéza ma jóvens pode ganha i ma es sta ta ganha! Pamodi? Pamodi es sta ‘kontinua ta bira fórti na Sinhor’. Má es ta faze más di ki pidi Deus forsa. Es sta priparadu pa géra. Sima kes trópa ben trenadu, es tene ‘armadura konplétu di Deus’. — Lé Efésios 6:10-12.

² Kantu Polu faze kel konparason li, talvês el staba ta pensa na armadura ki trópas di Roma ta uzaba. (Atos 28:16 ) Na kel studu li nu sta ben odja, pamodi ki kel-li é un bon konparason. Tanbê nu sta ben odja kuzê ki alguns  jóven ta pensa sobri prublémas i vantaji di uza kada pésa di kel armadura spritual.

3, 4. Pamodi ki kes verdadi di Palavra di Deus é sima un sintu ki un trópa di Roma ta uzaba?

³ Lé Efésios 6:14. Kel sintu ki trópas di Roma ta uzaba tinha féru na el ki ta protejeba se sintura i ta djudaba pa kel koleti pizadu ka sai di lugar. Tanbê alguns sintu ta sirbiba pa prinda spada i punhal. Ku kel sintu ben pertadu, un trópa ta xintiba kunfiansa i priparadu pa bai géra.

⁴ Sima kel sintu ta protejeba un trópa, verdadis ki nu prende di Palavra di Deus ta proteje-nu di kes ensinu falsu. (João 8:31, 32 ; 1 João 4:1 ) Kada bês ki nos amor pa kes verdadi di Bíblia ta fika más fórti, é más faxi leba nos ‘koleti’ ô sigi leis di Deus. (Sal. 111:7, 8; 1 João 5:3 ) Tanbê, óras ki nu ta ntende dretu kes verdadi di Palavra di Deus, nu ta ten más kunfiansa di difende-s kóntra nos inimigu. — 1 Ped. 3:15.

5. Pamodi ki nu debe pâpia verdadi?

⁵ Óras ki verdadis di Bíblia fika roladu na nos sima un sintu, nu ta xinti gana di vive sima el ta fla i pâpia verdadi sénpri. Pamodi ki nu ka debe konta mintira? Pamodi mintira é un di kes midjór arma di Satanás. Mintira ta prujudika ken ki sta konta-l i ken ki ta kridita na el. (João 8:44 ) Pur isu, sikrê nos é inperfetu, nu debe sforsa pa nu ka konta mintira. (Efé. 4:25) Má é ka faxi di faze. Un minina di 18 anu ki txoma Abigail, fla: “Alvês é ka faxi pâpia verdadi, prinsipalmenti óras ki mintira pode libra-m di un situason difísil.” Má kuzê ki ta djuda Abigail pâpia verdadi sénpri? El fla: “Óras ki N ta pâpia verdadi, nha konsénsia ta fika linpu ku Jeová. Nha pai ku nha mai i nhas amigu sabe ma es pode kúnfia na mi.” Vitória di 23 anu fla: “Alguns pode trata-u mariadu sô pamodi bu ta pâpia verdadi i bu ta difende kuzas ki bu ta kridita na el. Má kes rezultadu bale péna. Bu ta ganha koraji, bu ta fika más amigu di Jeová i kes algen ki gosta di bo ta pasa ta kúnfia na bo.” Bu ka ta atxa ma é inportanti uza sénpri verdadi sima un sintu?

6, 7. Pamodi ki justisa pode konparadu ku koleti?

⁶ Un tipu di koleti ki trópas di Roma ta uzaba na ténpu di apóstlus, éra fetu di tiras di féru ki ta fikaba riba kunpanheru. Kes tira ta fikaba prendedu na kunpanheru ku fivélas di féru. Es ta fazeba kel koleti di manera ki ta protejeba petu ku bariga di kel trópa. Pa protejeba onbru di kel trópa, es ta uzaba otus tira di féru. Kel koleti ka ta dexaba trópa movimentaba dretu, i tudu óra el tinha ki djobeba si kes tira staba na lugar. Má éra kel koleti ki ta protejeba korason i kes otu órgon inportanti kóntra spada ô flexa.

⁷ Kes lei justu di Jeová é sima un koleti, pamodi el ta proteje nos korason ô kel tipu di algen ki nos é di pa déntu. (Prov. 4:23) Un trópa nunka ka ta trokaba un koleti di féru pa un otu tipu di koleti más fraku. Di mésmu manera, nunka nu ka debe troka kes lei justu di Jeová pa kel ki nu ta atxa ma é dretu ô mariadu. Pamodi kel ki nu sabe é mutu poku i el ka ta proteje nos korason. (Prov. 3:5, 6) Pur isu, sénpri nu ten ki  djobe si kes ‘tira di féru’ di koleti ki Jeová da-nu, sta kontinua ta proteje nos korason.

8. Pamodi ki é bon sigi leis di Jeová?

⁸ Alvês bu ta atxa ma leis di Jeová ta tra-u bu liberdadi? Daniel di 21 anu, fla: “Na skóla, profesoris ku kolégas ta fazeba mi trósa, pamodi N ta sigi kuzê ki Bíblia ta fla. Duránti un ténpu, N perde kunfiansa i N fika dizanimadu.” Modi ki Daniel sta xinti gósi? El fla: “N da kónta ma midjór kuza ki ten é sigi leis di Jeová. Alguns di nhas ‘amigu’ kumesa ta uza dróga; otus larga skóla. É tristi di odja kuzê ki es faze ku ses vida. N ka ten dúvida ma Jeová ta proteje-nu.” Un minina di 15 anu ki txoma Marízia *, fla: “Pa mi é difísil sigi leis di Jeová i ka faze kuzas ki nhas koléga ta fla ma é sábi.” Modi ki el ta konsigi? El fla: “N ta lenbra nha kabésa ma mi é Tistimunha di Jeová, i ma kel tentason é di Satanás ki krê sô disvia-m. Óras ki N ta vense un tentason, N ta xinti orgulhu di nha kabésa.”

9-11. (a) Sima Efésios 6:15 ta fla, modi ki kristons debe sta kalsadu? (b) Kuzê ki ta djuda-nu xinti avontádi óras ki nu ta pâpia di notísias sábi?

⁹ Lé Efésios 6:15. Un trópa di Roma ka podia baba géra sen sapatu. Se sandália éra fetu di três tira di péli, éra fórti, i tanbê es ta kalsaba sábi. Asi el podia andaba ku suguransa i el ka ta skoregaba.

¹⁰ Sima un sandália ta djudaba un trópa ganha géra, tanbê kristons meste ten ses pé kalsadu ku notísias sábi pa es pode leba mensaji di pas. (Isa. 52:7; Rom. 10:15) Má simé, nu meste ten koraji pa nu prega. Un irmon di 20 anu, ki txoma Robertu, fla: “N tinha medu di pâpia ku nhas koléga di skóla sobri Bíblia. N ta fikaba ku vergónha. Óras ki N djobe pa tras, N ta odja ma N ka tinha motivu di xinti si. Gósi N ta fika kontenti di da nhas koléga tistimunhu.”

¹¹ Txeu jóven da kónta ma é más faxi da tistimunhu óras ki es sta ben priparadu. Kuzê ki ta djuda-u sta priparadu? Un minina di 16 anu, ki txoma Júlia, fla: “Sénpri N ta poi publikasons na nha bólsa di skóla. Tanbê N ta obi kuzê ki nhas koléga ta fla i N ta tenta sabe na kuzê ki es ta kridita. Asi ta fika más fásil djuda-s. Óras ki N sta priparadu, N ta konsigi fla-s kuzê ki es meste sabe.” Maria di 23 anu, fla: “Si bu trata otus ku amor i bu obi-s ku atenson, bu ta sabe kuzê ki bus koléga sta ta pasa. Tanbê N ta sforsa pa N lé tudu publikasons ki ta fazedu pa jóvens. Asi N ta konsigi uza Bíblia ô jw.org pa djuda-s.” Sima kes izénplu li ta mostra, sta ben priparadu pa prega é sima uza ‘sandálias’ fórti i ki ta kalsa sábi.

12, 13. Kal ki é alguns ‘flexa di lumi’ ki Satanás ta uza?

¹² Lé Efésios 6:16. Un trópa ta karegaba un skudu grandi, ki ta kubriba el di onbru ti duedju. Skudu ta protejeba trópa pa spada, flexa ô lansa ka friba el.

¹³ Alguns ‘flexa di lumi’ ki Satanás pode manda kóntra bo é mintiras sobri Jeová. Satanás krê pa bu pensa ma Jeová ka ta preokupa ku bo i ma nunka  el ka ta ama-u. Un minina ki txoma Ida, di 19 anu, sta ta luta kóntra kuzas ki el sta xinti. El fla: “Alvês N ta atxa ma Jeová ka krê ser nha amigu i ma el sta lonji mi.” Kuzê ki el ta faze óras ki el ta xinti si? Ida fla: “Runions ta poi nha fé ta fika más fórti. Antis, N ta xintaba na nha kantu i N ka ta partisipaba, N ta atxaba ma ningen ka krê obiba mi. Gósi, N ta pripara dretu pa runion i N ta tenta da dôs ô três komentáriu. É ka faxi, má dipôs N ta xinti sábi. I nhas irmon ta da-m txeu koraji. Sénpri N ta sai di runion ku sertéza ma Jeová ta ama-m.”

14. Kuzê ki nu ta prende ku izénplu di Ida?

¹⁴ Izénplu di Ida ta mostra un verdadi inportanti: tamanhu di un skudu é sénpri kel mê, má tamanhu di nos skudu di fé pode fika pikinoti ô grandi. Kel-li ta dipende di nos. (Mat. 14:31; 2 Tes. 1:3) Kel-li ta mostra ma é inportanti nu omenta nos fé!

15, 16. Di ki manera nos speransa é sima un kapaseti?

¹⁵ Lé Efésios 6:17. Un trópa di Roma ta uzaba un kapaseti ki ta protejeba el kabésa, piskós i róstu. Un trópa podia lebaba se kapaseti na mô óras ki el ka staba ta luta.

¹⁶ Sima kapaseti ta protejeba kabésa di un trópa, nos speransa di salvason  ta proteje-nu nos menti ô kuzas ki nu ta pensa. (1 Tes. 5:8; Prov. 3:21) Tanbê nos speransa ta djuda-nu konsentra na promésas di Jeová envês di nos prubléma. (Sal. 27:1, 14; Atos 24:15 ) Má si nu krê pa nos speransa proteje-nu el ten ki ser un kuza rial pa nos. Pa kel-li kontise nu ka debe karega nos ‘kapaseti’ sô na mô, nu ten ki pô-l na kabésa.

17, 18. (a) Kuzê ki Satanás ta uza pa nu pode tra nos kapaseti? (b) Modi ki nu ta mostra ma nu ka ta dexa Satanás ngana-nu ku se manha?

¹⁷ Satanás ta tenta tra-nu nos kapaseti. Modi ki el ta faze-l? Lenbra modi ki el tenta Jizus. Satanás sabia ma Jizus tinha speransa di governa Téra un dia. Má primeru Jizus tinha ki sufreba i moreba. Dipôs el tinha ki speraba Jeová faze-l Rei. Nton Satanás oferese Jizus xansi di konsigi kel-li más sédu. Satanás fla ma si Jizus adora-l sô un bês, el podia kumesaba ta governa mundu na kel óra. (Lucas 4:5-7 ) Di mésmu manera, Satanás sabe ma Jeová promete da-nu kuzas material na kel mundu novu. Má nu ten ki spéra pa kel-la kontise. I talvês timenti nu ka txiga la, nu ta pasa pa prublémas. Pur isu, Satanás ta da-nu xansi di ten un vida sábi désdi gósi. El krê pa nu poi kuzas material na primeru lugar i Reinu na sugundu lugar. — Mat. 6:31-33.

¹⁸ Txeu jóven ka ta dexa Satanás ngana-s ku se manha. Pur izénplu, Keila di 20 anu fla: “N sabe ma úniku soluson pa nos prubléma é Reinu di Deus.” Modi ki kel speransa li ta djuda Keila na se manera di pensa i na kuzas ki el ta faze? El kontinua ta fla: “Speransa di paraízu ta djuda-m poi otus kuza ki ka é inportanti na ses lugar.” Envês di uza se ténpu i se forsa pa ten un bon vida na kel mundu li, Keila ta konsentra na sirbi Jeová.

19, 20. Modi ki nu pode midjora na uza Bíblia?

¹⁹ Na ténpu di apóstlu Polu, trópas di Roma ta uzaba un spada ki tinha uns 50 cm, ki éra fetu pa un géra frenti-frenti. Kes trópa ta trenaba ku spada tudu dia, pur isu es éra bon.

²⁰ Polu konpara Palavra di Deus ku un spada. Má nu meste prende uza-l pa nu difende nos krénsa ô midjora nos manera di pensa. (2 Cor. 10:4, 5; 2 Tim. 2:15) Modi ki nu pode midjora? Sebastian di 21 anu fla: “Kada kapítlu ki N ta lé na Bíblia N ta skodje un versíklu. N sta ta faze un lista di testus ki más N gosta. Faze kel-li ta pô-m ta pensa sima Jeová ta pensa.” Daniel ki dja nu papiaba di el antis, fla: “Na nha leitura di Bíblia N ta skodje alguns versíklu ki N sabe ma ta djuda pesoas na tiritóriu. N ta odja ma es ta reaji dretu óras ki es da kónta ma nu ta ama Bíblia i ma nu krê djuda-s.”

21. Pamodi ki nu ka debe ten medu di Satanás ku se dimónis?

²¹ Sima nu prende ku izénplu di kes jóven na es studu, nu ka meste ten medu di Satanás ku se dimónis. Nu sabe ma es ten puder, má ka más ki Jeová i nen es ka ta ben vive pa tudu ténpu. Óras ki Kristu ben governa pa mil anu, es ta podu prézu pa es ka prujudika ningen. Lógu dipôs es ta distruídu. (Apo. 20:1-3, 7-10) Nu konxe nos inimigu, ses manha i ses intenson. Ku ajuda di Jeová nu pode mante firmi kóntra Diabu!