Má simé, Jeová krê pa nu spera ku paxénxa pa el ben aji na ténpu ki el tene markadu. Pamodi ki el ta spera kel-li di nos? I kuzê ki ta djuda-nu sta kontenti timenti nu ta spera?

PAMODI KI JEOVÁ KRÊ PA NU SPERA?

Bíblia ta fla: ‘Jeová sta spera ku paxénxa pa el djuda nhos, i el ta ben labanta pa mostra nhos mizerikórdia. Pamodi Jeová é un Deus di justisa. Filís é tudu kes ki ta fika ta spera-l.’ (Isa. 30:18) Kes palavra li di proféta Izaías skrebedu primeru pa kes judeu ki éra dizobidienti. (Isa. 30:1) Má entri kes judeu, tanbê tinha alguns algen ki éra fiel, i kes palavra li ta daba es speransa. I sérvus fiel di Jeová oji pode ten kel mésmu speransa óras ki es ta lé kes palavra di Izaías.

Pur isu, nu meste spera ku paxénxa pamodi Jeová sta spera ku paxénxa. El ten un ténpu markadu pa el ben kaba ku kel mundu li i el sta spera pa kel dia i kel óra txiga. (Mat. 24:36) Ta ben fika klaru ma kes kuza ki Diabu fla kóntra Jeová i kóntra kes ki ta sirbi-l é falsu. Nton, Jeová ta ben distrui Satanás i kalker algen ki sta di se ladu, má El ta ben ‘mostra-nu mizerikórdia.’

Timenti kel dia ka txiga, Jeová talvês ka ta kaba ku nos prubléma, má el da-nu serteza ma nu pode ser filís timenti nu ta spera. Sima Izaías fla, nu pode sta kontenti timenti nu ta spera pa un kuza bon kontise. (Isa. 30:18) a Modi ki kel-li é posível? Nu ben odja kuatu kuza ki pode djuda-nu.

MODI KI NU PODE STA KONTENTI TIMENTI NU TA SPERA

Konsentra na kes kuza puzitivu. Rei Davidi odja txeu maldadi na se vida. (Sal. 37:35) Má simé el skrebe: ‘Fika kétu na frenti di Jeová i spera pa el ku gana di resebe se ajuda. Ka bu fika xatiadu pamodi ómi ki sta ta konsigi faze  ses trama.’ (Sal. 37:7) Davidi sigi kel konsedju li i el konsentra na speransa di salvason ki Jeová da-l. Tanbê, el mostra gratidon pa tudu kes benson ki el resebe di Jeová. (Sal. 40:5) Si nos tanbê, nu konsentra na kes kuza puzitivu na nos vida envês di konsentra na kes kuza negativu ki sta ta kontise, ta ser más fásil nu spera pa Jeová.

Mante okupadu ta lova Jeová. Kel skritor di Salmo 71, ki ta parse ma éra Davidi, fla Jeová: ‘N ta kontinua ta spera; N ta ben lova-u kada bês más inda.’ (Sal. 71:14) Modi ki el ta lovaba Jeová? El ta papiaba ku otus algen sobri Jeová i el ta kantaba kántikus di lovor pa el. (Sal. 71:16, 23) Sima Davidi, nu pode ten alegria timenti nu sta spera na Jeová. Nu ta lova-l óras ki nu ta prega pa otus algen, óras ki nu ta pâpia sobri el ku nos amigus i famílias i óras ki nu ta kanta nos múzikas. Di prósimu bês ki bu kanta un di nos múzika, pamodi ki bu ka ta presta atenson na se létra i na modi ki el ta pô-u ta xinti kontenti?

Dexa bus irmon ku irmans da-u koraji. Kantu Davidi pasa pa prublémas, el fla Jeová: ‘Na frenti di kes ki é lial pa bo, N ta spera na bu nómi’. (Sal. 52:9) Nos tanbê nu pode ser inkorajadu pa nos irmons ki é fiel, ka sô na nos runion i na pregason, má tanbê óras ki nu ta pasa ténpu ku es. — Rom. 1:11, 12.

Bira bu speransa más fórti. Salmo 62:5 ta fla: ‘Na Deus N ta spera kaladu, pamodi nha speransa ta ben di el.’ É txeu inportanti ten un speransa fórti, prinsipalmenti si fin ka ben na ténpu ki nu sta speraba. Nu meste ten serteza ma kes promésa di Jeová ta ben kunpri, ka ta inporta kantu ténpu nu ten ki spera pa es. Nu pode bira nos speransa más fórti óras ki nu ta studa Palavra di Deus. Pur izénplu, pensa na tudu kes profesia di Bíblia ki dja kunpri, na modi ki kes skritor di Bíblia skrebe kuzas ki sta di akordu ku kunpanheru i na kes informason ki Jeová ta da sobri se kabésa. (Sal. 1:2, 3) Tanbê, nu meste kontinua ta “faze orason ku ajuda di spritu santu”, pa nu pode kontinua ta ten un bon amizadi ku Jeová timenti nu ta spera pa se promésa di vida pa tudu ténpu kunpri. — Judas 20, 21.

Sima rei Davidi, ten serteza ma Jeová ta kuida, ta proteje i ta mostra amor lial pa tudu kes algen ki ta spera na El. (Sal. 33:18, 22) Kontinua ta spera ku paxénxa na Jeová óras ki bu ta konsentra na kes kuza puzitivu, óras ki bu ta lova-l, óras ki bu ta dexa irmons da-u koraji i óras ki bu ta bira bu speransa más fórti.