1. Da un izénplu ki ta mostra pamodi ki nu meste pa Jeová orienta-nu.

 IMAJINA ma bu perde na un florésta. Ten txeu prigu na bu vólta sima animal brabu, insétus ki pode pasa duénsa, plantas ki ten venénu i txon ku txeu pédra i braku. Bu ta fikaba txeu kontenti si bu tinha un gia ki ten spiriénsia djuntu ku bo ki sabia undi ki prigu staba i modi ki bu pode ivitaba prigu! Oji, mundu sta sima kel florésta li. El sta ku txeu prigu ki pode prujudika prinsipalmenti nos amizadi ku Jeová. Má nu ten Jeová, ki é kel Gia perfeitu. El ta libra-nu di prigu i el ta leba-nu pa undi ki nu sta bai ki é pa vida pa tudu ténpu na mundu novu.

2. Modi ki Jeová sta gia-nu?

² Modi ki Jeová ta gia-nu? El ta faze kel-li prinsipalmenti através di se Palavra, ki é Bíblia. Má tanbê, el ta uza ómis pa gia-nu. Pur izénplu, el ta uza “skravu fiel i prudenti” pa da-nu kumida spritual ki ta djuda-nu kontinua ta toma disizons ku sabedoria. (Mat. 24:45) Jeová tanbê ta uza otus ómi ki ten kapasidadi pa gia-nu. Pur izénplu, enkaregadus di grupu di kongregason i ansions na kongregason ta da-nu inkorajamentu i instruson ki ta djuda-nu duránti ténpus difísil. Nos é gratu pamodi kes orientason di kunfiansa ki Jeová sta da-nu duránti kes últimu dia difísil li. Kes orientason li ta djuda-nu kontinua ta ser amigu di Jeová i kontinua ta anda na kaminhu di vida pa tudu ténpu.

3. Kuzê ki nu sta ben odja na kel studu li?

³ Má alvês, nu ta atxa ma é difísil sigi orientasons di Jeová, prinsipalmenti óras ki é un ómi inperfeitu ki da kel orientason. Pamodi ki kel-li ta kontise? Pamodi kel orientason ki dadu talvês é ka kel ki nu ta gostaba di obi.  Ô pode ser ki nu ta atxa ma kel orientason ka ta faze sentidu, pur isu nu ta atxa ma el ka ben di Jeová. Na kes situason li, nu meste kunfia prinsipalmenti ma é Jeová ki sta ta orienta se povu i ma sigi se orientasons sénpri ta traze bensons. Pa djuda-nu bira nos kunfiansa más fórti, nu ta ben odja na kel studu li (1) modi ki Jeová gia se povu na pasadu, (2) modi ki el sta ta gia se povu oji i (3) ki bensons nu ta resebe si nu kontinua ta sigi se orientason.

MODI KI JEOVÁ ORIENTA ISRAELITAS

4-5. Modi ki Jeová mostra ma el staba ta uza Muizés pa orienta Se povu? (Odja dizenhu na kapa.)

⁴ Jeová skodje Muizés pa tra israelitas di Ijitu. I Jeová da-s próvas klaru ki ta mostra ma el sta giaba es através di Muizés. Pur izénplu, El uza un koluna di núven di dia i un koluna di lumi di noti. (Êxo. 13:21) Muizés sigi kel koluna ki leba israelitas pa mar Brumedju. Má dipôs, kes genti di Ijitu pirsigi kes israelita. Nton, kes israelita fika ku txeu medu pamodi es pensa ma kes genti di Ijitu ta mataba es. I es pensa ma Muizés toma un disizon mariadu kantu el leba-s pa mar Brumedju. Má ka foi un éru. Jeová uza Muizés pa leba se povu ti la. (Êxo. 14:2) I kel-la da Jeová oportunidadi di mostra se puder di un manera ki poi pesoas ta fika dimiradu. — Êxo. 14:26-28.

⁵ Duránti 40 anu, Muizés kontinua ta kunfia ma Jeová ta uzaba kel koluna pa giaba se povu na dizértu. a Pa un ténpu, Jeová poi kel koluna di núven pa riba ténda di Muizés, pa tudu israelitas pode odjaba el. (Êxo. 33:7, 9, 10) Jeová ta papiaba ku Muizés através di kel koluna, i Muizés ta flaba povu kuzê ki Jeová flaba el. (Sal. 99:7) Israelitas pode odjaba klaru ma Jeová staba ta uza Muizés pa giaba es.

6. Modi ki israelitas reaji kantu es resebe orientason di Jeová? (Números 14:2, 10, 11)

⁶ Infilismenti, maioria di kes israelita nega tudu kes próva ki ta mostra ma Jeová staba ta pâpia através di Muizés. (Lé Números 14:2, 10, 11.) Txeu bês, es nega seta ma Jeová staba ta uza Muizés pa giaba es. Pamodi kel-li, Jeová ka dexa-s entra na kel téra ki el prometeba es. — Núm. 14:30.

7. Da izénplu di pesoas ki sigi orientason di Jeová. (Números 14:24) (Odja dizenhu.)

⁷ Má alguns israelita sigi orientason di Jeová. Pur izénplu, Jeová fla: ‘Kalebi kontinua ta sigi-m di tudu korason’. (Lé Números 14:24.) Deus rekonpensa Kalebi, i ti mésmu el dexa-l skodje na undi ki el krê moraba na kel téra ki el prometeba es. (Jos. 14:12-14) Kes israelita ki entra na kel téra ki Deus prometeba es, tanbê dexa un bon izénplu di algen ki sigi orientason di Jeová. Kantu Juzué skodjedu pa gia israelitas na lugar di Muizés, ‘es pasa ta ruspeta-l di korason duránti tudu se vida’. (Jos. 4:14) Pamodi kel-li, Jeová abênsua israelitas i el leba-s pa kel téra ki el prometeba es. — Jos. 21:43, 44.

8. Splika modi ki Jeová gia se povu duránti ténpu di kes rei. (Odja dizenhu.)

⁸ Alguns anu dipôs, Jeová uza alguns juís pa orienta se povu. Dipôs duránti  ténpu di kes rei, Jeová skodje profétas pa orienta se povu. Kes rei fiel sigi konsedju di profétas. Pur izénplu, rei Davidi seta ku umildadi kantu proféta Natan koriji-l. (2 Sam. 12:7, 13; 1 Cró. 17:3, 4) Rei Jeozafá sigi konsedju di proféta Jaaziel, i el insentiva povu pa ‘poi fé na profétas di Deus’. (2 Cró. 20:14, 15, 20) Kantu rei Ezekias staba preokupadu dimás, el djobe ajuda na proféta Izaías. (Isa. 37:1-6) Tudu bês ki kes rei li sigiba orientason di Jeová, el ta abensuaba es i el ta protejeba se povu. (2 Cró. 20:29, 30; 32:22) Tudu algen pode odjaba klaru ma Jeová staba ta uza se profétas pa orienta se povu. Má, maioria di kes rei i israelitas ka obi ku profétas di Jeová. — Jer. 35:12-15.

MODI KI JEOVÁ ORIENTA KRISTONS NA TÉNPU DI APÓSTLUS

9. Kenha ki Jizus uza pa orienta kes primeru kriston? (Odja dizenhu.)

⁹ Dipôs ki Jizus resusitadu, Jeová forma kongregasons. Modi ki el orienta kes primeru kriston? El skodje Jizus pa ser kabésa di kongregason. (Efé. 5:23) Má Jizus ka pâpia ku kada un di se disiplus pa fla-s kuzê ki es ta fazeba. El uza apóstlus i ansions na Jiruzalen pa tomaba kónta di kes primeru kriston. (Atus 15:1, 2) Tanbê, ansions skodjedu pa orienta kongregasons. — 1 Tes. 5:12; Titu 1:5.

10. (a) Modi ki maioria di kes kriston na ténpu di apóstlus reaji kantu es resebe orientason? (Atus 15:30, 31) (b) Pamodi ki alguns algen na ténpu ki Bíblia skrebedu ka sigi kes orientason ki Jeová da-s? (Odja kuadru “ Pamodi ki alguns algen ka ta seta ma Jeová sta uza ómis pa orienta se povu”.)

¹⁰ Modi ki kes primeru kriston na ténpu di apóstlus reaji? Maioria di es fika kontenti di sigi kes orientason ki es resebe. Na verdadi, “es fika kontenti ku kes palavra di inkorajamentu” ki es resebe. (Lé Atus 15:30, 31.) Má modi ki Jeová sta ta orienta se povu na nos ténpu?

MODI KI JEOVÁ STA ORIENTA-NU OJI

11. Da un izénplu ki ta mostra ma Jeová sta ta orienta se povu na nos ténpu.

¹¹ Jeová sta kontinua ta orienta se povu oji. El ta faze kel-li através di  se Palavra, ki é Bíblia, i di se Fidju ki é kabésa di kongregason. Nu ten próvas klaru ki ta mostra tanbê ma Deus sta kontinua ta uza ómis pa orienta se povu? Sin. Pur izénplu, pensa na kuzê ki kontise dipôs di anu 1870. Charles Taze Russell ku se kunpanherus kumesa ta intende ma anu di 1914 ta sérba un anu inportanti pa Reinu di Deus. (Dan. 4:25, 26) Es konsigi intende kel-li ku bazi na profesias ki sta na Bíblia. Jeová staba ta orienta kes piskiza ki es staba ta faze? Klaru ki sin. Kuzas ki kontise na mundu na anu 1914 prova ma Reinu di Deus dja kumesaba ta governa. Na kel anu, Primeru Géra na Mundu Interu kumesa, i dipôs tevi txeu duénsa, tremor di téra i falta di kumida. (Luk. 21:10, 11) Jeová di serteza uza kes ómi sinseru li pa djuda se povu.

12-13. Kuzê ki fazedu duránti Sugundu Géra na Mundu Interu ki poi trabadju di pregason ta omenta?

¹² Repara tanbê kuzê ki kontise duránti Sugundu Géra na Mundu Interu. Dipôs di studa Apokalipse 17:8, kes irmon responsável di Sédi Mundial odja ma dipôs di géra ka ta binha Armajedon, má un ténpu di pas. I Tistimunhas di Jeová ta tinha oportunidadi di prega pa más algen inda. Nton, es toma un disizon ki ta parseba ma ka ta fazeba txeu sentidu, ki éra kria Skóla di Jiliádi di Tori di Vijia pa trena misionárius pa prega i inxina na txeu lugar na mundu. Txeu misionáriu mandadu pa ba prega, sikrê ku géra. Tanbê, skravu fiel kria Kursu di Ministériu Tiokrátiku b pa djuda tudu algen na kongregason midjora na prega i na inxina. Di kel manera li, povu di Deus staba ta priparadu pa un grandi trabadju ki es tinha ki faze.

¹³ Oji nu ta odja klaru ma Jeová staba ta orienta se povu duránti kel ténpu difísil. Désdi Sugundu Géra na Mundu Interu, povu di Jeová sta konsigi faze ses trabadju di pregason di manera livri na txeu país. Na verdadi, trabadju di pregason sta ta omenta.

14. Pamodi ki nu pode kunfia na orientason ki ta ben di organizason di Jeová i di kes ansion skodjedu? (Apokalipse 2:1) (Odja fotu.)

 ¹⁴ Oji kes irmon di Grupu Enkaregadu di Óbra sta kontinua ta sigi orientason di Jizus. Es ta faze kel-li óras ki es ta ten serteza ma kes disizon ki es ta toma sta di akordu ku kel ki Jizus krê. I es ta uza kes enkaregadu di grupu di kongregason i ansions pa da kongregasons kes orientason. c Kes ansion skodjedu ku spritu santu sta na “mô direita” di Jizus. (Lé Apokalipse 2:1.) É klaru ki tudu kes ansion é inperfeitu i es ta fadja. Muizés i Juzué fadja alvês, i kes apóstlu tanbê. (Núm. 20:12; Jos. 9:14, 15; Rom. 3:23) Má nu pode odja ma Jizus sta ta orienta skravu fiel i kes ansion skodjedu, i el ta kontinua ta faze kel-li “tudu dia, ti fin di es mundu.” (Mat. 28:20) Pur isu, nu ten tudu motivu pa nu kunfia na orientason ki Jizus sta ta da através di kes skodjedu ki sta toma kónta di povu di Deus.

BENSONS KI NU TA RESEBE SI NU KONTINUA TA SIGI ORIENTASON DI JEOVÁ

15-16. Kuzê ki bu prende ku spiriénsia di kes ki sigi orientason di Jeová?

¹⁵ Óras ki nu kontinua ta sigi orientason di Jeová, nu ta resebe bensons désdi gósi. Pur izénplu, Andy i Robyn obi ku kel konsedju di skravu fiel di ten un vida sinplis. (Odja Ebreus 13:5.) Pamodi kel-li, es konsigi trabadja na prujétus di konstruson di organizason. Robyn fla: “Alvês nu ta moraba na lugar txeu pikinoti ki txeu bês ka tinha kuzinha. N tevi ki bende txeu ekipamentu ki N ta uzaba pa N tra fotu ki éra un kuza ki N gostaba txeu. N txora kantu N bende-s. Má sima Sara, ki éra mudjer di Abraon, N staba disididu na odja pa frenti, i ka odja pa tras.” (Ebr. 11:15) Kuzê ki kel kazal ganha ku kel spiriénsia li? Robyn fla: “Nu sta txeu kontenti di sabe ma nu sta da Jeová tudu kel ki nu ten. Óras ki nu ta trabadja na diziginasons di organizason nu ta ten un ideia di modi ki vida ta ben ser na mundu novu.” Se maridu, Andy ta konkorda. El fla: “Nu sta kontenti di sabe ma nu sta ta gasta tudu nos ténpu i forsa pa Jeová.”

 ¹⁶ Ki otu benson nu ta resebe si nu kontinua ta sigi orientason di Jeová? Dipôs ki Marcia tirmina liseu, el sigi un konsedju ki el dadu pa ser pionera. (Mat. 6:33; Rom. 12:11) El fla: “N dadu un bólsa pa N ba studa kuatu anu na un universidadi. Má, N krê daba nha midjór pa Jeová. Pur isu, N faze un formason pa N prende un trabadju ki ta djudaba mi ganha dinheru ki ta daba pa N sérba pionera. Kel-li foi kel midjór disizon ki dja N toma. Gósi ami é pionera, i nha trabadju ta dexa-m apoia na Betel i N ten otus priviléjiu spesial.”

17. Ki otus benson nu ta resebe si nu kontinua ta sigi orientason di Jeová ? (Isaías 48:17, 18)

¹⁷ Alvês, nu ta resebe konsedjus di organizason ki ta proteje-nu. Pur izénplu, nu ta avizadu sobri prigu di ama dinheru i sobri faze kuzas ki pode pô-nu ta dizobidese leis di Deus. Nu ta resebe bensons di Jeová si nu sigi kes konsedju li. Nu ta ten un konsénsia linpu i nu ta ivita txeu prubléma. (1 Tim. 6:9, 10) Pamodi kel-li, nu ta pode sirbi Jeová di tudu nos korason. Ka ten nada ki ta da-nu más alegria i pas na vida. — Lé Isaías 48:17, 18.

18. Pamodi ki bu sta disididu na kontinua ta sigi orientason di Jeová?

¹⁸ Nu ka ten dúvida ma Jeová ta kontinua ta uza kes algen ki el skodje pa el da-nu orientason duránti grandi tribulason i duránti govérnu di mil anu. (Sal. 45:16) Nu ta kontinua ta sigi orientason sikrê nu ta prifiri faze kuzas di nos manera? Tudu ta dipende di modi ki nu sta reaji gósi óras ki nu resebe orientason di Jeová. Pur isu, nu krê sigi sénpri orientason di Jeová i kel-li ta inklui kel ki el ta da-nu através di ómis ki el skodje pa kuida di nos. (Isa. 32:1, 2; Ebr. 13:17) Nu pode sigi nos gia Jeová pamodi el ta libra-nu di kalker kuza ki pode prujudika nos amizadi ku el i el ta leba-nu pa vida pa tudu ténpu na mundu novu.