1-2. Kuzê ki ta djuda-nu intende modi ki Jeová xinti kantu es mantxa se nómi?

 IMAJINA kel situason li: Un algen ki bu gosta txeu di el ta pâpia mal di bo. Bu sabe ma kel ki el fla é mintira. Má alguns algen ta kridita na el. I pa piora situason, es ta kumesa ta spadja kes mintira i otus algen ta kridita na es tanbê. Modi ki bu ta xintiba? Si bu ta preokupa txeu ku kes algen li i na ten un bon nómi, kes kuza ta pô-u xinti kasábi, i bu ta fika tristi. — Pro. 22:1.

² Kel situason li ta djuda-nu intende modi ki Jeová xinti kantu es mantxa se nómi. Un di se anjus na séu konta Eva, kel primeru mudjer, mintira sobri el. Eva kridita na kel mintira. Pamodi kel mintira li, Adon rabela kóntra Jeová. Rezultadu é ki pekadu i mórti spadja pa tudu algen. (Gén. 3:1-6; Rom. 5:12) Tudu kes prubléma ki ten na mundu oji, sima mórti, géra i sufrimentu ta izisti pamodi kel mintira ki Satanás kumesa ta spadja na jardin di Éden. Modi ki Jeová ta xinti óras ki el ta odja tudu kes prubléma ki kes mintira li traze? Di serteza el ta xinti txeu tristi. Má simé, Jeová ka guarda rankor. Na verdadi, el kontinua ta ser “kel Deus filís.” — 1 Tim. 1:11.

3. Ki priviléjiu nu ten?

³ Nu ten priviléjiu di djuda prova ma Satanás konta mintira sobri Jeová. Nu ta faze kel-li óras ki nu ta obi ku kel órdi sinplis li: ‘Nhos lova nómi di Jeová.’ (Sal. 113:1) Nu ta lova nómi di Jeová óras ki nu ta pâpia dretu di el. Bu sta ta faze kel-li? Nu ben odja três motivu ki ta djuda-nu lova nómi di nos Deus di tudu korason.

 JEOVÁ TA FIKA FILÍS ÓRAS KI NU TA LOVA SE NÓMI

4. Pamodi ki nu ta dexa Jeová kontenti óras ki nu ta lova-l? Da un izénplu. (Odja fotu.)

⁴ Nu ta dexa nos Pai na séu filís óras ki nu ta lova se nómi. (Sal. 119:108) Má kel-li krê fla ma nos Deus ki ten txeu puder é sima kes algen inperfeitu ki ta krê pa otus algen ilojia-s sô pa es pode xinti dretu? Nau. Nu ben odja un izénplu. Imajina un minininha ta kóre, ta brasa se pai i el ta fla-l: “Abo é midjór pai di mundu!” Se pai ta da un sorizu i el ta fika txeu kontenti ku kuzê ki se fidju-fémia faze. Pamodi? Kel-li krê fla ma el é un ómi ki ka ten kunfiansa na se kabésa i ki meste pa se fidju-fémia da-l ilojiu? Nau. Kel pai ta ama se fidju-fémia, i el ta fika kontenti di odja-l ta mostra amor i gratidon pa el. El sabe ma óras ki se fidju-fémia bira grandi, el ta ser un algen filís pamodi el ta mostra amor i gratidon. Di mésmu manera, Jeová ki é kel midjór Pai ki ten, ta fika kontenti óras ki nu ta lova-l.

5. Óras ki nu ta lova Jeová, kuzê ki nu ta djuda prova?

⁵ Óras ki nu ta lova Jeová, nu ta djuda prova ma tudu kes otu kuza ki Satanás fla sobri kada un di nos é mintira. El fla ma ninhun algen ka ta difende nómi di Jeová ku lialdadi. Satanás fla ma ninhun algen ka ta mante lial pa Deus óras ki es ta pasa pa provason. El fla ma nos tudu nu ta para di sirbi Jeová si nu oferesedu un kuza midjór. (Jó 1:9-11; 2:4) Má Jó, ki éra un sérvu fiel, prova ma Satanás é mintirozu. I nos? Kada un di nos pode skodje difende nos Pai i pô-l ta fika kontenti óras ki nu ta sirbi-l di manera fiel. (Pro. 27:11) É un onra faze kel-li.

6. Modi ki nu pode imita rei Davidi i kes levita? (Neemias 9:5)

⁶ Kes ki ta ama Jeová ta krê lova se nómi di tudu ses korason. Rei Davidi skrebe: ‘Pa nha alma lova Jeová, pa tudu kel ki N ten na mi lova se nómi santu.’ (Sal. 103:1) Davidi sabia ma óras ki nu ta lova nómi di Jeová é mésmu kuza ki lova Jeová. Óras ki nu ta obi nómi di Jeová, nu ta pensa na ki tipu di algen el é. Nu ta pensa na tudu kualidadis bunitu ki el ten i na tudu kuzas sábi ki dja el faze. Davidi sabia ma nómi se Pai é santu, pur isu el ta lovaba el. El krê fazeba kel-li ku ‘tudu kel ki el tinha’, ô di tudu se korason. Di mésmu manera, kes  levita éra kes primeru na lova Jeová. Ku umildadi, es rekonhese ma ses palavra nunka ka ta konsigi flaba tudu kel lovor ki nómi sagradu di Jeová ta merese. (Lé Neemias 9:5.) Nu ka ten dúvida ma ses umildadi poi Jeová ta fika txeu kontenti.

7. Modi ki nu pode lova Jeová na pregason i na nos dia-dia?

⁷ Oji nu ta poi Jeová kontenti óras ki nu ta pâpia di el di un manera ki ta mostra modi ki nu ten txeu gratidon i amor pa el. Óras ki nu ta prega, nos obijetivu prinsipal é djuda otus algen bira amigu di Jeová i xinti kel mésmu kuza ki nu ta xinti pa nos Pai ki krê-nu txeu. (Tia. 4:8) Nu ta xinti sábi di mostra otus algen modi ki Bíblia ta pâpia di Jeová i ta mostra se amor, justisa, sabedoria, puder i otus kualidadi bunitu. Tanbê, nu ta lova Jeová i nu ta dexa-l kontenti óras ki nu ta faze nos midjór pa imita-l. (Efé. 5:1) Óras ki nu ta faze kel-li, otus algen ta odja ma nos é diferenti di pesoas na nos vólta. (Mat. 5:14-16) Óras ki nu ta konvive ku es na dia-dia, nu pode ten xansi di splika-s pamodi ki nos é si. I pamodi kel-li, alguns algen ki é sinseru ta krê bira amigu di Deus. Óras ki nu ta lova Jeová di kel manera li, el ta fika txeu kontenti. — 1 Tim. 2:3, 4.

NU TA DEXA JIZUS FILÍS ÓRAS KI NU TA LOVA NÓMI DI JEOVÁ

8. Pamodi ki Jizus é kel midjór izénplu di algen ki lova Jeová?

⁸ Ka ten ningen na séu ô na téra ki konxe Jeová midjór di ki Jizus. (Mat. 11:27) Jizus ta ama se Pai, i el é midjór izénplu di algen ki lova nómi di Jeová. (Juan 14:31) Na un orason ki el faze na kel noti antis di el móre, el pâpia di kel kuza más inportanti ki el faze duránti se pregason na téra. El fla: “N pô-s ta konxe bu nómi”. (Juan 17:26) Kuzê ki Jizus krê flaba ku kel-li?

9. Modi ki Jizus uza un ilustrason pa splika di manera klaru modi ki se Pai é?

⁹ Jizus faze más di ki sô inxina pesoas nómi di Deus, ki é Jeová. Kes judeu ki Jizus inxina dja konxeba nómi di Deus. Má Jizus é kel primeru ki ‘splika ken ki Deus é.’ (Juan 1:17, 18) Pur izénplu, Skrituras Ebraiku ta fla ma Jeová ten mizerikórdia i konpaxon. (Êxo. 34:5-7) Jizus mostra kel-li klaru kantu el konta kel ilustrason di kel pai i kel fidju ki perde. Kel pai odja se fidju ki staba rapendidu “kantu inda el staba lonji”, el kóre pa el, el brasa-l i el purdua-l di korason. Kel-li ta mostra-nu klaru modi ki mizerikórdia i konpaxon di Jeová é. (Luk. 15:11-32) Jizus djuda otus algen intende ki tipu di algen ki Jeová é di verdadi.

10. (a) Modi ki nu sabe ma Jizus uza nómi di se Pai i ma el krê pa otus algen faze mésmu kuza? (Markus 5:19)(Odja dizenhu.) (b) Kuzê ki Jizus krê pa nu faze?

¹⁰ Jizus tanbê kreba pa otus algen uzaba nómi di se Pai? Klaru ki sin. Alguns xéfi di relijion ta atxaba ma é falta di ruspetu uza nómi di Deus, má Jizus nunka ka dexa kel tradison li, ki ka ten bazi na Bíblia, inpidi-l di da onra pa nómi di se Pai. Un bês, Jizus kura un ómi ki tinha dimóni, na téra di jerazenus. Kes algen fika ku medu i es pidi Jizus pa sai di la. Pur isu, el ka fika na kel lugar. (Mar. 5:16, 17) Má simé, Jizus kreba pa kes algen di la konxeba nómi di Jeová. Nton, Jizus fla kel ómi ki el  kura, pa ka fla pesoas kuzê ki el fazeba, má kuzê ki Jeová faze pa el. (Lé Markus 5:19.) a Jizus tanbê krê pa nu djuda otus algen konxe nómi di se Pai na mundu interu. (Mat. 24:14; 28:19, 20) Óras ki nu ta faze nos párti, nu ta dexa nos Rei, Jizus, kontenti.

11. Sobri kuzê ki Jizus inxina se sigidoris ora, i pamodi ki kel-li é inportanti? (Ezequiel 36:23)

¹¹ Jizus sabia ma vontadi di Jeová é bira Se nómi santu i linpa-l di tudu mintira ki Satanás konta kóntra el. É pur isu ki Jizus inxina se sigidoris pa ora si: “Nos Pai ki sta na séu, pa bu nómi ser santifikadu.” (Mat. 6:9) Jizus ta intendeba ma kel-li é kel asuntu más inportanti ki ta involve tudu kriason. (Lé Ezequiel 36:23.) Ka ten ningen na séu ku téra ki faze más kuza pa bira nómi di Jeová santu di ki Jizus. Má, di kuzê ki inimigus di Jizus akuza-l kantu el podu prézu? Di pâpia kóntra Deus! Di serteza Jizus sabia ma pâpia kóntra nómi santu di se Pai é kel pekadu más gravi ki ten. Jizus staba txeu preokupadu pamodi es akuza-l i es kondena-l pa kel krimi li. Kel-li talvês é kel motivu prinsipal ki poi Jizus ta fika “txeu angustiadu” na kes óra antis di el móre. — Luk. 22:41-44.

12. Modi ki Jizus santifika nómi di se Pai di kel midjór manera ki ten?

¹² Pa santifika nómi di se Pai, Jizus aguenta tudu tipu di tortura, insultu i mintiras kóntra el. El sabia ma el debe obiba ku se Pai na tudu kuza. I el ka tinha ninhun motivu pa el xintiba vergónha. (Ebr. 12:2) El sabia tanbê ma Satanás staba ta akuzaba el na kel momentu difísil. (Luk. 22:2-4; 23:33, 34) Di serteza Satanás kreba pa Jizus dexaba di ser lial pa Jeová. Má Satanás fadja konpletamenti! Jizus prova ma Satanás é un mintirozu kruel i ma Jeová ten sérvus lial ki ta kontinua fiel pa el, sikrê óras ki es pasa pa situasons difísil!

13. Modi ki bu pode dexa bu Rei ki sta ta governa kontenti?

¹³ Bu krê dexa bu Rei ki sta ta governa  kontenti? Kontinua ta lova nómi di Jeová i ta djuda otus algen prende tudu kes kualidadi bunitu di nos Deus. Óras ki bu faze si, bu sta ta imita Jizus. (1 Ped. 2:21) Sima Jizus, bu sta ta dexa Jeová kontenti i bu ta prova ma Satanás, ki é Se inimigu, é un mintirozu diskaradu!

NU TA DJUDA OTUS ALGEN SALVA ÓRAS KI NU TA LOVA NÓMI DI JEOVÁ

14-15. Ki kuzas bunitu pode kontise óras ki nu ta inxina pesoas sobri Jeová?

¹⁴ Óras ki nu ta lova nómi di Jeová, nu ta djuda salva vida di pesoas. Modi ki nu ta faze kel-li? Satanás ‘sega menti di kes ki é ka krenti’. (2 Kor. 4:4) Pamodi kel-li, es fika ta kridita na kes mintira di Satanás. Pur izénplu, es ta kridita ma Deus ka ta izisti, ma el sta lonji di nos i ma el ka ta inporta ku algen. Tanbê, es ta atxa ma Deus é mau i ma el ta tortura kes algen mau pa tudu ténpu. Satanás konta tudu kes mintira li pamodi el krê mantxa nómi di Jeová i el ka krê pa pesoas bira amigu di Deus. Má óras ki nu ta prega, nu ta inpidi Satanás di kunpri ku se obijetivu. Nu ta inxina pesoas verdadi sobri nos Pai, óras ki nu ta lova se nómi santu. Kal ki é rezultadu?

¹⁵ Kes verdadi di Palavra di Deus ten txeu puder. Óras ki nu ta inxina pesoas sobri Jeová i verdadis sobri el, nu ta odja un kuza bunitu ta kontise. Pesoas ka ta fika inganadu dimás ku kes mintira di Satanás i es ta ben odja kualidadis bunitu di nos Pai. Es ta fika dimiradu ku puder di Jeová ki ka ten limiti. (Isa. 40:26) Es ta prende kunfia na el pamodi se justisa é perfeitu. (Deut. 32:4) Es ta prende txeu ku se grandi sabedoria. (Isa. 55:9; Rom. 11:33) I es ta fika konsoladu di sabe ma Jeová é amor. (1 Juan 4:8) Sima es ta ba ta bira más amigu di Jeová, ses speransa di vive pa tudu ténpu sima se fidjus, ta bira rial pa es. Pa nos é un priviléjiu grandi djuda otus algen bira más amigu di nos Pai! Óras ki nu ta faze kel-li, Jeová ta odja-nu sima se “kolaborador”. — 1 Kor. 3:5, 9.

16. Modi ki pesoas talvês ta xinti óras ki es prende sobri nómi di Deus? Da izénplus.

 ¹⁶ Na komésu, talvês nu pode sô inxina pesoas ma nómi di Deus é Jeová, i kel-li pode toka korason di kes algen sinseru. Pur izénplu, un jóven ki txomaba Alia b kriadu na un relijion ki ka ta kridita na Jizus. Má, el ka staba kontenti ku se relijion, i el ka ta xintiba ma el éra amigu di Deus. Kel-li muda kantu el kumesa ta studa Bíblia ku Tistimunhas di Jeová. El kumesa ta odja Deus sima se Amigu. I el fika spantadu di sabe ma nómi di Deus tradu di txeu Bíblia i ma el mudadu pa titlus, sima Sinhor. Prende nómi di Jeová foi un kuza inportanti na se vida. El fla: “Nha midjór Amigu ten un nómi!” Kal ki foi rezultadu? El fla: “Gósi N ta xinti pas na nha korason. Pa mi, kel-li é un onra.” Un ómi ki txomaba Stiven, éra múziku i se família éra judeu, i es éra txeu relijiozu. El ka krê fazeba párti di relijion más pamodi el odja txeu finjimentu. Má dipôs ki se mai móre, el seta studa Bíblia ku un Tistimunha di Jeová. Prende nómi di Deus toka se korason. El fla: “Nunka N ka inxinadu ma Deus ten nómi.” Tanbê el fla: “Pa primeru bês N intende ma Deus é rial! Gósi N ta odja-l sima un Algen. N sabia ma dja N atxaba un Amigu di verdadi.”

17. Pamodi ki bu sta disididu na kontinua ta lova nómi di Jeová? (Odja fotu.)

¹⁷ Na bu trabadju di prega i inxina, bu ta pâpia ku otus algen sobri nómi di Jeová ki é sagradu? Bu ta djuda-s odja modi ki nos Deus é di verdadi? Si bu ta faze kel-li, bu ta lova nómi di Deus. Bu ta kontinua ta lova nómi santu di Jeová óras ki bu ta djuda otus algen konxe-l. Di kel manera li bu ta salva vidas. Bu ta sigi izénplu di bu Rei, Jizus Kristu. I más inportanti inda, bu ta dexa Jeová, bu Pai ki krê-u txeu kontenti. Kontinua ta ‘lova [se] nómi pa tudu ténpu’! — Sal. 145:2.