SKRITORIS di Bíblia alvês ta ripitiba alguns frazi palavra pa palavra. Odja três motivu ki talvês pô-s ta faze kel-li:

Ténpu ki el skrebedu. Na ténpu di Israel antigu, maioria di algen ka tinha un kópia di Lei. Es ta obiba leitura di Lei prinsipalmenti óras ki es ta djuntaba na frenti di tabernáklu. (Deut. 31:10-12) Talvês éra fásil es fikaba distraídu dja ki es ta fikaba di pé duránti alguns óra na meiu di txeu algen ta obiba Lei. (Nee. 8:2, 3, 7) Pur isu, pa pesoas konsigi lenbraba di kuzê ki ledu i dipôs aplika kel konsedju na ses vida, es ta ripitiba kes frazi más inportanti. Ripiti kes frazi ta djudaba es lenbra di alguns kuza inportanti di Lei ki Jeová daba es. — Lev. 18:4-22; Deut. 5:1.

Modi ki el skrebedu. Uns 10 pursentu di Bíblia é kántikus, ki ta inklui Salmos, Cântico de Salomão i Lamentações. Alvês kes kántiku tinha palavras ki ta ripitiba. Kel-li ta distakaba téma di kántiku i ta djudaba kes algen ki staba ta obi dikoraba kes palavra. Pur izénplu, repara kes palavra ki sta na Salmo 115:9-11: ‘Ó Israel, nhos kunfia na Jeová, el é nhos ajuda i nhos skudu. Ó kaza di Aron, nhos kunfia na Jeová, el é nhos ajuda i nhos skudu. Nhos ki ten grandi ruspetu pa Jeová, nhos kunfia na Jeová, el é nhos ajuda i nhos skudu.’ Ripiti kes palavra li ta djudaba kes kantor kontinua ku kes pensamentu li ki ten txeu valor, na ses menti i korason.

Pamodi ki el skrebedu. Skritoris di Bíblia alvês ta ripitiba frazis inportanti. Pur izénplu, kantu Jeová fla israelitas pa ka kume sangi, el fla Muizés pa ripiti txeu bês pamodi ki es ka debe fazeba kel-la. Deus krê distakaba ma vida sta na sangi ô ma sangi ta reprizenta vida. (Lev. 17:11, 14) Algun ténpu dipôs, apóstlus i ansions na Jiruzalen skrebe sobri alguns kuza ki kristons meste ivitaba pa es pode agradaba Deus. Es distaka otu bês ma es ka debe kumeba sangi. — Atus 15:20, 29.

É verdadi ma Bíblia ta ripiti alguns frazi, má kel-li ka krê fla ma Jeová krê pa nu fika ta ripiti-s. Pur izénplu, Jizus fla: “Óras ki bu ta ora, ka bu ripiti kes mésmu kuza”. (Mat. 6:7) Dipôs, el pâpia di alguns kuza ki sta di akordu ku vontadi di Deus ki nu pode ora pa el. (Mat. 6:9-13) Nton, mésmu ki nu ka fla kes mésmu palavra txeu bês na nos orason, nu pode pâpia sobri un asuntu txeu bês. — Mat. 7:7-11.

Bíblia ten bons motivu pa ripiti alguns palavra i frazis. É un di kes txeu manera ki nos Grandiozu Instrutor, ta uza pa inxina-nu kel ki é midjór pa nos. — Isa. 48:17, 18.