1-2. Ki prublémas ki alguns sérvu fiel di Jeová pode pasa pa el?

 ÓRAS ki nu pasa pa un situason txeu difísil, nos vida pode muda dirapenti i pode ser ki nunka más el ka ta fika sima antis. Pur izénplu, un irmon fiel ki txoma Luis a atxadu ku kánser. Dotor fla-l ma el tinha sô alguns mês di vida. Mónika i se maridu staba konsentradu na sirbi Jeová djuntu. Má un dia, Mónika diskubri ma se maridu, ki éra un ansion, staba ta leba un vida finjidu dja tinha alguns anu. Olívia ki é un irman soltera, tevi ki dexa se kaza pamodi un furakon. Kantu ki el volta, el diskubri ma kel furakon dja distruíba se kaza. Di un óra pa kel otu, vida di Luis, Mónika i Olívia muda konpletamenti. Bu ta konsigi intende kuzê ki es pasa pa el? Dja bu kustuma pasa pa un situason ki muda bu vida dirapenti?

² Sikrê nos é sérvus fiel di Jeová, tanbê nu ta pasa pa prublémas i nu ta duense, sima ta kontise ku tudu algen. Tanbê, talvês nu ten ki aguenta opozison ô pirsigison di kes ki ta ôdia povu di Deus. Enbóra Jeová ka ta inpidi pa kes kuza li kontise ku nos, el promete ma el ta djuda-nu. (Isa. 41:10) Ku se ajuda nu pode kontinua ku nos alegria, toma bons disizon i kontinua lial pa el, sikrê na situasons txeu difísil. Na es studu, nu ta ben odja kuatu manera ki Jeová ta djuda-nu duránti ténpus difísil. Tanbê, nu ta ben odja kuzê ki nu meste faze pa nu tra pruvetu di ajuda ki el ta da-nu.

 JEOVÁ TA PROTEJE-U

3. Óras ki nu pasa pa un prubléma, kuzê ki talvês pode ser difísil nu faze?

³ Dizafiu. Óras ki nu sta passa pa un prubléma, pode ser difísil nu pensa di manera klaru i toma bons disizon. Pamodi? Pamodi nos korason pode sta ku txeu dór i nu pode sta ku txeu preokupason na nos menti. Nu pode xinti konfuzu sen sabe kuzê ki nu ta faze dipôs. Repara modi ki kes dôs irman ki dja nu papiaba di es antis, xinti kantu es pasa pa kes prubléma. Olívia fla: “Dipôs ki kel furakon distrui nha kaza, N ka sabia kuzê ki N ta fazeba i N staba txeu preokupadu.” Mónika fla sobri kel traison di se maridu: “N xinti más ki diziludidu. N xinti sima ki un algen da-m ku faka déntu nha korason. Éra difísil faze kuzas sinplis di dia-dia. Nunka N ka pensaba ma kel-li ta kontiseba ku mi.” Modi ki Jeová promete ma el ta djuda-nu óras ki nu sta preokupadu dimás?

4. Sima sta na Filipensis 4:6, 7, kuzê ki Jeová promete-nu?

⁴ Modi ki Jeová ta djuda-nu. El promete ma el ta da-nu kel ki Bíblia ta txoma di “kel pas di Deus”. (Lé Filipensis 4:6, 7.) Kel pas li krê fla ma nu ta xinti kalmu i trankilu na menti i na korason pamodi kel amizadi ki nu ten ku Jeová ki ten txeu valor. Kel pas ki “nu ka ta konsigi intende” é un kuza más sábi di ki kel ki nu ta pode imajina. Dja bu kustuma ora txeu pa Jeová i bu fika dimiradu pamodi bu xinti txeu kalmu dipôs? Kel sentimentu li é pamodi “kel pas di Deus”.

5. Modi ki pas di Deus ta proteje nos menti i nos korason?

⁵ Filipensis 4:7 tanbê ta fla ma kel pas di Deus “ta proteje”, ô guarda, “nhos korason i nhos menti”. Kel palavra ki traduzidu pa “guarda” éra un palavra ki ta uzadu pa pâpia di trópas ki ta guardaba un sidadi i ta protejeba el kóntra atakis di inimigus. Kes algen ki ta moraba na un sidadi undi tinha guardas, ta xintiba suguru pamodi es sabia ma kes guarda staba ta proteje-s. Di mésmu manera, óras ki pas di Deus ta guarda nos korason i nos menti, nu ta xinti kalmu pamodi nu sabe ma nu sta suguru. (Sal. 4:8) Sima kontise ku Ana, sikrê nos situason ka muda lógu, nu pode kontinua ta xinti pas. (1 Sam. 1:16-18) I óras ki nu ta xinti kalmu, txeu bês é más fásil nu pensa di manera klaru i toma bons disizon.

6. Kuzê ki nu pode faze pa nu xinti kel pas di Deus? (Odja dizenhu i fotu.)

⁶ Kuzê ki nu meste faze. Óras ki bu sta  txeu preokupadu, bu pode pidi Jeová pa djuda-u. Modi ki bu pode faze kel-li? Faze orason ti ki bu xinti kel pas di Deus. (Luk. 11:9; 1 Tes. 5:17) Luis ki dja nu papiaba di el antis, fla modi ki el ku se mudjer Ana, konsigi aguenta kantu ki es diskubri ma el tinha sô alguns mês di vida. El fla: “Na un situason sima kel-li é difísil dimás toma disizons sobri tratamentu di saúdi i otus asuntu. Má, sô nu konsigi ten pas duránti kel situason txeu difísil pamodi nu ora.” Luis ku se mudjer fla ma es ora txeu bês ta pidi Jeová pa da-s kel pas na menti, un korason kalmu i sabedoria pa es toma bons disizon. I es xinti ajuda di Jeová. Si bu sta ta pasa pa un prubléma, kontinua ta faze orason i bu ta xinti kel pas di Jeová ki ta guarda bu korason i bu menti. — Rom. 12:12.

JEOVÁ TA PÔ-U TA XINTI SUGURU

7. Kuzê ki nu pode xinti óras ki nu sta pasa pa un situason difísil?

⁷ Dizafiu. Óras ki nu sta pasa pa un situason txeu difísil nu pode xinti, pensa ô aji di un manera diferenti. Sima óndia ta bota barku di un ladu pa kel otu duránti un tenpistadi, nos tanbê nu pode xinti txeu kuza diferenti di un óra pa kel otu. Ana ki dja nu papiaba di el antis, fla ma el xinti sentimentus diferenti dipôs ki Luis móre. El fla: “Alvês N ta xinti dizanimadu i ku péna di nha kabésa. Tanbê N fika ku raiba pamodi el móre.” Ana alvês ta xintiba el sô i kasábi pamodi el tinha ki tomaba disizons sobri asuntus ki antis éra Luis ki ta kuidaba di es. Alvês, el ta xintiba sima si el staba na un tenpistadi na mar. Modi ki Jeová ta djuda-nu óras ki sentimentus negativu kumesa ta toma kónta di nos?

8. Sima sta na Isaías 33:6, kuzê ki Jeová ta garanti-nu?

⁸ Modi ki Jeová ta djuda-nu. El ta garanti-nu ma el ta pô-nu ta xinti suguru. (Lé Isaías 33:6.) Óras ki ten un tenpistadi na mar, un barku pode kumesa ta balansa di un ladu pa kel otu, i kel-li é prigozu. Pur isu, txeu barku ten na tudu dôs ladu uns kuza ki ta fika baxu di agu i ki ta djuda-s mante suguru. Kes kuza ka ta dexa barku balansa txeu. Di es manera, kes algen ki sta na barku ta xinti más suguru i es ta viaja dretu. Má kel-li ta kontise midjór si kel barku kontinua ta bai. Di mésmu manera, Jeová ta pô-nu ta xinti suguru si nu kontinua ta sirbi-l di manera fiel duránti ténpus difísil.

9. Modi ki nos feraméntas di faze piskiza pode djuda-nu kontrola nos sentimentu? (Odja dizenhu i fotu.)

 ⁹ Kuzê ki nu meste faze. Óras ki kuzas ki bu sta xinti sta tenta kontrola-u, faze bu midjór pa kontinua ta ora, ta sisti runions i ta prega. É verdadi ma bu ka ta konsigi faze txeu kuza sima antis, má lenbra ma Jeová ka ta spera pa bu faze más di kel ki bu ta pode faze. (Konpara ku Lukas 21:1-4.) Tra ténpu pa bu faze bu studu pesoal i pa bu midita. Pamodi? Pamodi através di se organizason, Jeová ta da-nu artigus i vídius sábi ki ta djuda-nu kontrola kuzê ki nu sta xinti duránti ténpus difísil. Pa bu atxa kuzê ki bu sta meste, bu pode uza feraméntas di piskiza ki sta disponível na bu língua, sima aplikativu JW Library^®, Índice das Publicações da Torre de Vigia i Publikason pa djuda Tistimunhas di Jeová faze piskiza. Mónika ki dja nu papiaba di el antis, fla ma el uza kes feraménta di piskiza li lógu ki el kumesa ta xinti ma se sentimentus staba ta fika más fórti. Pur izénplu, el piskiza palavra “raiba”. Na otus situason el piskiza palavras “traison” ô “lialdadi”. Dipôs, el ta leba es ti ki el xintiba midjór. El fla: “Óras ki N ta kumesaba ta faze piskiza, N ta staba txeu preokupadu. Má sima N kontinua ta lé N xinti ma Jeová staba ta da-m un abrasu fórti i N da kónta ma Jeová ta intendeba tudu kes sentimentu diferenti ki N staba ta xinti i ma el staba ta djuda-m.” Kel ajuda di Jeová li, tanbê pode djuda-u kontrola bus sentimentu ti ki bu xinti más kalmu. — Sal. 119:143, 144.

JEOVÁ TA DJUDA-U

10. Modi ki nu pode xinti óras ki kontise un kuza txeu difísil?

¹⁰ Dizafiu. Óras ki kontise un kuza txeu difísil, ten dias ki nu pode xinti sen forsa i dizanimadu. Nu pode xinti sima un atléta ki antis ta koreba faxi, má ki gósi, pamodi un prubléma na pé, sta ta anda manku. Pode ser difísil faze kes kuza ki antis éra fásil nu faze ô nu pode ka ten vontadi más di faze kes kuza ki nu gostaba di faze. Sima Elias, nu pode xinti ma é difísil labanta i nu ta krê sô durmi. (1 Reis 19:5-7) Kuzê ki Jeová promete faze óras ki nu sta xinti sen forsa?

11. Di ki otus manera Jeová ta djuda-nu? (Salmo 94:18)

¹¹ Modi ki Jeová ta djuda-nu. El promete ma el ta djuda-nu. (Lé Salmo 94:18.)  Sima un atléta ki ten un prubléma na pé meste ajuda pa el anda, nos tanbê nu pode meste ajuda pa nu kontinua ta faze nos sirvisu pa Jeová. Na kes situason li, Jeová ta garanti-nu: ‘Ami, Jeová, bu Deus, N ta pega bu mô direita; Ami é kel ki ta fla-u: ‘Ka bu ten medu. N ta ba djuda-u.’ (Isa. 41:13) Rei Davidi xinti kel ajuda li. Kantu ki el pasa pa provasons i se inimigus krê mataba el, Davidi fla Jeová: ‘Bu mô direita ta susti-m’. (Sal. 18:35) Má modi ki Jeová ta da-nu se ajuda?

12. Kenha ki Jeová pode uza pa djuda-nu óras ki nu sta xinti sen forsa?

¹² Jeová txeu bês, ta uza otus algen pa da-nu kel ajuda ki nu meste. Pur izénplu, kantu Davidi staba ta xinti sen forsa, se amigu Jonatan vizita-l i da-l forsa i koraji através di se palavras. (1 Sam. 23:16, 17) Di mésmu manera, Jeová skodje Elizeu pa da Elias kel ajuda ki el staba ta meste. (1 Reis 19:16, 21; 2 Reis 2:2) Oji Jeová pode uza família, amigus ô ansions pa djuda-nu. Má óras ki nu sta dizanimadu talvês nu ta krê fika lonji di otus algen. Nu ta krê fika nos sô i kel-li é un kuza normal. Kuzê ki nu pode faze pa nu resebe ajuda di Jeová?

13. Kuzê ki nu meste faze pa nu pode resebe ajuda di Jeová? (Odja dizenhu i fotu.)

¹³ Kuzê ki nu meste faze. Luta kóntra kel vontadi di fika bu sô. Óras ki nu ta fika nos sô, txeu bês nu ta kumesa ta pensa sô na nos kabésa i na kes prubléma ki nu sta ta pasa pa el. I pamodi kel-li, nu pode ka toma bons disizon. (Pro. 18:1) É klaru ki alvês nos tudu nu meste fika nos sô prinsipalmenti óras ki un kuza difísil kontise ku nos. Má si nu fika nos sô pa txeu ténpu, nu pode sta ta nega ajuda di kes algen ki Jeová sta ta uza pa djuda-nu. Sikrê é difísil, seta ajuda di bu família, amigus i ansions. Odja-s sima pesoas ki Jeová sta ta uza pa djuda-u. — Pro. 17:17; Isa. 32:1, 2.

JEOVÁ TA KONSOLA-U

14. Ki situasons ki ta pô-nu ku medu nu pode pasa pa el?

¹⁴ Dizafiu. Nu pode pasa pa situasons ki ta pô-nu ta xinti txeu medu. Na Bíblia sérvus fiel di Deus pâpia di situasons ki es staba txeu preokupadu i ku medu pamodi ses inimigu ô otus provason. (Sal. 18:4; 55:1, 5) Di mésmu manera, nu pode sta ta pasa pa opozison na skóla, na trabadju,  na família ô di govérnu. Nu pode tene medu di móre pamodi un prubléma di saúdi. Duránti kes situason li, nu pode xinti ma nu ka pode faze nada, sima un mininu ki ka ta pode rezolve se situason. Modi ki Jeová ta djuda-nu na situasons sima kes-li?

15. Ki garantia nu ta atxa na Salmo 94:19?

¹⁵ Modi ki Jeová ta djuda-nu. El ta konsola-nu i el ta pô-nu ta fika kalmu. (Lé Salmo 94:19.) Kel testu li, pode pô-nu ta pensa na un minininha ki sta ku txeu medu i ki ka sta konsigi durmi pamodi un tenpistadi txeu fórti. Nu pode imajina se pai ta txiga na el, ta karega-l i ta fika ku el na se brasu ti ki el durmi. Enbóra kel tenpistadi fórti inda ka pasa, el ta xinti suguru i kalmu na brasu di se pai. Óras ki nu sta pasa pa provasons ki ta da-nu medu, talvês nu meste pa nos Pai ki sta na séu pega-nu na se brasus ti ki nu xinti kalmu. Modi ki nu pode resebe kel konsolu li?

16. Kuzê ki nu pode faze pa nu resebe konsolu di Jeová? (Odja dizenhu i fotu.)

¹⁶ Kuzê ki nu meste faze. Tra ténpu pa bu faze orason i lé Palavra di Jeová sénpri. (Sal. 77:1, 12-14) Óras ki bu sta txeu preokupadu talvês kel primeru kuza ki bu ta pensa na faze é djobe ajuda di bu Pai ki sta na séu. Konta Jeová kuzê ki bu ten medu i kuzê ki bu sta preokupadu ku el. Dexa pa el pâpia ku bo i pa el konsola-u através di Bíblia. (Sal. 119:28) Bu pode atxa alguns párti di Bíblia ki pode konsola-u, prinsipalmenti óras ki bu sta ku medu. Pur izénplu, bu pode ganha koraji óras ki bu ta lé livrus di Jó, Salmos i Proverbios i tanbê kes palavra di Jizus ki nu ta atxa na Mateus kapítlu 6. Óras ki bu ta faze orason pa Jeová i bu ta lé se Palavra, bu ta xinti se konsolu.

17. Ki serteza nu pode ten?

¹⁷ Nu pode ten serteza ma Jeová sénpri ta djuda-nu óras ki nu sta pasa pa situasons difísil. Nunka nu ka ta sta nos sô. (Sal. 23:4; 94:14) Jeová promete ma el ta proteje-nu, el ta pô-nu xinti suguru, el ta djuda-nu i el ta konsola-nu. Isaías 26:3, ta fla kel-li sobri Jeová: ‘Bu ta proteje kes ki ta kunfia na bo di korason, bu ta da-s pas ki ka ta kaba, pamodi é na bo ki es ta kunfia.’ Pur isu, kunfia na Jeová i tra pruvetu di kes manera ki el ta uza pa el djuda-u. Si bu faze kel-li, bu ta ganha forsa sikrê duránti ténpus difísil.