Si Deus é ka kulpadu pa sufrimentu, nton pamodi ki mundu sta xeiu di géra, duénsas terível, dizastris na naturéza, fómi i pobréza? Bíblia, ki é Palavra di Deus, ta fla kes três motivu prinsipal di ten sufrimentu na mundu:

1. Iguísmu, ganánsia i ódiu. ‘Ómi ta manda na ómi pa se disgrasa.’ (Eclesiastes 8:9) Pesoas ta pensa sô na ses kabésa, es ta faze maldadi i es é inperfetu. Pur isu, es sta ta poi txeu algen ta sufri.

2. Kuzas ki ta kontise ki nu ka sta ta spéra. Txeu bês pesoas ta sufri ‘pamodi ténpu i kuzas ki es ka sta spéra ta kontise’. (Eclesiastes 9:11) Kel-li krê fla ma un algen pode sta na un lugar mariadu, na un óra mariadu ô pode kontise un asidenti. Tanbê un algen pode ka ten kuidadu ô faze algun éru.

3. Governanti di kel mundu li é mau. Bíblia ta fla klaru kal ki é motivu prinsipal di algen sufri. El ta fla: ‘Mundu interu sta na puder di Malvadu.’ (1 Joao 5:19) Kel ‘Malvadu’ é Satanás, ki tanbê ta txomadu Diabu. El é un kriatura poderozu ki éra un anju di Deus, má ‘el ka kontinua na verdadi’. (João 8:44) Otus anju tanbê djunta ku Satanás i es rabela kóntra Deus pa es pode satisfaze ses dizeju. Di kel manera li, es bira dimónis. (Génesis 6:1-5) Désdi ki es rabela, Satanás ku se dimónis sta ta kontrola kes kuza ki ta kontise na mundu, i di manera kruel. I é kel-li ki sta ta kontise prinsipalmenti na nos ténpu. Gósi, Satanás sta ku txeu raiba i el ‘sta ta ngana Téra interu’. Pur isu, Bíblia ta fla: ‘Ai di Téra’. (Apocalipse 12:9, 12) Satanás é kel governanti más mau ki ten i el ta fika kontenti di odja-nu ta sufri. Nton, é ka Deus ki ta poi algen ta sufri, má é Satanás.

PENSA NA KEL-LI: Sô un algen runhu i ki ka ten korason é ki ta poba algen inosenti ta sufri. Má, Bíblia ta fla ma ‘Deus é amor.’ (1 João 4:8) Amor é un di kes kualidadi di Deus. Pur isu, ‘Deus verdaderu nunka ka ta fazeba kel ki é mau, i Tudu-Poderozu nunka ka ta fazeba kel ki é mariadu!’ — Jó 34:10.

Má, talvês bu ta pergunta: ‘Pa kantu ténpu ki Deus ta dexa Satanás kontinua ta governa?’ Sima dja nu odja, Deus ta ôdia maldadi i el ta sufri txeu óras ki el ta odja-nu ta sufri. Tanbê, se Palavra ta insentiva-nu: ‘Bota tudu nhos preokupason riba di el, pamodi el ta kuida di nhos.’ (1 Pedro 5:7) Deus ta ama-nu i el ten puder pa kaba ku tudu sufrimentu i injustisa. Kel otu artigu ta ben pâpia más sobri kel asuntu li. *