Kuazi nos tudu nu ta konkorda ma ten alguns konportamentu ki é dretu i otus ki é mariadu. Pur izénplu, mata algen, violason, abuzu seksual di kriansas é kuzas ki pesoas ta kondena. Má, justisa, bondadi i konpaxon é kuzas ki pesoas ta da txeu valor. Na otus asuntu, sima séksu, onestidadi i kria fidjus txeu algen ta atxa ma ka ten un disizon dretu ô mariadu. Es ta atxa ma kalker disizon ki es toma é dretu. Normalmenti pesoas ta toma disizons ku bazi na ses opinion ô na opinion di pesoas ki sta na ses vólta. Kel manera di toma disizon li é dretu?

Txeu bês nu ta toma disizons ku bazi na nos opinion, ô na kel ki nu ta atxa ma é dretu ô mariadu. (Romanus 2:14, 15) Ti mésmu mininus pikinoti ta konsigi odja diferénsa entri un konportamentu justu ô injustu i ti xinti kulpadu. Ku ténpu, nos konsénsia ta muda di akordu ku kuzas ki nu prende ku nos família, amigus, profesoris, relijion, kultura i ku otus pesoas na nos vólta. Óras ki nu ta toma disizons, nos konsénsia ta fla-nu si kel disizon ki nu toma sta di akordu ku kel ki nu prende ma é dretu ô mariadu.

Kel ki nu prende ma é dretu ô mariadu pode pô-nu ta poi na lugar di otus algen, ta mostra gratidon, justisa i konpaxon pa otus algen. Tanbê, el pode ka dexa-nu faze kes kuza ki pode mágua kes algen ki nu ta ama ô ki pode pô-nu sen jetu, ku vergónha i ta xinti kulpadu.

Sénpri nu debe kunfia na nos opinion? Kantu Garrick éra jóven, el fla ma el disidi leba un vida ki el ta fazeba kel ki el kreba. Má, el da kónta ma fazeba kel ki el ta atxaba ma éra dretu ka djuda-l ten bons rezultadu. Garrick fla ma el ka éra filís pamodi el ta fazeba txeu konportamentu seksual mariadu, el ta abuzaba di dróga, el ta bebeba dimás i el ta fazeba txeu violénsia.

Alén di nos opinion, txeu bês nu ta toma disizons ku bazi na opinion di otus algen. Kel-li ta djuda-nu prende ku ses spiriénsia i sabedoria. Nu pode ten ruspetu di nos família, amigus i di kes algen di undi ki nu ta mora óras ki nu ta faze kel ki es ta atxa ma é dretu.

Sénpri nu debe kunfia na opinion di otus algen? Kantu Prisila éra jóven, el ta fazeba kes kuza ki se amigus ta kustuma fazeba i el ta fazeba séksu ku txeu algen. El da kónta ma faze kel ki otus algen ta atxaba ma éra dretu ka staba ta dexa-l filís. El fla: “Faze kel ki tudu mundu staba ta faze, ka staba ta pô-m ta xinti dretu. Kel-li pô-m ta toma disizons mariadu i ta faze kuzas ki staba ta prujudika-m.”

Óras ki nu ta disidi entri kel ki é dretu ô mariadu, nos opinion i opinion di otus algen é txeu inportanti. Má sô kel-li ka ta txiga pa djuda-nu ten bons rezultadu. Alvês nu pode prujudika nos kabésa i otus algen pamodi nu ka pensa na kes rezultadu ki nos disizon pode ben tinha. (Provérbios 14:12) Nu ka pode ten serteza si nos opinion ô opinion di otus algen sénpri é kel midjór pa nos i ma kes opinion nunka ka ta muda. Alguns konportamentu ki antis pesoas ta atxaba ma éra mariadu, gósi es ta seta-s. Má, otus kuza ki antis es ta atxaba ma éra dretu, gósi es ta atxa ma es é mariadu.

Ten un manera midjór di sabe kuzê ki é dretu i kuzê ki é mariadu? Ten leis di konportamentu ki nu pode sigi oji ki ka ta diziludi-nu na futuru?

Má inda ben ki nu ten un fonti ki ses prinsípiu nunka ka ta muda i ki ta da sértu pa tudu algen na tudu lugar. Kel otu artigu ta ben mostra undi ki nu pode atxa prinsípius ki nu pode kunfia na el pa nu sabe kuzê ki é dretu i kuzê ki é mariadu.