Orientasons di Bíblia ta djuda-nu toma bons disizon
Odja kuatu ária di vida ki konsedjus di Bíblia dja djuda milhons di algen.
1. Kazamentu
Pesoas ten ideias diferenti sobri kazamentu i sobri kuzê ki nu meste pa nu ten un kazamentu filís.
BÍBLIA TA FLA: “Pa kada un di nhos ama se mudjer sima el ta ama se kabésa. Tanbê, mudjer debe ruspeta se maridu di korason.” — Efézius 5:33.
KUZÊ KI KEL-LI KRÊ FLA: É Deus ki kria kazamentu, pur isu el sabe kuzê ki un kazal meste pa es ser filís. (Markus 10:6-9) Óras ki maridu ku mudjer ta preokupa más ku kuzê ki kel otu meste, es tudu dôs ta ser filís na kazamentu. Un maridu ki ta ama se mudjer ta mostra kel-li na manera ki el ta trata-l i el ta kuida di el. Un mudjer ki ta ruspeta se maridu ta mostra kel-li na kes kuza ki el ta fla i ki el ta faze.
BONS REZULTADU DI SIGI KONSEDJU DI BÍBLIA: Quang ku Thi, di Vietnam, ta atxaba ma ses kazamentu nunka ka ta sérba filís. Quang éra brutu. El fla: “N ka ta inportaba ku sentimentus di Thi i txeu bês N ta maguaba el.” Thi krê divorsiaba di el. El fla: “N ta xintiba ma N ka ta konsigi kunfiaba más na nha maridu i nen ruspeta-l.”
Dipôs, Quang ku Thi prende kuzê ki Bíblia ta inxina i modi ki es pode sigiba konsedju di Efézius 5:33 na ses kazamentu. Quang fla: “Kel versíklu li djuda-m odja ma N meste mostraba Thi bondadi i djuda-l xinti ma N ta ama-l i ma N krê kuida di el i da-l tudu kes kuza ki el meste. Óras ki N faze si N ta ganha se amor i ruspetu.” I Thi fla: “Kantu más N aplika Efézius 5:33 i mostra nha maridu ruspetu, más N ta xinti ma el ta ama-m, ma el ta proteje-m i N ta xinti pas.”
Pa más informason sobri kazamentu, lé revista Nhos korda! Nunbru 2 di 2018 na jw.org, ku téma “12 kuza ki ta djuda família ser filís”.
2. Modi ki nu debe trata otus algen
Txeu bês pesoas ta trata otus algen mariadu pamodi ses rasa, país, aparénsia, relijion ô pamodi es é omoseksual.
BÍBLIA TA FLA: “Nhos onra pesoas di tudu tipu”. — 1 Pedru 2:17.
KUZÊ KI KEL-LI KRÊ FLA: Bíblia ka ta inxina ma nu debe ôdia pesoas di otu rasa, país ô pamodi es é omoseksual. Envês di kel-li, el ta fla ma nu debe ruspeta tudu tipu di algen ka ta inporta ses rasa, país ô si es é riku ô póbri. (Atus 10:34) Mésmu si nu ka ta konkorda ku kuzê ki otus algen ta kridita na el, ô ku manera ki es ta aji, simé nu debe trata-s ku bondadi i ruspetu. — Mateus 7:12.
BONS REZULTADU DI SIGI KONSEDJU DI BÍBLIA: Daniel inxinadu ma pesoas di Ázia éra un prigu pa se país. Pamodi kel-li el ta odiaba kalker algen di Ázia i txeu bês el ta insultaba es na públiku. El fla: “N ta atxaba ma N staba ta apoia nha país. Nen N ka ta atxaba ma manera ki N ta pensaba i ajiba éra mariadu.”
Dipôs, Daniel prende kuzê ki Bíblia ta inxina. El fla: “N tevi ki muda nha manera di pensa konpletamenti i odja pesoas sima Deus ta odja-s. Pa Deus nos tudu é igual, ka ta inporta di undi ki nos é.” Daniel fla modi ki el ta xinti gósi óras ki el konxe un algen. El fla: “N ka ta inporta di undi ki kel algen é. Gósi N ta ama tudu tipu di pesoas i N ten amigus na mundu interu.”
Pa más informason, lé revista Nhos korda! Nunbru 3 di 2020 na jw.org, ku téma “Diskriminason ten kura?”.
3. Dinheru
Txeu algen ta tenta ser riku asi pa es pode ser filís i ten un futuru midjór.
BÍBLIA TA FLA: ‘Sabedoria é un proteson, sima dinheru é un proteson. Má, vantajen di konhisimentu é kel-li: sabedoria ta proteje vida di kel algen ki ten el.’ — Eclesiastes 7:12.
KUZÊ KI KEL-LI KRÊ FLA: Nu meste di dinheru, má kel-li ka ta garanti ma nu ta ser filís ô ma nu ta ten un bon futuru. (Provérbios 18:11; 23:4, 5) Envês di kel-li, filisidadi di verdadi i un futuru suguru ta dipende di nu aplika sabedoria di Deus ki sta na Bíblia. — 1 Timótiu 6:17-19.
BONS REZULTADU DI SIGI KONSEDJU DI BÍBLIA: Cardo, un ómi di Indonézia, sforsa txeu pa bira riku. El fla: “N tinha tudu kel ki maioria di pesoas ta krê tinha. N konsigi viaja i kunpra kuzas di luxu, karus i kazas.” Má se rikéza ka dura txeu. Cardo fla: “Un algen ingana-m i el toma tudu kel dinheru ki N trabadja duru pa ten. N trabadja nha vida interu pa-m bira riku, má dipôs N fika diziludidu pamodi N fika sen nada i N xinti sen valor.”
Cardo kumesa ta sigi kes konsedju di Bíblia sobri dinheru, el para di konsentra na bira riku i el disidi leba un vida sinplis. El fla: “Gósi N ta xinti ma mi é riku di verdadi pamodi N ten un amizadi fórti ku Deus. N pode durmi dretu di noti i mi é filís di verdadi.”
Pa más informason sobri dinheru, lé artigu “Ten bon skóla i txeu dinheru pode da-nu un futuru midjór?” na Sentinéla Nunbru 3 di 2021, na jw.org.
4. Séksu
Pesoas ten txeu opinion diferenti sobri kuzê ki é dretu ô mariadu sobri séksu.
BÍBLIA TA FLA: “Ka [nhos] ten konportamentu seksual mariadu. Kada un di nhos debe sabe modi ki el ta kontrola se própi korpu di manera santu i ku ónra. Nhos ka debe sigi kes nason ki ka konxe Deus, ki ta sigi ses paxon seksual diskontroladu ku ganánsia.” — 1 Tesalonisensis 4:3-5.
KUZÊ KI KEL-LI KRÊ FLA: Bíblia ta poi limiti na modi ki nu debe mostra dizeju seksual. Kes palavra “konportamentu seksual mariadu” ta inklui adultériu, prostituison, relason seksual entri pesoas ki é ka kazadu, entri pesoas di mésmu séksu i entri pesoas i animal. (1 Koríntius 6:9, 10) Relason seksual é un prezenti di Deus ki el da sô pa un ómi ku un mudjer ki é kasadu ku kunpanheru. — Provérbios 5:18, 19.
BONS REZULTADU DI SIGI KONSEDJU DI BIBLIA: Un mudjer di Austrália ki txoma Kylie fla: “Kantu mi éra soltera N ta atxaba ma si N fazeba séksu N ta xintiba amadu i suguru. Má, é ka kel-li ki kontise. N xinti maguadu.”
Dipôs, Kylie prende kuzê ki Bíblia ta fla sobri séksu i el kumesa ta faze sima el prende. El fla: “N ta konsigi odja ma Deus da-nu se leis pa proteje-nu di dór i sufrimentu. Gósi N ta xinti amadu i suguru pamodi N sta faze kuzas di manera ki Jeová ta krê. Faze sima Bíblia ta inxina dja libra-m di txeu dór!”
Pa más informason, lé artigu “Kuzê ki Bíblia ta fla sobri mora djuntu sen sta kazadu?”, na jw.org.
Nos Kriador ta djuda-nu intende kuzê ki é dretu ô mariadu. Nen sénpri é ka fásil obi ku kuzê ki Jeová ta fla, má bale pena sforsu ki nu ta faze pa obi ku el. Nu pode kunfia ma kel ki el ta fla sénpri ta djuda-nu ten un futuru filís.
