Ti gósi, dja nu odja alguns kuza ki djuda-nu odja respósta pa kel pergunta ‘Ken ki é Deus?’. Primeru nu odja na Bíblia ma se nómi é Jeová i se kualidadi prinsipal é amor. Tanbê nu odja kuzê ki dja el faze i kuzê ki el ta ben faze pa djuda tudu algen. Enbóra inda bu ten txeu kuza pa prende sobri Deus, bu pode pergunta modi ki konxe Deus ta djuda-u.

Jeová promete ma ‘si bu djobe-l, el ta dexa-u atxa-l’. (1 Crónicas 28:9) Sima bu ta ba ta konxe Deus, bu ta ben bira ‘txeu amigu’ di el. Kel-li é un kuza txeu spesial! (Salmo 25:14) Modi ki bira amigu di Deus ta djuda-u?

Filisidadi di verdadi. Bíblia ta fla ma Jeová é “kel Deus filís.” (1 Timótiu 1:11) Bira se amigu i imita se manera di aji ta da-u filisidadi di verdadi, i kel-li pode djuda-u na manera ki bu ta lida ku bus sentimentu, bus pensamentu i ku bu saúdi. (Salmo 33:12) Tanbê bu pode ten un vida filís pamodi bu ta ivita un stilu di vida ki ta prujudika-u, bu ta dizenvolve bons ábitu i bu ta konsigi ten bons amizadi ku otus algen. Bu pode ben konkorda ku kuzê ki un salmista fla: ‘Txiga pértu di Deus é bon pa mi.’ — Salmo 73:28.

Atenson i kuidadu di Deus. Jeová promete se sérvus: ‘N ta da-u konsedju ku nhas odju fíksu na bo.’ (Salmo 32:8) Jeová ta kuida di kada un di se sérvus i el ta da-s kuzê ki kada un di es meste. (Salmo 139:1, 2) Óras ki bu ta bira amigu di Jeová, bu ta odja ma el sta sénpri la pa bo.

Un futuru txeu sábi. Alén di djuda-u ten un vida sábi i filís gósi, Jeová Deus ta da-u oportunidadi di ten un futuru maravilhozu. (Isaías 48:17, 18) Bíblia ta fla: “Kel-li siginifika vida pa tudu ténpu: pa es konxe-u abo, kel úniku Deus verdaderu, i tanbê kel ki bu manda, Jizus Kristu.” (Juan 17:3) Na kes ténpu difísil li, kel speransa ki Deus ta da-nu pode ser sima un ánkura ki ta djuda-nu fika “suguru i firmi”. — Ebreus 6:19.

Kes-li é sô alguns di kes razon txeu inportanti ki ta pô-nu krê konxe Deus midjór i bira se amigu. Bu pode xinti avontádi pa pâpia ku un Tistimunha di Jeová ô pa vizita jw.org pa djobe más informason ki ta djuda-u.