Si bu krê konxe un algen dretu, é inportanti bu prende sobri kuzê ki dja el faze i ki dizafius ki dja el pasa pa el. Di mésmu manera, si bu krê konxe Deus dretu, bu meste prende sobri kuzê ki dja el faze. Sima bu ta ba ta faze kel-li, talvês bu ta fika dimiradu di diskubri modi ki txeu kuza ki el faze na pasadu ta djuda-nu gósi i ta da-nu xansi di ten un futuru filís.

Jeová Deus é kel Grandi Kriador i se “kualidadis ki nu ka ta pode odja, ... sta ta odjadu klaru désdi kriason di mundu, pamodi es ta pode intendedu através di kes kuza ki kriadu.” (Romanus 1:20) ‘El é Kel ki faze téra ku se puder, Kel ki uza se sabedoria pa faze txon ki ta da kumida, i ki stika séu ku se intendimentu.’ (Jeremias 10:12) Kes kuza bunitu ki Deus kria tanbê ta mostra ma el ta preokupa ku nos.

Odja modi ki Jeová faze nos vida txeu spesial kantu el faze pesoas “sima el”. (Jénezis 1:27) Kel-li krê fla ma Jeová kria-nu ku kapasidadi di imita se kualidadis ki ka ten konparason. El kria-nu ku kapasidadi di konxe-l i kel-li krê fla ma nu ta konsigi intende se manera di pensa i kuzê ki é inportanti pa el. Si nu sigi kel konhisimentu li, nu ta ten un vida más filís i ku obijetivu. Tanbê, Deus kria-nu ku kapasidadi di ten amizadi ku el.

Óras ki nu ta odja pa tudu kes kuza ki Deus kria na téra, nu ta konsigi intende kuzê ki Deus ta xinti pa nos. Apóstlu Paulu fla ma Deus ‘ka dexa di faze kuzas dretu ki mostra ken ki el é, kantu el da-nu txuba di séu i ténpu di bon kodjéta. El da-nu txeu kumida i el intxi nos korason di alegria.’ (Atus 14:17) Deus da-nu mutu más di ki kel ki nu ta meste pa nu vive. El faze txeu kuza i di tipus diferenti, asi pa nu pode ten alegria na vida. Tudu kes kuza li é sô un ideia di kel tipu di vida ki Deus krê pa nu ten.

 Jeová kria téra pa nu pode viveba na el pa tudu ténpu. Bíblia ta fla: ‘Téra el da pa fidjus di ómi’, i el ‘ka kria-l pa nada, má pa moradu na el.’ (Salmo 115:16; Isaías 45:18) Má kenha ki el krê pa moraba na téra i pa kantu ténpu? Bíblia ta fla: ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

Jeová kria primeru ómi ku mudjer, Adon ku Eva, i el pô-s na Paraízu na téra pa es “trabadjaba txon i pa [es] tomaba kónta di kel jardin.” (Jénezis 2:8, 15) Deus da-s un trabadju inportanti pa es fazeba. El fla-s: “Nhos ten fidju i nhos bira txeu. Nhos intxi téra i nhos manda na el.” (Jénezis 1:28) Nton, Adon ku Eva tinha speransa di ten un vida sábi pa tudu ténpu li na téra. Infilismenti es skodje ka obi ku Deus i pur isu, es perde kel oportunidadi di sta entri ‘kes algen justu’ ki ta ‘ben vive na téra pa tudu ténpu.’ Má simé, kuzê ki es faze ka muda kuzê ki Jeová sénpri kreba pa nos i pa téra. Má primeru, nu ben odja otu kuza ki Deus faze pa nos.

Bíblia tanbê ta txomadu di Palavra di Deus. Pamodi ki Jeová da-nu Bíblia? Un di kes motivu prinsipal é pa nu prende sobri el. (Provérbios 2:1-5) Bíblia ka ta responde tudu pergunta ki nu ten sobri Deus. Na verdadi ka ten ninhun livru ki ta pode faze kel-la. (Eclesiastes 3:11) Má, tudu kes kuza ki nu ta atxa na Bíblia ta djuda-nu konxe Deus. Nu ta konsigi odja ken ki el é pa manera ki el ta lida ku pesoas. Nu ta prende ki tipu di algen ki el gosta i ki el ka gosta. (Salmo 15:1-5) Nu ta prende modi ki el krê pa nu adora-l, kuzê ki el ta atxa ma é dretu ô mariadu i kuzê ki el ta pensa di dinheru. Bíblia ta da-nu un ideia más klaru di modi ki Jeová é através di kuzê ki se Fidju, Jizus Kristu, faze i fla. — Juan 14:9.

Un otu motivu ki poi Jeová ta da-nu Bíblia, é pamodi el krê pa nu sabe modi ki nu ta ten un vida filís i ku obijetivu. Através di Bíblia, Jeová ta fla-nu modi ki nu pode ten un família filís, modi ki nu pode sta kontenti i modi ki nu pode lida ku ansiadadi. Sima nu ta ben prende na kel revista li, Bíblia ta da-nu respósta pa kes pergunta inportanti ki nu ta faze na vida, sima: Pamodi ki ten txeu sufrimentu? Kuzê ki nu pode spera di futuru? Tanbê el ta splika kuzê ki Deus faze pa garanti ma el ta ben kunpriba se vontadi pa téra i pa pesoas.

Ten txeu motivu ki ta mostra ma Bíblia é un livru txeu spesial i ma se autor sô pode ser Deus. Uns 40 ómi skrebe Bíblia duránti uns 1.600 anu. Má simé, el ten un téma sô, pamodi se verdaderu Autor é Deus. (2 Timótiu 3:16) Diferenti di kuzê ki kontise ku otus livru antigu, kuzê ki Bíblia ta fla ka mudadu sikrê anus ba ta pasa, i kes kópia más antigu di Bíblia ta prova kel-li. Tanbê, txeu algen tenta inpidi pa Bíblia traduzidu, distribuidu i pa pesoas le-l. Má, oji Bíblia é kel livru más traduzidu i distribuidu. Tudu kes kuza li é un próva klaru ma ‘palavra di nos Deus ta dura pa tudu ténpu.’ — Isaías 40:8.

Deus faze un kuza spesial pa garanti ma se vontadi pa nos ta kunpriba. Sima nu odjaba antis, Deus kreba pa nu viveba na téra pa tudu ténpu. Má kantu Adon skodje ka obi ku Deus i el peka, el perde xansi di vive pa tudu ténpu, ka sô pa el má tanbê pa tudu se fidju. Bíblia ta fla: “Pekadu entra na mundu através di sô un ómi i mórti através di pekadu, i di kel manera li mórti spadja pa tudu ómi, pamodi es tudu tinha pekadu”. (Romanus 5:12) Dipôs ki Adon ka obi ku Deus ta parseba ma vontadi di Deus pa téra ka ta kunpriba. Kuzê ki Jeová faze?

Kuzê ki Jeová faze staba di akordu ku se kualidadis. El aji ku justisa i el mostra ma Adon ku Eva éra kulpadu pa kuzê ki es faze. El mostra amor kantu el ranja un manera di salva kes fidju di Adon ku Eva. Ku sabedoria, Jeová disidi modi ki el ta lida ku kel situason i lógu el ranja un soluson pa kel prubléma. (Jénezis 3:15) El libra-nu di pekadu ku mórti através di se Fidju, Jizus Kristu. Modi ki el faze kel-la?

 Pa liberta-nu di kes mau rezultadu di dizobidiensa di Adon, Jeová manda Jizus pa téra pa inxina pesoas modi ki es ta vive i pa el “da se vida pa resgata txeu algen.” a (Mateus 20:28; Juan 14:6) Jizus pode pagaba resgati pamodi el éra un ómi perfeitu sima Adon. Má diferenti di Adon, Jizus obi ku Deus di manera perfeitu ti ki el móre. Dja ki Jizus ka merese moreba, Jeová resusita-l otu bês pa el ba vive na séu. Asi, Jizus ta konsigi fazeba kuzê ki Adon ka konsigi faze, ki é da pesoas obidienti xansi di vive pa tudu ténpu. “Pamodi sima txeu algen bira pekador pamodi un ómi ki dizobidese, di mésmu manera txeu algen ta ser justu pamodi un ómi ki obidese.” (Romanus 5:19) Através di sakrifisiu di resgati di Jizus, Deus ta ben kunpri se promésa di da pesoas vida pa tudu ténpu na téra.

Nu ta prende txeu sobri Jeová ku manera ki el lida ku kes prubléma ki kontise pamodi Adon dizobidese. Nu ta odja ma nada ka ta inpidi Jeová di tirmina kuzê ki el kumesa i kuzê ki el fla ‘ta kunpri sen falta’. (Isaías 55:11) Tanbê nu ta odja modi ki amor di Jeová pa nos é grandi. “Através di kel-li Deus mostra se amor pa nos: Deus manda se úniku Fidju pa mundu pa nu pode ganha vida através di el. Amor é kel-li: é ka pamodi nu ama Deus, má é el ki ama-nu i el manda se Fidju pa ser un sakrifisiu pa nu faze pas ku el pamodi nos pekadu.” — 1 Juan 4:9, 10.

Deus “ka popa nen se própi Fidju, má el intrega-l pa nos tudu,” pur isu nu pode ten serteza ma Deus “ta ben da-nu tudu kes otu kuza” ki el promete-nu “ku bondadi”. (Romanus 8:32) Kuzê ki Deus promete ma el ta ben faze pa nos? Kontinua ta lé.