Kantu más nu da kónta di kualidadis ki un algen ten, más txeu nu ta konxe-l i asi nos amizadi ku el ta fika más fórti. Di mésmu manera, kantu más nu prende sobri kualidadis di Jeová, más nu ta konxe-l i nos amizadi ku el ta fika más fórti. Deus ten txeu kualidadi bunitu, má ten kuatu di kes kualidadi ki ta distaka más txeu: se puder, se sabedoria, se justisa i se amor.

‘Ó Jeová, kel Sinhor Más Grandi! Bu faze Séu ku Téra ku bu grandi puder’. —  JEREMIAS 32:17.

Kuzas ki Deus kria ta mostra ma el ten puder. Pur izénplu, óras ki bu ta sai na rua, na un dia di sól, kuzê ki bu ta xinti na bu péli? Bu ta xinti kentura di sól, ka simé? Na verdadi, bu ta xinti puder ki Deus uza pa kria kuzas. Kantu puder ki sól ten? Ta fladu ma tenperatura di sól é uns 15 milhon di grau (27 milhon di grau Fahrenheit). Kel-li ta da 150 mil bês más kenti ki agu ta ferbe. Kada sugundu sól ta manda inerjia ki é sima un monti milhon di bonba nukliar ta spludi.

Má simé, sól é pikinoti óras ki nu ta konpara-l ku bilhons di otus stréla ki sta na séu. Pur izénplu, sientistas ta fla ma talvês stréla UY Scuti, é un di kes stréla más grandi ki ten. Es ta fla ma kel stréla é uns 1.700 bês más grandi ki sól. Stréla UY Scuti é uma grandi ki si el podu na lugar di sól, planéta Téra i otus planéta ki ta fika más lonji, sima Júpiter, ta fika déntu di el. Talvês kel-li ta djuda-nu intende  midjór kuzê ki Jeremias krê flaba, kantu el fla ma Jeová Deus kria séu ku téra ku se grandi puder.

Modi ki puder di Deus ta djuda-nu? Nos vida ta dipende di kuzas ki Deus kria, sima sól i otus kuza spetakular ki nu ta atxa na téra. Alén di kel-li, Deus ta uza se puder pa djuda kada algen ki sta na téra. Modi ki el ta faze kel-li? Kantu Jizus staba na téra, Deus da-l puder pa el faze milagri. Bíblia ta fla: “Ségus gósi sta ta odja, mankus sta ta anda, leprozus sta ta kuradu, surdus sta ta obi, mortus sta ta resusitadu”. (Mateus 11:5) Má kuzê ki Deus sta ta faze pa nos gósi? Bíblia ta fla: ‘El ta da puder pa ken ki sta kansadu’. I tanbê el ta fla: ‘Kes ki ta spera na Jeová ta torna ganha forsa.’ (Isaías 40:29, 31) Deus pode da-nu “puder alén di normal” pa djuda-nu lida ku prublémas di vida. (2 Koríntius 4:7) Bu ka ta atxa ma ta sérba rei di bon ser amigu di kel Deus ki ta uza se grandi puder pa djuda-nu?

‘Ó Jeová, bu faze txeu trabadju! Bu faze tudu es ku sabedoria.’ —  SALMO 104:24.

Kantu más nu prende sobri kriason di Deus, más dimiradu nu ta fika ku se sabedoria. Na verdadi, alguns sientista ta studa kriason di Jeová i es ta kôpia ideias ki sta na naturéza, asi pa es midjora ses prujétu. Kes prujétu li ta inklui kuzas sinplis sima fexu di ropa i kuzas más konplikadu sima avion.

Korpu di algen é kel midjór izénplu pa nu odja ma Deus ten sabedoria. Pur izénplu, pensa na manera ki korpu di un bebé ta dizenvolve. Tudu ta kumesa ku un sélula txeu pikinoti ki ten tudu informason ki ta mostra modi ki kel algen ta ben ser. Kel sélula li ta dividi na monti otus sélula ki ta parse ku el. Má na óra sértu kes sélula ta kumesa ta forma di manera diferenti di kunpanheru. Pamodi kel li ta parse sélulas di tipu diferenti, sima kes sélula di sangi, kes di nervu i kes di osu. Dipôs di 9 mês, kel un sélula ki dividi na bilhons di otus sélula, ta forma un bebé. Sabedoria ki nu ta odja na kel-li, ta poi txeu algen ta konkorda ku kes palavra ki un skritor di Bíblia fla: ‘N ta lova-u pamodi N fazedu di manera maravilhozu i spetakular.’ — Salmo 139:14.

Modi ki sabedoria di Deus ta djuda-nu? Nos Kriador sabe kuzê ki nu meste pa nu ser filís. El ta uza se grandi sabedoria i intendimentu pa el da-nu konsedju através di se Palavra, ki é Bíblia. Pur izénplu, Bíblia ta da-nu kel konsedju li: “Nhos kontinua ta... sta sénpri prontu pa púrdua kunpanheru”. (Kolosensis 3:13) Kel konsedju li ta mostra sabedoria? Sin. Alguns piskiza ta mostra ma óras ki nu ta púrdua, kel-li ta djuda-nu durmi midjór i nu ta ten ménus risku di ten tenson altu. Risku di panha depreson tanbê é más poku, alén di otus vantajen pa nos saúdi. Deus é sima un amigu ki ten sabedoria, ki ta preokupa ku nos tudu i ki sénpri ta da-nu bons konsedju. (2 Timótiu 3:16, 17) Bu ka ta gostaba di ten un amigu asi?

‘Jeová ta ama justisa’. —  SALMO 37:28.

Deus sénpri ta faze kuzê ki é dretu. Bíblia ta fla: ‘Deus verdaderu nunka ka ta fazeba kel ki é mau, i Tudu-Poderozu nunka ka ta faze kel ki é mariadu!’ (Jó 34:10) Julgamentus di Jeová sénpri é justu, pur isu salmista fla: ‘Bu ta ben julga povus ku justisa.’ (Salmo 67:4) Algen ki é finjidu ka ta pode ingana Jeová pamodi el “ta odja korason.” (1 Samuel 16:7) Jeová sabe sénpri kal ki é verdadi i se julgamentus é sénpri dretu. Alén di kel-li, Deus sta ta odja tudu injustisa i korupson ki ten na mundu i el promete ma ka ta dura ‘kes algen mau ta ben tradu di téra’. — Provérbios 2:22.

Má kel-li ka krê fla ma Deus é un juís duru ki krê sô kastiga algen. Sénpri ki ta da, el ta purdua-nu. Bíblia ta fla ma ‘Jeová ten mizerikórdia i konpaxon’ ti mésmu pa kes algen mau, si es rapende di korason. Kel-li ki é justisa di verdadi, bu ka ta atxa? — Salmo 103:8; 2 Pedru 3:9.

Modi ki justisa di Deus ta djuda-nu? Apóstlu Pedru fla: “Deus ta trata tudu algen igual, i na tudu nason, el ta seta ken ki ta ruspeta-l i ki ta faze kel ki é dretu.” (Atus 10:34, 35) Justisa di Deus é bon pa nos, pamodi kel-la ta pô-l ta trata tudu algen igual. Kel-li krê fla ma nu pode ser amigu di Deus i adora-l ka ta inporta kal ki é nos rasa, país, puzison na sosiadadi ô kantu skóla ki nu ten.

Deus krê pa nu intende modi ki el ta aji ku justisa i pa nu prende ku el. É pur isu ki el da-nu konsénsia. Bíblia ta fla ma konsénsia é sima un lei ‘skrebedu na nos korason’, ki ta aviza-nu si nos konportamentu sta dretu ô mariadu. (Romanus 2:15) Modi ki kel-li ta djuda-nu? Óras ki nu ta trena nos konsénsia dretu, el pode djuda-nu ka faze  kuzas mariadu ki ta prujudika-nu, i si nu fadja, el ta djuda-nu rapende i koriji kuzê ki nu faze di mariadu. Nton intende justisa di Deus ta djuda-nu bira más se amigu!

“Deus é amor.” — 1 JUAN 4:8.

Deus ta mostra puder, sabedoria i justisa, má Bíblia ka ta fla ma el é puder, sabedoria ô justisa. Bíblia ta fla ma el é amor. Pamodi? Pamodi nu pode fla ma puder di Deus ta da-l kapasidadi pa el faze kuzas i se justisa ku se sabedoria ta gia kuzê ki el ta faze, má é se amor ki ta pô-l ta aji. Amor ta motiva tudu kuza ki el ta faze.

Enbóra Deus ka mesteba di nada, se amor pô-l ta kria pesoas intilijenti na séu ku téra, asi pa el mostra-s amor i pa el kuida di es. Amor tanbê pô-l ta kria téra pa el ser un kaza perfeitu pa nos. Tanbê el ta kontinua ta mostra amor pa tudu algen na téra, pamodi “el ta poi se sól ta sai pa algen mau i pa algen bon. I el ta poi txuba ta kai pa algen justu i pa algen injustu.” — Mateus 5:45.

Alén di kel-li, “Jeová ten txeu konpaxon i mizerikórdia.” (Tiagu 5:11) El gosta txeu di kes algen ki ta sforsa di korason pa konxe-l i pa bira se amigu. Deus ta presta atenson na kada algen. Na verdadi, ‘el ta kuida di nos.’ — 1 Pedru 5:7.

Modi ki amor di Deus ta djuda-nu? Nu gosta di odja sól ta kanba. É sábi obi un bebé ta ri. Nu ta da valor pa amor di nos família. Nu ka meste di kes kuza li pa nu pode sta bibu. Má kes kuza li ta da-nu txeu alegria na vida.

Otu manera ki Deus ta mostra-nu se amor é através di orason. Bíblia ta fla: “Ka nhos preokupa dimás ku ninhun kuza, má sénpri nhos ora pa Deus i nhos inplora-l pa el orienta nhos na tudu kuza, i sénpri nhos agradese-l.” Deus é sima un pai ki ten amor. El krê pa nu djobe se ajuda pa nu pode lida ku nos preokupason, mésmu kes ki nu ka ta konta ningen. Nton, Jeová, na tudu se amor, el promete da-nu “kel pas di Deus ki nu ka ta konsigi intende”. — Filipensis 4:6, 7.

Nu ta spera ma kel splikason li sobri kes kualidadi prinsipal di Deus, sima puder, sabedoria, justisa i amor, djuda-u intende midjór modi ki Deus é. Pa bu gratidon pa Deus bira más txeu, nu ta konvida-u pa bu prende kuzê ki dja el faze i kuzê ki el sta ben faze pa djuda-u.