Kuzê ki ta poi un algen ta xinti ódiu?
Pamodi ki ten txeu ódiu na mundu? Pa nu sabe respósta, nu meste ntende kuzê ki é ódiu, pamodi ki algen ta kumesa ta ôdia kunpanheru i modi ki ódiu ta spadja.
Kuzê ki é ódiu?
Ódiu é óras ki nu ka gosta di un algen pa nada ki ten ô óras ki nos é kóntra un algen ô un grupu di algen. É mutu más di ki sô xinti txeu raiba di un algen duránti un ténpu.
PAMODI KI PESOAS TA KUMESA TA ÔDIA KUNPANHERU?
Ten txeu kuza ki ta poi pesoas ta ôdia kunpanheru. Alvês, pesoas ta xinti ódiu di otus algen ka pamodi kuzas ki es ta faze, má pamodi kenha ki es é. Es ta xinti ódiu di kes algen pamodi es ta atxa ma es é mau, es é prigozu i ma nunka es ka ta midjora. Tanbê, es ta ôdia otus pamodi es ta atxa ma es é más inportanti di ki kes algen ô pamodi es ta atxa ma é kes algen ki sta ta poi txeu prubléma ta kontise. Alvês pesoas ta xinti ódiu di otus algen pamodi algun injustisa ô violénsia ki es pasa pa el ô pamodi otus sentimentu mariadu.
MODI KI ÓDIU TA SPADJA
Pesoas pode ôdia otus sikrê es ka konxe-s. Pur izénplu, alguns algen ta pensa kuzas mariadu di otus sô pamodi ses amigu i ses família ta pensa di kel manera. Pamodi kel-li, ódiu ta spadja mutu más txeu.
Óras ki nu ta odja modi ki é fásil ódiu spadja, nu ta ntende pamodi ki txeu algen ta ôdia kunpanheru. Má, Bíblia ta fla-nu modi ki ódiu kumesa i pamodi ki ten txeu ódiu na mundu.
BÍBLIA TA FLA-NU MODI KI ÓDIU KUMESA
É KA ALGEN LI NA TÉRA KI POI ÓDIU NA MUNDU. Ódiu kumesa kantu un anju na Séu, ki dipôs bira ta txomadu Satanás, rabela kóntra Deus. Satanás ‘foi un asasinu kantu el kumesa’ ta rabela. Dja ki ‘el é mintirozu i pai di mintira’, el sta ta poi algen ta ôdia kunpanheru i ta faze violénsia. (João 8:44; 1 João 3:11, 12) Bíblia ta fla ma el é un algen mau, violéntu i xeiu di raiba. — Jó 2:7; Apocalipse 12:9, 12, 17.
NU TEN TENDÉNSIA DI ÔDIA KUNPANHERU PAMODI ANOS É INPERFEITU. Kel primeru ómi, Adon, sigi izénplu di Satanás i el peka. Pamodi kel-li tudu algen nase ku pekadu i inperfeison. (Romanos 5:12) Kain, ki éra kel primeru fidju di Adon, xinti ódiu di se irmon Abel i el mata-l. (1 João 3:12) É verdadi ki txeu algen ta mostra amor i bondadi pa kunpanheru. Má pamodi pekadu ki nu erda di Adon, txeu algen é invejozu, orgulhozu i es ta pensa sô na ses kabésa. Tudu kel-li ta traze más ódiu inda. — 2 Timóteo 3:1-5.
É MÁS FÁSIL UN ALGEN ÔDIA OTUS SI EL KA GOSTA DI ES. Mundu sta xeiu di algen mau i kel-li sta ta poi ódiu ta bira más txeu. Pa tudu ladu, nu ta odja diskriminason, violénsia i pesoas ki ta uza palavras pa ofende otus. Tudu kes kuza li sta ta kontise pamodi ‘mundu interu sta na puder di Malvadu’, ki é Satanás. — 1 João 5:19.
Bíblia ta fla-nu pamodi ki ten ódiu na mundu i tanbê el ta mostra-nu un soluson.
