Notísias sábi di Reinu di Deus sta ta pregadu na téra interu, sima Jizus fla ma ta kontiseba. (Mateus 24:14) Na livru di Daniel, Bíblia ta fla ma kel Reinu li é govérnu di Deus. Na kapítlu 2 di livru di Daniel ten un profesia sobri alguns govérnu ki ta ben mandaba na mundu, désdi Babilónia ti nos ténpu. Daniel 2:44 ta mostra kuzê ki ta ben kontise na futuru. El ta fla:

‘Deus di Séu ta ben traze un reinu ki ka ta kaba nunka más. I kel reinu li ka ta pasa pa mô di ninhun otu povu. El ta ben disfaze i el ta ben kaba ku tudu kes reinu, i sô el ta ben fika pa tudu ténpu’.

Kel-li i otus profesia di Bíblia ta mostra ma Reinu di Deus ta ben fika na lugar di tudu kes govérnu di ómi. Dipôs el ta ben poi algen ta vive sábi li na téra. Modi ki vida ta ben ser óras ki kel-li kontise? Pa sabe respósta, odja alguns promésa sábi di Deus ki ka ta dura ta ben kunpri.

• GÉRA TA BEN KABA

  Salmo 46:9: ‘Deus ta kaba ku géra na Téra interu. El ta kebra arku i el ta kebra lansa padás-padás, karus di géra el ta kema-s na lumi.’

  Oji ta gastadu txeu dinheru i konhisimentu pa faze arma i pa mata algen. Óras ki Reinu di Deus ben governa téra kel-li ka ta ben kontise más. Tudu rikéza i konhisimentu ta ben uzadu pa djuda algen.

• DUÉNSA TA BEN KABA

  Isaías 33:24: ‘Ningen ki ta mora la ka ta fla: “N sta duenti.”’

  Pensa na un mundu ki ningen más ka ta ben sufri pamodi duénsas di korason, kánser, paludismu ô kalker otu duénsa. Ningen ka ta ben meste ramedi i ospital. Tudu algen ta ben ten saúdi perfeitu.

• FÓMI TA BEN KABA

  Salmo 72:16: ‘Ta ben ten kumida avontádi na Téra, i riba monti ta ben ten un monti kumida.’

  Téra ta ben da kumida avontádi ki ta ben distribuidu pa tudu algen. Ka ta ben ten fómi más nen kes duénsa pamodi falta di kumida.

• DÓR, SUFRIMENTU I MÓRTI TA BEN KABA

  Apocalipse 21:4: ‘Deus ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór. Kuzas di pasadu ka ta ben más.’

  Kel-li krê fla ma vida ta ben ser perfeitu i pa tudu ténpu. I téra ta ben ser un paraízu. É kel-li ki Jeová, ki é nos Kriador ki krê-nu txeu, promete.

Bu ta atxa ma kel-li é sábi dimás pa ser verdadi? Maioria di algen ta atxa ma kes promésa di Bíblia é sábi dimás. Má simé, pamodi txeu motivu, monti algen ta atxa difísil di kridita ma ta da pa nu vive pa tudu ténpu. É normal pensa si, dja ki nu ka konxe ningen ki pasa pa kel-li i dipôs ben konta modi ki éra.

Tudu algen ta peka i ta móre. Alén di kel-li, algen dja kustuma di tal manera ku sufrimentu i prublémas ki es ta atxa ma é normal vive si. Má é ka kel tipu di vida li ki Jeová, nos Kriador krê pa nu tinha.

Pa djuda-nu ten sertéza ma Deus ta ben kunpri tudu kel ki el promete, el fla sobri kuzê ki el promete: ‘El ka ta volta pa mi sen rezultadus, má di sertéza el ta faze kel ki N krê, i sen falta el ta kunpri kuza ki N manda-l pa faze.’ — Isaías 55:11.

Bíblia ta fla ma Jeová ‘ka pode konta mintira’. (Tito 1:2) El promete txeu kuza sábi pa futuru. Pur isu, é bon nu para i nu pensa: Algen pode vive pa tudu ténpu na paraízu na téra? Kuzê ki nu meste faze pa nu odja kel promésa di Deus li ta kunpri? Na kes otu pájina, bu ta atxa respósta.