Modi ki bu ta atxa ma bu futuru i futuru di bu família ta ben ser? Nhos ta ben ten txeu dinheru ô prubléma ku dinheru? Nhos ta ben ten txeu amor ô nhos ta ben fika nhos sô? Bu ta ben vive pa txeu ténpu ô bu ta móre dirapenti? Dja ten monti anu ki algen ta tenta sabe modi ki futuru ta ser.

Oji kes spesialista ta studa kuzê ki sta kontise na mundu i es ta fla kuzê ki pode ben kontise na futuru. Alguns di kes kuza ki es ta fla ta kontise i otus ka ta kontise. Na alguns situason es ta fadja txeu própi. Odja situason di Guglielmo Markoni, ki inventa un manera di kumunika sen fiu. Alguns algen ta fla ma na 1912 el fla kel-li: “Kumunikason sen fiu ta ben kaba ku géra.” I un reprizentanti di un inpréza di gravason ki txomaba Deka, ka seta grava grupu Beatles na 1962, pamodi el ta atxaba ma kes grupu ki ta tokaba vióla ta dexaba di faze susésu.

Txeu algen ta djobe ajuda na fitisaria ô bruxaria pa sabe futuru. Alguns algen ta djobe orientason na astrolojia. Pur izénplu, es ta lé kes kuza ki ta fladu sobri síginu ki ta parse sénpri na jornal i revistas. Otus ta djobe kes algen ki ta fla ma es ta dibinha ô kes ki ta invoka spritu, pamodi es ta fla ma es ta konsigi “sabe” futuru através di karta, nunbru ô palma di mô di algen.

Na ténpu antigu, alguns algen ta tenta sabeba futuru através di kes algen ki ta fla ma es ta reprizentaba un deus i dipôs es ta flaba kuzê ki kel deus fla. Pur izénplu, ta fladu ma Rei Krezu di reinu di Lídia, manda prezentis karu pa ténplu di Delfus, na Grésia, na undi ki es ta flaba kuzê ki ta kontiseba na futuru. El krê sabeba kuzê ki ta kontiseba si el ba lutaba kóntra Siru, ki éra rei di Pérsia. El fladu ma el ta distruíba “un inpériu grandi”. Rei Krezu bai pa géra ku kunfiansa ma el ta ganhaba, má kel inpériu grandi ki distruídu éra kel di Krezu!

Kel kuza ki el fladu ka foi dirétu i el ka sirbi-l pa nada. Ta parseba ma kel kuza ki fladu éra verdadi ka nporta kenha ki ganhaba géra. Krezu perde tudu kuza pamodi kel informason mariadu ki el dadu. Na nos ténpu, kes algen ki ta djobe kes manera li di sabe futuru sta ta ten bons rezultadu?