DJA BU kustuma xinti mariadu di tal manera ki da-u gana di mata kabésa? Nton talvês bu ta ntende kuzê ki Adriana xinti. Tudu óra el ta staba preokupadu, tristi i sen speransa. Adriana atxadu ku depreson.

Kauru di Japon, ta kuidaba di se pai ku se mai ki dja staba algen grandi i ki staba duenti. El fla: “Alvês, N ta fikaba dizanimadu pamodi preson dimás na trabadju. Ku ténpu, N perde vontadi di kume i N ka ta konsigi durmiba dretu. Alvês N ta pensaba ma N ta fikaba aliviadu si N moreba.”

Un ómi di Nijéria ki txoma Nelson, fla: “N ta staba sénpri tristi i N ta txoraba tudu óra, pur isu N tenta mata kabésa.” Filismenti Nelson, Kauru i Adriana ka mata kabésa. Má tudu anu monti algen ta mata kabésa.

Maioria di kes algen ki ta mata kabésa é ómi i txeu di es tevi vergónha di pidi ajuda. Jizus fla ma kes algen duenti meste di dotor. (Lucas 5:31) Nton, si bu sta pensa na mata kabésa favor, ka bu xinti vergónha di pidi ajuda. Txeu algen ki tene depreson da kónta ma tratamentu ku un dotor pode djuda-s. Nelson, Kauru i Adriana djobe ajuda na un dotor i oji es ta xinti mutu más midjór.

Dotor pode uza ramedi ô pâpia ku un algen ki tene depreson pa djuda-l. Kes algen ki tene depreson tanbê meste pa ses família i amigus ntende-s, mostra-s paxénxa i kuida di es ku amor. Kel midjór amigu ki kalker algen pode ten é Jeová, i el ta ajuda-nu através di se Palavra, Bíblia.

Kes algen ki tene depreson pode meste tratamentu pa txeu ténpu i es pode meste muda ses ábitu. Si bu sta ta luta kóntra depreson, bu pode spéra un futuru rei di sábi, sima Nelson. El fla: “N tene gana pa txiga kel ténpu ki Isaías 33:24 ta ben kunpri. La ta fla ma ningen más na Téra ka ta ben fla: ‘N sta duenti.’” Faze sima Nelson, pensa na kel promésa di Deus ma ta ben ten un ‘Téra novu,’ na undi ki ka ta ben ten ‘dór’ más. (Apocalipse 21:1, 4) Kel promésa li krê fla ma ningen más ka ta ben xinti dór nen na korpu nen na menti. Kes sentimentu kasábi ki bu tene, ta ben kaba pa tudu ténpu. Nunka más bu ka ta ben lenbra di bus sentimentu kasábi ‘i nen es ka ta ben pasa pa bu korason.’ — Isaías 65:17.