Jizus fla: “Gentis di un nason ta briga ku gentis di otu nason. Txeu nason ta briga un kóntra kel otu. Na txeu lugar gentis ta ben sufre i ta ben móre, pamodi téra ta treme ku forsa. Gentis ta ben sufre txeu fómi i ta ben duense rixu.” (Lúkas 21:10, 11, BPK ) Tudu kes kuza li djuntu, ta forma un sinal ki ta mostra ma “sa ta txiga ténpu ki Déus ta ben guberna tudu algen”. Tudu kes kuza li dja kustuma kontise omésmu ténpu? Es sta ta kontise na mundu interu? Odja alguns próva.

1. GÉRAS

Na anu di 1914, kontise un géra ki prujudika más algen i más país di ki kalker otu géra! Txeu bês, storiadoris ta fla ma anu di 1914, é anu ki muda stória di mundu, pamodi kumesa kel primeru géra na mundu interu. Na kel géra, uzadu tankis di géra, avions ki ta lansa bonba, metralhadora, gas venenozu i otus tipu di arma, mutu más di ki antis. Dipôs, kumesa kel sugundu géra na mundu. É na kel géra la ki inventadu i uzadu bonba atómika pa primeru bês. Désdi anu di 1914, ómis dja faze géra na un lugar tras di kel otu i kes géra dja mata milhons di algen.

2. TREMOR DI TÉRA

Un ensiklopédia a ta fla ma tudu anu ta kontise uns 100 tremor di téra ki ta faze “txeu stragu”. Un lugar na Mérka b ki ta fazedu piskiza sobri tremor di téra, fla ma “rejistus ki fazedu (désdi anu 1900), ta mostra ma tudu anu pode kontise uns 16 grandi tremor di téra.” Alguns algen ta fla ma nunbru di tremor di téra sta más txeu, pamodi oji ómis ta konsigi sabe midjór si kontise un tremor di téra. Má nu sabe ma tremor di téra sta ta traze sufrimentu ku mórti mutu más di ki un bês.

 3. FALTA DI KUMIDA

Na mundu interu sta falta di kumida pamodi géra, korupson, falta di dinheru i prublémas na agrikultura. Un rilatóriu di Programa Mundial de Alimentos, di anu 2018, fla: “Na mundu interu 821 milhon di algen ta pasa fómi i 124 milhon di kes algen ta pasa fómi ti dimás.” Tudu anu, uns 3,1 milhon di mininu ta móre pamodi es ka tene kumida ki é bon pa saúdi. Na anu 2011, kuazi metadi di kes mininu ki móre na mundu interu é pamodi es ka tinha kumida ki é bon pa saúdi.

4. DUÉNSAS KI TA SPADJA FAXI

Un publikason di Organizason Mundial di Saúdi ta fla: “Désdi anu 2001 sta ta parse txeu duénsa ki ta spadja faxi. Duénsas antigu, sima kólera, pésti, fébri amarela, torna parse. Tanbê sta ta parse otus duénsa ki ta spadja faxi, sima gripi, SARS [Síndrome respiratória aguda severa ], MERS [Síndrome respiratória do Oriente Médio ], ébola i zika.” Duénsa di COVID-19 é kel más novu. Sientistas ku dotoris dja diskubri txeu kuza sobri kes duénsa, má simé es ka konsigi atxa kura pa tudu duénsa.

5. TRABADJU DI PREGASON NA MUNDU INTERU

Jizus pâpia di otu kuza ki ta faze párti di kel sinal. El fla: ‘Kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’ (Mateus 24:14 ) Timenti mundu sta pasa pa prublémas konplikadu, más di 8 milhon di algen sta ta pâpia di notísias sábi di Reinu na más di 240 país i na más di 1.000 língua. Kel-li é un kuza ki nunka ka kontiseba antis.

Kes kuza ki Jizus fla ma ta kontiseba sta ta kontise oji. Pamodi ki é inportanti nu sabe kel-li? Pamodi Jizus fla: “Óki nhos odja ma kes kuza terivi sa ta kontise, nhos pode ten sertéza ma sa ta txiga ténpu ki Déus ta ben guberna”. — Lúkas 21:31, BPK.

Kel sinal ki Jizus da djuntu ku kes otu párti di Bíblia, ta djuda-nu ntende ma Reinu di Deus kumesa ta governa na anu di 1914. c Désdi kel ténpu Jizus Kristu bira Rei di Reinu di Deus. (Salmo 2:2, 4, 6-9 ) Ka ta dura, Reinu di Deus ta ben governa Téra i el ta ben kaba ku tudu kes otu govérnu. El ta ben bira Téra na un paraízu, undi tudu algen ta ben vive pa tudu ténpu.

Ka ta dura, kes palavra ki Jizus inxina na kel orason ta ben kunpri: ‘Faze bu Reinu ben. Pa bu vontadi fazedu na Séu, asi tanbê na Téra.’ (Mateus 6:10 ) Má, kuzê ki Reinu sta ta faze désdi ki el kumesa ta governa na anu 1914? I kuzê ki ta ben kontise óras ki Reinu kumesa ta governa Téra?