Ka ta dura, kel novu govérnu di Deus ta ben governa Téra interu la di Séu. Óras ki kel-li kontise, Téra ta bira un lugar sábi undi pesoas ta vive unidu i filís. Deus skodje Jizus pa governa Téra interu. El é diferenti di kes governanti di gósi. Sénpri el ta faze kel ki é midjór pa tudu algen. El ta ben governa sénpri ku amor, bondadi mizerikórdia i justisa. — Isaías 11:4.

Na kel mundu novu di Deus, ka ta ben ten divizon entri algen di rasa ô kultura diferenti. Tudu algen na Téra ta ben sta unidu. (Apocalipse 7:9, 10) Es ta ben ama Deus i kunpanheru. Es tudu ta ben trabadja djuntu i na pas, pa faze vontadi di Deus ki é bira Téra un paraízu. — Salmo 115:16.

Óras ki Reinu di Deus ben governa Téra, nos Kriador ka ta ben dexa mudansas di klima distrui planéta Téra. (Salmo 24:1, 2) Kantu Jizus staba na Téra, el kalma un tenpistadi fórti pa el mostra kuzê ki el pode faze ku puder ki Deus da-l. (Marcos 4:39, 41) Na govérnu di Jizus ningen ka meste ten medu di dizastris na naturéza. Óras ki Reinu di Deus ben governa, nu ta ben vive na pas ku animal i ka ta ben ten dizastri na naturéza. — Oseias 2:18.

Tudu algen ta ben ten saúdi perfetu. Ningen ka ta ben fika duenti, bira bédju ô móre. (Isaías 35:5, 6) Nos tudu ta ben vive na un anbienti linpu i bunitu sima kel primeru kazal ta viveba na jardin di Éden. Sima na jardin di Éden, na kel mundu novu Téra ta ben da txeu kumida i ningen ka ta ben xinti falta di nada. (Génesis 2:9) Sima kontise ku povu di Deus na ténpu antigu, nu ta ben ‘kume pon avontádi’ na Paraízu. — Levítico 26:4, 5.

Óras ki Reinu di Deus ben governa Téra interu, tudu algen ta ben ten pas i ta ben trata kunpanheru ku bondadi i justisa. Géra i abuzu di puder ka ta ben ten más i tudu algen ta ben ten kel ki es ta meste. Bíblia ta promete: ‘I kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu’. — Miqueias 4:3, 4.

Tudu família ta ben ten un lugar di mora, sen fika preokupadu si un dia es ta ben perde ses kaza. Bíblia ta fla ma kes ki ta ben vive na mundu novu di Deus ‘ka ta ben trabadja duru sen rezultadu’. — Isaías 65:21-23.

Bíblia ta promete: ‘Téra ta intxi di konhisimentu di Jeová’. (Isaías 11:9) Na kel mundu novu pesoas ta ben prende sobri kes kuza bunitu ki Jeová kria i sobri se sabedoria ki ka ten fin. Ningen ka ta ben uza se konhisimentu pa faze armas ô pa prujudika otus algen. (Isaías 2:4) Envês di kel-li, pesoas ta ben prende vive na pas ku kunpanheru i kuida di Téra. — Salmo 37:11.

Deus pripara Téra ku amor pa nu pode vive ku alegria tudu dia. El krê pa nu vive pa tudu ténpu na Téra. (Salmo 37:29; Isaías 45:18) Pa kel-li kontise, Deus ‘ta ben kaba ku mórti pa tudu ténpu’. (Isaías 25:8) Bíblia ta promete: ‘Ka ta ten más mórti, nen ka ta ten más tristéza, nen txoru, nen dór’. (Apocalipse 21:4) Tudu kes ki skapa na fin di es mundu mau i kes ki ben resusitadu na kel mundu novu di Deus, ta ben ten xansi di vive pa tudu ténpu. — João 5:28, 29; Atos 24:15.

 Désdi gósi, milhons di algen dja sta ta pripara pa ben vive dibaxu di govérnu di Deus, ki sta kuazi ta ben. Nbóra es é inperfetu, es sta tenta ser kel tipu di algen ki Deus krê pa ben vive na se mundu novu. Modi ki es ta faze kel-li? Es sta ta prende sobri Jeová Deus i Jizus Kristu, ki é se Fidju ki el manda pa Téra. — João 17:3.

Odja kuzê ki bu ten ki faze pa bu skapa di kel mundu mau li i ben vive na kel mundu novu di Deus ki sta kuazi ta txiga. Faze un studu di Bíblia di grasa ku un Tistimunha di Jeová, na livru Vive Filís pa Tudu Ténpu!