Kuzê ki ta mostra ma nu ta ten un futuru midjór?
Txeu algen ta kridita ma algun forsa ki es ka ta odja ta kontrola ses futuru. Pur isu, es ta atxa ma es debe faze alguns kuza pa midjora ses futuru.
NA KUZÊ KI TXEU ALGEN TA KRIDITA
ASTROLOJIA: Txeu algen ta kridita ma nu ta sabe futuru di un algen na puzison ki strélas ta sta óras ki kel algen nase. Tanbê es ta uza síginu pa sabe ses futuru i pa djuda-s toma disizon.
LÉ KARTA: Ten otus algen ki ta kridita ma si es bai na kes algen ki ta lé karta, es pode sabe pamodi ki es tene prublémas na vida i kuzê ki es meste faze pa es proteje. Es ta kridita ma si es sabe kel-li, es ta konsigi ivita kes prubléma ô atxa un soluson pa es. Tanbê es ta kridita ma es ta ten bons rezultadu na vida.
ADORASON DI MORTUS: Inda ten otus algen ki ta kridita ma es ten ki adora ses família ki dja móre ô alguns deus pa pode proteje-s i abensua-s. Van, * ki ta mora na Vietnan, fla: “N ta kriditaba ma óras ki N ta adoraba nhas família ki dja móre, N ta tinha un vida dretu gósi i un futuru midjór pa mi ku nhas fidju.”
RIENKARNASON: Txeu algen ta kridita ma óras ki un algen móre, el ta nase otu bês ku otu korpu i kel-li ta kontinua ta kontise un bês bai. Es ta kridita ma kes kuza dretu ô mariadu ki sta kontise ku es gósi é pamodi kes kuza ki es fazeba na kel otu vida.
Txeu algen ta fla ma es ka ta kridita na kes kuza ki dja nu pâpia di el. Má simé, es ta faze kuzas sima lé mô, djobe síginu, bai kaza di méstri ô kuranderu i otus kuza sima kes-li. Es ta atxa ma kes kuza li, talvês pode djuda-s sabe ses futuru.
KES KUZA LI TA DJUDA ALGEN?
Kes algen ki faze kes kuza li konsigi ten un vida dretu i un futuru midjór?
Odja spiriénsa di Rau, ki ta mora na Vietnan. El ta uzaba astrolojia i el ta adoraba se famílias ki móre. Kes kuza li djuda-l ten un vida midjór? Rau fla: “Nha nogósiu ka da sértu, N fika ku txeu dívida, N tevi txeu prubléma na família i N fika deprimidu.”
Kiuming, di Taiuan, tanbê ta kriditaba na astrolojia, rienkarnason, distinu i adorason di mortus. Dipôs di analiza kes kuza li ku kuidadu, el fla: “N da kónta ma alguns di kes ensinu i kustumus li ka sta di akordu ku kunpanheru i es ta konfundi algen kabésa. Kes kuza ki astrolojia ta fla, txeu bês ka ta kontise. I sobri rienkarnason, si bu ka ta lenbra ma bu viveba antis, modi ki bu pode muda i faze kuzas dretu na kel otu vida?”
“N da kónta ma alguns di kes ensinu i kustumus li ka sta di akordu ku kunpanheru i es ta konfundi algen kabésa.” — KIUMING, TAIUAN.
Rau, Kiuming i txeu otus algen kumesa ta da kónta ma é ka distinu, strélas, adorason di mortus ô rienkarnason ki ta kontrola nos futuru. Má kel-li krê fla ma nu ka ta konsigi faze nada pa nu midjora nos futuru?
Txeu algen ta atxa ma pa es ten un futuru midjór es ten ki ten bon skóla i txeu dinheru. Kes algen li ten razon?
^ par. 6 Mudadu alguns nómi na kel artigu li i na kes otu dipôs di kel-li.
^ par. 16 Kes palavra li sta na Bíblia, na Gálatas 6:7. Nu ta atxa kel mésmu ideia li na un ditadu di Ázia txeu konxedu, ki ta fla: “Símia melon, bu ta panha melon; símia fijon, bu ta panha fijon.”
Bu pode gosta di kes-li tanbê
SENTINÉLA
Astrolojia i dibinhason ta djuda-nu sabe futuru?
Bu pode kunfia na kes manera li di sabe futuru?
