1. Sima sta splikadu na Efésios 6:10-13, kal ki é un di kes midjór manera ki Jeová ta mostra ma el ta preokupa ku nos? Splika.

UN DI kes midjór manera ki Jeová ta mostra ma el ta preokupa ku se sérvus é óras ki el ta djuda-nu mante firmi kóntra nos inimigus. Nos inimigus prinsipal é Satanás ku se dimónis. Jeová ta aviza-nu sobri kes inimigu i el ta da-nu kuzê ki nu meste pa nu ka kai na ses armadilha. (Lé Efésios 6:10-13.) Óras ki nu ta seta ajuda di Jeová i nu ta kúnfia na el di tudu korason, nu ta konsigi mante firmi kóntra Diabu. Nu meste ten kel mésmu kunfiansa di apóstlu Polu. El skrebe: ‘Si Deus é pa nos, ken ki ta ser kóntra nos?’ — Rom. 8:31.

2. Kuzê ki nu sta ben odja na kel studu li?

² Anos ki é kristons verdaderu, nu ka ta konsentra dimás na Satanás ku dimónis. Nu ta konsentra nos atenson na prende sobri Jeová i faze se vontadi. (Sal. 25:5) Má, nu meste konxe kes armadilha di Satanás. Pamodi? Asi, el ka ta konsigi ngana-nu. (2 Cor. 2:11; nóta di rodapé) Na kel studu li, nu sta ben odja un di kes manera ki Satanás ku se dimónis más ta uza pa ngana algen. Tanbê nu ta ben prende modi ki nu pode mante firmi kóntra es.

3-4. (a) Kuzê ki é fitisaria ô bruxaria? (b) Kuzê ki alguns piskiza ta mostra sobri nunbru di algen ki ta kridita na fitisaria ô bruxaria?

³ Un di kes kuza ki Satanás ku se dimónis más ta uza pa ngana algen é fitisaria ô bruxaria. Kes ki ta faze fitisaria  ô bruxaria ta fla ma es ta konsigi sabe ô kontrola kuzas ki otus algen normal ka ta pode. Pur izénplu, alguns ta fla ma es ta konsigi sabe futuru através di dibinhason ô astrolojia. Otus ta faze sima si es sta pâpia ku kes algen ki dja móre. Tanbê, ten kes ki ta uza fitisaria ô majia pa tenta faze otus algen malfetu. *

⁴ Txeu algen na mundu interu ta kridita na fitisaria ô bruxaria. Un piskiza ki fazedu na 18 país di Mérka Latinu i na Karibi, mostra ma na kada três algen ki entrivistadu, un ta kridita na majia, fitisaria ô bruxaria i kel mésmu nunbru di algen ta kridita ma nu pode pâpia ku spritus. Tanbê fazedu otu piskiza na 18 país di Áfrika. La, más di metadi di kes algen ki entrivistadu ta kridita na fitisaria. É klaru ki ka ta nporta undi nu ta mora, nu ten ki sta sienti kóntra fitisaria ô bruxaria, pamodi Satanás ta tenta ngana ‘Téra interu.’ — Apo. 12:9.

5. Kuzê ki Jeová ta pensa di fitisaria ô bruxaria?

⁵ Jeová é kel ‘Deus di verdadi.’ (Sal. 31:5) Nton, kuzê ki el ta pensa di fitisaria ô bruxaria? El ta ôdia! Jeová fla israelitas: ‘I na bu meiu ka debe ten ningen ki ta kema se fidju matxu ô se fidju-fémia na lumi, ô ki ta faze dibinhason, ô ki ta faze majia, ô ki ta djobe agoru, ô un fitiseru, ô un algen ki ta prende otu ku nkantamentu, ô ki ta djobe kes algen ki ta invoka spritus, ô un algen ki ta dibinha, ô algen ki ta pâpia ku mortus. Pamodi Jeová ta ôdia ken ki ta faze kes kuza li’. (Deut. 18:10-12) Kristons ka sta dibaxu di Lei ki Jeová daba israelitas. Má, nu sabe ma kel ki el ta xinti pa fitisaria ô bruxaria ka muda, kontinua kel mê. — Mal. 3:6.

6. (a) Modi ki Satanás ta uza fitisaria ô bruxaria pa prujudika algen? (b) Di akordu ku Eclesiastes 9:5, kal ki é verdadi sobri kuzê ki ta kontise ku mortus?

⁶ Jeová ta aviza-nu kóntra fitisaria ô bruxaria pamodi el sabe ma Satanás ta uza-l pa prujudika pesoas. Satanás ta uza fitisaria ô bruxaria pa spadja se mintiras, i tanbê kel mintira ma mortus ta kontinua bibu na otu lugar. (Lé Eclesiastes 9:5.) Satanás tanbê ta uza fitisaria ô bruxaria pa poi pesoas ku medu i pa afasta-s di Jeová. Se obijetivu é poi kes algen, ki ta faze fitisaria ô bruxaria, ta kúnfia na spritus mau envês di kúnfia na Jeová.

7. Kuzê ki Jeová ta fla-nu?

⁷ Sima fladu antis, Jeová ta fla-nu kuzê ki nu meste sabe pa Satanás ku dimónis ka ngana-nu. Nu ben odja alguns kuza ki nu pode faze pa nu kontinua firmi na nos luta kóntra Satanás ku dimónis.

8. (a) Kal ki é kel manera prinsipal di nu proteje kóntra kes spritu mau? (b) Modi ki Salmo 146:4 ta mostra kel mintira ki Satanás ta konta sobri mórti?

⁸ Lé Palavra di Deus i pensa na kuzê ki bu lé. Kel-li é kel manera prinsipal di nu proteje di kes mintira ki spritus mau ta spadja. Palavra di Deus é sima un spada  moladu ki pode korta i mostra kes mintira ki Satanás ta spadja. (Efé. 6:17) Pur izénplu, Palavra di Deus ta mostra ma mortus ka pode pâpia ku algen bibu. (Lé Salmo 146:4.) Tanbê el ta lenbra-nu ma é sô Jeová ki pode fla futuru di manera izatu. (Isa. 45:21; 46:10) Si nu lé Bíblia tudu dia i nu pensa na kuzê ki nu lé, nu ta sta priparadu pa ivita i pa ôdia kes mintira ki kes spritu mau krê pa nu kridita na es.

9. Kal ki é alguns kuza ki sta ligadu ku fitisaria ô bruxaria?

⁹ Ka bu faze nada ki sta ligadu ku fitisaria ô bruxaria. Kristons verdaderu ka ta faze nada ki sta ligadu ku fitisaria ô bruxaria. Pur izénplu, nu ka ta bai kaza méstri ô kuranderu, nen nu ka ta tenta pâpia ku mortus di otus manera. Sima dja nu odjaba na kel otu studu, nu ka ta partisipa na kes kustumu ki ta fazedu ku bazi na kel ideia ma mortus ta kontinua bibu na algun lugar. Tanbê, nu ka ta uza astrolojia nen nu ka ta nvolve ku kes algen ki ta faze dibinhason pa sabe futuru. (Isa. 8:19) Nu sabe ma tudu kes kuza li é txeu prigozu i es pode pô-nu ta pâpia ku Satanás i dimónis.

10-11. (a) Kuzê ki alguns algen na Éfezu faze kantu es prende verdadi? (b) Di akordu ku 1 Coríntios 10:21, pamodi ki nu debe imita izénplu di kes kriston na sidadi di Éfezu, i modi ki nu pode faze kel-li?

¹⁰ Libra di kuzas ki sta ligadu ku fitisaria ô majia. Na ténpu di apóstlus, kes algen ki ta viveba na sidadi di Éfezu ta fazeba fitisaria ô bruxaria. Kantu es prende verdadi, es toma un grandi disizon. Bíblia ta fla: ‘Un monti di kes ki ta fazeba majia djunta ses livru i es leba pa ba kemadu dianti di tudu algen.’ (Atos 19:19 ) Kes algen na Éfezu faze di tudu pa es difende di kes spritu mau. Kes livru di majia ta kustaba txeu dinheru. Má,  envês di es da ô bende kes livru pa otus algen, es kema-s. Es staba más preokupadu na agrada Jeová di ki kantu dinheru ki es podia ganhaba ku kes livru.

¹¹ Modi ki nu pode imita izénplu di kes kriston na sidadi di Éfezu? Nu ta mostra sabedoria si nu libra di kalker kuza ki nu ten i ki sta ligadu ku fitisaria ô majia, sima kónta di odju ô kalker otu kuza ki pesoas ta poi na es pa proteje-s di kes spritu mau. — Lé 1 Coríntios 10:21.

12. Ki perguntas nu debe faze nos kabésa óras ki nu ta skodje diverson?

¹² Djobe ku kuidadu kuzas ki bu ta divirti ku el. Pergunta bu kabésa: ‘N ta kustuma lé livrus, revistas ô artigus na internet ki ta pâpia di fitisaria ô majia? Ki tipu di múzika, filmis, prugramas di tilivizon ô jogus di konputador N gosta di odja ô di obi? Algun di kes kuza li sta ligadu ku fitisaria ô bruxaria? Es ta mostra ô es ta pâpia di kuzas sima vanpiru, zunbi ô di pesoas ki ten puderis ki otus umanu ka ten? Es ta faze majia, fitisaria i maldison pa parse ma é un diverson ki ka ta prujudika ningen?’ É klaru ki é ka tudu diverson ki ta konta stórias ô stórias di fada ki ta sta ligadu ku fitisaria ô bruxaria. Pur isu, óras ki nu ta djobe si un diverson é dretu ô nau, nu debe sta disididu na skodje kuzas ki ka ten nada aver ku kel ki Jeová ta ôdia. Nu krê faze nos midjór pa nu ten un ‘konsénsia linpu’ dianti di Deus. — Atos 24:16. *

13. Kuzê ki nu debe ivita faze?

¹³ Ivita konta stórias sobri dimónis. Nu  ten ki faze sima Jizus ta fazeba. (1 Ped. 2:21) Antis di Jizus ben pa Téra, el ta viveba na Séu i el sabia txeu kuza sobri Satanás i dimónis. Má el ka ta staba ta konta stórias sobri kuzê ki kes spritu mau ta fazeba. Jizus kria inxinaba pesoas sobri Jeová, envês di djuda Satanás spadja se stórias. Nu pode imita izénplu di Jizus óras ki nu ka ta spadja stórias sobri dimónis. Má, nu ta mostra na kuzas ki nu ta fla ma nos korason sta kontenti pamodi algun kuza bon, ô ku verdadi. — Sal. 45:1.

14-15. (a) Pamodi ki nu ka debe ten txeu medu di kes spritu mau? (b) Kuzê ki ta mostra ma Jeová ta proteje se povu oji?

¹⁴ Ka bu xinti medu dimás di spritus mau. Na es mundu inperfetu ki nu sta vive oji, kuzas mariadu pode kontise ku nos di un óra pa kel otu, sima asidenti, duénsa ô ti mórti. Má, nu ka debe atxa ma kes spritu mau é kulpadu pa tudu kuza. Bíblia ta splika ma ‘ténpu i kuzas ki nu ka sta spéra’ pode kontise ku kalker un di nos. (Ecl. 9:11) Jeová dja mostra ma el ten mutu más puder di ki dimónis. Pur izénplu, Jeová ka dexa Satanás mata Jó. (Jó 2:6 ) Na ténpu di Muizes, Jeová mostra ma el tinha más puder di ki kes méstri di Ijitu ki ta fazeba majia. (Êxo. 8:18; 9:11) Tanbê, Jeová da Jizus puder pa tra Satanás ku dimónis di Séu i bota-s pa Téra. I ka ta dura, es ta ben podu prézu na abismu i es ka ta ben pode prujudika ningen. — Apo. 12:9; 20:2, 3.

¹⁵ Oji nu ta odja txeu kuza ki ta mostra ma Jeová ta proteje se povu. Pensa na trabadju di prega i inxina verdadi ki nu ta faze na mundu interu. (Mat. 28:19, 20) Kel trabadju li ta mostra klaru tudu kes kuza mau ki Diabu ta faze. Di sertéza, si Satanás ta podeba, el ta kababa ku nos trabadju. Má el ka ta pode. Pur isu, nu ka meste ten txeu medu di kes spritu mau. Nu sabe ma Jeová ta djobe pa Téra interu, ‘pa mostra se forsa pa kes algen ki ten korason konplétu pa el.’ (2 Cró. 16:9) Si nu kontinua lial pa Jeová, kes dimóni ka ta  pode faze-nu nada ki ta prujudika-nu pa tudu ténpu.

16-17. Da un izénplu ki ta mostra ma nu meste ten koraji pa nu difende di kes spritu mau.

¹⁶ Nu meste ten koraji pa nu pode mante firmi kóntra kes spritu mau, inda más óras ki amigus i famílias ka ta ntende nos disizon. Má, Jeová ta abênsua kes algen ki ta mostra koraji. Odja izénplu di un irman ki txoma Erica, ki ta mora na Gana. Kantu el tinha 21 anu, el seta studa Bíblia. Má, el éra fidju-fémia di un saserdóti ki ta fazeba majia. Nton, se família ta speraba ma el ta partisipaba di un kustumu ki ta nvolveba kume karni ki dja es ofereseba na un serimónia pa deuzis di se pai. Kantu Erica ka partisipa, se família odja kel-la sima un ofénsa pa ses deus. Es ta kriditaba ma kes deus ta kastigaba el ku duénsas.

¹⁷ Família di Erica tenta obriga-l partisipa na kel kustumu, má el ka faze kel-la. Pur isu el tevi ki sai di kaza. Alguns Tistimunha di Jeová dexa pa el fika ku es na ses kaza. Jeová abênsua Erica ku un novu família, pesoas ki bira sima se irmons ku irmans. (Mar. 10:29, 30) Se família bota-l pa rua i ti es kema se kuzas. Má Erica mante lial pa Jeová, el batiza i gósi el é pionera fíksu. El ka ten medu di dimónis. Erica fla sobri se família: “N ta faze orason tudu dia pa nha família tanbê konxe Jeová i pa es xinti liberdadi ki nu ta ten óras ki nu ta sirbi nos Deus di amor.”

18. Kuzê ki nu ta ganha si nu kúnfia na Jeová?

¹⁸ É ka tudu nos ki ta pasa pa un próva di fé difísil sima kel-li. Má, nos tudu nu meste mante firmi kóntra kes spritu mau i kúnfia na Jeová. Si nu faze kel-li, nu ta ganha txeu benson i Satanás ka ta ngana-nu ku ses mintira. Tanbê nu ka ta dexa medu di dimónis inpidi-nu di sirbi Jeová. Más inportanti inda, nu ta ten un amizadi fórti ku Jeová. Disiplu Tiagu skrebe: ‘Nhos obi ku Deus; má nhos fika kóntra Diabu, i el ta fuji di nhos. Nhos ser amigu di Deus i el ta ser nhos amigu.’ — Tia. 4:7, 8.