1. Kuzê ki Bíblia ta fla-nu di Jeová ki ta anima-nu?

BU TA gostaba pa algen julga-u pamodi kor di bu péli, pa fórma di bu róstu, pa bu altura ô pa bu pézu? Klaru ki nau. Fórti nu ta fika kontenti di sabe ma Jeová ka ta julga-nu sô pa kuzas ki otus ta odja! Pur izénplu, kantu Samuel odja fidjus di Jesé, el ka odja kuzê ki Jeová odja. Jeová flaba Samuel ma un di kes fidju di Jesé ta sérba rei di Israel. Má éra kal di es? Kantu Samuel odja Eliabi, kel fidju más grandi di Jesé, el fla: ‘Di sertéza é kel-li ki Jeová skodje.’ Eliabi ta parseba sima un rei. ‘Má, Jeová fla Samuel: “Ka bu djobe pa kel ki el ta parse nen pa se altura, pamodi N ka skodje-l.”’ Kuzê ki nu ta prende? Jeová kontinua ta fla: ‘Ómi ta odja kel ki ta parse, má Jeová ta odja korason.’ — 1 Sam. 16:1, 6, 7.

2. Sima sta na João 7:24, pamodi ki nu ka debe julga un algen pa kel ki nu ta odja? Da un izénplu.

² Anos é inperfetu, pur isu nos tudu nu ten tendénsia di julga otus pa kel ki es ta parse. (Lé João 7:24.) Má, nu ka ta konsigi konxe un algen dretu sô pa kel ki nu ta odja. Pur izénplu, imajina un dotor intilijenti i ku txeu spiriénsa. El ta konsigi konxe dretu un algen ki el sta da konsulta sô pa kel ki el sta odja? Nau. Primeru el meste obi-l ku atenson tudu prubléma di saúdi ki el tinha antis, sabe kuzê ki el ta pensa di se situason ô kuzê ki el sta xinti. Talvês, kel dotor ta manda-l faze xapa pa el pode odja modi ki el sta di pa déntu. Má si kel dotor ka faze kel-li, el pode pasa-l ramedi mariadu. Di mésmu manera, nu ka ta pode konxe nos  irmons ku irmans sô pa kel ki nu ta odja. Nu meste tenta ntende ki tipu di algen ki es é di pa déntu. É klaru ki nu ka ta pode lé korason, pur isu nunka nu ka ta pode ntende un algen dretu sima Jeová ta ntende. Má, nu pode faze nos midjór pa imita Jeová. Modi?

3. Modi ki izénplus di Bíblia na kel studu li ta djuda-nu imita Jeová?

³ Modi ki Jeová ta trata kes algen ki ta adora-l? El ta obi-s. El ta ntende ses situason i tudu kuza ki es pasa na vida. Tanbê el ta mostra-s konpaxon. Nu sta ben odja modi ki Jeová faze kel-li ku Jonas, Elias, Agar i Ló. Tanbê nu sta ben odja modi ki nu pode imita Jeová na manera ki nu ta trata nos irmons ku irmans.

4. Pamodi ki nu pode pensa kuza mariadu sobri Jonas?

⁴ Dja ki nu ka sabe tudu kuza sobri situason di Jonas, nu pode pensa ma el ka éra lial. El resebe un órdi dirétu di Jeová pa el ba prega un mensaji di julgamentu na Nínivi. Má envês di el obi ku Jeová, Jonas viaja na un barku ki staba ta bai pa otu lugar, pa ‘lonji di Jeová’. (Jonas 1:1-3 ) Si éra bo, bu ta daba Jonas otu xansi pa el kunpriba se diziginason? Talvês nau. Má Jeová atxa ma Jonas mereseba otu xansi. — Jonas 3:1, 2.

5. Kuzê ki Jonas 2:1, 2, 9 ta inxina-nu sobri proféta Jonas?

⁵ Na se orason, Jonas mostra ki tipu di algen ki el éra di verdadi. (Lé Jonas 2:1, 2, 9.) Di sertéza kel-li é un di kes txeu orason ki Jonas faze. El ta djuda-nu odja ma el ka éra sô un ómi ki fuji di un diziginason. Se palavras ta mostra ma el éra umildi, gratu i ma el staba prontu pa obi ku Jeová. É pur isu ki Jeová ka konsentra na se fadjas, má el responde se orason i el kontinua ta uza-l sima un proféta!

6. Pamodi ki bale péna nu sforsa pa nu obi otus ku atenson?

⁶ Pa nu obi otus ku atenson, nu meste ser umildi i ten paxénxa. Ten peloménus três motivu ki ta mostra ma bale péna faze kel sforsu li. Primeru, pode ser más difísil nu pensa kuzas mariadu di un algen. Sugundu, nu pode ntende más dretu modi ki un irmon sta ta xinti i pamodi ki el faze algun kuza. Tanbê, kel-li ta djuda-nu ten más konpaxon pa el. I tirseru, nu pode djuda kel algen prende algun kuza sobri el. Alvês, nu ka ta konsigi  ntende dretu nen mésmu kuzê ki nu sta ta xinti, timenti nu ka pâpia sobri el. (Pro. 20:5) Un ansion na Ázia rekonhise: “N ta lenbra ma un bês N pâpia antis di N obi tudu kuza. N flaba un irman ma el meste midjoraba se komentárius na runion. Má, más tardi N ben da kónta ma kel irman ka sabia lé dretu i el ta fazeba txeu sforsu pa el daba komentáriu na runion.” Kel-li ta mostra modi ki é inportanti pa kada ansion ‘obi informason’ antis di da konsedju! — Pro. 18:13.

7. Kuzê ki bu ta prende di manera ki Jeová lida ku Elias?

⁷ Alguns di nos irmons ku irmans ta atxa difísil pâpia di ses sentimentu. Talvês kel-li ta kontise pamodi manera ki es kriadu, ses kultura ô ses manera di ser. Kuzê ki nu pode faze pa es pode fla-nu modi ki es sta ta xinti? Lenbra modi ki Jeová lida ku Elias kantu el fuji di Jizabel. Sô dipôs di txeu dia, ki Elias konsigi konta se Pai na Séu, tudu kuza ki el staba ta xinti. Jeová obi-l ku atenson. Dipôs, el da Elias koraji i el da-l un trabadju inportanti pa el faze. (1 Reis 19:1-18 ) Di mésmu manera, pode ser ki ta leba algun ténpu pa nos irmons ku irmans xinti avontádi pa pâpia ku nos. Má é sô óras ki es faze kel-li, ki nu ta konsigi sabe kuzê ki es sta ta xinti di verdadi. Si nu ten paxénxa sima Jeová, es pode kunfia na nos. Asi, óras ki es sta prontu pa konta modi ki es sta ta xinti, nu debe obi-s ku atenson.

8. Sima sta na Génesis 16:7-13, modi ki Jeová djuda Agar?

⁸ Agar, ki éra sérva di Sarai, ka aji dretu kantu el bira mudjer di Abraon. Dipôs ki el fika grávida, el kumesa ta dispreza Sarai ki ka tinha ninhun fidju. Sarai tanbê kumesa ta maltrata-l. Situason piora di tal manera ki Agar fuji. (Gén. 16:4-6) Dja ki nos é inperfetu, nu pode atxa ma Agar éra un mudjer runha ki staba ta paga pa kuza ki el faze. Má Jeová ka pensa kel-li di Agar. El manda un anju pa bai na el. Kantu anju atxa Agar, el djuda-l muda se konportamentu i el abensua-l. Agar xinti ma Jeová staba ta kuida di el i ma Jeová sabia dretu kuzê ki el staba ta pasa. É pur isu ki el txoma Jeová di un ‘Deus ki ta odja’ i di ‘kel ki ta odja-m’. — Lé Génesis 16:7-13.

9. Pamodi ki Deus trata Agar ku bondadi?

⁹ Kuzê ki Jeová odja na Agar? El sabia modi ki éra vida di Agar i di tudu kuza ki kontise ku el. (Pro. 15:3) Agar éra di Ijitu i el staba ta viveba na kaza di un família ebreu. Bu ta atxa ma alvês el ta xintiba sima un algen stranhu? El ta xintiba sodadi di se família i di se téra? É ka sô el ki éra mudjer di Abraon. Na ténpu antigu, alguns ómi fiel tinha más di ki un mudjer. Má é ka éra kel-li ki Jeová kreba désdi komésu. (Mat. 19:4-6) Pur isu, nu ka ta fika spantadu di odja ma na kes tipu di família li, ta tinha siumis i rankor. Jeová sabia ma Agar aji mariadu kantu el trata Sarai sen ruspetu. Má, el trata Agar ku bondadi pamodi el ta ntendeba se situason i kuzê ki el staba ta xinti.

10. Modi ki nu pode konxe nos irmons ku irmans más dretu?

¹⁰ Nu pode imita Jeová óras ki nu ta tenta ntende kunpanheru. Tenta konxe bus irmons ku irmans más dretu. Pâpia ku es antis i dipôs di runions, trabadja ku es na pregason, i si da, konvida-s pa nhos kume algun kuza djuntu. Óras ki bu ta faze kel-li, talvês bu ta diskubri ma un  irman ki ta parse ma el ka gosta di pâpia ku algen, na verdadi el ten txeu vergónha. Un irmon ki é riku, i ki bu ta atxa ma el gosta di dinheru, bu pode diskubri ma el gosta di da i di resebe otus. Ô un família ki txeu bês ta txiga runion atrazadu, bu ta diskubri ma es sta ta lida ku opozison. (Jó 6:29 ) É klaru ki nu ka debe ‘mete na asuntus di otus algen’. (1 Tim. 5:13) Má, é bon nu sabe alguns kuza sobri nos irmons ku irmans i kuzê ki es pasa na vida. Kel-li ta djuda-nu ntende ses manera di ser más dretu.

11. Pamodi ki é inportanti pa ansions konxe ovelhas dretu?

¹¹ Ansions meste konxe más dretu inda, situason di kes irmon ku irmans ki es ta kuida di es. Odja izénplu di un irmon ki txoma Artur, ki éra enkaregadu di grupu di kongregason. El ku otu ansion, es vizita un irman ki ta parseba ma el tinha txeu vergónha. El fla: “Nu fika ta sabe ma maridu di kel irman móre alguns anu dipôs ki es kaza. Sikrê se vida éra difísil dimás, el konsigi kria se dôs fidju-fémia na kaminhu di Jeová i es ten un amizadi fórti ku el. Má el staba kuazi ségu, i el panha depreson. Simé, nunka el ka perde fé i amor pa Jeová. Nu odja ma nu tinha txeu pa prende ku bon izénplu di kel irman.” (Fil. 2:3) Kel enkaregadu di grupu di kongregason staba ta imita izénplu di Jeová. Jeová konxe se ovelhas i el sabe dór ki es ta sufri. (Êxo. 3:7) Ansions ki konxe ovelhas dretu, ta sta más ben priparadu pa djuda-s.

12. Pamodi ki foi bon pa irman Yip Yee konxe más dretu situason di un irman di se kongregason?

¹² Talvês, bu ta atxa ma un irmon di kongregason ta faze kuzas ki ta xatia-u. Má, si bu konxe-l más dretu, pode ser ki bu ta ntende-l midjór. Odja izénplu di un irman na Ázia, ki txoma Yip Yee. El fla: “Un irman na nha kongregason tinha ábitu di pâpia riju. N ta atxaba ma el ka tinha mutu idukason. Má, kantu N sai ku el na pregason, el fla-m ma el ta djudaba se mai ku se pai bendeba pexi na merkadu. El tinha ki papiaba riju pa el txomaba fregês.” Yip Yee fla tanbê: “N prende ma si N krê ntende nhas irmons ku irmans, N meste konxe-s más dretu.” Faze kel-li ta iziji sforsu. Má, óras ki bu sigi konsedju di Bíblia di abri bu korason más txeu, bu ta imita Jeová, ki ta ama ‘tudu tipu di algen’. — 1 Tim. 2:3, 4; 2 Cor. 6:11-13.

13. Sima sta na Génesis 19:15, 16, kuzê ki anjus faze kantu Ló staba ta dura, i pamodi?

¹³ Na un momentu inportanti di se vida, Ló dura ki sigi orientasons di Jeová. Dôs anju vizita Ló i es fla-l pa el sai ku se família fóra di Sudoma. Pamodi? Es fla-l: ‘Nu sta ben distrui kel lugar li’. (Gén. 19:12, 13) Kel otu dia di palmanhan, Ló ku se família inda staba na kaza. Pur isu, kes anju torna aviza Ló. Má el ‘staba ta dura’. Nu pode pensa ma Ló ka liga kuzê ki Jeová fla-l pa el faze, ô ti ma el éra dizobidienti. Má, Jeová ka dizisti di el. Dja ki ‘Jeová tevi konpaxon di el’, kes anju pega Ló ku se família na mô i es leba-s pa fóra di sidadi. — Lé Génesis 19:15, 16.

14. Kuzê ki talvês poi Jeová ta mostra Ló konpaxon?

¹⁴ Jeová talvês mostra Ló konpaxon pamodi txeu razon. Pode ser ki Ló staba ku medu di kes algen fóra di sidadi, pur isu el dura ki sai di kaza. Tanbê tinha otus prigu. Talvês Ló sabia di dôs rei ki kaíba déntu posu di alkatron pértu di un vali. (Gén. 14:8-12) Dja ki el éra pai i maridu, pode ser ki el staba preokupadu ku se família. Tanbê, Ló éra riku, i talvês el tinha un bon kaza na Sudoma. (Gén. 13:5, 6) É klaru ki ninhun di kes kuza la ka éra diskulpa pa Ló ka obiba ku Jeová lógu na kel momentu. Má, Jeová ka konsentra na fadjas di Ló i el ta odjaba el sima un ‘ómi justu’. — 2 Ped. 2:7, 8.

15. Envês di julga un algen pamodi se manera di ser, kuzê ki nu debe faze?

¹⁵ Envês di julga un algen pamodi se manera di ser, tenta ntende modi ki el sta xinti. Un irman na Europa, ki txoma Verónika, tenta faze kel-li. El fla: “Ten un irman ki ta parse ma el ta sta sénpri xatiadu. El ka ta krê sta djuntu ku otus algen. Alvês, N ta xintiba medu di txigaba na el. Má, N pensa: ‘Si N staba na se lugar, N ta mesteba un amiga.’ Pur isu, N disidi pergunta-l modi ki el staba ta xinti. Nton, el kumesa ta abri se korason! Gósi N ta ntende-l más midjór.”

16. Pamodi ki nu debe faze orason pa djuda-nu ntende otus midjór?

 ¹⁶ Úniku algen ki ta ntende-nu dretu é Jeová. (Pro. 15:11) Pur isu, pidi-l pa el djuda-u odja otus algen sima el ta odja-s i ntende modi ki bu ta mostra-s konpaxon. Orason djuda un irman ki txoma Ánjila ntende irmons más dretu. Tinha un irman na se kongregason ki es ka ta daba mutu dretu. Ánjila fla: “Pode sérba fásil pa N kritikaba el i dexaba el pa la. Má, N pidi Jeová pa djuda-m ntende kel irman.” Jeová responde orason di Ánjila? Ánjila fla: “Nu sai na pregason djuntu i nu pasa alguns óra ta pâpia. N obi-l ku konpaxon. Gósi, N ta ama-l más txeu i N krê djuda-l.”

17. Kuzê ki nu debe sta disididu na faze?

¹⁷ Bu ka pode skodje ki irmons ô irmans ki merese bu konpaxon. Tudu es sta pasa pa prublémas, sima Jonas, Elias, Agar i Ló. I txeu bês, é es ki poi ses kabésa na prubléma. Má si nu pensa dretu, kel-li é un kuza ki ta kontise ku nos tudu. Pur isu ta da pa ntende, pamodi ki Jeová ta pidi-nu pa nu poi na lugar di otus. (1 Ped. 3:8) Óras ki nu ta obi ku Jeová, nu sta djuda pa nos família na mundu interu fika más unidu, sikrê nos é diferenti di kunpanheru. Nton, óras ki nu ta lida ku kunpanheru, sénpri nu debe obi, konxe i mostra konpaxon.