1-2. Na ki situason Jizus staba kantu el fla kes últimu palavra antis di el móre?

STA SÉDU palmanhan di dia 14 di nizan di anu 33. Jizus akuzadu i kondenadu pa un krimi ki el ka faze. Dipôs di kel-li, el fazedu trósa, el torturadu di manera kruel i el podu na un staka di tortura. Es mete-l prégu na mô ku na pé. El sta xinti txeu dór ti pa respira i pâpia. Má, el meste pâpia. El tene txeu kuza inportanti pa el fla.

² Nu ben analiza kes últimu kuza ki Jizus fla na staka di tortura i odja kuzê ki nu pode prende ku es. Nu pode fla ma nu sta ‘ben obi-l’. — Mat. 17:5.

3. Di ken ki Jizus staba ta pâpia kantu el fla: ‘Nha Pai, purdua-s’?

³ Kuzê ki Jizus fla? Kantu el staba na staka di tortura, Jizus ora: ‘Nha Pai, purdua-s’. Má ken ki Jizus krê pa se Pai purduaba? Kes palavra ki Jizus fla dipôs, ta djuda-nu ntende di kenha ki el staba ta pâpia. El kontinua ta fla: ‘Es ka sabe kuzê ki es sta ta faze.’ (Luc. 23:33, 34) Ta parse ma el staba ta pâpia di kes trópa di Roma ki prega se mô ku se pé na staka. Es ka sabia ma Jizus éra Fidju di Deus. I tanbê pode ser ki el staba ta pensa na kes monti di algen ki staba la ta manda pa prega-l na staka, má ki dipôs ta ben mostraba fé na el. (Atos 2:36-38) Jizus ka merese moreba. Má el ka dexa kes injustisa ki el sufri, pô-l ta bira un algen xeiu di raiba i ku rankor. (1 Ped. 2:23) Envês di kel-li, el pidi Jeová pa púrdua kes algen ki mata-l.

4. Jizus staba prontu pa púrdua se inimigus. Kuzê ki nu ta prende ku kel-li?

 ⁴ Kuzê ki nu pode prende ku kes palavra di Jizus? Sima Jizus, nu meste sta prontu pa púrdua otus. (Col. 3:13) Alguns algen i tanbê nos família talvês ta fika kóntra nos pamodi es ka ta ntende kes kuza ki nu ta kridita na el ô nos manera di vive. Talvês es ta konta mintira sobri nos, es ta rabaxa-nu na frenti di otus algen, es ta distrui nos publikason i ti es ta amiasa sota-nu. Envês di guarda rankor, nu pode pidi Jeová pa abri odju di kes algen li, asi pa un dia es pode prende verdadi. (Mat. 5:44, 45) Alvês é ka fásil púrdua, prinsipalmenti óras ki nu ta tratadu rei di mariadu. Má, si nu dexa simenti di raiba i di rankor kria na nos korason, nu ta prujudika sô nos kabésa. Un irman splika: “N ta atxa ma óras ki N ta púrdua otus, kel-li ka krê fla ma N ta konkorda ku atitudi mariadu di kel algen ki ofende-m. Tanbê, kel-li ka krê fla ma N sta dexa-s trata-m mariadu. Kel-li krê fla ma N skodje faze un kuza: ka guarda rankor.” (Sal. 37:8) Óras ki nu ta disidi púrdua, nu sta skodje ka dexa kes kuza mariadu ki kontise ku nos pô-nu bira un algen xeiu di rankor. — Efé. 4:31, 32.

5. Kuzê ki Jizus promete un di kes kriminozu i pamodi ki el faze kel promésa li?

⁵ Kuzê ki Jizus fla? Dôs kriminozu tanbê staba na staka di tortura na ladu di Jizus. Na komésu, es tudu dôs insulta Jizus. (Mat. 27:44) Má dipôs, un di es muda di atitudi. El ntende ma Jizus ‘ka faze nada mariadu.’ (Luc. 23:40, 41) I más di ki sô kel-li, el mostra ma el ta kunfiaba ma un dia Jizus ta sérba resusitadu i ma el ta biraba rei. El fla Jizus: ‘Lenbra di mi óras ki bu entra na bu Reinu.’ (Luc. 23:42) Kel ómi li, mostra própi ma el tinha txeu fé! Jizus responde-l: ‘Oji N ta fla-u ku tudu sertéza ma bu ta ben sta ku mi [ka na Reinu má] na Paraízu.’ (Luc. 23:43) Repara ma é própi Jizus ki faze kel promésa li pa kel ómi. El uza palavra sima ‘N’, ‘bu’ i ‘ku mi’. El sabe ma se Pai é mizerikordiozu, pur isu Jizus podia daba kel speransa li pa kel kriminozu ki staba kuazi ta móre. — Sal. 103:8.

6. Kuzê ki nu pode prende ku kes palavra ki Jizus fla kel kriminozu?

⁶ Kuzê ki nu pode prende ku kes palavra di Jizus? Jizus imita se Pai di manera perfetu. (Heb. 1:3) Jeová tene gana purdua-nu i di mostra mizerikórdia pa kada un di nos. Má, el ta purdua-nu sô si nu rapende di korason di kes kuza mariadu ki nu fazeba na pasadu i nu mostra fé na sakrifisiu di Jizus. (1 João 1:7) Alguns talvês ta atxa difísil di kridita ma Jeová pode purdua-s pa kes kuza mariadu ki es faze na pasadu. Si alvês bu ta xinti asi, pensa na kel-li: un poku antis di Jizus móre, el mostra mizerikórdia pa un kriminozu kondenadu i ki staba ta kumesa ta mostra fé na el. Nton, bu pode ten sertéza ma Jeová ta mostra mutu más mizerikórdia inda pa se sérvus fiel ki sta ta faze kel ki es ta pode pa obi ku se mandamentus! — Sal. 51:1; 1 João 2:1, 2.

7. Sima sta na João 19:26, 27, kuzê ki Jizus fla Maria ku Juan? Pamodi ki el faze kel-li?

⁷ Kuzê ki Jizus fla? (Lé João 19:26, 27.) Jizus staba preokupadu ku se mai ki talvês éra viúva. Kes irmon di Jizus podia ti kuidaba di ses mai. Má, kenha ki ta  kuidaba di se amizadi ku Jeová? Ka ten nada ki ta mostra ma kes irmon di Jizus dja biraba se disiplus. Má, Juan éra un apóstlu fiel di Jizus i un di se midjór amigu. Pa Jizus, kes ki ta sirbiba Jeová djuntu ku el éra se família spritual. (Mat. 12:46-50) Jizus ta amaba Maria i el krê tinha sertéza ma algen ta kuidaba di el. Nton, el pidi Juan pa faze kel-li. Jizus sabia ma Juan ta djudaba Maria kontinua ta sirbi Jeová. El fla se mai: ‘Kel-li é bu fidju!’ I el fla Juan: ‘Kel-li é bu mai!’ Désdi kel dia, Juan bira sima un fidju pa Maria i el bira ta kuida di Maria sima si el éra se mai. Maria kuida di Jizus ku amor désdi kantu ki el nase i el fika na se ladu kantu  ki el staba ta móre. Jizus tinha txeu razon pa ama kel mudjer li ki tinha txeu valor!

8. Kuzê ki nu pode prende di kuza ki Jizus fla Maria ku Juan?

⁸ Kuzê ki nu pode prende ku kes palavra di Jizus? Kel amizadi ki nu ten ku nos irmons na fé, pode ser mutu más fórti di ki kel amizadi ki nu ten ku nos família. Nos família pode fika kóntra nos ô ti bandona-nu. Má, Jizus promete ma si nu mante lial pa Jeová i pa Se organizason nu ‘ta resebe 100 bês más’ di ki kel ki nu perde. Txeu irmon pode bira sima nos fidju matxu, nos fidju-fémia, sima un pai ô un mai. (Mar. 10:29, 30) Nu ta faze párti di un família spritual ki é unidu pamodi fé i amor ki nu ten pa Jeová i pa kunpanheru. Modi ki kel-li ta pô-u ta xinti? — Col. 3:14; 1 Ped. 2:17.

9. Kuzê ki kes palavra di Jizus ki sta na Mateus 27:46, ta inxina-nu?

⁹ Kuzê ki Jizus fla? Un poku antis di el móre, Jizus fla: ‘Nha Deus, nha Deus, pamodi ki bu bandona-m?’ (Mat. 27:46) Bíblia ka ta splika pamodi ki Jizus fla kel-li. Má, kes palavra li ta inxina-nu txeu kuza. Pur izénplu, kantu Jizus fla kes palavra li, el staba ta kunpri kel profesia ki sta na Salmo 22:1. * Tanbê, es ta mostra klaru ma Jeová ‘ka poi un sérka di proteson na vólta’ di se Fidju. (Jó 1:10) Má, Jizus ntende ma se Pai dexa-l na mô di se inimigus pa el pode sérba testadu ti se limiti. Ningen nunka ka pasa pa un próva sima di Jizus. Kes palavra di Jizus tanbê ta mostra ma el tinha sertéza ma el ka tinha ninhun kulpa i ma el ka merese moreba.

10. Kuzê ki nu ta prende di kuza ki Jizus fla se Pai?

¹⁰ Kuzê ki nu pode prende ku kes palavra di Jizus? Un kuza ki nu ta prende é ma nu ka debe spéra ma Jeová ta proteje-nu di kes dizafiu ki ta poi nos fé na próva. Sima Jizus testadu ti se limiti, nos tanbê nu debe sta priparadu pa mostra ma nos é fiel ti mórti si meste. (Mat. 16:24, 25) Má Deus ta da-nu sertéza ma el ka ta dexa-nu ser provadu más di ki kel ki nu ta pode aguenta. (1 Cor. 10:13) Otu kuza ki nu pode prende é ki, sima Jizus nu pode sufri mésmu ki nu ka faze nada mariadu. (1 Ped. 2:19, 20) Kes ki ta fika kóntra nos ta faze kel-li ka pamodi nu faze algun kuza mariadu, má pamodi nu ka ta faze párti di mundu i nu ta difende verdadi. (João 17:14; 1 Ped. 4:15, 16) Jizus ntende pamodi ki Jeová dexa-l sufri. Má alvês óras ki alguns irmon fiel ta pasa pa prublémas, es ta pergunta pamodi ki Jeová dexa kel-la kontise. (Hab. 1:3) Nos Deus ten mizerikórdia i el ten paxénxa ku kes irmon li. Jeová ta ntende ma kel-li é ka sinal di falta di fé. Má, kel-li ta mostra ma es meste konsolu ki sô el ki ta pode da. — 2 Cor. 1:3, 4.

11. Pamodi ki Jizus fla kuzê ki sta na João 19:28 ?

¹¹ Kuzê ki Jizus fla? (Lé João 19:28.) Pamodi ki Jizus fla: ‘N tene sedi’? El fla kel-li ‘pa kunpriba un párti di Skrituras’ ki sta na Salmo 22:15, ki ta fla: ‘Nha forsa dja seka sima un padás di baru; nha língua dja kola na jenjiva.’ Ta da pa ntende pamodi ki Jizus staba ku txeu sedi. Dja el aguentaba txeu sufrimentu i tanbê kel dór fórti na staka di tortura. I na kel  situason ki el staba el ta mesteba ajuda di otus algen pa el mataba sedi.

12. Kuzê ki nu pode prende ku kes palavra di Jizus ‘N tene sedi’?

¹² Kuzê ki nu pode prende ku kes palavra di Jizus? Jizus ka ta pensaba ma fla modi ki el staba ta xinti éra un sinal di frakéza. Nos tanbê nu ka debe pensa si. Na txeu situason di nos vida nu ta prifiri ka fla ningen kuzê ki nu sta meste. Má, si nu sta na algun situason ki nu meste ajuda, nu ka debe xinti medu di pidi ajuda di otus algen. Pur izénplu, si dja nu sta algen grandi ô nu sta duenti, talvês nu meste pidi un amigu pa bai ku nos faze kónpra ô faze un konsulta. Si nu sta tristi ô dizanimadu, nu pode pidi un ansion ô un irmon ku más spiriénsa pa obi-nu ku atenson ô pa fla-nu ‘un palavra sábi ki ta poi korason fika kontenti.’ (Pro. 12:25) Nu lenbra ma nos irmon ku irmans ta ama-nu i es krê djuda-nu na ‘ténpu di frónta.’ (Pro. 17:17) Má, es ka sabe kuzê ki nu ta pensa ô ki nu ta xinti. Es ka ta konsigi sabe si nu sta meste ajuda si nu ka pâpia ku es.

13. Kuzê ki Jizus faze pamodi el mante fiel ti mórti?

¹³ Kuzê ki Jizus fla? Pa vólta di três óra di tardi di dia 14 di nizan, Jizus fla ku vós altu: ‘Dja sta fetu!’ (João 19:30) Kes palavra di Jizus li, ta inxina-nu ma un poku antis di el móre dja el sabia ma el fazeba tudu kel ki Jeová kreba. I pamodi el mante fiel ti mórti, Jizus faze txeu kuza. Primeru, el prova ma Satanás é un mintirozu. Jizus mostra ma un algen perfetu ta pode mante fiel sikrê ku tudu kuza ki Satanás ta faze. Sugundu, Jizus da se vida pa resgata-nu. Di kel manera li, Jizus da tudu algen inperfetu xansi di bira amigu di Deus i di ten speransa di vive pa tudu ténpu. Tirseru, Jizus prova ma Jeová é un governanti justu i el difende nómi di se Pai.

14. Modi ki nu debe sta disididu na vive kada dia? Splika.

¹⁴ Kuzê ki nu pode prende ku kes palavra di Jizus? Nu debe sta disididu na mante lial tudu dia. Na un asenbleia internasional, irmon Maxwell Friend ki sirbi kómu instrutor di Skóla di Jiliádi, fla kel-li na un diskursu sobri lialdadi: “Ka bu dexa pa manhan kel ki bu pode faze ô fla oji. Bu ten sertéza ma bu ta sta bibu manhan? Vive kada dia sima si é últimu xansi di bu mostra ma bu merese vida pa tudu ténpu.” Nu ten ki vive kada dia sima si é nos últimu xansi di mostra nos lialdadi pa Jeová. Asi, mésmu óras ki nu ta nfrenta mórti nu pode fla: “Jeová, N faze nha midjór pa N mante nha lialdadi, pa N prova ma Satanás é un mintirozu, pa N difende bu nómi i pa N apoia kel direitu ki nhu ten di governa!”

15. Sima sta na Lúkas 23:46, ki kunfiansa Jizus tinha?

¹⁵ Kuzê ki Jizus fla? (Lé Lúkas 23:46, Bíblia Na Prugrésu Di Traduson Pa Lingua Kabuverdianu, BPK.) Ku tudu kunfiansa, Jizus fla: “Pai, N ta ntrega na Bu mô Nha Spritu!” Jizus sabia ma é sô Jeová ki pode daba el vida otu bês i el tinha sertéza ma se Pai ta lenbraba di el.

16. Kuzê ki bu prende ku izénplu di un jóven di 15 anu?

¹⁶ Kuzê ki nu pode prende ku kes palavra di Jizus? Nu debe sta disididu na dexa nos vida na mô di Jeová. Pa nu konsigi  faze kel-li nu debe ‘kunfia na Jeová di tudu nos korason’. (Pro. 3:5) Odja izénplu di Joshua, un Tistimunha di Jeová di 15 anu ki móre pamodi un duénsa gravi. El nega seta kalker tratamentu ki ta violaba lei di Deus. Un poku antis di el móre, el fla se mai: “Mamá N sta na mô di Jeová. . . N sta fla kel-li ku tudu sertéza mamá. N sabe ma Jeová ta ben resusita-m. El lé nha korason i el odja ma N ta ama-l di verdadi.” * Kada un di nos debe pergunta nos kabésa: ‘Si N pasa pa un situason di vida ô mórti, ki ta poi nha fé na próva, N ta poba nha vida na mô di Jeová ku kunfiansa ma el ta ben lenbra di mi?’

17-18. Kuzê ki nu prende? (Odja kuadru “ Kuzê ki nu ta prende ku kes últimu palavras di Jizus.”)

¹⁷ Nu prende txeu kuza inportanti di kes últimu palavra di Jizus. Nu lenbradu ma nu meste púrdua otus i kunfia ma Jeová tanbê ta purdua-nu. Nu ten priviléjiu di sirbi Jeová djuntu ku irmons i irmans na fé ki sta prontu pa djuda-nu. Má, nu meste pidi ses ajuda óras ki nu meste. Nu sabe ma Jeová ta djuda-nu vense kalker prubléma ki nu pasa pa el. Nu odja ma é rei di inportanti nu vive kada dia sima ki é últimu xansi di prova nos lialdadi pa Jeová. Nu ten ki kunfia ma si nu poi nos vida na mô di Jeová nu ta fika protejedu.

¹⁸ Sima nu odja, kes palavra ki Jizus fla kantu el staba ta móre na staka di tortura ta inxina-nu txeu kuza. Ta pâpia sobri se Fidju, Jeová fla: ‘Nhos obi ku el.’ (Mat. 17:5) Si nu aplika tudu kel ki nu prende na kel studu li, nu sta ta faze kel ki Jeová manda-nu.