Perguntas ki leitoris ta faze
Pamodi ki antis di Jizus móre el fla kes palavra di Davidi ki sta na Salmo 22:1?
Un di kes últimu frazi ki Jizus fla antis di el móre é kel ki sta na Mateus 27:46 : ‘Nha Deus, nha Deus, pamodi ki bu bandona-m?’ Kantu Jizus fla kel-li, el kunpri kes palavra di salmista Davidi ki sta na Salmo 22:1. (Mar. 15:34) Si nu pensa ma Jizus fla kes palavra li pamodi el staba diziludidu ku Jeová ô ma el perde fé pa un ténpu, nu sta nganadu. Jizus sabia dretu pamodi ki el tinha ki moreba i el staba dispostu na faze kel-li. (Mat. 16:21; 20:28) Jizus tanbê sabia ma óras ki txigaba se óra di móre, Jeová tinha ki traba kalker ‘sérka di proteson’ ki staba na se vólta. (Jó 1:10) Asi, Jizus ta pode provaba ma el éra lial pa Jeová mésmu ki el tinha ki moreba di un manera ki ta poba el ta sufri txeu. — Mar. 14:35, 36.
Nton, pamodi ki Jizus fla kes palavra di kel Salmo li? Nbóra nu ka pode fla ku sertéza nu ben odja alguns razon ki talvês poi Jizus ta fla kes palavra li. *
Talvês Jizus staba ta mostra ma Jeová ka ta protejeba el na se mórti. Jizus meste pagaba resgati sen ajuda di Jeová. El éra umanu i el tinha ki moreba sima umanu pa el pode ‘provaba mórti pa tudu algen.’ — Heb. 2:9.
Talvês Jizus fla alguns palavra di kel salmu pa otus algen pode lenbraba di kel salmu interu. Kes judeu di ténpu di Jizus, ta kustuma dikoraba txeu salmu. I si es obiba vérsu di un di kes salmu, es ta lenbraba lógu di kel salmu interu. Si éra na kel-li ki Jizus staba ta pensa, talvês el krê pa kes judeu ki ta sigiba el lenbraba ma kel salmu li tinha txeu profesia ki ta papiaba di se mórti. (Sal. 22:7, 8, 15, 16, 18, 24) Tanbê es podia lenbraba ma kes últimu versíklu di kel salmu ta lova Jeová i ta mostra ma el é Rei di Téra interu. — Sal. 22:27-31.
Talvês Jizus krê flaba ma el ka tinha kulpa. Antis di Jizus móre, kel Tribunal más altu di judeus faze-l un julgamentu ilegal i es akuza-l ma el ka tinha ruspetu pa Deus ô pa nómi di Deus. (Mat. 26:65, 66) Dja pasaba di meia noti kantu fazedu kel julgamentu, es faze-l ku présa i nen es ka sigi ninhun di kes lei sobri julgamentu di kel ténpu. (Mat. 26:59; Mar. 14:56-59) Kantu ki Jizus fla: ‘Nha Deus, nha Deus, pamodi ki bu bandona-m?’, talvês el staba ta mostra ma el ka faze nada pa el mereseba un mórti sima kel-la.
Talvês Jizus krê pa otus algen lenbraba ma kel sufrimentu di Davidi ka éra un sinal ma Jeová dexa di abênsua Davidi. Kel pergunta di Davidi ka krê fla ma el perde fé na Deus. É pur isu, ki dipôs di faze kel pergunta, Davidi fla ma el ta kunfiaba na kel puder ki Deus ten di salva i Jeová kontinua ta abênsua Davidi. (Sal. 22:23, 24, 27) Di mésmu manera, nbóra Jizus, ‘kel Fidju di Davidi’ staba ta sufri na staka di tortura, kel-li é ka un sinal ma Jeová dexa di djuda-l i abensua-l. — Mat. 21:9.
Talvês Jizus staba ta mostra kel dór ki el staba ta xinti pamodi el staba sen proteson di Jeová na kel óra. Jeová ka kria pa se Fidju sufreba i moreba. Kel-li tevi ki kontise dipôs ki Adon ku Eva rabela na jardin di Éden. Jizus ka faze nada mariadu, má el tevi ki sufri i móre pa responde kes pergunta ki Satanás faze i pa daba kel resgati ki mesteba pa rekupera kel ki Adon perde. (Mar. 8:31; 1 Ped. 2:21-24) Kel-li ta kontiseba sô si na kel momentu, Jeová traba se proteson di Jizus pa primeru bês.
Talvês Jizus krê djudaba se sigidoris pensa na kel razon ki poi Jeová ta dexa-l móre di kel manera la. * Jizus sabia ma txeu algen ta ben tropesaba pamodi el móre sima un kriminozu. (1 Cor. 1:23) Má, si se sigidoris konsentraba na razon di se mórti, es ta ntendeba ma el móre pa salvaba es. (Gál. 3:13, 14) Asi, kes disiplu di Jizus ta odjaba el ka sima un kriminozu, má sima un Salvador.
Ka ta nporta pamodi ki Jizus fla kes palavra, el sabia ma el tinha ki moreba na staka di tortura pa kunpriba vontadi di Jeová. Poku dipôs ki el fla kes palavra di kel salmu, Jizus fla: ‘Dja sta fetu!’ (João 19:30; Luc. 22:37) Nton, dja ki Jeová ka proteje-l na kel momentu, Jizus konsigi kunpri tudu kes kuza ki el mandadu faze li na Téra i tanbê el konsigi kunpri tudu kes kuza ki skrebedu sobri el ‘na Lei di Muizés, na Profétas i na Salmus.’ — Lúkas 24:44, Bíblia Na Prugrésu Di Traduson Pa Lingua Kabverdianu, BPK.
^ par. 2 Odja parágrafus 9 i 10 na kel artigu “Kuzê ki nu ta prende ku kes últimu palavras di Jizus” na kel Sentinéla li.
^ par. 4 Timenti Jizus staba na Téra, txeu bês el pâpia di kuzas ô el faze perguntas ki na verdadi é ka éra kel ki el ta xintiba. El ta fazeba kel-li pa daba se disiplus xansi di fla kuzê ki es ta atxaba sobri un asuntu. — Mar. 7:24-27; João 6:1-5; odja Sentinéla di 15 di otubru di 2010, na purtugês, pájinas 4 i 5.
