1. Kuzê ki ta da-nu txeu alegria?

 JEOVÁ krê pa nu ser filís. Nu sabe kel-li pamodi alegria é un di kes kualidadi di frutu di spritu. (Gál. 5:22) Dja ki é más sábi da di ki toma, nu ta xinti txeu alegria óras ki nu ta partisipa na pregason i óras ki nu ta djuda nos irmons ku irmans. — Atos 20:35.

2-3. (a) Sima sta na Gálatas 6:4, kal ki é dôs kuza ki ta djuda-nu mante alegria na sirvisu di Jeová? (b) Kuzê ki nu sta ben odja na kel studu li?

² Sima sta na Gálatas 6:4, apóstlu Polu pâpia di dôs kuza ki ta djuda-nu mante nos alegria. (Lé.) Primeru, nos obijetivu debe ser da Jeová nos midjór. Si nu da Jeová nos midjór, nu debe fika kontenti. (Mat. 22:36-38) Sugundu, nu ka debe konpara nos kabésa ku otus algen. Kalker kuza ki nu ta konsigi faze pamodi nos saúdi, nos trenamentu ô pamodi nos kapasidadi, nu debe agradese Jeová. Afinal, tudu kel ki nu ten é el ki da-nu. Má, si otus algen ta prega más midjór di ki nos, nu debe fika kontenti pamodi es ka sta uza ses kapasidadi pa mostra ma es é midjór di ki otus, nen pa djobe ses própi interesi, má pa lova Jeová. Nton, envês di nu fika ta konpara ku es, nu krê prende ku es.

³ Na kel studu li, nu sta ben odja kuzê ki pode djuda-nu óras ki nu ta xinti dizanimadu pamodi nu ka sta konsigi faze tudu kel ki nu ta krê na sirvisu di Jeová. Tanbê, nu sta ben odja modi ki nu pode uza di midjór manera kalker kapasidadi ki nu ten i kuzê ki nu pode prende ku izénplu di otus algen.

4. Kuzê ki pode poi alguns algen ta xinti dizanimadu? Da un izénplu.

⁴ Alguns di nos ta xinti dizanimadu pamodi idadi ô duénsa ka ta dexa-nu faze tudu kel ki nu ta gostaba di faze na sirvisu di Jeová. É kel-li ki kontise ku Karol. El sirbi na undi ki tinha más nisisidadi. Duránti kel ténpu, el tinha 35 studu di Bíblia i el djuda txeu di es faze prugrésu i batiza. Karol trabadja txeu pa Jeová! Má dipôs, el fika txeu duenti i el tevi ki pasa maior párti di ténpu na kaza. Karol fla: “N sabe ma pamodi nha duénsa, N ka ta konsigi faze kel ki otus algen ta konsigi faze. Pur isu, N ta atxa ma mi é ka fiel sima es. N ka ta konsigi faze tudu kel ki N ta gostaba i kel-li ta pô-m ta xinti dizanimadu.” Karol krê faze se midjór pa Jeová i el é un bon izénplu! Nu pode ten sertéza ma Jeová sta kontenti ku el.

5. (a) Kuzê ki nu debe lenbra di el si nu ka sta konsigi faze tudu kel ki nu ta gostaba? (b) Sima nu sta odja na kes fotu, modi ki kel irmon kontinua ta da Jeová se midjór?

⁵ Si alvês bu ta fika dizanimadu pamodi bu situason, pergunta bu kabésa: ‘Kuzê ki Jeová krê pa N faze?’ Jeová krê pa bu da-l bu midjór na kel situason ki bu sta gósi. Odja kel izénplu li: Un irman ki ten 80 anu sta xinti dizanimadu pamodi el ka sta konsigi faze kel ki el ta fazeba kantu el tinha 40 anu. El ta atxa ma sikrê el sta faze se midjór, Jeová ka sta kontenti ku el. Má kel-li é verdadi? Pensa na kel-li: Si kel irman faze se midjór kantu el tinha 40 anu i ti inda el sta kontinua ta faze se midjór ku 80 anu, nton nunka el ka para di faze se midjór. Si nu kumesa ta xinti ma kel ki nu sta faze ka sta txiga pa agrada Jeová, nu debe lenbra ma é Jeová ki ta disidi kuzê ki ta agrada-l. Si nu faze nos midjór, Jeová ta fika kontenti ku nos! — Konpara ku Mateus 25:20-23.

6. Kuzê ki nu pode prende ku izénplu di Maria?

⁶ É más fásil nu ser filís si nu konsentra na kel ki nu ta pode faze envês di konsentra na kel ki nu ka ta pode faze. Odja izénplu di un irman ki txoma Maria ki ten un duénsa ki ka ta dexa-l faze txeu na pregason. Na komésu, el ta xintiba dizanimadu i sen valor. Dipôs, el pensa na un irman di se kongregason ki staba duenti na kama i el disidi djuda-l. Maria fla: “Nu konbina pa nu prega pa tilifóni i pa nu skrebe kartas. Tudu bês ki nu ta trabadjaba djuntu na pregason, N ta voltaba pa kaza kontenti pamodi N djuda nha irman.” Anos tanbê, nu pode xinti más alegria óras ki nu ta konsentra na kuzê ki nu ta konsigi faze envês di konsentra na kuzê ki nu ka ta konsigi faze. Má, i si nu ta konsigi faze más ô nos é bon na faze alguns kuza na sirvisu di Jeová?

7. Ki konsedju apóstlu Pedru da irmons?

⁷ Na kel primeru karta di apóstlu Pedru, el pidi irmons pa es uzaba kalker kapasidadi ô taléntu ki es tinha pa nkorajaba kunpanheru. Pedru skrebe: ‘Sima kada un resebe un don, el debe uza-l pa sirbi otus sima un bon enkaregadu di bondadi di Deus ki ka  meresedu’. (1 Ped. 4:10) Nu debe faze nos midjór pa uza kel kapasidadi ki nu ten i ka fika preokupadu si otus ta fika ku siumis ô dizanimadu. Si nu ka faze nos midjór pamodi nu ka krê pa otus algen fika ku siumis ô dizanimadu, nton nu ka sta da Jeová nos midjór.

8. Sima sta na 1 Coríntios 4:6, 7, pamodi ki nu ka debe ngaba di nos kapasidadi?

⁸ Nu debe uza dretu nos kapasidadi pa sirbi Jeová, má nu ka debe ngaba. (Lé 1 Coríntios 4:6, 7.) Pur izénplu, si pa bo é fásil ranja studus di Bíblia, bu ka debe dexa di uza kel don li! Má é inportanti bu lenbra ma bu ka debe ngaba. Imajina ma bu tevi un bon spiriénsia na pregason i bu kumesa ta studa Bíblia ku kel algen. Bu sta ku gana di konta bu grupu pa pregason kel spiriénsia. Má óras ki bu nkontra ku irmons di bu grupu, bu ta atxa un irman sô ta konta un spiriénsia di un revista ki el da. Kuzê ki bu ta fazeba? El da un revista i abo bu kumesa un studu di Bíblia. Bu sabe ma bu spiriénsia ta nkoraja irmons di bu grupu. Má, bu pode disidi konta kel spiriénsia un otu dia, asi pa bu ka kaba ku alegria di kel irman. Bu ta mostra bondadi si bu faze kel-li. Má, ka bu para di oferese studus di Bíblia. Bu ten kel kapasidadi li, pur isu uza-l!

9. Modi ki nu debe uza nos kapasidadi?

⁹ Nu debe lenbra ma kalker kapasidadi ki nu ten é un prezenti ki Jeová da-nu. Nu ka debe uza kes kapasidadi ki nu ten pa mostra ma nos é bon, má nu debe uza-s pa nu nkoraja kunpanheru. (Fil. 2:3) Óras ki nu ta uza nos forsa i nos kapasidadi pa faze vontadi di Jeová, nu ta fika kontenti. Pamodi? Pamodi nu ka sta uza nos kapasidadi pa mostra ma nu ta faze más di ki otus ô pa nu tenta ser midjór di ki es, má pa nu lova Jeová.

10. Pamodi ki é ka bon nu konpara ku otus algen?

¹⁰ Si nu ka toma kuidadu, nu pode fika ta konpara nos kapasidadi ku frakézas di otus algen. Pur izénplu, un irmon pode ser bon na faze diskursu. Dja ki kel-li é se pontu fórti, el pode pensa ma el é midjór di ki un otu irmon ki é ka bon na faze diskursu. Má kel irmon  pode ser konxedu pa un algen ki gosta di resebe otus na se kaza, ki ta iduka se fidjus dretu i ki é zelozu na pregason. Nu ta fika kontenti di odja irmons ku irmans ta uza ses kapasidadi pa sirbi Jeová i pa djuda otus algen!

11. Pamodi ki nu debe tenta imita izénplu di Jizus?

¹¹ Nbóra nu ka debe konpara nos kabésa ku otus algen, nu pode prende ku izénplu di sérvus fiel di Jeová. Kel midjór izénplu é di Jizus. Nos é ka perfeitu sima Jizus, má nu pode prende txeu ku kes kualidadi bunitu ki el ten i ku kes kuza ki el faze. (1 Ped. 2:21) Óras ki nu faze nos midjór pa nu imita izénplu di Jizus, nu ta bira sérvus di Jeová midjór i nu ta midjora nos manera di prega.

12-13. Kuzê ki nu pode prende ku izénplu di Davidi?

¹² Na Bíblia, nu ta atxa txeu izénplu di ómis ku mudjeris fiel ki nu pode imita. (Heb. 6:12) Pur izénplu, Jeová fla ma rei Davidi éra ‘un ómi ki ta poba se korason ta fika kontenti’, ô sima un otu traduson di Bíblia ta fla ‘kel tipu di algen ki N krê’. (Atos 13:22) Má Davidi ka éra perfeitu. Na verdadi, el faze alguns pekadu gravi. Má simé, el é un bon izénplu pa nos. Pamodi? Pamodi kantu el korijidu, el ka da diskulpa. Envês di kel-li, el seta kel konsedju duru ki el dadu i el rapende di korason. Pur isu, Jeová purdua-l. — Sal. 51:3, 4, 10-12.

¹³ Nu pode prende ku Davidi óras ki nu ta faze kes pergunta li: ‘Modi ki N ta reaji óras ki N dadu konsedju? N ta seta nhas fadja lógu ô N ta tenta da diskulpa? N ta tenta poi kulpa na otus? N ta faze di tudu pa N ka ripiti kes mésmu éru?’ Bu pode faze perguntas sima kes-li óras ki bu ta lé sobri otus ómi ku mudjer fiel ki sta na Bíblia. Es pasa pa prubléma sima kes ki bu sta ta pasa pa el? Ki bons kualidadi ki es mostra? Na kada situason, bu pode pergunta: ‘Modi ki N pode imita kel sérvu di Jeová li más txeu?’

14. Kuzê ki nu pode prende ku nos irmons ku irmans?

¹⁴ Tanbê, nu pode prende ku izénplu di nos irmons más jóven i kes di más  idadi. Pur izénplu, bu ta konsigi pensa na un algen na bu kongregason ki sta ta lida ku un prubléma sima preson di koléga, opozison na família ô algun prubléma di saúdi? Bu ta konsigi odja na kel irmon li alguns kualidadi ki bu pode imita? Óras ki bu ta pensa na ses izénplu, bu pode prende modi ki bu ta lida ku bus prubléma. Nu sta txeu kontenti di ten kes irmon ku irmans li ki é bons izénplu ki nu pode imita! — Heb. 13:7; Tia. 1:2, 3.

15. Ki konsedju apóstlu Polu da ki ta djuda-nu kontinua ta sirbi Jeová ku alegria?

¹⁵ Pa djuda ten pas i union na kongregason, kada un di nos debe faze nos midjór. Pensa na izénplu di kes kriston di ténpu di apóstlus. Es tinha txeu kapasidadi i diziginasons diferenti. (1 Cor. 12:4, 7-11) Má, es ka dexa kel-li pô-s ta konpiti i ta briga ku kunpanheru. Envês di kel-li, Polu insentiva kada un di es pa faze kel ki staba ta mestedu pa nkoraja kongregason. Polu skrebe pa kristons na Éfezu: ‘Óras ki kada ménbru ta funsiona dretu, kel-li ta djuda korpu dizenvolve i kria na amor.’ (Efé. 4:1-3, 11, 12, 16) Kes ki faze kuzê ki Polu fla ta djuda ten pas i union na kongregason.

16. Kuzê ki nu ka debe faze? (Hebreus 6:10)

¹⁶ Ka bu konpara bu kabésa ku otus algen. Envês di kel-li, prende ku Jizus i sforsa pa imita se kualidadis. Prende ku izénplus di Bíblia i ku izénplus di sérvus di Jeová di nos ténpu. Si bu kontinua ta faze bu midjór, bu pode ten sertéza ma Jeová ‘é ka injustu pa skese di bus óbra’. (Lé Hebreus 6:10.) Kontinua ta sirbi Jeová ku alegria i lenbra ma el ta da valor pa sforsu ki bu ta faze di tudu korason pa agrada-l.