Un juramentu é “óras ki algen fla ô promete faze un kuza inportanti i txeu bês es ta fla ma Deus é ses tistimunha.” Un algen pode fla un juramentu ô el pode skrebe-l.

Alguns algen ta atxa ma nu ka debe jura, pamodi Jizus fla: ‘Nunka ka nhos jura. Basta nhos dexa pa nhos palavra “sin” ser sin, i pa nhos “nau” ser nau; pamodi tudu kuza ki fladu alén di kel-li é di Malvadu.’ (Mat. 5:33-37) Jizus sabia ma Lei di Muizés ta izijiba pa israelitas fazeba juramentu na alguns situason i ma alguns sérvu fiel di Jeová dja fazeba juramentu. (Gén. 14:22, 23; Êxo. 22:10, 11) Tanbê, el sabia ma ti mésmu Jeová faze juramentu. (Heb. 6:13-17) Nton Jizus ka staba ta fla ma un algen ka debe jura. Má, el krê flaba ma é ka dretu pa un algen faze juramentu pa kuzas ki ka é inportanti. Sénpri nu debe kunpri kel ki nu promete, pamodi é kel-li ki Jeová krê pa nu faze.

Má, kuzê ki bu debe faze si es pidi-u pa bu faze un juramentu? Primeru, bu meste ten sertéza ma bu ta faze kel ki bu promete. Si bu ka ten sertéza, é midjór ka bu faze kel juramentu. Palavra di Deus ta fla: ‘É midjór bu ka faze ninhun votu di ki faze un votu i ka kunpri-l.’ (Ecl. 5:5) Dipôs, pensa na kes prinsípiu di Bíblia ki ta pâpia sobri kel juramentu i toma un disizon di akordu ku bu konsénsia. Kal ki é alguns prinsípiu di Bíblia ki pode djuda-u?

Alguns juramentu sta di akordu ku vontadi di Deus. Pur izénplu, Tistimunhas di Jeová ta faze votu óras ki es ta kaza. Kes votu ki es ta faze é un tipu di juramentu. Kel noivu i kel noiva ta promete dianti di Deus i di kes algen ki sta la, ma es ta ama, es ta da valor i es ta ruspeta kunpanheru pa tudu ténpu ki es vive djuntu na Téra. (Otus kazal pode ka fla kes mésmu palavra li óras ki es ta kaza, má simé es ta faze un votu dianti di Deus.) Es ta bira maridu ku mudjer i es debe kontinua kazadu pa tudu ténpu di ses vida. (Gén. 2:24; 1 Cor. 7:39) Faze votu di kazamentu sta di akordu ku vontadi di Deus.

Alguns juramentu ka sta di akordu ku vontadi di Deus. Un kriston verdaderu ka ta faze un juramentu pa el difende se país na un géra ô pa el nega se fé na Deus. Si el faze kel-li, el sta faze un kuza kóntra kes mandamentu di Deus. Tanbê el ‘ka ta faze párti di mundu’, pur isu el ka ta mete na ses géra i na ses prubléma. — João 15:19; Isa. 2:4; Tia. 1:27.

 Kristons meste disidi di akordu ku ses konsénsia si es ta faze alguns juramentu ô nau. Alvês, antis di nu faze un juramentu, nu debe pensa dretu na kel konsedju di Jizus, ki ta fla: ‘Nhos paga Séza kel ki é di Séza, má nhos da Deus kel ki é di Deus.’ — Luc. 20:25.

Imajina ma un kriston krê pidi nasionalidadi di un otu país ô el krê faze un pasapórti. Má, es ta fla-l ma primeru el meste faze un juramentu di lialdadi. Si na kel país, kel juramentu ta pidi pa el faze un kuza ki é kóntra lei di Deus, se konsénsia ka ta dexa-l faze kel-la pamodi kuzê ki el prende na Bíblia. Má, talvês govérnu pode dexa-l muda palavras di kel juramentu, asi pa el pode faze kel juramentu ku konsénsia trankilu.

Si un kriston faze un juramentu di lialdadi ki sta mudadu, kel-li pode sta di akordu ku kel prinsípiu ki nu ta atxa na Romanos 13:1, ki ta fla: ‘Tudu algen debe obi ku autoridadi supirior’. Pamodi kel-li, un kriston pode ntende ma é ka mariadu faze un juramentu ki ten aver ku un kuza ki Deus dja pidi-nu pa nu faze.

Tanbê, si es pidi-u pa bu uza un obijétu ô pa bu faze un jéstu na kel juramentu, é inportanti bu uza bu konsénsia pa disidi si bu ta faze kel juramentu ô nau. Pur izénplu, kes romanu i kes povu sita na ténpu antigu ta juraba pa ses spada i es ta invokaba puder di deus di géra pa garantiba ma es staba ta konta verdadi. Gregus ta labantaba ses mô pa séu óras ki es ta fazeba un juramentu. Kel-li ta mostra ma es ta rekonheseba ma ten un deus ki ta odja tudu kuza ki un algen ta fla i ta faze, i ma tudu algen ta prestaba kónta na el.

É klaru ki un sérvu di Jeová ka ta jura pa kalker sinblu di un país ki sta ligadu ku adorason falsu. Má, i si na un tribunal es pidi-u pa bu poi mô riba di un Bíblia i jura ma bu ta konta verdadi? Na kel kazu li, bu pode disidi faze kel-la, pamodi Bíblia ta pâpia di sérvus di Jeová ki faze jéstu na ses juramentu. (Gén. 24:2, 3, 9; 47:29-31) Má, é inportanti bu lenbra ma si bu faze kel-li, bu sta ta jura dianti di Deus ma bu ta konta verdadi. Bu debe sta priparadu pa bu responde ku sinseridadi kalker pergunta ki es faze-u.

Nu ta da txeu valor pa nos amizadi ku Jeová, pur isu nu debe faze orason i pensa dretu antis di nu faze un juramentu. Nu krê toma kuidadu pa nu ka faze nada kóntra nos konsénsia ô viola prinsípius di Bíblia. Si bu disidi faze un juramentu, bu debe ten sertéza ma bu ta konsigi kunpri-l. — 1 Ped. 2:12.