Si un ómi kaza otu bês, kongregason ta pensa ma kel kazamentu ki el tinha antis dja kaba i ma é kel novu kazamentu ki ta konta. Pa nu ntende kel asuntu li midjór, nu ben odja kuzê ki Jizus fla sobri divórsiu i kaza otu bês.

Sima sta na Mateus 19:9, Jizus fla ma ten sô un motivu pa kaba ku un kazamentu. El fla: ‘Ken ki divôrsia di se mudjer, sen ser pamodi konportamentu seksual mariadu i el kaza ku otu mudjer, el sta faze adultériu.’ Ku kes palavra di Jizus li, nu ta prende dôs kuza: (1) Konportamentu seksual mariadu é úniku razon ki Bíblia ta da pa kaba ku kazamentu i divôrsia. (2) Si un ómi divôrsia di se mudjer sen kel razon ki Bíblia ta da i el kaza otu bês, el ta faze adultériu. a

Jizus krê flaba ma un ómi ki faze konportamentu seksual mariadu i divôrsia di se mudjer, sta livri pa kaza otu bês? Óras ki kontise adultériu na kazamentu, kel mudjer ta disidi si el ta púrdua se maridu ô nau. Si el ka purdua-l i es divôrsia, es tudu dôs sta livri pa kaza otu bês, dipôs ki es tene dukumentu di divórsiu na mô.

Talvês kel mudjer pode krê pa ses kazamentu kontinua i el pode fla se maridu ma el krê purdua-l. Má, i si kel maridu ki faze adultériu ka seta perdon di se mudjer i el konsigi dukumentu di divórsiu el sô? Dja ki se mudjer krê purdua-l i kontinua kazadu ku el, di akordu ku Bíblia el ka sta livri pa el torna kaza. Si el disidi kaza ku otu algen, sikrê el ka sta livri pa el faze kel-la, el sta faze adultériu otu bês. Nton, ansions di kongregason ta faze un otu kumison pa julga pa rezolve kel asuntu. — 1 Cor. 5:1, 2; 6:9, 10.

Óras ki un ómi ka sta livri pa kaza otu bês, kuzê ki kongregason debe pensa di kel kazamentu ki el tinha antis i di kel novu kazamentu? Di akordu ku Bíblia, kel kazamentu ki el tinha antis ta kaba? Se mudjer inda ta pode disidi si el ta purdua-l ô si el ta divôrsia di el? Kongregason debe pensa ma kel novu kazamentu é sima si es sta kontinua ta ten konportamentu seksual mariadu?

Antis, nu ta pensaba ma kel novu kazamentu ta sérba sima faze konportamentu seksual mariadu si kel maridu ô mudjer ki ka ten kulpa inda staba bibu, si el ka kaza otu bês ô si el ka faze konportamentu seksual mariadu. Má kantu Jizus pâpia di divórsiu i kaza otu bês, el ka pâpia di kel maridu ô kel mudjer ki ka tinha kulpa. Má el fla ma si un maridu ô mudjer divôrsia sen kel razon ki Bíblia ta da i el kaza ku otu algen, el sta faze adultériu. Nton, óras ki  un algen ta divôrsia i ta kaza otu bês sen kel razon ki Bíblia ta da, el sta faze adultériu i kel-li ta kaba ku kel kazamentu ki el tinha antis.

Óras ki un ómi divôrsia di se mudjer i el kaza otu bês, kel mudjer ki el tinha antis, ka ta pode skodje más si el ta purdua-l ô si el ta larga-l. Asi, kel mudjer ka ten responsabilidadi más di toma kel disizon difísil di púrdua se maridu ki el tinha antis ô nau. Tanbê, kuzê ki kongregason ta pensa di kel novu kazamentu ka ta dipende si kel maridu ô mudjer ki ka tinha kulpa móre, kaza otu bês ô faze konportamentu seksual mariadu. b

Na kel izénplu ki sta di riba, kel maridu faze adultériu i el divôrsia di se mudjer. I si un maridu ka faze adultériu, má el divôrsia i dipôs el torna kaza? Ô si un maridu divôrsia sen faze adultériu, má dipôs ki el divôrsia el faze adultériu i el kaza otu bês, nbóra se mudjer krê purduaba el? Na tudu kes situason li, si el divôrsia i el kaza otu bês, el ta faze adultériu i kel-la ta kaba ku kel kazamentu ki el tinha antis. Kel novu kazamentu é legal. Sentinéla di 1 di febreru di 1980, pájina 32, fla: “Gósi ki dja el sta na un novu kazamentu, el ka pode dexa kel algen ki el kaza ku el pa el bai pa kel ki el staba antis. Pamodi kel otu kazamentu kaba kantu el divôrsia, el faze adultériu i el kaza otu bês.”

Kel mudansa li na nos ntendimentu ka krê fla ma nu ta atxa ma kazamentu é ka sagradu ô ma adultériu é ka un pekadu gravi. Óras ki un ómi ta divôrsia di se mudjer sen kel razon ki Bíblia ta da i el kaza ku un otu mudjer, sikrê el ka sta livri pa faze kel-la, ansions debe forma un kumison pa julga pamodi el faze adultériu. (I si kel mudjer ki el kaza ku el é un Tistimunha di Jeová, tanbê ansions debe forma un kumison pa julga kel mudjer pamodi adultériu.) Nbóra kel novu kazamentu é ka sima si es sta kontinua ta ten konportamentu seksual mariadu, kel ómi ka debe dadu ninhun priviléjiu spesial na kongregason duránti txeu ténpu, ti ki kongregason torna ganha ruspetu pa el i ka xinti inkomodadu más pamodi kuzas mariadu ki el fazeba. Antis di da-l kalker priviléjiu, ansions debe djobe modi ki sta situason di kel mudjer ki traídu i tanbê modi ki sta situason di kes fidju menór di idadi ki bandonadu. — Mal. 2:14-16.

Dja ki divôrsia i kaza sen kel razon ki Bíblia ta da, ta traze maus rezultadu, é inportanti nu imita Jeová. Nton, pa nos, kazamentu debe ser un kuza sagradu. — Ecl. 5:4, 5; Heb. 13:4.