1. Fla kuzê ki kontise kantu Jizus faze kel primeru milagri.

 IMAJINA kel séna li na fin di anu 29 D.J. na komésu di se trabadju di pregason. Jizus, ku se mai Maria i alguns di se disiplus konvidadu pa un fésta di kazamentu na Kanan, na un zóna na nórti di Nazaré, ki é sidadi undi Jizus kria. Ta parse ma Maria éra amiga di kel família i el staba ta djudaba es kuida di kes konvidadu. Duránti fésta di kazamentu kontise un prubléma ki pode poba kel noivu ku kel noiva ku txeu vergónha. Vinhu kaba. b Talvês nunbru di kes algen ki es konvidaba éra mutu más txeu di ki kes ki es staba ta spéra. Maria bai faxi pa se fidju i el fla-l: “Es ka tene vinhu.” (Juan 2:1-3) Kuzê ki Jizus faze? Kontise un kuza ki dexa-s dimiradu. El faze un milagri. El transforma agu na un “bon vinhu”. — Juan 2:9, 10.

2-3. (a) Ki tipu di milagris ki Jizus faze? (b) Kuzê ki nu pode prende óras ki nu ta studa kes milagri di Jizus?

² Jizus faze txeu otus milagri duránti se trabadju di pregason. c El uza puder ki el tinha pa faze milagri pa djuda un monti algen. Pur izénplu, na dôs di kes milagri ki el faze, el da kumida pa 5 mil ómi i dipôs pa 4 mil ómi. Kel-li krê fla ma talvês el da más di 27 mil algen kumida,  ki ta inklui mudjer ku mininu ki tanbê staba la. (Mat. 14:15-21; 15:32-38) Na kes dôs bês li, Jizus tanbê kura txeu algen duenti. (Mat. 14:14; 15:30, 31) Imajina modi kel monti di algen fika kontenti kantu Jizus faze milagri pa el kura-s i pa el da-s kumida!

³ Oji nu pode prende txeu ku kes milagri di Jizus. Na kel studu li, nu ta ben odja alguns lison ki nu pode prende ku kes milagri ki ta bira nos fé más fórti. Dipôs, nu ta ben odja modi ki nu pode imita umildadi i konpaxon ki Jizus mostra kantu el faze kes milagri.

4. Kes milagri di Jizus ta djuda-nu bira nos fé más fórti na kenha?

⁴ Kes milagri di Jizus ta inxina-nu kuzas ki ta djuda-nu bira nos fé más fórti na el i tanbê na se Pai. Pamodi Jeová é fonti di puder, el da Jizus puder pa faze kes milagri. Atus 10:38 ta fla-nu: “Deus skodje-l [Jizus] ku spritu santu i puder, i el anda pa tudu kel lugar ta faze kuzas dretu i ta kura tudu kes ki Diabu staba ta poi ta sufri, pamodi Deus staba ku el.” Lenbra tanbê ma na tudu kuza ki Jizus faze, ki ta inklui kes milagri, el imita se Pai di manera perfeitu na se pensamentus i na kuzê ki el staba ta xinti. (Juan 14:9) Nu ben odja três lison ki nu pode prende ku milagris di Jizus.

5. Kuzê ki poi Jizus ta faze milagris? (Mateus 20:30-34)

⁵ Primeru, Jizus ku se Pai ta ama-nu txeu. Kantu Jizus staba na téra, el mostra txeu amor pa algen kantu el uza puder ki el tinha pa faze milagri pa kaba ku ses sufrimentu. Un bês, dôs ségu pidi-l pa el djuda-s. (Lé Mateus 20:30-34.) Repara ma Jizus “xinti péna di es” i dipôs el kura-s. Kel vérbu na gregu ki traduzidu pa “xinti péna” ki uzadu na kel versíklu li, krê fla xinti konpaxon fórti, di fundu di korason. Kel konpaxon fórti li, ki é un manera di mostra amor, tanbê poi Jizus ta da kes algen ki tinha fómi kumida i ta kura un leprozu. (Mat. 15:32; Mar. 1:41) Nu pode ten sertéza ma Jeová, ki é un ‘Deus di konpaxon’, ta sufri óras ki el ta odja-nu ta sufri. I se Fidju ki ta ama-nu txeu, tanbê ta xinti mésmu kuza. (Lukas 1:78; 1 Ped. 5:7) Es tene gana di kaba ku tudu kes prubléma ki ta pô-nu ta sufri!

6. Ki puder ki Deus da Jizus?

⁶ Sugundu, Deus da Jizus puder pa rezolve tudu prublémas di mundu. Kantu Jizus faze milagris, el prova ma el ta pode rezolve tudu prubléma ki nu ka ta pode rezolve nos sô. Pur izénplu, el ten puder di kaba ku nos pekadu i ku tudu kes kuza ki pekadu traze, sima duénsa i mórti. (Mat. 9:1-6; Rom. 5:12, 18, 19) Kes milagri ki Jizus faze prova ma el ta pode “kura tudu tipu” di duénsa i ti resusita mortus. (Mat. 4:23; Juan 11:43, 44) Tanbê, el ten puder di kontrola tenporal fórti i di tra spritu mau di algen. (Mar. 4:37-39; Lukas 8:2) Nu ta fika kontenti di sabe ma Jeová da se Fidju Jizus tudu kel puder li!

7-8. (a) Kes milagri di Jizus ta da-nu sertéza di kuzê? (b) Ki milagri bu ten gana di odja na mundu novu?

⁷ Tirseru, nu pode ten sertéza ma tudu kes benson di Reinu di Deus ta ben kunpri. Kes milagri ki Jizus faze kantu el  staba na téra, ta inxina-nu kuzê ki el ta ben faze mutu más inda na Reinu di Deus. Repara kes benson ki nu ta ben ten na govérnu di Jizus. Nu ta ben ten saúdi perfeitu pamodi Jizus ta ben kaba ku tudu duénsa i difisénsia ki ta pô-nu ta sufri. (Isa. 33:24; 35:5, 6; Apo. 21:3, 4) Nunka nu ka ta ben xinti fómi ô nu ka ta ben sufri pamodi dizastris na naturéza. (Isa. 25:6; Mar. 4:41) Nu ta ben fika txeu kontenti di odja kes nos família i amigus ki dja móre ta resusita. (Juan 5:28, 29) Ki milagri bu ten más gana di odja na mundu novu?

⁸ Jizus mostra txeu umildadi i konpaxon kantu el faze milagris. É kes kualidadi li ki nu debe imita. Nu ben odja dôs izénplu. Nu ta kumesa ku kel stória sobri kel fésta di kazamentu na Kanan.

9. Kuzê ki Jizus faze na un fésta di kazamentu? (Juan 2:6-10)

⁹ Lé Juan 2:6-10. Kantu vinhu kaba na fésta di kazamentu, es obriga Jizus pa faze algun kuza? Nau. Ka tinha ninhun profesia ki ta flaba ma Misías ta fazeba un milagri pa bira agu na vinhu. Má imajina modi ki bu ta xintiba si bebidas kaba na bu kazamentu. Jizus talvês xinti konpaxon di kel família prinsipalmenti di kel noiva i di kel noivu i el ka kria pa es pasaba vergónha. Nton sima  nu flaba na komésu di kel artigu li, el faze un milagri. El transforma uns 390 litru di agu na un bon vinhu. Si es ka uzaba tudu kel vinhu na kazamentu, es pode ben uzaba kel réstu dipôs, ô kel kazal pode bendeba el i uza kel dinheru pa otu kuza. Di sertéza kel kazal fika aliviadu!

10. Kal ki é alguns kuza inportanti ki sta na kel stória na Juan kapítlu 2? (Odja dizenhu.)

¹⁰ Odja alguns kuza inportanti ki sta na kel stória na Juan kapítlu 2. Bu repara ma é ka Jizus ki intxi kes jaru di pédra ku agu? Envês di txoma atenson pa se kabésa, el fla kes sérvu pa intxi kes jaru. (Versíklus 6, 7) I dipôs ki Jizus transforma agu na vinhu, é ka el ki leba vinhu pa diretor di fésta. Envês di kel-li, el fla kes sérvu pa leba. (Versíklu 8) Di sertéza, Jizus ka panha un kópu di vinhu i el labanta-l na frenti di kes konvidadu, ta fla: ‘Nhos sprimenta vinhu ki N faze!’

11. Kuzê ki nu pode prende ku milagri di Jizus?

¹¹ Kuzê ki nu pode prende di kel milagri di Jizus kantu el transforma agu na vinhu? Nu ta prende un lison di umildadi. Jizus ka ngaba di kel milagri. Na verdadi, nunka el ka ngaba di nada ki el faze. Envês di kel-li, sénpri el mostra umildadi i el da tudu glória i ónra pa se Pai. (Juan 5:19, 30; 8:28) Si nu imita Jizus i nu kontinua ku un ideia umildi sobri nos kabésa, nu ka ta ngaba di nada ki nu ta faze. Ka ta inporta kuzê ki nu pode faze na trabadju di Jeová, ka nu ngaba nos kabésa, má nu da glória pa nos grandi Deus ki nu ten priviléjiu di sirbi. (Jer. 9:23, 24) Nu debe da-l kel ónra ki el merese. Afinal, ten algun kuza dretu ki nu ta konsigi faze sen ajuda di Jeová? — 1 Cor. 1:26-31.

12. Kal ki é otu manera ki nu pode imita umildadi di Jizus? Da un izénplu.

¹² Odja un otu manera ki nu pode imita umildadi di Jizus. Imajina un jóven ki é ajudanti di kongregason i ki meste pripara se primeru diskursu pa públiku. Un ansion ta gasta txeu ténpu ta djuda-l i el ta konsigi faze un bon diskursu ki kongregason ta gosta txeu. Dipôs di runion, un algen ta txiga na kel ansion i ta fla-l ma kel jóven faze un bon diskursu. Kel ansion meste fla: ‘Sin, má N gasta txeu ténpu ta djuda-l’? Nau. Si el é umildi, el ta fla: ‘Sin, el faze sin. N tene txeu orgulhu di el!’ Óras ki nos é umildi, nu ka meste dadu ónra pa kes kuza dretu ki nu ta faze pa otus algen. Nu ta fika kontenti di sabe ma Jeová ta odja i ma el ta da valor pa kuzê ki nu ta faze. (Konpara ku Mateus 6:2-4; Heb. 13:16) Di sertéza, nu ta poi Jeová ta fika kontenti óras ki nu ta imita Jizus na mostra umildadi. — 1 Ped. 5:6.

13. Kuzê ki Jizus odja pértu di sidadi di Nain, i kuzê ki el faze? (Lukas 7:11-15)

¹³ Lé Lukas 7:11-15. Pensa na un kuza ki kontise kuazi na metadi di trabadju di pregason di Jizus. El bai pa Nain, ki éra un sidadi di Galilea, pértu di Sunén. Uns 900 anu antis, Elizeu resusitaba fidju matxu di un mudjer, na Sunén. (2 Reis 4:32-37) Kantu Jizus txiga pértu di porton di sidadi di Nain, el odja txeu algen na un funeral ta sai di la. Kel situason éra txeu tristi, pamodi kel viúva perde se úniku fidju. Má kel mai ka staba el  sô. Staba un monti algen djuntu ku el. Jizus para kel funeral i el faze un kuza ki kel mai ka skese nunka más. El resusita se fidju matxu! Kel-li é kel primeru di kes três resureison ki Jizus faze ki nu ta atxa na kes Ivanjélhu.

14. Kal ki é alguns kuza inportanti ki sta na kel stória na Lukas kapítlu 7? (Odja dizenhu i fotu.)

¹⁴ Odja alguns kuza inportanti ki sta na kel stória na Lukas kapítlu 7. Bu repara ma Jizus “odja” kel mai ki perde se fidju i dipôs “el xinti péna di el”? (Versíklu 13) Talvês Jizus odja-l ta txora timenti el staba ta anda pértu di korpu di se fidju i el xinti konpaxon di el. Jizus ka xinti sô péna di kel mai, má el mostra konpaxon pa el. Jizus pâpia ku el, di un manera ki ta konsolaba el i el fla-l: “Ka bu txora.” Dipôs el faze algun kuza pa djuda-l. El resusita se fidju matxu i el intrega-l el. — Versíklus 14, 15.

15. Kuzê ki nu pode prende ku milagri di Jizus?

¹⁵ Kuzê ki nu pode prende ku kel milagri di Jizus kantu el resusita kel fidju di kel viúva? Nu ta prende ma nu meste mostra konpaxon pa kes algen ki sta tristi. É klaru ki nu ka ta konsigi resusita un algen ki dja móre, sima Jizus faze. Má sima Jizus, un manera ki nu pode mostra konpaxon pa kes algen ki sta tristi é óras ki nu ta sta sienti. Nu pode mostra konpaxon óras ki nu ta fla i faze kel ki nu pode pa djuda-s i konsola-s. d (Pro. 17:17; 2 Cor. 1:3, 4; 1 Ped. 3:8) Ti kuzas pikinoti ki nu ta faze ku bondadi pode da-s koraji i konsola-s txeu.

16. Sima sta na fotu, kuzê ki bu ta prende ku spiriénsia di un mai ki dja ten poku ténpu ki se fidju-fémia móre?

¹⁶ Odja un izénplu. Dja ten alguns anu, timenti un irman staba ta kanta na un runion na Salon, el repara ma un mai ki staba pértu di el, staba ta txora. Kel kántiku ta papiaba sobri speransa di resureison, i dja tinha poku ténpu ki fidju-fémia  di kel mai móre. Kel irman sabia di kel-li i lógu ki el da kónta, el txiga pértu di kel mai, el poi se mô riba se onbru i el kanta djuntu ku el. Dipôs kel mai fla: “Irmons ku irmans mostra-m txeu amor.” El fika kontenti pamodi el bai runion. Tanbê el fla: “É li ki nu ta resebe ajuda, na Salon di Reinu.” Nu pode ten sertéza ma Jeová ta odja i el ta da valor ti mésmu pa kes kuza pikinoti ki nu ta faze, pa mostra konpaxon pa kes algen ki sta tristi i ki tene ‘spritu dizanimadu.’ — Sal. 34:18.

17. Kuzê ki nu prende na kel studu li?

¹⁷ Óras ki nu ta studa kes párti di Bíblia sobri kes milagri ki Jizus faze, nos fé pode bira mutu más fórti. Es ta inxina-nu ma Jeová i Jizus ta ama-nu txeu, ma Jizus ten puder di rezolve tudu nos prubléma i ma nu pode ten sertéza ma kes benson di Reinu ki prometedu, di li poku ténpu ta ben kunpri. Óras ki nu ta studa kes stória li, nu pode midita na modi ki nu pode imita kes kualidadi di Jizus. Pamodi ki bu ka ta faze un prujétu di studu pa bu studu pesoal ô adorason na família pa prende más sobri otus milagris di Jizus? Odja kuzê ki bu pode prende i dipôs pâpia ku otus algen sobri kes kuza ki bu prende. Si bu faze kel-li, bu pode pâpia di kuzas ki ta da otus algen koraji! — Rom. 1:11, 12.

18. Kuzê ki nu ta ben odja na kel otu studu?

¹⁸ Kuazi na fin di trabadju di pregason di Jizus, el faze kel tirseru resureison ki Bíblia ta pâpia di el. Má kel-li éra diferenti, pamodi el resusita un amigu di sel ki el kreba txeu i el faze kel-li na un situason diferenti. Kuzê ki nu pode prende ku kel milagri li? I modi ki nu pode bira nos fé más fórti na speransa di resureison? Kel otu studu ta ben responde kes pergunta li.