1-2. Kuzê ki nu debe faze timenti nu sta ta spéra mundu novu?

 NU TA da txeu valor pa promésa di Jeová di kaba ku kel mundu mau li i traze un mundu novu justu. (2 Ped. 3:13) Enbóra nu ka sabe ki ténpu ki kel mundu novu ta ben, kes próva ki nu ten ta mostra ma nu ka ten ki spéra txeu ténpu. — Mat. 24:32-34, 36; Atus 1:7.

² Timenti kel-li ka kontise, ka ta inporta kantu ténpu ki nu sta na verdadi, nos tudu meste bira nos fé na kel promésa li más fórti. Pamodi? Pamodi sikrê nu ten un fé fórti, el pode bira fraku. Na verdadi, apóstlu Paulu txoma falta di fé di ‘pekadu ki é faxi nu kai na el’. (Heb. 12:1) Pa nu ka dexa nos fé fika fraku, nu meste izamina sénpri kes kuza ki ta prova ma mundu novu sta kuazi ta ben. — Heb. 11:1.

3. Kuzê ki nu ta ben odja na kel studu li?

³ Na kel studu li, nu ta ben odja três manera di bira nos fé más fórti na promésa di Jeová di un mundu novu: (1) midita na resgati, (2) pensa na puder di Jeová i (3) gasta nos ténpu na kuzas spritual. Dipôs, nu ta ben odja modi ki kel mensaji ki Jeová fla Abakuki ta bira nos fé más fórti. Má primeru, nu ben odja alguns situason ki talvês nu pode pasa pa el gósi i ki ta iziji pa nu ten un fé fórti na promésa di un mundu novu ki sta pa ben.

 SITUASONS KI TA IZIJI PA NU TEN UN FÉ FÓRTI

4. Ki disizons ta iziji pa nu ten txeu fé?

⁴ Tudu dia, nu ta toma disizons ki ta iziji pa nu ten txeu fé. Pur izénplu, nu ta toma disizons sobri kolégas, diverson, skóla, kazamentu, fidju i trabadju. É bon nu pergunta nos kabésa: ‘Disizons ki N ta toma ta mostra ma N ten sertéza ma kel mundu li ta ben kaba i ma ka ta dura Deus ta ben traze se mundu novu? Ô N ta skodje faze kes mésmu kuza sima kes algen ki ta atxa ma mórti é fin di tudu?’ (Mat. 6:19, 20; Lukas 12:16-21) Nu ta toma bons disizon si nu bira nos fé más fórti ma mundu novu sta kuazi ta ben.

5-6. Pamodi ki nu meste ten un fé fórti na ténpu di frónta? Da un izénplu.

⁵ Tanbê nu ta pasa pa prublémas ki ta iziji pa nu ten un fé fórti. Nu pode pasa pa pirsigison, un duénsa gravi ô otus kuza ki pode dizanima-nu. Na komésu, nu pode aguenta nos prubléma ku forsa. Má si kel prubléma dura, sima txeu bês ta kontise, nu meste ten un fé fórti pa aguenta firmi i kontinua ta sirbi Jeová ku alegria. — Rom. 12:12; 1 Ped. 1:6, 7.

⁶ Óras ki nu sta pasa pa un prubléma, nu pode xinti ma mundu novu di Jeová ka sta ta ben. Kel-li krê fla ma nos fé sta fraku? Nen sénpri é kel-la ki ta kontise. Odja un ilustrason. Óras ki ten txeu simana ta txobe, nu pode xinti sima si sól ka ta sai más. Má simé, dipôs sól ta sai. Di mésmu manera, óras ki nu sta txeu dizanimadu, nu pode xinti sima si mundu novu ka sta ben más. Má si nos fé é fórti, nu sabe ma promésas di Deus ta ben kunpri. (Sal. 94:3, 14, 15; Heb. 6:17-19) Ku kel kunfiansa li, nu pode kontinua ta poi nos adorason pa Jeová na primeru lugar na nos vida.

7. Ki manera di pensa nu debe ivita?

⁷ Tanbê nu meste ten un fé fórti, pa nu faze nos trabadju di pregason. Txeu algen ki nu ta da tistimunhu ta atxa ma “notísias sábi” sobri un mundu novu di Deus ki sta pa ben, é bon dimás pa ser verdadi. (Mat. 24:14; Eze. 33:32) Nu meste toma kuidadu pa nunka nu ka duvida di kuzê ki Jeová ta inxina-nu sima kes algen ta faze. Pa nu ka dexa kel-li kontise, nu meste kontinua ta bira nos fé más fórti. Nu ben odja três manera ki nu pode faze kel-li.

MIDITA NA RESGATI

8-9. Modi ki midita na resgati pode bira nos fé más fórti?

⁸ Un manera ki nu pode bira nos fé más fórti, é midita na resgati. Resgati é un garantia ma promésas di Deus ta ben kunpri. Óras ki nu pensa txeu na pamodi ki resgati dadu i na kuzê ki staba involvidu na el, nu ta bira nos fé más fórti na promésa di Deus di da-nu vida pa tudu ténpu na un mundu midjór. Pamodi ki nu pode fla kel-li?

⁹ Bon, kuzê ki sta involvidu na resgati? Jeová ten se primeru Fidju, Jizus ki el ta ama txeu i ki é se midjór amigu: Má simé, el manda-l di séu pa téra pa ben nase sima un ómi perfeitu. Kantu Jizus staba na téra, el aguenta tudu tipu di prubléma. Dipôs el sufri i el móre di un manera kruel. Jeová paga un présu altu! Nos Deus ki krê-nu txeu nunka ka ta dexaba pa se Fidju sufri i móre sô pa nu pode tinha un vida más midjór,  má pa poku ténpu. (Juan 3:16; 1 Ped. 1:18, 19) Kel présu altu ki Jeová paga é un garantia ma nu ta ben vive pa tudu ténpu na mundu novu.

PENSA NA PUDER DI JEOVÁ

10. Sima sta na Efésios 3:20, kuzê ki Jeová ta konsigi faze?

¹⁰ Kel sugundu manera di bira nos fé más fórti, é pensa na puder di Jeová. El ten puder di kunpri tudu kuza ki el promete. Txeu algen gósi ta atxa ma kel promésa di vive pa tudu ténpu na mundu novu ka ta kunpri. Má Jeová txeu bês promete kuzas ki algen nunka ka ta konsigi fazeba. El pode faze kel-li pamodi el é Deus Tudu-Poderozu. (Jó 42:2; Mar. 10:27) Pur isu, nu ka ta fika dimiradu óras ki el promete faze kuzas sábi dimás! — Lé Efésios 3:20.

11. Da un izénplu di un di kes promésa di Deus ki ta parse ma ka ta kunpriba. (Odja kuadru “ Alguns promésa di Deus ki ta parseba ma ka ta kunpriba, má ki kunpri”.)

¹¹ Odja alguns di kes kuza ki Jeová promete se povu na pasadu ki ta parseba ma ka ta kontiseba. El promete Abraon ku Sara ma es ta tinha un fidju na ses bedjisa. (Gén. 17:15-17) Tanbê, el fla Abraon ma el ta ben daba téra di Kanan pa se disendentis. Duránti txeu anu, kes israelita ki éra disendenti di Abraon, éra skravu na Ijitu. Pur isu, talvês ta parseba ma kel promésa li nunka ka ta kunpriba. Má el kunpri. Dipôs, Jeová fla Elizabeti ki dja staba algen grandi ma el ta tinha un fidju. Tanbê el fla Maria, ki éra vírjen, ma el ta tinha un fidju ki ta sérba Fidju di Deus. Kel-li ta kunpriba un promésa ki Jeová fazeba monti ténpu antis na jardin di Éden! — Gén. 3:15.

12. Kuzê ki Josué 23:14 i Isaías 55:10, 11 ta garanti-nu sobri puder di Jeová?

¹² Óras ki nu ta pensa na tudu kes promésa ki Jeová faze i na modi ki el kunpri-s, nu ta odja ma el ten txeu puder. Pur isu, nos fé na se promésa di mundu novu ta bira más fórti. (Lé Josué 23:14; Isaías 55:10, 11.) Kel-li ta djuda-nu sta ben priparadu pa djuda otus algen intende ma kel promésa di mundu novu é ka un sonhu. Sobri kel promésa di séu novu i téra novu, Jeová fla: ‘Kes palavra li é fiel i verdaderu.’ — Apo. 21:1, 5.

GASTA TÉNPU NA KUZAS SPRITUAL

13. Modi ki runion pode bira nos fé más fórti? Splika.

¹³ Un tirseru kuza ki pode bira nos fé más fórti é gasta nos ténpu na kuzas spritual. Pur izénplu, pensa na modi ki nos runion ta djuda-nu. Ana, ki dja ten txeu ténpu ta sprimenta maneras diferenti na trabadju pa ténpu interu, fla: “Runion ta djuda-m kontinua ku nha fé fórti. Sikrê kel irmon ki sta na tribuna é ka mutu bon na inxina ô el ka fla nada novu, txeu bês N ta obi un kuza ki ta pô-m ta intende un verdadi di Bíblia midjór, i kel-li ta bira nha fé más fórti.” b Nos fé tanbê pode bira más fórti óras ki nu ta obi komentáriu di nos irmons ku irmans na runion. — Rom. 1:11, 12; 10:17.

14. Modi ki pregason ta bira nos fé más fórti?

¹⁴ Tanbê nu ta bira nos fé más fórti óras ki nu ta partisipa na pregason.  (Heb. 10:23) Barbara, ki dja ten más di 70 anu ta sirbi Jeová, fla: “Sénpri N atxa ma trabadju di pregason ta bira nos fé más fórti. Óras ki N pâpia ku otus sobri kes promésa sábi di Jeová txeu bês, nha fé ta bira más fórti.”

15. Modi ki studu pesoal ta bira nos fé más fórti? (Odja dizenhus.)

¹⁵ Studu pesoal é kel otu kuza ki ta bira nos fé más fórti. Suzana ta atxa ma ten un prugrama pa studa ta djuda-l. El fla: “Dumingu, N ta pripara studu di Sentinéla di kel otu simana. Na sugunda-fera i na térsa-fera, N ta pripara runion di meiu di simana. Na kes otu dia di simana N ta faze nha studu pesoal.” Pamodi Suzana ta sigi se prugrama pa studa sénpri, el ta kontinua ta bira se fé más fórti. Irene, ki dja ten txeu ténpu ta sirbi na sedi mundial, da kónta ma studa profesias di Bíblia bira se fé más fórti. El fla: “N ta fika dimiradu di odja ma profesias di Jeová sta ta kunpri tintin pa tintin.” c

‘EL TA KUNPRI SEN FALTA’

16. Pamodi ki kel garantia ki Jeová da Abakuki ta sirbi pa nos oji? (Hebreus 10:36, 37)

¹⁶ Alguns sérvu di Jeová, dja ten txeu ténpu ta spéra pa fin di kel mundu li ben. Alguns algen ta atxa ma fin sta ta dura ki txiga. Má Jeová sabe modi ki se sérvus ta xinti. Na verdadi, el fla Abakuki: ‘Vizon é pa ténpu markadu. El sta bai faxi pa se fin, i el ka ta konta mintira. Sikrê el dura, kontinua ta spera-l! Pamodi el ta kunpri sen falta. El ka ta atraza!’ (Hab. 2:3) Kel garantia li ki Deus da éra pa djuda sô Abakuki? Ô kes kuza ki el fla ta sirbi pa nos oji? Jeová orienta apóstlu Paulu pa fla kes palavra li pa tudu  kes ki é kriston, ki tene gana pa mundu novu ben. (Lé Hebreus 10:36, 37.) Nu pode ten sertéza, ma sikrê nu ta atxa ma promésa di Jeová sta ta dura, ‘el ta kunpri sen falta. El ka ta atraza!’

17. Modi ki un irman sigi kel konsedju ki Jeová da Abakuki?

¹⁷ Txeu sérvu di Jeová sigi se konsedju di ‘kontinua ta spera-l.’ Alguns di es dja ten txeu anu ta faze kel-li. Pur izénplu, Luiza, ki kumesa ta sirbi Jeová na anu 1939, fla: “Na kel ténpu, N ta atxaba ma Armajedon ta binha antis di N tirmina liseu. Má kel-la ka kontise. Sima anus ba ta pasa, lé kes stória na Bíblia sobri kes algen ki ‘spéra pa Jeová kunpri se promésas’ djuda-m faze mésmu kuza. N lé sobri Nué, Abraon, Juzé i otus ki spéra txeu ténpu antis di es resebe un rekonpénsa di Jeová ki es staba ta spéra. Kridita sénpri ma kes promésa ta ben kunpri, djuda ami i otus algen ten sertéza ma mundu novu sta kuazi ta txiga.” Txeu algen ki dja ten txeu ténpu ta sirbi Jeová ta konkorda ku kel-li!

18. Modi ki presta atenson na kriason pode bira nos fé más fórti na mundu novu ki sta kuazi pa ben?

¹⁸ É verdadi ma mundu novu inda ka txiga. Má, repara na alguns di kes kuza ki dja sta li, sima stréla, arvi, animal i otus algen. Ningen ka ten dúvida ma kes kuza li ta izisti, enbóra dja tevi un ténpu ki es ka izistiba. Gósi, es sta li sô pamodi Jeová kria-s. (Gén. 1:1, 26, 27) Nos Deus tanbê promete ma el ta ben kria un mundu novu. El ta ben kunpri kel promésa li. Na mundu novu, algen ta ben vive pa tudu ténpu ku saúdi perfeitu. Nu pode ten sertéza ma mundu novu ta ben, na ténpu ki Deus disidi. — Isa. 65:17; Apo. 21:3, 4.

19. Modi ki bu pode bira bu fé más fórti?

¹⁹ Timenti kel dia ka txiga, faze tudu kel ki bu pode pa bira bu fé más fórti. Mostra sénpri gratidon pa resgati. Pensa na puder di Jeová. Faze kuzas ki ta pô-u ta bira más amigu di Jeová. Si bu faze kes kuza li, bu pode ser un di ‘kes ki ta resebe promésas pamodi ses fé i ses paxénxa.’ — Heb. 6:11, 12; Rom. 5:5.