1. Pamodi ki nu ta da komentáriu na runion?

 PAMODI ki nu ta sisti runion? Primeru, é pamodi nu krê lova Jeová. (Sal. 26:12; 111:1) Tanbê nu ta sisti runion pa nu inkoraja kunpanheru na es ténpu difísil. (1 Tes. 5:11) Óras ki nu ta labanta mô pa da komentáriu, nu sta ta faze kes dôs kuza li.

2. Ki oportunidadis nu ten pa da komentáriu na runion?

² Tudu simana, nu ten oportunidadi di da komentáriu na runion. Pur izénplu, na fin di simana nu pode da komentáriu na Studu di Sentinéla. I na runion na meiu di simana, nu pode da komentáriu na párti ‘Jóias ki sta na Bíblia,’ ‘Studu di Bíblia na kongregason’ i otus párti ki ta fazedu pergunta pa kes algen ki sta sisti responde.

3. Ki prublémas nu pode ten i modi ki Hebreus 10:24, 25 ta djuda-nu?

³ Nos tudu nu krê lova Jeová i da nos irmons koraji. Má óras ki nu ta da komentáriu, nu pode ten dôs prubléma. Nu pode fika nervozu na óra di da komentáriu ô nu pode ten gana di da komentáriu, má nu pode ka dadu komentáriu txeu bês sima nu ta kreba. Kuzê ki pode djuda-nu lida ku kes prubléma li? Kuzê ki apóstlu Paulu skrebe pa ebreus pode djuda-nu atxa respósta. Kantu el mostra ma é inportanti sisti runion djuntu, el fla ma nu debe konsentra na ‘da kunpanheru koraji’. (Lé Hebreus 10:24, 25.) Nu pode fika ménus nervozu na óra di da komentáriu, si nu lenbra ma nu pode da otus koraji ti ku un komentáriu sinplis ki ta mostra nos fé.  I si nu ka dadu komentáriu txeu bês sima nu ta kreba, nu pode fika kontenti pamodi otus na kongregason tevi oportunidadi di da komentáriu. — 1 Ped. 3:8.

4. Ki três kuza ki nu ta ben odja na kel studu li?

⁴ Na kel studu li, primeru nu ta ben pâpia di modi ki nu pode inkoraja kunpanheru na un kongregason pikinoti ki ten poku algen pa da komentáriu. Dipôs, nu ta ben odja modi ki nu pode inkoraja kunpanheru na un kongregason grandi ki txeu algen ta labanta mô pa da komentáriu. Na fin, nu ta ben odja modi ki nu ta da komentáriu di un manera ki ta inkoraja otus.

5. Modi ki nu pode inkoraja kunpanheru si nos kongregason é pikinoti?

⁵ Na un kongregason pikinoti ô na un grupu, ka ten txeu algen pa da komentáriu. Alvês, kel algen ki sta faze se párti meste spéra un bokadinhu antis di algun algen labanta mô pa da komentáriu. Runion pode parse infadadu i kel-li pode ka inkoraja algen. Kuzê ki bu pode faze? Sta prontu pa labanta mô txeu bês. Óras ki bu faze kel-li, bu ta poi otus algen ku gana di da komentáriu más txeu.

6-7. Modi ki nu ta fika ménus nervozu na óra di da komentáriu?

⁶ Kuzê ki bu pode faze si bu ta fika txeu nervozu na óra di da komentáriu? Txeu algen pode xinti si. Má pa bu pode inkoraja bus irmon ku irmans más txeu, pamodi ki bu ka ta djobe manera di fika ménus nervozu óras ki bu ta da komentáriu? Modi ki bu pode faze kel-li?

⁷ Kuzê ki pode djuda-u é odja alguns sujiston ki sta na kes Sentinéla b ki dja saíba antis. Pur izénplu, pripara dretu. (Pro. 21:5) Si bu studa kel asuntu dretu, bu ta fika más avontádi pa da komentáriu. Tanbê, da komentárius kurtu. (Pro. 15:23; 17:27) Bu ta fika ménus nervozu óras ki bu da komentárius kurtu. Un komentáriu kurtu talvês pode ten un ô dôs frazi i el pode ti ser más fásil pa bus irmon ku irmans intende di ki un komentáriu kunpridu ki ten txeu ideia. Un komentáriu kurtu i na bus palavra, ta mostra ma bu pripara dretu i ma bu intende kel matéria dretu.

8. Kuzê ki Jeová ta atxa di sforsu ki nu ta faze di korason?

⁸ Má i si bu tenta sigi kes sujiston li, má simé bu ta fika txeu nervozu na da más di ki un ô dôs komentáriu? Ten sertéza ma Jeová ta da txeu valor pa sforsu ki bu ta faze di korason pa faze kel ki bu pode. (Lukas 21:1-4) Jeová ka ta pidi-nu pa nu faze más di kel ki nu pode. (Fil. 4:5) Disidi kuzê ki bu pode faze, poi méta pa faze-l i pidi Jeová pa da-u un korason kalmu. Na komésu, kel méta pode ser da un komentáriu kurtu.

9. Pamodi ki pode ser difísil da komentáriu na un kongregason grandi?

⁹ Si bu kongregason ten txeu publikador, talvês bu ten otu prubléma. Talvês ten txeu irmon ku irmans pa da komentáriu, ki bu ta labanta mô má bu ka ta dadu komentáriu. Pur izénplu, Daniela  sénpri gostaba di da komentáriu na runion. c Pa el, kel-li ta faze párti di se adorason pa Jeová, é un manera di el inkoraja otus i un manera di el bira se fé más fórti na kel ki Bíblia ta inxina. Má kantu el muda pa un kongregason más grandi, es fika ta da-l komentáriu más poku. Alvês nen el ka ta daba un komentáriu na un runion. El fla: “N ta fikaba dizanimadu. N ta xintiba sima ki N perde un priviléjiu. Óras ki kel-li ta kontise txeu bês, bu ta kumesa ta pergunta si es sta faze-u el di abuzu.”

10. Kuzê ki nu pode faze pa nu ten más xansi di da komentáriu?

¹⁰ Algun bês dja bu xinti sima Daniela? Si dja bu xinti asi, pode da-u gana di dizisti di da komentáriu i sô obi runion. Má, ka bu para di tenta da komentáriu. Kuzê ki bu pode faze? Pripara txeu komentáriu pa kada runion pode djuda-u. Si bu ka dadu komentáriu na komésu di studu, inda bu ten oportunidadi di da komentáriu más pa frenti na runion. Óras ki bu ta pripara pa Studu di Sentinéla, pensa na modi ki kada parágrafu sta ligadu ku téma di kel studu. Si bu faze kel-li, talvês bu ta tene bons komentáriu pa da duránti kel studu. Tanbê, bu pode pripara pa da komentáriu na kes parágrafu ki ta pâpia di kes asuntu ki é más difísil splika. (1 Cor. 2:10) Pamodi? Pamodi pode ten más poku algen pa da komentáriu na kel párti. I si dipôs di aplika kes sujiston li, má simé dja pasa alguns runion i bu ka dadu komentáriu? Antis di runion bu pode pâpia ku kel irmon ki ta diriji i fla-l kal ki é pergunta ki bu krê responde.

11. Kuzê ki Filipensis 2:4 ta insentiva-nu pa nu faze?

¹¹ Lé Filipensis 2:4. Ku ajuda di spritu santu, apóstlu Paulu insentiva kristons pa djobe interesi di otus algen. Modi ki nu pode sigi kel konsedju li na runion? Óras ki nu ta lenbra ma ten otus algen ki ta krê da komentáriu sima nos.

12. Kal ki é un bon manera di da otus koraji na runion? (Odja fotu.)

 ¹² Pensa na kel-li. Óras ki bu sta pâpia ku bus amigu, bu ta pâpia txeu dimás ki kuazi bu ka ta dexa-s pâpia? Bu ta dexa-s sin, bu krê pa es partisipa na kel konbérsu. Di mésmu manera, na runion nu krê pa txeu algen da komentáriu. Na verdadi, un di kes midjór manera di da nos irmons ku irmans koraji é da-s oportunidadi di pâpia sobri ses fé. (1 Cor. 10:24) Nu ben odja modi ki nu pode faze kel-li.

13. Modi ki nu pode dexa más algen da komentáriu?

¹³ Un kuza ki nu pode faze é da komentáriu kurtu, asi ta da ténpu pa más algen da komentáriu. Ansions i otus irmon ki ten spiriénsia pode da izénplu. Sikrê óras ki bu sta da komentáriu kurtu, ivita pâpia di txeu pontu. Si bu pâpia di tudu kuza ki sta na parágrafu, ta fika poku kuza pa otus algen fla. Pur izénplu, na kel parágrafu li dadu dôs sujiston: da komentáriu kurtu i ivita pâpia di txeu pontu. Si bo é primeru algen ki es txoma pa da komentáriu na kel parágrafu li, pamodi ki bu ka ta pâpia sobri un di kes pontu?

14. Kuzê ki pode djuda-nu disidi kantu bês ki nu ta labanta mô? (Odja fotu.)

¹⁴ Ser ikilibradu óras ki bu ta disidi kantu bês ki bu ta labanta mô. Si nu ta labanta mô txeu dimás, nu pode faze kel irmon ki sta na tribuna preson pa da-nu komentáriu txeu bês, sikrê otus algen inda ka da ninhun komentáriu. Kel-li pode poi otus ka ta labanta mô. — Ecl. 3:7.

15. (a) Modi ki nu debe reaji si nu ka dadu komentáriu? (b) Modi ki kes irmon ki sta faze ses párti ta mostra ma es ta pensa na tudu algen? (Odja kuadru “ Si bu sta faze un párti na runion”.)

¹⁵ Óras ki txeu algen ta labanta mô na runion, nu pode ka da txeu komentáriu  sima nu ta krê. Alvês, kel irmon ki sta na tribuna pode ka konsigi da-nu ninhun komentáriu. Kel-li pode dizanima-nu, má nu ka debe fika ofendidu óras ki nu ka dadu komentáriu. — Ecl. 7:9.

16. Modi ki nu pode inkoraja otus algen ki da komentáriu?

¹⁶ Si bu ka ta konsigi da txeu komentáriu sima bu ta gostaba, pamodi bu ka ta presta atenson óras ki otus algen ta da komentáriu i dipôs di runion bu ta ilojia-s pamodi ses komentáriu? Kes ilojiu ki bu ta da bus irmon ku irmans ta da-s koraji, sima kes komentáriu ki bu pode daba. (Pro. 10:21) Ilojia otus algen é otu manera ki nu pode inkoraja kunpanheru.

17. (a) Modi ki pai ku mai pode djuda ses fidjus pripara pa da komentáriu? (b) Sima sta na vídiu, kal ki é kes kuatu kuza ki nu debe faze pa pripara un komentáriu? (Odja nóta di rodapé.)

¹⁷ Di ki otu manera nu pode da kunpanheru koraji na nos runion? Si bu ten fidju, djuda bus fidju pripara komentáriu ki ta fika dretu pa ses idadi. (Mat. 21:16) Alvês studu ta pâpia di un asuntu sériu, sima prubléma na kazamentu ô konportamentu, má simé pode ten un ô dôs parágrafu ki un mininu pode da  komentáriu. Tanbê, djuda bus fidju intende pamodi es ka pode dadu komentáriu sénpri ki es labanta mô. Splika-s kel-li pode djuda-s ka fika dizanimadu óras ki otus algen dadu komentáriu envês di es. — 1 Tim. 6:18. d

18. Modi ki nu pode ivita txoma atenson pa nos kabésa óras ki nu ta da komentáriu? (Provérbios 27:2)

¹⁸ Nos tudu nu pode pripara bons komentáriu ki ta onra Jeová i ki ta da nos irmon koraji. (Pro. 25:11) Enbóra alvês nu pode konta un spiriénsia kurtu ki kontise ku nos, nu debe ivita pâpia txeu sobri nos. (Lé Provérbios 27:2; 2 Cor. 10:18) Envês di kel-li, nu ta sforsa pa nu kontinua konsentradu na Jeová, na se Palavra i na se povu. (Apo. 4:11) É klaru ki si pergunta di parágrafu ta pidi pa nu konta un spiriénsia ki kontise ku nos, nu debe faze kel-la. Nu ta ben odja un izénplu di kel-li na kel otu parágrafu.

19. (a) Kal ki é rezultadu óras ki nu ta pensa na tudu algen ki sta sisti runion? (Romanos 1:11, 12) (b) Pamodi ki bu gosta di da komentáriu?

¹⁹ Enbóra ka ten ninhun régra sobri modi ki nu debe da komentáriu, nos tudu debe sforsa pa da komentáriu di un manera ki ta inkoraja. Kel-li krê fla ma talvês nu ten ki da más komentáriu. Ô talvês nu ten ki prende fika kontenti sikrê nu dadu komentáriu más poku. Tanbê, nu debe sforsa pa fika kontenti óras ki otus algen ta dadu komentáriu envês di nos. Óras ki nu ta konsentra na djobe interesi di otus algen na runion, nos tudu pode ‘inkoraja kunpanheru’. — Lé Romanos 1:11, 12.