1. Kuzê ki Jeová ta spera di nos?

 UN DI kes momentu más filís na vida di un kazal é óras ki ses fidju ta nase. Enbóra mai ku pai ta ama ses fidju ki kaba di nase, es ka krê pa el kontinua sénpri un bebe. Na verdadi, es ta fikaba txeu preokupadu si ses fidju ka kriaba. Di mésmu manera, Jeová ta fika kontenti óras ki el ta odja-nu ta kumesa ta prende sobri el, má el ka krê pa nu kontinua sima mininus pikinoti na sentidu spritual. (1 Kor. 3:1) Envês di kel-li, el ta fla-nu pa nu “bira sima algen grandi” na sentidu spritual. — 1 Kor. 14:20.

2. Kuzê ki nu ta ben odja na kel studu li?

² Kuzê ki krê fla bira un sérvu di Jeová maduru? Kuzê ki nu meste faze pa nu bira un sérvu di Jeová maduru? Modi ki studa kes verdadi más profundu di Bíblia ta djuda nos amizadi ku Jeová bira má fórti? I pamodi ki nu debe ivita kunfia dimás na nos kabésa? Na kel studu li, nu ta ben odja respósta pa kes pergunta li.

KUZÊ KI KRÊ FLA BIRA UN SÉRVU DI JEOVÁ MADURU?

3. Kuzê ki krê fla bira un sérvu di Jeová maduru?

³ Na Bíblia, kel palavra gregu ki traduzidu pa “adultu” tanbê pode krê fla “maduru”, “perfeitu”, i “konplétu”. a (Efé. 4:13, nóta di rodapé.) Sima un mininu ta kontinua ta kria ti ki el bira un adultu, nos tanbê nu debe kontinua ta bira nos amizadi ku Jeová más fórti. Di kel manera li, nu ta bira un sérvu di Jeová maduru. É klaru ki dipôs di kel-li, nu ka debe para di faze prugrésu. (1 Tim. 4:15) Nos tudu i jóven tanbê nu pode bira un sérvu di Jeová maduru.  Má modi ki nu pode sabe si nu sta ta bira maduru?

4. Kuzê ki un sérvu di Jeová maduru ta faze?

⁴ Un sérvu di Jeová maduru é un algen ki ta faze tudu kuza ki Jeová ta pidi pa el faze. El ka ta faze sô kes kuza ki el krê. É klaru ki dja ki el é inperfeitu el ta fadja. Má simé, tudu dia di se vida el ta mostra ma el ta pensa i ma el ta aji di akordu ku vontadi di Jeová. El ta bisti di kel novu manera di ser i el ta kontinua ta sforsa pa pensa kada bês más sima Jeová. (Efé. 4:22-24) El ta prende toma bons disizon ku bazi na kes lei i prinsípius di Jeová. Pur isu, el ka meste txeu régra pa fla-l kuzê ki el debe faze. Óras ki el ta toma un disizon, el ta sforsa txeu pa el faze sima el disidi. — 1 Kor. 9:26, 27.

5. Kuzê ki pode kontise ku un sérvu di Jeová ki é ka maduru? (Efézius 4:14, 15)

⁵ Má, un sérvu di Jeová ki é ka maduru pode inganadu faxi pa “kes ensinu falsu di kes algen ki ta ingana otus”. El pode kridita na kes stória falsu i kes mintira ki ta dadu na tilivizon i na internet ô na kes kuza ki kes algen ki fika kóntra organizason di Jeová ta fla. b (Lé Efézius 4:14, 15.) El pode xinti siumis di otus algen, ten prubléma ku es, ofende faxi, ô txeu bês el pode kai na tentason. — 1 Kor. 3:3.

6. Pamodi ki nu pode konpara un algen ki ta bira un sérvu di Jeová maduru ku un mininu ki ta bira adultu? (Odja fotus i dizenhus.)

⁶ Sima nu odjaba antis, Bíblia ta konpara un algen ki ta bira un sérvu di Jeová maduru ku un mininu ki ta bira un adultu. Ten txeu kuza ki un mininu inda ka ta intende, pur isu el ta meste di un adultu pa proteje-l i pa gia-l. Pur izénplu, un mai pode pidi se fidju-fémia pikinoti pa pega-l na mô timenti es sta pasa strada. Má timenti se fidju-fémia ta ba ta kria, kel mai pode dexa-l pasa strada el sô, má el ta kontinua ta lenbra se fidju-fémia pa djobe primeru si ka ten ninhun karu ta pasa. Óras ki se fidju-fémia bira un adultu, dja el ta sabe modi ki el ta ivita prigus sima kes-li. Sima un mininu pikinoti meste ajuda di un adultu pa ivita  prigus, un sérvu di Jeová ki é ka maduru txeu bês ta meste ajuda di un sérvu di Jeová maduru pa ivita kuzas ki pode prujudika se amizadi ku Jeová i pa el toma bons disizon. Má, antis di un sérvu di Jeová maduru toma un disizon, el ta pensa na prinsípius di Bíblia pa sabe kuzê ki Jeová ta pensa sobri kel asuntu i dipôs el ta faze sima el prende.

7. Un sérvu di Jeová ki é maduru meste di ajuda di otus algen?

⁷ Kel-li krê fla ma un sérvu di Jeová ki é maduru nunka ka ta meste ajuda di ningen? Klaru ki nau. Un algen ki é maduru alvês ta meste di ajuda tanbê. Má un algen ki é ka maduru pode krê pa otus algen fla-l kuzê ki el debe faze ô ki disizon ki el debe toma. Un sérvu di Jeová ki é maduru, ta pidi ajuda di otus irmon ki ten más sabedoria i spiriénsia, má el sabe ma Jeová ta spera ma el ta “leba se própi karga”. — Gál. 6:5.

8. Di ki manera ki sérvus di Jeová maduru é diferenti di kunpanheru?

⁸ Sima pesoas adultu é diferenti di kunpanheru, sérvus di Jeová ki é maduru tanbê ten kualidadis diferenti di kunpanheru. Pur izénplu, alguns irmon pode ten más sabedoria, otus pode ser más korajozu, alguns irmon pode gosta di da i otus sabe poi na lugar di otus algen. Alén di kel-li, óras ki dôs sérvu di Jeová ta pasa pa mésmu situason es pode toma disizons diferenti, má ki sta di akordu ku prinsípius di Bíblia. Txeu bês, kel-li ta kontise óras ki un kriston ten ki toma un disizon ki ten aver ku se konsénsia. Pur isu, es ka ta julga kunpanheru si es toma un disizon diferenti. Envês di kel-li, es ta sforsa pa mante unidu. — Rom. 14:10; 1 Kor. 1:10.

KUZÊ KI NU MESTE FAZE PA NU BIRA SÉRVUS DI JEOVÁ MADURU?

9. Nu ta kria na sentidu spritual sen faze sforsu? Splika.

⁹ Un mininu pode kria i bira un adultu sen faze sforsu, má na sentidu spritual kel-li ka ta kontise. Pur izénplu, kes irmon ku irmans na Korintu seta kes notísia sábi, es batiza, es resebe spritu santu i es prende txeu ku kes kuza ki apóstlu Paulu inxina-s. (Atus 18:8-11) Má simé, alguns anu dipôs ki es batiza, txeu di es inda ka éra un sérvu di Jeová maduru. (1 Kor. 3:2) Kuzê ki nu pode faze pa kel-li ka kontise ku nos?

10. Kuzê ki nu meste faze pa nu bira un algen maduru? (Judas 20)

¹⁰ Pa nu bira un algen maduru, primeru nu meste ten kel dizeju di ser maduru. Kes algen ki ta ‘ama vive sen spiriénsia’ i ta krê fika sima es sta, nunka ka ta bira maduru. (Pro. 1:22) Nu ka krê ser sima kes algen ki dja é adultu, má ki inda ta dipende di ses pai ku ses mai pa toma disizon pa es. Envês di kel-li, nu ten responsabilidadi di kontinua ta bira nos amizadi ku Jeová más fórti. (Lé Judas 20.) Si inda bu sta sforsa pa bu bira maduru, ora pa Jeová ta pidi pa el da-u “dizeju i forsa pa aji.” — Flp. 2:13.

11. Kuzê ki Jeová ta da-nu pa djuda-nu bira un algen maduru? (Efézius 4:11-13)

¹¹ Jeová ka ta spera ma nu ta bira un algen maduru nos sô. El da-nu pastoris i instrutoris na kongregason ki ta djuda-nu bira maduru na sentidu spritual “ti ki nu konsigi alkansa altura konplétu di Kristu.” (Lé Efézius 4:11-13.) Jeová tanbê ta da-nu se spritu santu pa djuda-nu ten “menti di Kristu.” (1 Kor. 2:14-16) Alén di kel li, Deus da-nu kes  kuatu ivanjélhu pa nu odja modi ki Jizus ta pensaba, ta papiaba i ta ajiba kantu el staba na téra. Si bu imita manera ki Jizus ta pensaba i ta ajiba, bu pode konsigi alkansa bu méta di ser un sérvu di Jeová maduru.

MODI KI KES VERDADI PROFUNDU DI BÍBLIA TA DJUDA-NU

12. Kuzê ki é “kes primeru ensinu sobri Kristu”?

¹² Pa nu bira un sérvu di Jeová maduru, nu meste prende más di ki sô “kes primeru ensinu sobri Kristu,” ô kes ensinu prinsipal di Bíblia. Alguns di kes primeru kuza ki nu prende é ma nu debe rapende, mostra fé, batiza, i ma ta ben ten un resureison. (Ebr. 6:1, 2) Kes-li é alguns di kes ensinu prinsipal ki tudu sérvus di Jeová ta kridita na el. É pur isu ki kantu apóstlu Pedru prega pa kes algen na Pentikósti el pâpia sobri kes kuza li. (Atus 2:32-35, 38) Pa nu bira un disiplu di Kristu, nu meste seta kes ensinu prinsipal. Pur izénplu, Paulu mostra ma si nu ka ta kridita na resureison nu ka pode fla ma nos é disiplus di Jizus. (1 Kor. 15:12-14) Má, pa nu bira un sérvu di Jeová maduru, nu meste prende más di ki sô kes ensinu prinsipal.

13. Kuzê ki nu meste faze pa kes verdadi profundu di Bíblia djuda-nu? (Ebreus 5:14) (Odja fotus.)

¹³ Diferenti di kes ensinu prinsipal, kes verdadi más profundu di Bíblia ka ta inklui sô kes lei di Jeová, má tanbê se prinsípius ki ta djuda-nu intende modi ki el ta pensa. Pa kes verdadi djuda-nu nu meste studa Bíblia, pensa txeu na kel ki nu studa, i sforsa pa faze sima nu prende. Óras ki nu ta faze si, nu ta prende toma disizons ki ta agrada Jeová. c — Lé Ebreus 5:14.

14. Modi ki Paulu djuda kes irmon na Korintu bira maduru?

¹⁴ É difísil pa un sérvu di Jeová ki é ka maduru toma un bon disizon sobri un asuntu óras ki ka ten un lei na Bíblia ki ta pâpia sobri el. El pode xinti ma el pode faze kel ki el krê si ka ten un lei na Bíblia ki ta fla kuzê ki el debe faze. Otus algen  talvês ta kria un régra óras ki ka meste ninhun régra. Pur izénplu, ta parse ma alguns kriston na Korintu pidi Paulu pa kria un régra ki ta fla si es pode kumeba kes kumida ki oferesedu pa imajens. Envês di Paulu fla-s kuzê ki es debe fazeba, el rekonhese ma kada un ten “direitu di skodje” di akordu ku kel ki se konsénsia ta permiti-l faze. El uza prinsípius di Bíblia pa djuda-s odja ma kada un di es debe toma disizons ki ta dexaba es ku un konsénsia trankilu, má ki ka ta poba otus algen ta tropesa. (1 Kor. 8:4, 7-9) Di kel manera li, Paulu staba ta djuda kes irmon na Korintu bira maduru. Asi es ta uzaba ses kapasidadi di pensa, envês di speraba pa otus algen ô pa un régra flaba es kuzê ki es debe fazeba.

15. Modi ki Paulu djuda kes kriston ebreu faze prugrésu spritual?

¹⁵ Nu ta prende otu lison inportanti ku kuzê ki Paulu skrebe pa kes irmon ebreu. Alguns di es dexa di bira ses amizadi ku Jeová más fórti. Na verdadi, más un bês es staba ta “meste leti, envês di kumida [spritual] fórti.” (Ebr. 5:12) Es ka prende nen es ka seta kes novu kuza ki Jeová staba ta inxina-s através di kongregason. (Pro. 4:18) Pur izénplu, txeu kriston judeu staba ta insisti na sigi Lei di Muizés sikrê dja pasaba 30 anu ki Lei di Kristu dja kababa ku Lei di Muizés. (Rom. 10:4; Titu 1:10) Pur isu, dja éra ténpu pa kes kriston judeu intendeba ma es ka meste más sigiba Lei di Muizés. Paulu staba ta tenta djuda-s seta kes verdadi profundu ki el inxinaba es. Kel karta djuda-s odja ma kel novu manera di adora Jeová éra midjór. Tanbê, el ta daba es koraji pa es kontinua ta pregaba sikrê ku pirsigison di kes judeu. — Ebr. 10:19-23.

IVITA KUNFIA NA BU KABÉSA

16. Kuzê ki nu meste faze pa nu kontinua ta faze prugrésu?

¹⁶ Nu meste sforsa ka sô pa nu bira un kriston maduru, má tanbê pa nu kontinua ta ser un kriston maduru. Kel-li ta involve ka kunfia dimás na nos kabésa. (1 Kor. 10:12) Nu meste “kontinua ta djobe” nos kabésa pa nu ten serteza ma nu sta ta faze prugrésu. — 2 Kor. 13:5.

17. Modi ki kel karta ki Paulu skrebe pa kes kriston na Kolosus mostra ma es meste kontinuaba maduru?

 ¹⁷ Na kel karta ki Paulu skrebe pa kes kriston na Kolosus, el torna mostra ma nu meste kontinua ta ser un sérvu di Jeová maduru. Enbóra kes kriston na Kolosus dja éra maduru, Paulu fla-s pa es toma txeu kuidadu pa es ka ser inganadu pa kes manera di pensa di pesoas di mundu. (Kol. 2:6-10) Epafras, ki talvês konxeba kes kriston dretu, ta oraba sénpri pa es pode sérba “konplétu” ô maduru. (Kol. 4:12) Kuzê ki nu pode prende ku kel-li? Paulu i Epafras ta intendeba ma pa nu kontinua maduru nu meste di ajuda di Deus, má tanbê nu meste faze sforsu. Es kreba pa kes kriston na Kolosus kontinuaba maduru, ka ta inporta ki prublémas es staba ta pasa pa el.

18. Kuzê ki pode kontise ku un kriston maduru? (Odja fotu.)

¹⁸ Paulu aviza kes kriston ebreu ma un kriston maduru ki ka ta toma kuidadu pode perde aprovason di Deus pa tudu ténpu. Si el ka obiba ku Jeová, el pode afastaba di El di tal manera ki el ka ta rapendeba i resebeba perdon di Deus. Filismenti kes kriston ebreu ka staba na kel situason li. (Ebr. 6:4-9) Má kuzê ki nu pode fla di kes irmon di nos ténpu ki bira inativu ô ki dizasosiadu, má ki dipôs rapende? Si es rapende di korason, es ta mostra ma es é ka sima kes kriston ki Paulu skrebe ma pode perdeba aprovason di Deus. Má, óras ki es ta volta pa Jeová, es ta meste kel ajuda ki Jeová ta da. (Eze. 34:15, 16) Ansions pode ranja un irmon ô un irman ki ten txeu spiriénsia pa djuda kes ki volta rekupera ses amizadi ku Jeová.

19. Ki méta ki nu debe ten?

¹⁹ Si bu kontinua ta bira un kriston maduru, bu pode alkansa bu méta! Kontinua ta prende kes verdadi más profundu di Bíblia i ta pensa kada bês más sima Jeová. I si dja bo é un kriston maduru, faze tudu kel ki bu ta pode pa bu kontinua si gósi i pa tudu ténpu.