1. Kuzê ki ta mostra ma Jeová gosta di da?

DURÁNTI txeu ténpu Jeová ta staba el sô. Má el ka fika ta pensa sô na el. Nton, el disidi da vida pa kriaturas na Séu i na Téra. Jeová gosta di da kuzas ki el ten. Pur isu, Bíblia ta txoma-l di ‘Deus filís.’ (1 Tim. 1:11; Tia. 1:17) Tanbê Jeová krê pa nu ser filís, pur isu el ta inxina-nu ser algen ki gosta di da. — Rom. 1:20.

2, 3. (a) Pamodi ki nos é más filís óras ki nu ta da kuzas ki nu ten? (b) Kuzê ki nu sta ben odja na es studu?

² Deus faze-nu sima se imaji. (Gén. 1:27) Kel-li siginifika ma Jeová kria-nu ku kapasidadi di mostra se kualidadis. Si nu krê ser filís, nu meste preokupa ku otus algen i da-s kuza ki nu ten. (Fil. 2:3, 4; Tia. 1:5) Pamodi? Pamodi é si ki Jeová kria-nu. Nbóra nos é inperfetu, nu pode imita Jeová i ser un algen ki gosta di da.

³ Na kel studu li, nu sta ben odja kuzê ki Bíblia ta fla sobri ser algen ki gosta di da. Nu ta ben prende pamodi ki Jeová ta fika kontenti ku nos óras ki nu ta da kuzas ki  nu ten, modi ki ser un algen ki gosta di da ta djuda-nu faze trabadju ki Jeová manda-nu i pamodi ki nu ta ser más filís óras ki nu ta da. Tanbê nu sta ben odja pamodi ki nu debe kontinua ta ser algen ki gosta di da.

4, 5. Kuzê ki ta mostra ma Jeová ku Jizus é midjór izénplu pa nu imita?

⁴ Jeová krê pa nu imita-l, pur isu el ta fika kontenti óras ki nu ta da kuzas ki nu ten. (Efé. 5:1) Tanbê Jeová krê pa nu ser filís. Nu ta odja kel-li na manera ki el faze-nu i el da-nu un Téra bunitu ku txeu kuza na el pa nu ten un vida sábi. (Sal. 104:24; 139:13-16) Nton nu ta onra Jeová, óras ki nu ta sforsa pa nu poi otus algen kontenti.

⁵ Tanbê nu ta imita Jizus, pamodi el dexa un izénplu perfetu di modi ki nu pode ser un algen ki gosta di da. El fla: ‘Fidju di Ómi ka ben pa ser sirbidu, má pa el sirbi i pa da se vida pa resgata un monti di algen.’ (Mat. 20:28) Apóstlu Polu tanbê fla kristons: ‘Nhos kontinua ta pensa sima Kristu Jizus ta pensaba: el dexa tudu ki el tinha el seta ser sima skravu i el bira umanu.’ (Fil. 2:5, 7) Pur isu, é bon nu pergunta nos kabésa: ‘N ta konsigi imita izénplu di Jizus más dretu?’ — Lé 1 Pedro 2:21.

6. Kuzê ki Jizus inxina-nu ku stória di kel bon samaritanu? (Odja dizenhu na komésu di studu.)

⁶ Jeová ta fika kontenti ku nos óras ki nu ta sigi se izénplu i tanbê di Jizus. Nu ta konsigi imita-s óras ki nu ta preokupa ku otus i djobe manera di djuda-s. Jizus mostra ma kel-li é inportanti kantu el konta stória di kel bon samaritanu. (Lé Lucas 10:29-37.) El inxina se sigidoris ma es debe djuda otus, ka ta nporta es é kenha i di undi es é. Bu ta lenbra pamodi ki Jizus konta kel stória li? El konta-l pamodi un judeu pergunta-l: ‘Kenha ki é nha prósimu?’ Respósta ki Jizus da kel ómi, ta inxina-nu ma nu debe ser algen ki ta faze kuzas pa otus, sima kel samaritanu faze. Óras ki nu ta faze si Jeová ta fika kontenti ku nos.

7. Modi ki nu ta mostra ma nu ta kridita ma maneras di Jeová faze kuzas é sénpri midjór? Splika.

⁷ Nu ten txeu motivu pa nu ser un algen ki gosta di da. Pur izénplu, na jardin di Éden, Satanás fla Adon ku Eva ma es ta sérba más filís si es ka obiba ku Jeová i es preokupaba sô ku ses kabésa. Eva ta pensaba sô na se kabésa i el krê sérba sima Deus. Adon tanbê faze mésmu kuza i el disidi agrada se mudjer, envês di obi ku Deus. (Gén. 3:4-6) Ses disizon traze txeu prubléma. Pur isu, óras ki nu ta pensa sô na nos kabésa nu ka ta pode ser filís. Má, si nu ta preokupa ku otus i nu ta da-s kuza ki nu ten, nu sta ta mostra ma maneras ki Jeová ta faze kuzas é sénpri midjór.

8. Pamodi ki Adon ku Eva devia pensaba na otus?

⁸ Adon ku Eva staba es sô na jardin di Éden, má simé es devia pensaba na otus. Pamodi? Pamodi Jeová daba es  un trabadju pa es fazeba. El flaba es pa es ten fidju, pa es intxi Téra i biraba el un paraízu. (Gén. 1:28) Sima Jeová ta preokupa txeu ku se kriason, Adon ku Eva devia preokupaba ku filisidadi di ses fidjus ki ta ben naseba. Jeová kreba pa Téra interu biraba un paraízu i pa tudu ses fidju viveba filís. Kel-li éra un trabadju grandi i tudu fidjus di Adon ku Eva tinha ki fazeba ses párti.

9. Pamodi ki bira Téra un paraízu ta daba umanus txeu alegria?

⁹ Pa Téra biraba un paraízu, Adon ku Eva tinha ki trabadjaba djuntu ku Jeová. Di kel manera li, es ta entraba na diskansu di Deus. (Heb. 4:11) Imajina modi ki umanus ta xintiba sábi i kontenti ku es trabadju! Si es kontinuaba ta preokupa ku otus i ta da kuzas ki es tinha, es ta resebeba txeu benson.

10, 11. Modi ki nu pode faze trabadju di pregason i faze disiplus ki Jeová manda-nu?

¹⁰ Oji tanbê, Jeová da-nu un trabadju pa nu faze. Nu meste prega i faze disiplus. Pa nu faze es trabadju, nu debe preokupa ku otus. Má, sô nu ta kontinua ta faze es trabadju si nu ta ama Jeová i nu ta ama pesoas.

¹¹ Na ténpu di apóstlus, Polu fla ma el i otus kriston éra ‘kolaboradoris di Deus.’ Pamodi es ta pregaba i inxinaba verdadi pa pesoas. (1 Cor. 3:6, 9) Oji tanbê, nu pode ten priviléjiu di kolabora ku Deus óras ki nu ta uza nos ténpu, nos forsa i kuzas ki nu ten pa djuda na faze trabadju di pregason ki Jeová manda-nu.

12, 13. Pamodi ki bu ta atxa ma trabadju di faze disiplus ta da alegria?

¹² Uza nos ténpu i nos forsa na trabadju di prega i faze disiplus, ta da-nu txeu alegria. Pergunta un kalker irmon ki ta faze studus di Bíblia. El ta fla-u ma ka ten kuza más sábi ki odja un studanti ta ntende verdadi, ta ten más fé, ta muda se vida i pâpia ku otus di kuzê ki el prende. Tanbê Jizus fika txeu kontenti kantu kes 70 disiplu ki el manda pa ba prega “volta kontenti”, pamodi es tevi bons rezultadu. — Lúkas 10:17-21, BPK.

¹³ Nos irmons na mundu interu ta fika kontenti óras ki es ta odja ma mensaji di Bíblia djuda pesoas midjora ses vida. Pur izénplu, un irman soltera ki txoma Ana krê fazeba más pa Jeová. * Nton el muda pa  Europa, na undi ki tinha más nisisidadi. El skrebe: “Kuzê ki más N gosta é pamodi N ta konsigi ranja txeu studu di Bíblia. Nha trabadju ta da-m txeu alegria. Óras ki N txiga na kaza, N ka ten ténpu nen di pensa na nhas prubléma. N ta fika ta pensa na nhas studanti, na ses prubléma i ses preokupason. N ta fika ta pensa modi ki N pode anima-s ô djuda-s na algun kuza ki es meste. Gósi, N ten sertéza ma ‘é más sábi da di ki toma.’” — Atus 20:35, BPK.

14. Sikrê pesoas ka obi-nu, modi ki nu pode fika kontenti ku nos trabadju di pregason?

¹⁴ Nu pode fika txeu kontenti óras ki nu ta pâpia ku pesoas di notísias sábi di Reinu, sikrê es ka obi-nu. Jeová ta spéra ma nu ta faze sima el manda Ezekiel faze: ‘Bu ten ki fla-s nhas palavra, sikrê es obi ô es ka obi’. (Eze. 2:7; Isa. 43:10) Sikrê es ka obi nos mensaji, Jeová ta da valor pa sforsu ki nu ta faze. (Lé Hebreus 6:10.) Un irmon fla sobri se trabadju di pregason: “Anos nu ta planta, nu ta rega i nu ta ora ku speransa ma Jeová ta djuda kel algen kria interesi.” — 1 Cor. 3:6.

15. Nu debe ser un algen ki gosta di da, sô si es ta da valor pa kuzas ki nu ta faze? Splika.

¹⁵ Jizus krê pa nu ser filís. Txeu algen ta fika kontenti óras ki nu ta da-s kuza ki nu ten. Jizus fla: ‘Nhos da, i algen ta da nhos. I ta botadu na dóbra di nhos ropa un bon medida, stibadu, sakudidu i ti ki baza. Pamodi ku kel mésmu medida ki nhos midi, nhos ta mididu tanbê.’ (Lucas 6:38 ) É klaru ki nen tudu algen ka ta prende da, sô pamodi bu gosta di da. Má alguns algen pode prende da sima bo. Pur isu, mésmu ki ta parse ma otus algen ka ta da valor, kontinua ta da. Nen bu ka ta imajina modi ki kel kuza ki bu faze pode djuda un algen.

16. Kenha ki nu debe da kuzas ki nu ten i pamodi?

 ¹⁶ Un algen ki gosta di da di korason, ka ta fika ta spéra ma otu algen ten ki da-l. Jizus fla: ‘Óras ki bu faze fésta, bu debe konvida póbris, paralizadu, mankus i ségus, pamodi kes algen li ka pode paga-u.’ (Lúkas 14:13, 14, BPK ) Bíblia ta fla: ‘Algen ki gosta di da ta ser abensuadu’. Tanbê el ta fla: ‘Filís é kel ki mostra ma el ta preokupa ku koitadu’. (Prov. 22:9; Sal. 41:1) Pur isu, nu debe ser un algen ki gosta di da, pamodi nu ta ser filís di verdadi óras ki nu ta djuda otus.

17. Ki otus kuza nu pode da ki ta pô-nu ser filís?

¹⁷ Kantu Polu fla kes palavra di Jizus ma ‘é más sábi da di ki toma’, el ka staba ta pâpia sô di kuzas material. Tanbê nu meste da kunpanheru koraji, da orientason ku bazi na Bíblia i djuda ken ki meste. (Atus 20:31-35, BPK ) Polu inxina-nu ku se izénplu modi ki é inportanti nu ser un algen ki gosta di da: nos ténpu, nos forsa, nos atenson i nos amor.

18. Kuzê ki txeu piskiza ta fla sobri ser un algen ki gosta di da?

¹⁸ Fazedu alguns piskiza ki ta mostra ma un algen ki gosta di da é más filís. Di akordu ku un studu, ‘pesoas ta xinti más filís dipôs ki es faze kuzas dretu pa otus.’ Otus piskiza ta fla ma, óras ki nu ta djuda otus, nu ta xinti más sábi i ma nos vida ten obijetivu. Inda kes piskizador ta fla ma, algen debe faze algun tipu di trabadju voluntáriu pa es pode ten un bon saúdi i pa es xinti más sábi. Nu ka ta fika dimiradu ku kes piskiza li, pamodi Jeová nos Kriador dja fla txeu bês, ma da kuzas ki nu ten ta da-nu txeu alegria. — 2 Tim. 3:16, 17.

19, 20. Pamodi ki bu krê ser un algen ki gosta di da?

¹⁹ É ka faxi ser un algen ki gosta di da, pamodi nu sta ta vive na un mundu undi ki pesoas ta pensa sô na ses kabésa. Má Jizus fla ma kel dôs mandamentu más inportanti é ama Jeová di tudu nos korason, alma, menti i forsa, i ama nos kunpanheru sima nu ta ama nos kabésa. (Marcos 12:28-31 ) Sima nu odja na es studu, ken ki ta ama Jeová ta imita-l. Jeová i Jizus é algen ki gosta di da. Es ta fla ma si nu krê ser filís, nu ten ki ser algen ki gosta di da. Pur isu, nu sforsa pa nu faze más na nos trabadju ki nu ta faze pa Deus i kel ki nu ta faze pa otus. Si nu faze si, nu sta ta onra Jeová, nu ta djuda nos kabésa i otus algen.

²⁰ Nu ka ten dúvida ma dja bu faze bu midjór pa djuda otus, prinsipalmenti bus irmon na fé. (Gál. 6:10) Si bu kontinua ta faze kel-li, pesoas ta fika kontenti ku bo, es ta bira ta ama-u i bu ta ser más filís. Provérbios 11:25 ta fla: ‘Algen ki gosta di da ta ten más txeu, i ken ki ta konsola otus tanbê ta ser konsoladu.’ Na nos dia-dia i na nos trabadju di pregason, ten txeu manera di da kuzas ki nu ten i djuda otus. Na kel otu studu nu ta ben odja modi ki nu pode faze-l.