1. Kuzê ki nos tudu ta krê pa nos família?

UN IRMAN ki txoma Pauline * fla: “Désdi ki N konxe verdadi, N kreba pa tudu algen di nha família staba ku mi na Paraízu. Inda más, N kreba pa nha maridu Wayne i nos fidju sirbiba Jeová djuntu ku mi.” Bu ten família ki inda ka konxe i nen ka ta ama Jeová? Si bu ten, talvês bu sta ta xinti sima Pauline.

2. Ki perguntas nu sta ben responde na kel studu li?

² Nu ka pode obriga nos família seta notísias sábi i ganha vida pa tudu ténpu. Má nu pode djuda-s pensa i abri korason pa mensaji di Bíblia. (2 Tim. 3:14, 15) Pamodi ki nu debe da nos família tistimunhu? Pamodi ki nu meste poi na ses lugar? Kuzê ki nu pode faze pa djuda nos família ama Jeová sima nos? I modi ki tudu irmons na kongregason pode djuda-nu? Na kel studu li, nu sta ben responde kes pergunta li.

3. Di akordu ku 2 Pedro 3:9, pamodi ki nu debe da nos família tistimunhu?

³ Ka ta dura, Jeová ta ben kaba ku kel mundu li. Sô kes algen ki ten ‘bon inklinason pa vive pa tudu ténpu’ ki ta ben salva. (Atos 13:48 ) Nu ta gasta txeu ténpu i forsa ta prega notísias sábi pa pesoas ki nu ka konxe na lugar ki nu ta mora. Pur isu, é normal nu krê tanbê  pa nos família sirbi Jeová djuntu ku nos. Jeová ki é nos Pai ki ta ama-nu txeu, ‘ka krê pa ningen ser distruídu, má el krê pa tudu algen rapende.’ — Lé 2 Pedro 3:9.

4. Ki éru talvês nu pode faze óras ki nu ta da nos família tistimunhu?

⁴ Nu meste lenbra ma ten un manera dretu i un manera mariadu di pâpia sobri notísias sábi. Óras ki nu ta pâpia ku un algen ki nu ka konxe sénpri nu ta pâpia ku el ku jetu. Má óras ki nu ta da nos família tistimunhu, talvês nu ta pâpia ku es di manera dirétu.

5. Di kuzê ki nu debe lenbra antis di nu pâpia ku nos família sobri Jeová?

⁵ Óras ki nu ta pensa na kel primeru bês ki nu tenta pâpia ku nos família sobri Jeová, txeu di nos talvês ta rapende di manera ki nu pâpia ku es, i nu ta krê fazeba el di otu manera. Apóstlu Polu da kristons kel konsedju li: ‘Ki nhos palavras ser sénpri sábi, tenpradu ku sal, pa nhos sabe modi ki nhos ta responde tudu algen.’ (Col. 4:5, 6) É bon nu lenbra di kel konsedju li óras ki nu ta pâpia ku nos família sobri Jeová. Sinon, nu pode sta ta afasta-s envês di djuda-s konxe verdadi.

6-7. Da un izénplu ki ta mostra pamodi ki un kriston kazadu meste poi na lugar di se maridu ô mudjer ki ka ta sirbi Jeová.

⁶ Poi na ses lugar. Pauline ki dja nu papiaba di el antis fla: “Na komésu, N kria papiaba ku nha maridu sô kuzas di Bíblia. Nu ka ta papiaba sobri kuzas normal di dia-dia.” Má Wayne, maridu di Pauline, ka sabia kuazi nada sobri Bíblia i el ka ta ntendeba kuzê ki se mudjer  sta ta papiaba ku el. Nton, el kumesa ta atxa ma se mudjer kria sô sabeba di se relijion. Wayne fika preokupadu ma se mudjer sta ta djuntaba na un seita prigozu ki krê nganaba el.

⁷ Pauline da kónta ma tevi momentu ki el ta pasaba un bon párti di se ténpu ku irmons na kongregason. El ta baba pa runion, pa pregason i pa konvívius. Pauline fla: “Wayne alvês ta txigaba na kaza i ka ta tinha ningen, i el ta xintiba el sô.” Ta da pa ntendeba, ma el ta xintiba falta di se mudjer i di se fidju. El ka konxeba kes algen ki staba ku es i ta parseba ma Pauline gostaba más di sta ku se novus amigu di ki ku se maridu. Pur isu, Wayne fla Pauline pa es divôrsia. Bu ta konsigi odja modi ki Pauline podia mostraba ma el ta ntendeba se maridu?

8. Di akordu ku 1 Pedro 3:1, 2, kuzê ki txeu bês nos família más ta repara?

⁸ Dexa bu konportamentu pâpia pa bo. Txeu bês, kuzê ki nos família más ta repara é ka kuzê ki nu ta fla, má kuzê ki nu ta faze. (Lé 1 Pedro 3:1, 2.) Ku ténpu é kel-li ki Pauline ntende. El fla: “N sabia ma Wayne ta amaba nos i ma el ka kria divorsiaba di mi. Má kantu el pâpia na divôrsia, N ntende ma N tinha ki kumesaba ta faze kuzas di manera di Jeová. Envês di N fika ta pâpia txeu, N meste sforsaba pa N dexa nha konportamentu pâpia pa mi.” Pauline para di forsa Wayne na pâpia sobri Bíblia i el kumesa ta pâpia sobri asuntus di dia-dia. Tanbê Wayne odja ma se mudjer bira un algen di pas i el odja se fidju ta konporta más midjór. (Pro. 31:18, 27, 28) Kantu el  odja modi ki Bíblia sta ta djudaba se família, el abri se menti i korason pa mensaji di Palavra di Deus. — 1 Cor. 7:12-14, 16.

9. Pamodi ki nu debe kontinua ta tenta djuda nos família?

⁹ Kontinua ta tenta djuda bus família. Jeová dexa un izénplu pa nos. ‘Txeu bês’ el ta da pesoas oportunidadi di seta notísias sábi i ganha vida pa tudu ténpu. (Jer. 44:4) I apóstlu Polu fla Timótiu pa el kontinua ta djuda otus. Pamodi? Pamodi si el fazeba si, el ta salvaba se kabésa i kes ki ta obiba el. (1 Tim. 4:16) Nu ta ama nos família i nu krê pa es konxe verdadis ki nu ta atxa na Palavra di Deus. Dipôs di un ténpu, palavras i konportamentu di Pauline kaba pa ten bon influénsia na se família. Gósi el ten alegria di sirbi Jeová djuntu ku se maridu. Es tudu dôs é pioneru i Wayne é ansion.

10. Pamodi ki nu meste ten paxénxa?

¹⁰ Ten paxénxa. Kantu nu disidi obi ku Deus, nu faze mudansas na nos vida i na nos krénsa. Má talvês pode ser difísil pa nos família seta kes mudansa. Pur izénplu, un di kes primeru kuza ki es ta repara ma nu ka sta faze más, é komemora kes feriadu ki sta ligadu ku relijion i ma nu ka sta mete na pulítika. Na komésu, alguns di es pode fika xatiadu ku nos. (Mat. 10:35, 36) Má, nu ka debe dizisti di djuda-s ntende nos krénsa. Si nu dizisti di djuda nos família, é sima si nu sta ta julga-s, ma es ka merese vive pa tudu ténpu. Jeová ka da-nu kel trabadju di julga, el da kel trabadju li pa Jizus. (João 5:22 ) Si nu ten paxénxa, nos família pode mostra interesi na obi nos mensaji. — Odja kuadru “ Uza nos site pa inxina”.

11-13. Kuzê ki bu prende sobri manera ki Alice lida ku se mai ku se pai?

¹¹ Mante firmi má pâpia ku jetu. (Pro. 15:2) Odja izénplu di Alice. El kriadu na un família ki ka ta kriditaba na Deus i ki staba metedu na pulítika. Kantu el sai di kaza di se mai ku se pai, Alice prende verdadi. El odja ma el tinha ki papiaba ku se mai i se pai sobri kes kuza ki el staba ta prende. Alice fla: “Si bu dura ki pâpia ku bu família sobri kes novu kuzas ki bu ta kridita i ki bu ta faze, es ta fika más xatiadu óras ki es diskubri. El ta skrebeba karta pa se mai ku se pai. Na kes karta el ta tenta poba alguns asuntu ki ta interesaba es, sima amor. Dipôs, el ta perguntaba es kuzê ki es ta pensaba di kel asuntu di Bíblia. (1 Cor. 13:1-13) Sénpri el ta agradiseba se mai ku se pai pamodi es kria-l i es toma kónta di el, i el ta mandaba es prezenti. Óras ki el ta ba vizitaba es, el ta fazeba di tudu pa djuda se mai na trabadju di kaza. Na komésu, se mai ku se pai ka staba kontenti kantu Alice fla-s sobri se novu krénsa.

¹² Kantu Alice ta pasaba algun ténpu na kaza di se mai ku se pai, el ta kontinuaba ku se prugrama di leitura di Bíblia. Alice fla: “Kel-li djuda nha mai ntende modi ki Bíblia éra inportanti pa mi.” Nton, pai di Alice disidi prende algun kuza sobri Bíblia, pa el pode ntendeba kuzê ki poi se fidju-fémia ta muda se manera di pensa. Tanbê el kria atxaba algun fadja na Bíblia. Alice fla: “N da nha pai un Bíblia i N skrebe un kuza na el.” Kal ki foi rezultadu? Envês di pai di Alice atxa fadja, kes kuza ki el lé na Palavra di Deus mexe txeu ku el.

¹³ Nu meste ser firmi, má nu krê pâpia  ku jetu, sikrê óras ki é difísil. (1 Cor. 4:12b) Pur izénplu, Alice tevi ki aguenta opozison di se mai. “Kantu N batiza, nha mai fla-m ma mi é un ‘mau fidju-fémia.’” Kuzê ki Alice faze? “Envês di ivita pâpia sobri nha relijion, N splika-l ku ruspetu ma N staba disididu na ser un Tistimunha di Jeová i ma N ka ta mudaba nha disizon. Tanbê N fla nha mai ma N gosta txeu di el. Nu txora nos tudu dôs i N faze un kumida ki el gosta txeu. Dipôs di kel dia, nha mai kumesa ta odja ma Bíblia staba ta pô-m ta bira un algen midjór.”

14. Pamodi ki nunka nu ka debe dexa nos família muda nos disizon di sirbi Jeová?

¹⁴ Talvês ta leba algun ténpu pa nos família ntende ma sirbi Jeová é un kuza inportanti pa nos. Pur izénplu, kantu Alice disidi ser pioneru envês di sigi un karera ki se mai ku se pai kreba, se mai txora. Má Alice kontinua firmi. El fla: “Si bu dexa bu família muda bu disizon sobri un kuza, di sertéza es ta ba tenta muda-u bu disizon na otus kuza. Má si bo é firmi i simé bu ta trata bu família ku amor, alguns di es pode disidi obi-u.” É kel-li ki kontise ku Alice. Oji se pai ku se mai é pioneru i se pai é ansion.

15. Di akordu ku Mateus 5:14-16 i 1 Pedro 2:12, modi ki ‘bons óbra’ di otus pode djuda nos família?

¹⁵ Jeová ta uza ‘bons óbra’ di se sérvus pa el atrai pesoas pa el. (Lé Mateus 5:14-16; 1 Pedro 2:12.) Si bu maridu ô bu mudjer é ka Tistimunha di Jeová, dja el tevi xansi di konxe irmons di bu  kongregason? Pauline, ki nu papiaba di el antis, ta konvidaba irmons ku irmans pa se kaza. Asi, se maridu Wayne ta podia konxeba es. Wayne ta lenbra modi ki un irmon djuda-l ntende ken ki é Tistimunha di Jeová: “El tra un dia di féria di se trabadju sô pa el bai odja un jogu ku mi. Kel-li pô-m ta pensa: ‘El é un algen normal!’”

16. Pamodi ki nu debe konvida nos família pa runions?

¹⁶ Un bon manera di djuda nos família é óras ki nu ta konvida-s pa runion. (1 Cor. 14:24, 25) Primeru runion ki Wayne bai foi Komemorason, pamodi éra dipôs di se trabadju i éra un prugrama ki ka ta duraba txeu. El fla: “N ka ntende kel diskursu, má N ta lenbra di kes algen. Es bai pâpia ku mi, es kunprimenta-m sábi i es fla-m ma es staba kontenti di odja-m la. N odja ma es éra algen dretu.” Wayne tanbê odja ma un kazal di kongregason ta trataba Pauline dretu. Es ta djudaba el ku se fidju na runion i na pregason. Nton, kantu Wayne disidi konxe midjór kes novu krénsa di Pauline, el pidi pa kel maridu studa Bíblia ku el.

17. Di kuzê ki nu ka debe kulpa nos kabésa, má pamodi ki nunka nu ka debe dizisti di nos família?

¹⁷ Nu krê pa tudu nos família sirbi Jeová djuntu ku nos. Má, sikrê ku tudu sforsu ki nu ta faze pa djuda-s, nen sénpri es ta seta verdadi. Si kel-li sta ta kontise ku bo, ka bu kulpa bu kabésa. Di tudu manera, kel-la é ses disizon i nu ka debe obriga ningen seta nos krénsa. Ku ténpu, bu família talvês pode odja ma bo é filís pamodi bu ta sirbi Jeová, i kel-la pode djuda-s muda ses ideia. Nton, faze orason pa es. Pâpia ku es ku bondadi. Ka bu dizisti di djuda-s. (Atos 20:20 ) Bu pode ten sertéza ma Jeová ta abênsua sforsu ki bu ta faze. I si bu família disidi obi-u, es ta salva!