STUDU 31
‘Nu ka ta dizisti’!
‘Pur isu nu ka ta dizisti’. — 2 CORÍNTIOS 4:16.
KÁNTIKU 128 Aguenta firmi ti fin
KUZÊ KI NU STA BEN STUDA *
1. Kuzê ki kristons meste faze pa es kontinua ta kóre ti fin di korida pa vida?
KRISTONS sta na un korida pa vida. Talvês dja ten poku ténpu ki bu entra na es korida, ô dja bu sta na el pa txeu anu. Ka ta nporta kal ki é nos situason, nos tudu nu meste kontinua ta kóre ti fin di korida. Apóstlu Polu da kristons na Filipus un konsedju ki pode djuda-nu ka dizisti di korida. Kantu kristons na Filipus resebe kel karta ku es konsedju, alguns dja ta sirbiba Jeová pa txeu anu. Dja es staba ta sirbi Jeová di un manera fiel, má Polu lenbra-s ma es meste kontinua ta kóre sen dizisti. El kreba pa es sigiba se izénplu di ‘npenha pa alkansa obijetivu’. — Fil. 3:14.
2. Pamodi ki konsedju ki Polu da pa kristons na Filipus ben déntu d’óra?
2 Konsedju ki Polu da pa kes kriston na Filipus ben déntu d’óra. Kongregason na Filipus sta ta pasaba pa pirsigison désdi ki kongregason formadu. Tudu kumesa na anu 50 D.J., kantu Deus konvida Polu pa ‘pasa pa Masedónia’. (Atos 16:9 ) Kantu Polu ku Silas txiga la, es konxe un mudjer ki txomaba Lídia. El “staba ta sukuta” notísias sábi i Jeová “abri-l si korason”. (Atus 16:14, Bíblia na Prugrésu di Traduson pa Lingua Kabuverdianu, BPK ) Poku ténpu dipôs, Lídia i tudu kes algen di se kaza batizadu. Má, Diabu kumesa lógu ta kria prublémas. Ómis di sidadi leba Polu ku Silas pa kes governanti di sidadi, ta fla ma es staba ta traze prubléma pa sidadi. Kal ki foi rezultadu? Polu ku Silas sotadu i es podu prézu. Dipôs es mandadu pa es sai di sidadi. (Atos 16:16-40 ) Es dizisti? Nau! I kuzê ki kontise ku kes irmon i irmans, di kel kongregason ki formadu? Es tanbê es ka dizisti! Nu ka ten dúvida ma es xinti nkorajadu pamodi Polu ku Silas dexa un bon izénplu.
3. Kuzê ki Polu sabia, i ki perguntas nu sta ben odja na kel studu li?
3 Polu staba disididu na ka dizisti. (2 Cor. 4:16) Má, el sabia ma pa el txigaba na fin di korida, el tinha ki konsentraba na se obijetivu. Kuzê ki nu pode prende ku izénplu di Polu? Ki izénplus di fé nu ten oji ki ta mostra-nu ma nu pode aguenta firmi sikrê ku prublémas? I modi ki nos speransa pa futuru pode djuda-nu sta más disididu pa nunka nu ka dizisti?
MODI KI IZÉNPLU DI POLU PODE DJUDA-NU
4. Modi ki Polu mostra ma el staba okupadu na sirvisu di Jeová, sikrê el staba prézu?
4 Pensa na tudu kuza ki Polu faze kantu el skrebe pa kristons na Filipus. El staba prézu na un kaza na Roma. El ka podia saíba pa prega. Má simé, el kontinua okupadu ta da tistimunhu pa kes algen ki ta bai vizitaba el i ta skrebeba kartas pa kongregasons ki ta fikaba más lonji. Di mésmu manera oji, txeu irmon ki ka ta pode sai di kaza, ta pruveta tudu oportunidadi pa pâpia di notísias sábi ku kes algen ki ta bai vizita-s. Tanbê nu pode skrebe kartas, ki ta nkoraja, pa kes algen ki nu ka ta pode pâpia ku es na pregason di kaza en kaza.
5. Di akordu ku Filipenses 3:12-14, kuzê ki djuda Polu kontinua konsentradu na se obijetivu?
5 Polu ka dexa kuzas dretu ô kuzas mariadu ki el faze distrai-l di sirbi Jeová. Na verdadi, el fla ma ‘skese kes kuza ki el dexa pa tras’, éra inportanti pa el ‘konsigi kes kuza ki sta pa frenti’, ô tirmina se korida. (Lé Filipenses 3:12-14.) Kal ki éra alguns kuza ki podia distraíba Polu? Primeru, Polu faze txeu kuza inportanti na relijion di judeus. Má, el odja kes kuza sima ‘lixu’. (Fil. 3:3-8) Sugundu, el ka dexa sentimentus di kulpa pamodi el ta pirsigiba kristons, pô-l ta para di sirbi Jeová. I tirseru, el ka ta atxaba ma dja el fazeba tudu kuza na trabadju di Jeová. Polu faze txeu kuza na pregason, nbóra el podu prézu, el sotadu, el dadu ku pédra, barku inkadja, el fika sen kumida i sen ropa pa bisti. (2 Cor. 11:23-27) Má, ka ta nporta kuzê ki dja el fazeba i kuzê ki el sufreba, Polu sabia ma el tinha ki kontinuaba ta sirbi Jeová. Nu meste faze mésmu kuza.
6. Kal ki é alguns di ‘kes kuza ki nu dexa pa tras’ ki talvês nu meste skese?
6 Modi ki nu pode imita izénplu di Polu di ‘skese kes kuza ki nu dexa pa tras’? Alguns di nos talvês meste luta ku sentimentus di kulpa pamodi kuzas ki nu fazeba antis. Si kel-la sta kontise ku bo, kuzê ki bu ta atxa di kumesa un prujétu di studu pesoal sobri sakrifisiu di resgati di Jizus? Si nu studa, nu pensa txeu na kuza ki nu studa i nu faze orason, nu ta xinti nkorajadu. Kel-la ta djuda-nu vense kes sentimentu di kulpa ki nu ka debe staba ta xinti más. Nu pode konsigi para di kastiga nos kabésa pa kuzas ki Jeová dja purdua-nu. Pensa na un otu lison ki nu ta prende ku Polu. Alguns irmon dexa un bon trabadju na mundu pa es pode faze más pa Jeová. Si kel-la kontise ku nos, un manera di nu skese kes kuza ki nu dexa pa tras é ka fika ta pensa na kes kuza ki nu tinha antis. (Núm. 11:4-6; Ecl. 7:10) Tanbê ‘kes kuza ki nu dexa pa tras’ pode inklui kes kuza dretu ki nu faze na sirvisu di Jeová ô prublémas ki nu konsigi lida ku el. É klaru ki lenbra modi ki Jeová abensua-nu i djuda-nu é un manera di nu bira más amigu di nos Pai. Má, nunka nu ka krê pensa ma kel ki nu faze pa Jeová dja sta bon. — 1 Cor. 15:58.
Na korida pa vida, ka nu dexa nada distrai-nu; nu mante konsentradu na nos obijetivu (Odja parágrafu 7.)
7. Di akordu ku 1 Coríntios 9:24-27, kuzê ki nu meste faze pa nu ganha korida pa vida? Da un izénplu.
7 Polu ta ntendeba dretu palavras di Jizus: ‘Nhos faze txeu sforsu’. (Luc. 13:23, 24) Polu sabia ma sima Kristu, el tinha ki sforsaba txeu ti fin di se vida. Pur isu, el konpara vida di un kriston ku un korida. (Lé 1 Coríntios 9:24-27.) Na un korida, un atléta ta mante konsentradu pa el txiga na fin i el ka ta dexa nada distrai-l. Pur izénplu, kes atléta ki ta partisipa na un korida na sidadi talvês ten ki bai na ruas undi ki ten lójas i otus kuza ki pode distrai-s. Bu ta pode imajina un atléta ta para na meiu di korida pa odja kes kuza ki sta na móntra di un lója? Klaru ki nau. Si el faze kel-la, el ka ta ganha korida. Di mésmu manera, nu sta na un korida pa vida, ki nu ka pode distrai. Si nu mante konsentradu na nos obijetivu i nu sirbi Jeová ku zelu sima Polu faze, nu ta ganha prémiu!
MODI KI NU PODE KONTINUA TA SIRBI JEOVÁ SIKRÊ KU PRUBLÉMAS
8. Ki três prubléma nu sta ben odja?
8 Gósi nu sta ben odja três prubléma ki pode dizanima-nu. Primeru, óras ki kuzas ka ta kontise sima nu sta speraba. Sugundu, saúdi fraku ô bedjisa. I tirseru, óras ki nu ta pasa pa prublémas ki ta dura pa txeu ténpu. Un kuza ki ta djuda-nu é odja modi ki otus irmon lida ku kes situason li. — Fil. 3:17.
9. Kuzê ki pode kontise óras ki kuzas ka ta bai sima nu sta speraba?
9 Óras ki kuzas ka ta kontise sima nu sta speraba. Nos tudu nu ten speransa na kes kuza sábi ki Jeová promete-nu. Kel-la é un sentimentu normal. Na verdadi, kantu proféta Abakuki, fla ma el ta gostaba txeu pa Jeová kaba ku kes maldadi na Judá, Jeová fla-l: ‘Kontinua ta spéra’. (Hab. 2:3) Má, alvês kuzas ki nu sta ta spéra gósi, pode dura ki kontise. Kel-li pode pô-nu dizanimadu i ta perde nos zelu pa verdadi. (Pro. 13:12) É kel-li ki kontise pa vólta di anu 1914, ku alguns kriston skodjedu ku spritu santu. Txeu di es tinha speransa di baba pa Séu na kel anu. Má kantu ki kel-la ka kontise, modi ki kes kriston fiel reaji kantu kuzas ka kontise sima es sta speraba?
Kuzas ki Royal ku Pearl Spatz sta speraba ka kunpri na anu di 1914, má es kontinua fiel pa txeu anu (Odja parágrafu 10.)
10. Kuzê ki un kazal faze kantu kuzas ka kontise sima es sta speraba?
10 Odja izénplu di irmon Royal ku Pearl Spatz, un kazal lial ki pasa pa es situason. Royal batiza na anu di 1908, kantu el tinha 20 anu. El tinha sertéza ma lógu el ta baba pa Séu. Na verdadi, kantu ki el pidi Pearl na kazamentu na anu di 1911, el fla-l: “Bu sabe kuzê ki sta ben kontise na anu di 1914. Si nu ten ki kaza, é midjór nu faze-l gósi!” Má, na anu di 1914 es ka ba pa Séu. Kel-la pô-s ta dizisti di ses korida pa vida? Nau, pamodi es staba konsentradu na sirbi Jeová, envês di ganha rekonpénsa. Royal ku Pearl staba disididu na kontinua fiel na ses korida pa vida. I é kel-la ki es kontinua ta faze duránti txeu anu, ti finda ses trabadju li na Téra. Nu ka ten dúvida ma falta poku pa nu odja Jeová ta ben linpa se nómi di tudu kes mintira ki Satanás fla kóntra el. Nu ten sertéza ma tudu kes kuza li ta ben kontise na ténpu di Jeová. Ti la, nu debe mante okupadu na sirbi Jeová, i nunka ka fika dizanimadu pamodi kuzas ka kontise sima nu sta speraba.
Sikrê ku txeu idadi, Arthur Secord kontinua ta faze se midjór pa Jeová (Odja parágrafu 11.)
11-12. Pamodi ki nu pode kontinua ta sirbi Jeová sikrê ku saúdi fraku ô bedjisa? Da un izénplu.
11 Saúdi fraku ô bedjisa. Un atléta meste ten un korpu fórti pa el partisipa na un korida. Má, bu ka meste di kel-la pa bu kontinua ta bira más amigu di Jeová. Na verdadi, txeu di nos irmons ki dja ka tene forsa sima antis ta kontinua ta faze ses midjór pa Jeová. (2 Cor. 4:16) Odja izénplu di irmon Arthur Secord. * El tinha 88 anu di idadi i 55 anu ta sirbi na Betel, i el staba txeu duenti. Un dia, un infermera txiga pértu di se kama pa djobe-l. El odja pa el i el fla-l ku karinhu: “Irmon Arthur, kel korpu li dja viaja txeu na sirvisu di Jeová.” Má Arthur ka ta konsentraba na kuzê ki dja el fazeba. El djobe pa kel infermera, el ri i el responde-l: “Bu ten razon. Má kuzê ki ta nporta é ka kuzê ki nu faze. É kuzê ki nu sta ben faze di li pa frenti.”
12 Talvês dja bu ta sirbi Jeová pa txeu anu, i gósi bu ta da kónta ma bu saúdi ka sta dexa-u faze txeu sima antis. Si kel-li sta kontise ku bo, ka bu dizanima. Ten sertéza ma Jeová ta da txeu valor pa tudu ki bu faze pa el. (Heb. 6:10) I lenbra ma nos amor pa Jeová ka ta djobedu pa kel ki nu ta konsigi faze na se sirvisu. Nu ta mostra ma nu ta ama Jeová, óras ki nu ta mante un atitudi puzitivu i nu ta faze tudu kel ki nu ta pode. (Col. 3:23) Jeová ta ntende nos limitason i nunka el ka ta iziji di nos más di ki kel ki nu ta pode faze. — Mar. 12:43, 44.
Anatoly ku Lidiya Melnik mante firmi sikrê ku txeu difikuldadi (Odja parágrafu 13.)
13. Modi ki spiriénsa di Anatoly ku Lidiya ta nkoraja-nu pa nu ka dizisti sikrê ku prublémas?
13 Prublémas ki ta dura pa txeu ténpu. Alguns di nos irmon sta ta pasa pa prublémas i pirsigison duránti txeu anu. Odja izénplu di Anatoly Melnik, * na Moldávia. El tinha sô 12 anu kantu se pai podu prézu i mandadu pa Sibéria, más di 7 mil km lonji di se família. Un anu dipôs, Anatoly, se mai i ses avó tanbê mandadu pa Sibéria. Dipôs di un ténpu, es konsigi fika ta sisti runions na un otu zóna, má es tinha ki andaba uns 30 km na meiu di névi ku txeu friu. Más tardi, irmon Anatoly pasa três anu na kadia, lonji di se mudjer, Lidiya i di ses fidju-fémia ki tinha un anu di idadi. Mésmu ta pasa pa prublémas pa txeu anu, Anatoly i se família ka dizisti. Gósi ku 82 anu, Anatoly ta faze párti di Kumison di Filial na un país di Ázia Sentral. Sima Anatoly ku Lidiya, nu debe faze tudu kel ki nu pode na sirvisu di Jeová, i kontinua ta aguenta firmi, sima dja nu fazeba antis. — Gál. 6:9.
NOS SPERANSA PA FUTURU TA DJUDA-NU
14. Kuzê ki Polu tinha ki fazeba pa alkansa se obijetivu?
14 Polu tinha kunfiansa ma el ta txigaba fin di korida i alkansa se obijetivu. Dja ki el éra un kriston skodjedu ku spritu santu, se obijetivu éra ganha kel ‘prémiu di xamada pa riba di párti di Deus’. Má el sabia ma pa el ganhaba prémiu el tinha ki kontinuaba ‘ta npenha’. (Fil. 3:14) Pa djuda kes kriston na Filipus mante konsentradu na ses obijetivu, Polu faze un konparason interesanti.
15. Modi ki Polu uza kel konparason di un sidadon di Roma pa nkoraja kes kriston na Filipus pa es kontinua ta ‘npenha’ pa ganha prémiu?
15 Polu lenbra kes kriston na Filipus ma es ta ba viveba na Séu. (Fil. 3:20) Pamodi ki es meste lenbraba di kel-li? Na kel ténpu, kes algen ta daba txeu inportánsia na ser un sidadon di Roma. * Má kes kriston skodjedu ku spritu santu ta sérba sidadons di midjór govérnu, i es ta tinha mutu más vantaji. Konparadu ku ba vive na Séu, ser sidadon di Roma ka éra nada! Pur isu, Polu nkoraja kes kriston na Filipus pa es ‘aji sima sidadons di un manera ki ta konbina ku notísias sábi sobri Kristu’. (Fil. 1:27, nóta di rodapé) Sima kes kriston skodjedu ku spritu santu di kel ténpu, oji kes ki ten speransa di ba vive na Séu, é un grandi izénplu di pesoas ki sta kontinua ta npenha pa ganha prémiu.
16. Ka ta nporta kal ki é nos speransa, kuzê ki nu debe kontinua ta faze di akordu ku Filipenses 4:6, 7 ?
16 Ka ta nporta si nos speransa é vive pa tudu ténpu na Séu ô na Paraízu na Téra, nu debe kontinua ta npenha pa alkansa nos obijetivu. Nu ka pode fika ta djobe pa kuzas ki fika pa tras; i nen nu ka debe dexa nada inpidi-nu di sirbi Jeová. (Fil. 3:16) Talvês dja nu dura ta spéra pa odja Jeová ta kunpri se promésa, ô talvês dja nu ka sta jóven más ô nu sta ku saúdi fraku. Pode ser tanbê ki dja ten txeu ténpu ki nu sta ta aguenta prublémas i pirsigison. Ka ta nporta kal ki é bu situason, ka bu ‘fika preokupadu dimás ku ninhun kuza’. Má, Deus konxe bus pididus i súplikas, i el ta da-u un pas ki nen bu ka ta konsigi imajina. — Lé Filipenses 4:6, 7.
17. Kuzê ki nu ta ben odja na kel otu studu?
17 Sima un atléta ki ta sforsa txeu óras ki el sta na fin di korida, nos tanbê nu ta mante konsentradu na nos obijetivu i nu ta npenha pa finda nos korida pa vida. Tanbê nu ta konsentra na promésas bunitu pa futuru. Pur isu, nu kontinua ta sforsa i ta faze tudu kel ki nu pode, sima nos situason ta da. Má kuzê ki nu debe faze pa nu kontinua ta kóre na direson sértu i pa nu ka para di sirbi Jeová? Kel otu studu ta ben djuda-nu sabe kuzê ki nu debe poi na primeru lugar i modi ki nu pode ‘konfirma kuzê ki é más inportanti’. — Fil. 1:9, 10.
KÁNTIKU 79 Djuda-s mante firmi
^ par. 5 Ka ta nporta kantu ténpu nu sta sirbi Jeová, nu meste kontinua ta bira nos amizadi ku el más fórti i sforsa pa ser kristons midjór. Apóstlu Polu nkoraja kristons pa nunka es ka dizisti. Óras ki nu ta lé se karta ki el skrebe pa kristons na sidadi di Filipus, ta djuda-nu kontinua firmi na nos korida pa vida. Kel studu li ta ben mostra-nu modi ki nu pode sigi kes palavra di Polu.
^ par. 11 Odja stória di vida di irmon Secord, na artigu “A minha parte no progresso da adoração correta ”, na Sentinéla di 15 di janeru di 1966, na purtugês.
^ par. 13 Odja stória di vida di irmon Melnik, na artigu “Aprendi a amar a Deus desde pequeno ”, na Despertai! di 22 di otubru di 2004, na purtugês.
^ par. 15 Dja ki sidadi di Filipus staba dibaxu di lei di Roma, kes algen di la tinha alguns direitu sima un sidadon di Roma. Pur isu, irmons na Filipus ntende dretu kel konparason ki Polu faze.
