1. Ki priviléjiu nu ten?

NOS tudu nu ten un priviléjiu grandi di faze párti di kongregason di Jeová! Nu ta xinti txeu pas i alegria na adora Jeová djuntu ku nos irmons i irmans. Kal ki é bu lugar na kongregason?

2. Ki ilustrason apóstlu Polu faze na alguns karta ki el skrebe?

² Nu pode prende txeu kuza sobri kel asuntu li, na un ilustrason ki ta parse na alguns karta di apóstlu Polu. Na kada un di kes karta ki el skrebe, ku orientason di Deus, Polu fla ma kongregason é sima korpu di algen. Tanbê, el fla ma kada algen na kongregason é sima pártis di korpu. — Rom. 12:4-8; 1 Cor. 12:12-27; Efé. 4:16.

3. Kal ki é três lison ki nu sta ben prende na kel studu li?

³ Na kel studu li, nu sta ben odja três lison inportanti ki nu ta prende ku ilustrason di Polu. Primeru, nu sta ben prende ma kada un di nos ten un lugar * na kongregason di Jeová. Sugundu, nu sta ben odja kuzê ki nu pode faze si nu ta atxa ma nu ka ten txeu valor na kongregason. I tirseru, nu sta ben odja pamodi ki nu meste sta okupadu ta faze trabadju ki Jeová da-nu na kongregason.

4. Kuzê ki Romanos 12:4, 5 ta inxina-nu?

⁴ Primeru lison ki nu pode prende ku ilustrason di Polu é kel-li: kada un di nos ten un lugar inportanti na família di Jeová. Polu kumesa se ilustrason ta fla: ‘Sima nu ten un monti párti na un korpu sô, má tudu kes párti ka ta faze mésmu kuza, di mésmu manera, sikrê nos é txeu, anos é un korpu unidu ku Kristu, má kada un di nos é párti di kunpanheru.’ (Rom. 12:4, 5) Kuzê ki Polu krê flaba? Kada un di nos ten un trabadju diferenti na kongregason, má simé kada un di nos ten txeu valor.

5. Ki ‘prezentis’ Jeová ta da kongregason?

⁵ Óras ki nu ta pensa na kes ki ten un lugar na kongregason, talvês lógu nu ta lenbra di kes ki ta toma kónta di kongregason. (1 Tes. 5:12; Heb. 13:17) Na verdadi, Jeová ta uza Jizus pa da kongregason ‘prezentis na fórma di ómis.’ (Efé. 4:8) Kes ‘prezenti na fórma di ómis’ ta inklui Grupu Enkaregadu di Óbra, ses ajudanti, ménbrus di Kumison di filial, enkaregadus di grupu di kongregason, kes ki ta inxina na skólas di organizason, ansions i ajudantis di kongregason. Tudu kes irmon li, diziginadu ku spritu santu pa kuida di ovelhas di Jeová, ki ten txeu valor pa el, i pa djuda kongregason fika más fórti. — 1 Ped. 5:2, 3.

6. Sima sta na 1 Tessalonicenses 2:6-8, kuzê ki kes irmon diziginadu ku spritu santu ta sforsa pa faze?

⁶ Irmons ta diziginadu ku spritu santu pa kuida di txeu responsabilidadi. I sima mô ku pé i kes otu párti di korpu ta trabadja pa djuda korpu interu, kes irmon li ta trabadja duru pa djuda kongregason interu. Es ka ta djobe glória pa ses kabésa, má es ta sforsa pa djuda ses irmons ku irmans ten un fé más fórti. (Lé 1 Tessalonicenses 2:6-8.) Nu ta agradese Jeová pamodi el da-nu kes irmon li ki ten un fé fórti i ki ta poi interesi di otus na primeru lugar.

7. Ki bensons txeu di kes ki sta na sirvisu pa ténpu interu ta resebe?

⁷ Alguns na kongregason pode diziginadu pa ser misionáriu, pioneru spesial ô pioneru fíksu. Na verdadi, irmons ku irmans na mundu interu, disidi sirbi Jeová pa ténpu interu na trabadju di prega i faze disiplus. Asi, es ta konsigi djuda txeu algen bira disiplus di Kristu Jizus. Kes irmon ki sta na sirvisu pa ténpu interu kuazi ka ten txeu kuza material. Má, Jeová da-s un vida xeiu di bensons. (Mar. 10:29, 30) Nu gosta txeu di kes irmon ku irmans li, i nu ta agradese pamodi es ta faze párti di kongregason!

8. Pamodi ki tudu publikador di notísias sábi ten txeu valor pa Jeová?

⁸ Má, é sô kes irmon ki ten responsabilidadi ô kes ki sta na sirvisu pa ténpu interu ki ten un lugar na kongregason? Klaru ki nau! Kada publikador di notísia sábi é inportanti pa Deus i pa kongregason. (Rom. 10:15; 1 Cor. 3:6-9) Na verdadi, un di kes obijetivu más inportanti di kongregason é faze disiplus di Jizus Kristu. (Mat. 28:19, 20; 1 Tim. 2:4) Tudu kes algen ki ta prega djuntu ku kongregason, ta sforsa pa poi pregason na primeru lugar, ka ta nporta si es é batizadu ô nau. — Mat. 24:14.

9. Pamodi ki nos irmans na kongregason ten txeu valor?

⁹ Jeová ta da mudjeris un lugar inportanti  na kongregason. El ta da txeu valor pa kes mudjer kazadu, kes ki é mai, viúvas i kes irman soltera ki ta sirbi-l ku lialdadi. Bíblia ta pâpia di bons mudjer ki agrada Deus. Nu ta lenbra di es pamodi es dexa un bon izénplu. Es mostra sabedoria, fé, zelu i koraji. Tanbê, es éra algen ki gostaba di da i ki faze bons óbra. (Luc. 8:2, 3; Atos 16:14, 15 ; Rom. 16:3, 6; Fil. 4:3; Heb. 11:11, 31, 35) Nu ta agradese Jeová pamodi nu ten irmans na nos kongregason ki ta mostra kes kualidadi bunitu sima di kes mudjer!

10. Pamodi ki nu ta da txeu valor pa kes irmon di idadi?

¹⁰ Tanbê, nu ta fika kontenti pamodi nu ten txeu irmon di idadi na nos kongregason. Alguns kongregason, ten irmons ku irmans di idadi ki sirbi Jeová duránti ses vida interu. Pode ser ki otus prende verdadi ka dura li. Ka ta nporta si dja es ten txeu ténpu ta sirbi Jeová ô nau, nos irmons ki dja sta di idadi, talvês sta ta lida ku txeu prubléma di saúdi pamodi bedjisa. Kes prubléma li, ka ta dexa-s faze txeu kuza na kongregason i na pregason. Má simé, kes irmon di idadi ta faze kel ki es pode na pregason, i es ta uza tudu ses forsa pa nkoraja i trena otus! Tanbê, nu pode prende txeu ku ses spiriénsa di vida. Di sertéza, nos irmons di idadi é bunitu pa Jeová i pa nos. — Pro. 16:31.

11-12. Modi ki jóvens di bu kongregason sta ta da-u koraji?

¹¹ Pensa tanbê na nos jóvens. É ka fásil pa es, kria na un mundu governadu pa Satanás i se filozofias. (1 João 5:19 ) Má simé, nos tudu ta xinti koraji óras ki nu ta odja nos jóvens ta da komentáriu na runion, ta sai na pregason i ta difende ku koraji kes kuza ki es ta kridita na el. Jóvens, nhos ten un lugar spesial na kongregason di Jeová! — Sal. 8:2.

¹² Má, alguns di nos irmons ku irmans ta atxa difísil kridita ma es ten valor na  kongregason. Kuzê ki pode djuda kada un di nos xinti ma nu ten un lugar na kongregason? Nu ben odja.

13-14. Pamodi ki alguns ta atxa ma es ka ten valor na kongregason?

¹³ Odja kel sugundu lison ki nu ta prende ku ilustrason di Polu. El ta txoma atenson pa un prubléma ki txeu algen ten oji. Txeu algen ta atxa difísil kridita ma es ten valor na kongregason. Polu skrebe: ‘Si pé flaba: “Dja ki mi é ka mô, N ka ta faze párti di korpu”, é ka pamodi kel-li ki el ta dexaba di faze párti di korpu. I, si obidu flaba: “Dja ki mi é ka odju, N ka ta faze párti di korpu”, é ka pamodi kel-li ki el ta dexaba di faze párti di korpu.’ (1 Cor. 12:15, 16) Kuzê ki Polu krê inxinaba nos?

¹⁴ Si bu fika ta konpara bu kabésa ku otus na kongregason, bu pode ka odja valor ki bu ten. Alguns na kongregason pode ser bon na inxina, bon na organiza ô bon na konsola i nkoraja otus. Talvês, bu pode atxa ma nunka bu ka ta ser bon móda es. Kel-li ta mostra ma bo é umildi i ma bu ta seta bus limitason. (Fil. 2:3) Má toma kuidadu. Si tudu óra bu ta konpara bu kabésa ku otus na kongregason ki ten txeu kapasidadi, bu pode xinti dizanimadu. Sima Polu fla, bu pode ti xinti ma bu ka ta sirbi pa nada na kongregason. Kuzê ki pode djuda-u lida ku kes sentimentu li?

15. Sima sta na 1 Coríntios 12:4-11, kuzê ki nu meste sabe sobri kes don ki nu ten?

¹⁵ Pensa na kel-li: na ténpu di apóstlus, Jeová da alguns kriston don di faze milagris através di spritu santu. Má é ka tudu kristons ki resebe kes mésmu don. (Lé 1 Coríntios 12:4-11.) Jeová da-s kapasidadi diferenti, má kada kriston tinha txeu valor pa el. Oji, nu ka sta dadu más kes don di faze milagris através di spritu santu. Má kel prinsípiu inda ta  sirbi pa nos. Kada un di nos ten kapasidadi diferenti, má nos tudu ten txeu valor pa Jeová.

16. Ki konsedju di apóstlu Polu nu debe sigi?

¹⁶ Envês di konpara nos kabésa ku otus irmon, nu debe sigi kel konsedju di apóstlu Polu: ‘Kada un debe djobe pa kel ki el ta faze, asi el ta ten motivu di fika kontenti sô ku se kabésa, sen konpara ku otus algen.’ — Gál. 6:4.

17. Modi ki sigi konsedju di Polu ta djuda-nu?

¹⁷ Si nu sigi kel konsedju di Polu i nu djobe kel ki nu ta faze, nu pode kumesa ta odja ma nu ten kapasidadi ki otus ka ten. Pur izénplu, un ansion pode ka ser bon na faze diskursu, má talvês el é bon na faze disiplus. Ô pode ser ki el é ka mutu organizadu sima alguns ansion di se kongregason, má pode ser ki el é konxedu pa amor ki el ta mostra pa otus i el é un algen ki irmons ta xinti avontádi pa pidi konsedju ku bazi na Bíblia. Ô talvês el é konxedu pa algen ki gosta txeu di resebe otus. (Heb. 13:2, 16) Óras ki nu ta odja klaru kes pontu fórti ki nu ten, nu ta atxa motivu pa xinti dretu ku nos kabésa. Tanbê, nu ta odja ma nu pode faze txeu kuza pa kongregason. I kel-li ta djuda-nu ka xinti invéja di nos irmons ki ten kapasidadi diferenti di kes di nos.

18. Kuzê ki pode djuda-nu midjora nos manera di faze pregason?

¹⁸ Ka ta nporta kal ki é nos lugar na kongregason, nos tudu debe krê midjora nos sirvisu i nos kapasidadi. Pa djuda-nu midjora, Jeová ta uza se organizason pa trena-nu dretu. Pur izénplu, na runion di meiu di simana, nu ta resebe txeu orientason pa nu pode midjora nos manera di faze pregason. Bu sta ta sforsa pa faze tudu kel ki bu sta prende na kel runion?

19. Kuzê ki pode djuda-u bai pa Skóla pa Pregadoris di Reinu?

¹⁹ Otu prugrama ki ta trena-nu dretu é Skóla pa Pregadoris di Reinu. Kel skóla li sta abértu pa tudu irmons ku irmans ki sta na sirvisu pa ténpu interu i ki ten 23 ti 65 anu. Talvês, bu ta atxa ma nunka bu ka ta konsigi bai kel skóla. Má, envês di bu faze un lista di kes kuza ki pode ka dexa-u bai kel skóla, pamodi ki bu ka ta faze un lista di kes kuza ki ta pô-u krê bai? Dipôs, faze un planu ki ta djuda-u ten kes kuza ki bu meste pa bu pode bai kel skóla. Ku ajuda di Jeová i ku txeu sforsu, bu pode konsigi faze un kuza ki bu ta atxa ma bu ka ta pode faze.

20. Kuzê ki nu pode prende na Romanos 12:6-8 ?

²⁰ Kel tirseru lison ki nu pode prende di kel ilustrason di Polu sta na Romanos 12:6-8. (Lé.) Na kes versíklu li, Polu torna mostra ma kes algen na kongregason ten kapasidadis diferenti. Má gósi, el mostra ma nu debe uza kalker kapasidadi ki nu ten pa djuda kongregason bira más fórti.

21-22. Kuzê ki nu ta prende ku izénplus di Robertu i Felice ?

²¹ Odja izénplu di un irmon ki nu pode txoma di Robertu. Dipôs ki el sirbi na un país stranjeru, el diziginadu pa trabadja na Betel di se país. Irmons fla-l ma el ka mudadu di diziginason pamodi el faze algun kuza mariadu. Má simé, Robertu fla: “Duránti alguns mês, N staba tristi pamodi N fika ta pensa ma N fadja na nha diziginason. Alguns bês N txiga ti di  pensa na sai di Betel.” Modi ki el torna xinti alegria? Un ansion lenbra-l ma kada diziginason ki Jeová ta da-nu antis, ta sirbi pa pripara-nu pa kel diziginason ki nu ten gósi. Robertu da kónta ma el tinha ki paraba di vive di pasadu i kumesa ta konsentra na kel ki el podia fazeba gósi.

²² Irmon Felice Episcopo pasa pa un prubléma sima kel-li. El ku se mudjer bai skóla di Jiliádi na anu 1956 i el éra enkaregadu di grupu di kongregason na Bulívia. Na anu 1964, es tevi un fidju. Felice fla: “Foi difísil dimás pa nos dexa nos diziginason ki nu gostaba txeu. N ten ki rekonhese ma N pasa kuazi un anu ta lamenta. Má ku ajuda di Jeová, N muda nha manera di pensa i N konsentra na nha novu responsabilidadi ki éra ser pai.” Bu ta xinti sima Robertu ô Felice? Bu ta xinti dizanimadu pamodi gósi bu ka tene kes priviléjiu ki bu tinha antis? Si bu ta xinti si, muda bu manera di pensa i konsentra na kuzê ki bu pode faze gósi pa sirbi Jeová i bus irmon. Mante okupadu i uza bus kapasidadi pa djuda otus. Di kel manera li, bu ta xinti más alegria i bu ta djuda kongregason fika más fórti.

23. Nu debe tra ténpu pa faze kuzê, i kuzê ki nu ta ben odja na kel otu studu?

²³ Kada un di nos ten txeu valor pa Jeová. El krê pa nu faze párti di se família. Si nu tra ténpu pa pensa na kuzê ki nu pode faze pa da nos irmons koraji i dipôs nu sforsa pa faze kel-li, nu ta xinti ma nu ten un lugar na kongregason! Má i kes otu irmon na kongregason? Modi ki nu pode mostra ma nu ta da-s valor? Na kel otu studu, nu ta ben pâpia di kel asuntu inportanti li.