1-2. Kuzê ki nu sta ben odja na kel studu li?

MODI ki bu ta reajiba si bu ka resebe un kuza na óra ki bu sta speraba? Bu ta fikaba xatiadu? Talvês bu ta xintiba sima kel ki Provérbios 13:12 ta fla: ‘Un speransa ki dimora pa realiza, ta poi korason ta fika duenti’. Má i si bu daba kónta ma kel kuza ki bu sta speraba ka txiga pamodi un bon razon? Talvês kel-li ta poba bo ta speraba ku más paxénxa.

² Na kel studu li, nu sta ben odja kuatu prinsípiu di Bíblia ki pode djuda-nu ‘spéra ku paxénxa’. (Miq. 7:7) Tanbê nu sta ben odja dôs situason ki ta iziji pa nu spéra ku paxénxa ti ki Jeová aji. Na fin, nu ta ben odja kes benson ki Jeová promete pa kes ki sta dispostu na spéra pa El.

3. Kuzê ki Provérbios 13:11 ta inxina-nu?

³ Provérbios 13:11 ta inxina-nu pamodi ki nu debe ten paxénxa. El ta fla: ‘Rikéza ki algen konsigi faxi, ta bira poku, má rikéza di kenha ki ta djunta-l poku-poku, ta omenta.’ Kuzê ki kel testu li ta inxina-nu? Un algen ki ten sabedoria ta faze kuzas ku paxénxa. El ta da un pasu di kada bês i kel-li ta traze bons rezultadu.

4. Ki prinsípiu nu ta atxa na Provérbios 4:18?

⁴ Provérbios 4:18 ta fla: ‘Kaminhu di kes algen justu é sima lus ki ta límia di palmanhan, ki ta ba ta fika más klaru ti ki lus di dia fika konplétu.’ Kes palavra li ten aver ku manera ki Jeová ta djuda se sérvus ntende kal ki é se vontadi. Jeová ta faze kel-li poku-poku. Má kel testu li tanbê, ta djuda-nu ntende modi ki un sérvu di Jeová ta  faze mudansas na vida pa el pode bira más amigu di Jeová. Prugrésu spritual ka ta kontise di un óra pa kel otu. É un kuza ki ta leba ténpu. Nu meste studa Bíblia ku kuidadu i aplika kes kuza ki nu ta prende na el i na organizason di Jeová. Asi, poku-poku nu ta konsigi imita kes kualidadi di Kristu. Tanbê nu ta konxe Deus kada bês más midjór. Nu ben odja un ilustrason ki Jizus faze pa splika kel asuntu li.

5. Ki ilustrason Jizus faze?

⁵ Jizus faze un ilustrason pa splika ma mensaji di Reinu é sima un simenti pikinoti ki ta kria poku-poku na korason di kes algen ki ta ama kel ki é dretu. El fla: ‘Kes simenti nase i kria grandi, nbóra el [kel ómi ki símia] ka sabia modi ki kontise. Kel txon, el sô, ta da frutu poku-poku. Primeru ta da pé, dipôs spiga i na fin gran madur na spiga.’ (Mar. 4:27, 28) Kuzê ki Jizus krê flaba ku kel-li? Jizus staba ta splika ma sima un planta ta kria poku-poku, tanbê un algen ki ta seta mensaji di Reinu ta faze prugrésu spritual poku-poku. Pur izénplu, óras ki un studanti di Bíblia ta kumesa ta bira amigu di Jeová, nu ta konsigi odja kes mudansa ki el sta faze na vida poku-poku. (Efé. 4:22-24) Má é klaru ki nu ka debe skese ma é Jeová ki ta poi kel simenti ta kria. — 1 Cor. 3:7.

6-7. Kuzê ki nu ta prende di manera ki Jeová kria Téra?

⁶ Jeová faze tudu kuza ku paxénxa. Pa kel-li, el uza kel ténpu ki mesteba. El faze kel-li pa el pode da glória pa se nómi i pa djuda otus algen. Pur izénplu, odja modi ki Jeová pripara Téra poku-poku pa nos.

⁷ Bíblia ta fla modi ki Jeová faze Téra. El pô-l ‘medida’, el pô-l ‘se bazi finkadu’ i el pô-l se ‘pédra di kantu’. (Jó 38:5, 6) I ti el tra un ténpu pa el djobe tudu kel ki  el faze. (Gén. 1:10, 12) Bu ta konsigi imajina modi ki anjus xinti sima es ba ta odja kes kuza ki Jeová staba ta kria? Talvês es fika uma kontenti. É pur isu ki es kumesa ta ‘grita di lovor’. (Jó 38:7) Kuzê ki nu ta prende? Leba milharis di anu pa Jeová tirmina di faze se kriason. Má bale péna faze tudu kuza poku-poku i ku kuidadu. Kantu el para pa el odja tudu kes kuza ki el faze, Jeová odja ma tudu staba ‘rei di bon.’ — Gén. 1:31.

8. Kuzê ki nu sta ben odja gósi?

⁸ Sima dja nu odja na kes izénplu ki nu pâpia di es, nu pode atxa txeu prinsípiu na Palavra di Deus ki ta mostra ma é inportanti nu ten paxénxa. Gósi, nu sta ben odja dôs situason ki nu debe sta dispostu na spéra pa Jeová.

9. Kal ki é un di kes situason ki nu ta meste spéra pa Jeová aji?

⁹ Talvês nu ten ki spéra pa Jeová responde nos orason. Alvês, nu ta faze orason i nu ta pidi pa Jeová da-nu forsa pa nu lida ku un difikuldadi ô pa el djuda-nu vense un frakéza. Má pode ser ki nu ta atxa ma Jeová sta dura ki responde nos orason. Pamodi ki Jeová ka ta responde lógu tudu kes orason ki nu ta faze?

10. Pamodi ki nu debe spéra ku paxénxa pa Jeová responde nos orason?

¹⁰ Jeová ta obi ku atenson óras ki nu ta faze orason. (Sal. 65:2) Pa el, nos orason di korason é un próva di nos fé. (Heb. 11:6) Óras ki nu ta faze orason, Jeová ta presta atenson pa odja si nu sta ora di korason. I el ta odja si nu sta ta sforsa pa faze se vontadi i aji di akordu ku kel ki nu pidi. (1 João 3:22) Pur isu, óras ki nu ta faze orason ta pidi Jeová pa djuda-nu vense un ábitu mariadu ô un frakéza, talvês nu meste ten paxénxa i faze txeu sforsu pa faze kes mudansa. Jizus djuda-nu ntende ma alguns di nos orason ka ta respondedu lógu ki nu faze-s. El insentiva-nu: ‘Nhos kontinua ta pidi, i nhos ta dadu; nhos kontinua ta djobe, i nhos ta atxa; nhos kontinua ta konku, i nhos ta abridu pórta; pamodi tudu kel ki ta pidi, ta dadu; i tudu kel ki ta djobe, ta atxa; i tudu kel ki ta konku, ta abridu pórta.’ (Mat. 7:7, 8) Óras ki nu ta sigi kel konsedju di ‘kontinua ta faze orason’, nu pode ten sertéza ma nos Pai na Séu ta obi i el ta responde nos orason. — Col. 4:2.

11. Modi ki Hebreus 4:16, pode djuda-nu óras ki ta parse ma Jeová sta dura ki responde nos orason?

¹¹ Óras ki ta parse ma Jeová sta dura ki responde nos orason, nu debe lenbra ma Jeová promete ma el ta responde-nu ‘na ténpu sértu.’ (Lé Hebreus 4:16.) Nton, nunka nu ka debe kulpa Jeová si el ka responde nos orason na kel óra ki nu sta speraba. Pur izénplu, txeu algen dja dura ta faze orason pa Reinu di Deus ben i pa el kaba ku kel mundu li. Ti mésmu Jizus inxina-nu pa nu ora sobri kel-li. (Mat. 6:10) Má ta sérba un tolisi nu perde fé na Jeová sô pamodi fin ka txiga na kel ténpu ki nu sta speraba! (Hab. 2:3; Mat. 24:44) Midjór kuza ki nu debe faze, é spéra pa Jeová i faze orason ku kunfiansa ma el ta responde nos orason. Fin di kel mundu li ta txiga na óra sértu i na kel midjór momentu pa tudu algen, pamodi é Jeová ki marka ‘dia i óra’ pa el kontise. — Mat. 24:36; 2 Ped. 3:15.

12. Na ki situason pode ser más difísil ten paxénxa?

 ¹² Talvês nu meste ten paxénxa timenti nu sta spéra pa fazedu justisa. Na kel mundu li, un algen ta tratadu mariadu sô pamodi el é ómi ô mudjer ô pamodi el é di rasa, kultura, tribu i nason diferenti. Otus algen ta maltratadu, pamodi es ten algun difisénsia ô un prubléma na menti. Txeu Tistimunha di Jeová ta sufri injustisa pamodi kes kuza ki es ta kridita na el. Óras ki nu ta sufri kes injustisa li, nu debe lenbra di kuzê ki Jizus fla: ‘Ken ki aguenta ti fin, ta salva.’ (Mat. 24:13) Má kuzê ki bu debe faze, si bu da kónta ma un algen di kongregason faze un pekadu gravi? Dipôs ki ansions fika ta sabe di kuzê ki kontise, bu ta dexa kel asuntu na ses mô? Bu ta spéra ku paxénxa ti ki es rezolve kel asuntu sima Jeová ta krê? Na kes tipu di situason li, ten alguns kuza ki ansions ta faze. Nu ben odja é kuzê.

13. Kuzê ki Jeová ta spéra pa ansions faze óras ki kontise un pekadu gravi?

¹³ Óras ki ansions fika ta sabe ma un algen na kongregason faze un pekadu gravi, es ta faze orason pa es pidi ‘kel sabedoria ki ta ben di riba’, asi pa es odja kel situason di mésmu manera ki Jeová ta odja-l. (Tia. 3:17) Ses obijetivu é odja si es ta konsigi djuda kel algen ki peka ‘volta di se kaminhu mariadu’. (Tia. 5:19, 20) Tanbê es krê faze di tudu pa proteje kongregason i konsola kes ki sufri algun injustisa. (2 Cor. 1:3, 4) Óras ki ansions ta lida ku un pekadu gravi, primeru es ta tenta sabe tudu kuza. I kel-li ta leba algun ténpu. Es ta faze orason i ku kuidadu es ta da konsedju ku bazi na Bíblia i es ta disiplina na ‘medida sértu’ kel algen ki peka. (Jer. 30:11) Nbóra ansions ka ta krê dura ki aji, tanbê es ka ta toma ninhun disizon na présa. Óras ki ansions ta kuida di un asuntu sima debe ser, ta djuda tudu algen na kongregason. Má sikrê kes ansion kuida di un asuntu di midjór manera, un algen ki fika prujudikadu pamodi kel algen ki peka, pode kontinua ta xinti maguadu. Kel-li sta kontise ku bo? Kuzê ki pode djuda-u ka xinti si?

14. Ki izénplu di Bíblia pode konsola-u si bu sta xinti maguadu pamodi un irmon?

 ¹⁴ Dja bu kustuma fazedu un grandi injustisa, talvês ti mésmu pa un irman ô un irmon di kongregason? Palavra di Deus ten bons izénplu ki ta inxina-nu modi ki nu ta spéra pa Jeová koriji kes kuza mariadu. Pur izénplu, nbóra irmons di Juzé faze-l injustisa, el ka dexa pekadu di se irmons pô-l ta bira un algen xeiu di rankor. Má envês di kel-li, Juzé kontinua ta faze se midjór na se sirvisu pa Jeová. El tevi paxénxa i el aguenta firmi. Pur isu, Jeová abensua-l txeu. (Gén. 39:21) Ténpu ba ta pasa, Juzé konsigi púrdua se irmons i el odja modi ki Jeová abensua-l. (Gén. 45:5) Sima Juzé, nu ta fika konsoladu óras ki nu ta bira nos amizadi ku Jeová más fórti i nu ta dexa Jeová koriji kes injustisa ki nu ta sufri, na ténpu sértu. — Sal. 7:17; 73:28.

15. Kuzê ki djuda un irman ka liga un kuza mariadu ki el fazedu?

¹⁵ É klaru ki nen tudu injustisa ki nu ta sufri é ka gravi sima kes di Juzé. Má di kalker manera, óras ki nu ta maltratadu ta due-nu. Ka ta nporta si nu ten un prubléma ku un irmon ô ku un algen ki ka ta sirbi Jeová, midjór kuza ki nu debe faze é sigi prinsípius di Bíblia. (Fil. 2:3, 4) Odja kuzê ki kontise ku un irman. El diskubri ma un koléga di trabadju staba ta pâpia mal di el. Envês di el aji ku kabésa kenti, el para i el pensa na izénplu di Jizus. Jizus ka ta ofendeba otus algen óras ki es ta insultaba el. (1 Ped. 2:21, 23) Izénplu di Jizus djuda kel irman ka liga kuzê ki kontise. Dipôs, kel irman ben diskubri ma se koléga di trabadju staba ku un prubléma gravi di saúdi i el sta pasaba pa txeu preokupason. Kel irman odja ma se koléga di trabadju ka krê maguaba el. Pur isu, el fika txeu kontenti di ten paxénxa i el xinti pas déntu di el.

16. Si bu sta sufri pamodi un injustisa, kuzê ki pode konsola-u? (1 Pedro 3:12)

¹⁶ Si bu sta sufri pamodi un injustisa ô pamodi kalker otu kuza, lenbra ma ‘Jeová sta pértu di kes ki tene korason maguadu’.  (Sal. 34:18) Bu pode ten sertéza ma Jeová ta ama-u pamodi bu sta mostra paxénxa i bu sta lansa bu karga riba di el. (Sal. 55:22) El é Juís di Téra interu. Jeová ta da kónta di tudu kuza. (Lé 1 Pedro 3:12.) Pur isu, óras ki bu sta pasa pa un prubléma ki bu ka ta konsigi rezolve bo sô, midjór kuza ki bu pode faze é spéra pa Jeová aji.

17. Kuzê ki Jeová ta promete-nu na Isaías 30:18?

¹⁷ Ka ta dura, nos Pai na Séu ta ben da-nu txeu benson através di se Reinu. Isaías 30:18 ta fla: ‘Má Jeová sta spéra ku paxénxa pa el djuda nhos, i el ta ben labanta pa mostra nhos mizerikórdia. Pamodi Jeová é un Deus di justisa. Filís é tudu kes ki ta fika ta spera-l.’ Kes ki kontinua ta spéra pa Jeová ta ben resebe txeu benson gósi i na kel mundu novu.

18. Ki bensons sta ta spera-nu?

¹⁸ Óras ki povu di Deus entra na kel mundu novu, nunka más es ka ta ben lida ku kes preokupason i dizafiu ki es ta pasa pa el oji. Ninhun injustisa ku dór ka ta ben ten más. (Apo. 21:4) Nu ka ta ben fika txeu preokupadu ta spéra pa kes kuza ki nu meste. Nu ta ben ten mutu más di kel ki nu ta meste. (Sal. 72:16; Isa. 54:13) Nu ta ben resebe txeu benson di Jeová!

19. Pa kuzê ki Jeová sta pripara-nu poku-poku?

¹⁹ Timenti kel dia ka txiga, kada bês ki Jeová djuda-nu vense un ábitu mariadu ô dizenvolve un kualidadi ki el gosta, na verdadi el sta ta pripara-nu pa vive na kel mundu novu. Pur isu, ka bu dizanima nen ka bu dizisti. Nu ta ben ten un futuru rei di sábi. Nton, nu kontinua ta spéra ku paxénxa pa Jeová konpleta se trabadju!